Igama LikaJehova—Lokho Elikushoyo KuJesu

1-2. (a) Yini uJesu ayenza ngobusuku bangaphambi kokuba abulawe? (b) Yimiphi imibuzo esizoxoxa ngayo kulesi sihloko?

KWAKUNGULWESINE kusihlwa, ngo-Nisan 14, ngo-33 C.E. futhi sase sisondele isikhathi sokuba uJesu akhashelwe, ahlulelwe, agwetshwe, ahlushwe futhi abulawe. Wayeqeda kuba nesidlo esikhethekile nabaphostoli bakhe abathembekile ekamelweni eliphezulu. Ngemva kwaleso sidlo, uJesu wavalelisa abaphostoli bakhe ngamazwi akhuthazayo. Ngaphambi nje kokuba bonke bahambe ekamelweni eliphezulu, uJesu wama kancane wenza umthandazo obaluleke kakhulu. Umphostoli uJohane wawubhala phansi lowo mthandazo; utholakala kuJohane isahluko 17.

² Yini umthandazo kaJesu ositshela yona ngalokho okwakumkhathaza ngaleso sikhathi? Lowo mthandazo ubonisa kanjani ukuthi yini eyayibalulekile kuye phakathi nenkonzo yakhe ngesikhathi elapha emhlabeni? Ake sixoxe ngezimpendulo zale mibuzo.

“NGIBAZISILE IGAMA LAKHO”

3. Yini uJesu ayisho ngegama likaJehova, futhi wayesho ukuthini? (Johane 17:6, 26)

³ Emthandazweni wakhe, uJesu wathi: “Ngibazisile igama lakho.” Empeleni, wakusho kabili ukuthi wayebazisile abafundi bakhe igama likaJehova. (Funda uJohane 17:6, 26.) Wayesho ukuthini? Ingabe wayebatshele igama abangalazi? Abafundi bakaJesu babengamaJuda, ngakho base belazi kakade igama likaNkulunkulu elithi Jehova. Lelo gama lalivela izikhathi eziyizinkulungwane emiBhalweni YesiHebheru. Ngakho uJesu wayengabhekiseli egameni likaNkulunkulu ngokwalo; kunalokho, wayebhekisela kulokho okumelelwa yilelo gama. UJesu wayenze ukuba abafundi bakhe bamazi uMnikazi wegama elithi Jehova, kuhlanganise nezinjongo zaKhe, izinto azenzile nezimfanelo zakhe futhi lokho wayekwenze ngendlela omunye umuntu ayengeke akwazi ukukwenza ngayo.

4-5. (a) Singakufanekisa kanjani lokho okushiwo ukwazi igama lomuntu? (b) Abafundi bakaJesu balazi ngayiphi indlela igama likaJehova?

⁴ Ukuze sifanekise, ake sithi kunomdala ebandleni okulo okuthiwa uDavid futhi ungudokotela ohlinzayo. Usunesikhathi eside umazi lowo mzalwane. Kodwa ngelinye ilanga kube sekwenzeka into ebeka ukuphila kwakho engozini futhi udinga udokotela ozokusiza. Uphuthunyiswa esibhedlela okusebenza kuso lo mzalwane futhi ube esesebenzisa ulwazi analo kwezokwelapha ukuze asindise ukuphila kwakho. Manje usumthanda nakakhulu lo mzalwane futhi lapho uzwa igama lakhe ucabanga ngalokho akwenzele kona! UDavid akaseyena nje umdala omaziyo kuphela; uphinde abe udokotela ohlinzayo osindise ukuphila kwakho.

⁵ Ngendlela efanayo, abafundi bakaJesu base belazi kakade igama likaJehova. Kodwa lelo gama labaluleka nakakhulu kubo ngenxa yenkonzo kaJesu. Kungani sisho kanjalo? Kungenxa yokuthi uJesu wabulingisa ngokuphelele ubuntu bukaBaba wakhe kukho konke ayekusho nayekwenza. Ngakho abaphostoli bakhe ‘bamazi’ kangcono uJehova ngokulalela indlela uJesu ayefundisa ngayo nangokubuka indlela ayephatha ngayo abantu.—Joh. 14:9; 17:3.

‘IGAMA LAKHO ENGIBAMBULELE LONA’

6. Kungamuphi umqondo uJehova ayembulele uJesu igama laKhe? (Johane 17:​11, 12)

⁶ Emthandazweni wakhe, uJesu wathandazela abafundi bakhe, wathi: “Babheke ngenxa yegama lakho engibambulele lona.” (Funda uJohane 17:11, 12.) Ingabe lokho kusho ukuthi uJesu manje wayesezobizwa ngokuthi uJehova? Cha. Phawula ukuthi emthandazweni wakhe, lapho uJesu ekhuluma ngegama likaJehova wathi ‘igama lakho.’ Ngakho igama likaJehova alizange libe igama likaJesu. Pho wayesho ukuthini uJesu lapho ethi wayebambulele igama likaNkulunkulu? Okokuqala, uJesu wayengummeleli noMkhulumeli kaJehova. Weza egameni likaBaba wakhe wenza nezimangaliso ngalelo gama. (Joh. 5:43; 10:25) Okwesibili, igama likaJesu lisho ukuthi “UJehova Uyinsindiso.” Ngakho incazelo yegama likaJesu ihlanganisa negama likaJehova.

7. Kungani uJesu ayengaba umkhulumeli kaJehova? Nikeza isibonelo.

⁷ Ukuze siqonde ukuthi kungani uJesu ayengaba umkhulumeli kaJehova, cabanga ngalesi sibonelo. Umbusi angase athume umuntu othile ukuba abe umkhulumeli wakhe. Ngakho lapho lowo muntu ekhuluma unegunya elilingana nelombusi. Ngendlela efanayo, uJesu wayemelela uJehova futhi wakhuluma nabantu egameni laKhe.—Math. 21:9; Luka 13:35.

8. Igama likaJehova “lalikuJesu” ngamuphi umqondo ngaphambi kokuba eze emhlabeni? (Eksodusi 23:20, 21)

⁸ Njengoba enguLizwi, uJesu wayenguMkhulumeli kaJehova ngokudlulisela ulwazi neziqondiso kwamanye amadodana kaNkulunkulu omoya nakubantu. (Joh. 1:1-3) Cishe uJesu wayeyingelosi uJehova ayithuma ukuba iyonakekela ama-Israyeli ngesikhathi soFuduko. Ngesikhathi etshela ama-Israyeli ukuba alalele leyo ngelosi, uJehova wathi: “Ngoba igama lami likuyo.”a (Funda u-Eksodusi 23:20, 21.) Igama likaJehova “lalikuJesu” ngomqondo wokuthi wayemelela uJehova futhi ngokuyinhloko nguye osekela nongcwelisa igama likaBaba wakhe.

“BABA, KHAZIMULISA IGAMA LAKHO”

9. Lalibaluleke kangakanani igama likaJehova kuJesu? Chaza.

⁹ Njengoba sesixoxile, ngisho nangaphambi kokuba uJesu eze emhlabeni, igama likaJehova lalibaluleke kakhulu kuye. Yingakho nje igama likaJehova lalihlobene eduze nayo yonke into uJesu ayenza ngesikhathi elapha emhlabeni! Ngasekupheleni kwenkonzo yakhe, uJesu wathi: “Baba, khazimulisa igama lakho.” Ngokushesha, uBaba wakhe waphendula ngezwi elikhulu esezulwini, wathi: “Ngilikhazimulisile futhi ngizophinde ngilikhazimulise.”—Joh. 12:28.

10-11. (a) UJesu walikhazimulisa kanjani igama likaJehova? (Bheka nesithombe.) (b) Kungani kudingeka lingcweliswe futhi lilwelwe igama likaJehova?

¹⁰ UJesu naye walikhazimulisa igama likaBaba wakhe. Kanjani? Enye indlela akwenza ngayo lokho ukuveza izimfanelo zikaBaba wakhe ezimangalisayo nezinto azenzela abanye. Nokho, kuningi okwakuhilelekile ekukhazimuliseni lelo gama. Igama likaJehova kwakudingeka lingcweliswe futhi kulwelwe idumela lakhe.b UJesu wabonisa ukuthi kwakubaluleke kangakanani lokho lapho efundisa abalandeli bakhe umthandazo oyisibonelo. Wathi: “Baba wethu osemazulwini, malingcweliswe igama lakho.”—Math. 6:9.

¹¹ Kungani kudingeka lingcweliswe futhi lilwelwe igama likaJehova? Kungenxa yokuthi ensimini yase-Edene, uSathane uDeveli wahlambalaza futhi wanyundela uJehova uNkulunkulu. USathane wayethi uJehova ungumqambimanga futhi ubagodlela okuhle o-Adamu no-Eva. (Gen. 3:1-5) Ngokwenza kanjalo, uSathane wayeqonde nokuthi indlela uJehova enza ngayo izinto ayilungile. Izinsolo zamanga zikaSathane zalihlasela ngokuqondile idumela likaJehova noma igama lakhe. Kamuva, ngesikhathi sikaJobe, uSathane wathi labo abakhonza uJehova bamkhonza kuphela ngoba befuna okuthile kuye. Lowo mnyundeli waphinde wathi akekho umuntu omthanda ngempela uJehova kangangokuba angaqhubeka emkhonza lapho ebhekene novivinyo. (Jobe 1:9-11; 2:4) Kwakudingeka isikhathi ukuze kubonakale ukuthi ubani ongumqambimanga, phakathi kukaJehova noSathane.

“NGINIKELA UKUPHILA KWAMI”

12. Yini uJesu ayezimisele ukuyenza ngenxa yokuthi wayethanda igama likaJehova?

¹² Ngenxa yokuthi wayemthanda uJehova, uJesu wayefuna ukwenza konke angakwenza ukuze angcwelise futhi alwele igama likaJehova. UJesu wathi: “Nginikela ukuphila kwami.” (Joh. 10:17, 18) Ngempela, wayezimisele ngisho nokufa ngenxa yegama likaJehova.c Abantu bokuqala ababili ababengenasono, u-Adamu no-Eva, bajikela uJehova, baba ngasohlangothini lukaSathane. Ngokuphambene nalokho, uJesu wayezimisele ukuza emhlabeni abonise ukuthi uyamthanda uJehova. Lokho wakwenza ngokulalela uJehova kukho konke ayekwenza nayekusho. (Heb. 4:15; 5:7-10) Wahlala eqotho ekuphileni kwakhe, kwaze kwaba yilapho efa esigxotsheni sokuhlushwa. (Heb. 12:2) Ngaleyo ndlela, wabonisa ukuthi uyamthanda uJehova negama laKhe.

13. Kungani uJesu ayesesimweni esikahle kakhulu sokufakazela ukuthi uSathane ungumqambimanga? (Bheka nesithombe.)

¹³ Indlela uJesu ayephila ngayo yabonisa ngokucacile ukuthi nguSathane ongumqambimanga, hhayi uJehova! (Joh. 8:44) UJesu wayemazi kangcono uJehova ukwedlula noma yimuphi omunye umuntu owake waphila. Ukube ezinye zezinsolo uSathane ayezisho ngoJehova zaziyiqiniso, uJesu wayeyokwazi ngalokho. Kodwa uJesu wama waqina ekulweleni idumela likaJehova noma igama lakhe. Ngisho nalapho kwakubonakala sengathi uJehova wayemlahlile, uJesu wayezimisele ukufa kunokuba ajikele uBaba wakhe onothando.—Math. 27:46.d

“NGIWUQEDILE UMSEBENZI ONGINIKE WONA”

14. UJehova wamvuza kanjani uJesu ngenxa yokwethembeka kwakhe?

¹⁴ Emthandazweni awenza ngobusuku bangaphambi kokuba afe, uJesu wathi: “Ngiwuqedile umsebenzi onginike wona ukuba ngiwenze.” Wayemethemba uJehova ukuthi wayezomvuza ngenxa yokwethembeka kwakhe. (Joh. 17:4, 5) UJesu akazange azisole ngokwethemba uBaba wakhe. UJehova akamvumelanga ukuba ahlale ethuneni. (IzE. 2:23, 24) Wavusa uJesu, wamnika nesikhundla esiphezulu ezulwini. (Fil. 2:8, 9) Ekugcineni, uJesu waqala ukubusa njengeNkosi yoMbuso kaNkulunkulu. Yini eyayiyofezwa yilowo Mbuso? Ingxenye yesibili yomthandazo oyisibonelo iyasitshela: “UMbuso wakho mawuze. Intando yakho [Jehova] mayenzeke nasemhlabeni njengasezulwini.”—Math. 6:10.

15. Yini enye eyokwenziwa uJesu?

¹⁵ Maduze esikhathini esizayo, uJesu uyolwa nezitha zikaNkulunkulu, abhubhise abantu ababi e-Armagedoni. (IsAm. 16:14, 16; 19:11-16) Ngokushesha ngemva kwalokho, uyophonsa uSathane “kwalasha,” lapho ayovalelwa khona angakwazi kwenza lutho. (IsAm. 20:1-3) UJesu uyokwenza abantu baphinde babe nokuthula, aqede nesono kubantu phakathi nokuBusa kwakhe Kweminyaka Eyinkulungwane. Uyovusa abafile. Uyokwenza wonke umhlaba ube yipharadesi. Injongo kaJehova iyofezeka!—IsAm. 21:1-4.

16. Kuyoba njani ukuphila ngemva kokuBusa Kweminyaka Eyinkulungwane?

¹⁶ Yini esingalindela ukuba yenzeke ekupheleni kokuBusa Kweminyaka Eyinkulungwane? Abantu bayobe bengasenaso isono. Abantu ngeke kusadingeka bacele ukuba bathethelelwe izono zabo ngesisekelo sesihlengo; ngeke badinge ngisho umlamuleli noma umpristi. ‘Isitha sokugcina, [esabangelwa u-Adamu] ukufa, [kuyobe] sekwenziwe ize.’ Amathuna ayobe engenamuntu. Abantu abafile bayobe sebevusiwe. Wonke umuntu uyobe engenaso isono.—1 Kor. 15:25, 26.

17-18. (a) Yini eyokwenzeka ekupheleni kokuBusa Kweminyaka Eyinkulungwane? (b) Yini uJesu ayoyenza lapho isikhathi sokubusa kwakhe siphela? (1 Korinte 15:24, 28) (Bheka nesithombe.)

¹⁷ Yini enye eyokwenzeka ekupheleni kokuBusa Kweminyaka Eyinkulungwane? Ngaleso sikhathi kuyokwenzeka into ekhetheke ngempela. Impikiswano ephathelene nokungcweliswa kwegama likaJehova iyophela. Kanjani? Ensimini yase-Edene, uSathane wathi uJehova ungumqambimanga futhi akababusi ngothando abantu. Kusukela ngaleso sikhathi, igama lakhe liye langcweliswa ngokuphindaphindiwe yilabo abamdumisayo nabamhloniphayo. Ngakho ekupheleni kokuBusa Kweminyaka Eyinkulungwane, idumela likaJehova liyolwelwa ngokuphelele. Uyobe esekwenze kwacaca bha ukuthi unguBaba osezulwini onothando.

¹⁸ Ekugcineni wonke umuntu uyokwazi ukuthi zonke izinto ezashiwo uSathane ngoJehova zingamanga. Yini uJesu ayoyenza lapho isikhathi sokubusa kwakhe siphela? Ingabe uyolingisa uSathane avukele uJehova? Cha! (Funda eyoku-1 Korinte 15:24, 28.) UJesu uyobuyisela uMbuso kuBaba wakhe. Uyozithoba ngaphansi kokubusa kukaJehova. Ngempela, ngokungafani noSathane, uJesu uzimisele ukudela konke ngenxa yothando analo ngoJehova. Ekugcineni, lapho uSathane esebhujisiwe, igama likaJehova liyobe selingcweliswe futhi lalwelwa ngokuphelele.

19. Lisho ukuthini igama likaJehova kuJesu?

¹⁹ Akumangazi ukuthi uJehova wayezimisele ukunika uJesu igama laKhe! UJesu uzibonisile ukuthi ungummeleli kaBaba wakhe okahle kakhulu. Pho, lisho ukuthini igama likaJehova kuJesu? Liyikho konke kuye. Wayezimisele ukufa ngenxa yalelo gama futhi uzimisele ukubuyisela zonke izinto kuJehova ekupheleni kokuBusa Kweminyaka Eyinkulungwane. Singasilingisa kanjani isibonelo sikaJesu? Sizoxoxa ngempendulo yalowo mbuzo esihlokweni esilandelayo.