Thola Induduzo KuJehova

1. Chaza ukuthi sasinjani isimo samaJuda ayedingisiwe.

AWUCABANGE indlela okungenzeka ayezizwa ngayo amaJuda ayethunjwe eBhabhiloni. Ayebone izwe lawo libhujiswa. Ngenxa yezono zawo nezokhokho bawo, asuswa emizini yawo ayiswa kwelinye izwe. (2 IziKr. 36:15, 16, 20, 21) Kuyavunywa, eBhabhiloni abadingisiwe babenayo inkululeko ethile yokuphila ukuphila okuvamile. (Jer. 29:4-7) Noma kunjalo, ukuphila kwakungelula futhi ngokuqinisekile babengaphili ukuphila ababekufisa. Babezizwa kanjani ngesimo sabo? Nakhu okwashiwo omunye owayedingisiwe othembekile: “Sahlala ngasemifuleni yaseBhabhiloni. Sakhala lapho sikhumbula iZiyoni.” (IHu. 137:1) Abadingisiwe ababecindezelekile babedinga induduzo, kodwa babengayithola kuphi?

2-3. (a) Yini uJehova ayenzela amaJuda ayedingisiwe? (b) Sizoxoxa ngani kulesi sihloko?

² UJehova ‘unguNkulunkulu wenduduzo yonke.’ (2 Kor. 1:3) NjengoNkulunkulu onothando, uyakujabulela ukududuza bonke abasondela kuye. UJehova wayazi ukuthi amanye amaJuda ayedingisiwe ayeyosamukela isiyalo sakhe bese ebuyela kuye. (Isaya 59:20) Ngakho eminyakeni engaphezu kwengu-100 ngaphambi kokuba adingiswe, waphefumulela umprofethi u-Isaya ukuba abhale incwadi ebizwa ngegama lalo mprofethi. Wayekwenzelani lokho? U-Isaya uthi: “‘Duduzani, duduzani abantu bami,’ kusho uNkulunkulu wenu.” (Isaya 40:1) Esebenzisa incwadi yalo mprofethi, uJehova wanika amaJuda ayedingisiwe induduzo ayeyoyidinga.

³ NjengamaJuda ayedingisiwe, nathi siyayidinga induduzo ngezikhathi ezithile. Kulesi sihloko, sizoxoxa ngezindlela ezintathu uJehova aduduza ngazo ababedingisiwe: (1) Wathembisa ukubathethelela abaphendukayo, (2) wanika abantu bakhe ithemba, (3) wabenza ukuba bazole bangesabi. Njengoba sixoxa ngala maphuzu, phawula indlela esingazuza ngayo emazwini kaJehova aduduzayo.

UJEHOVA USIBONISA ISIHE ASITHETHELELE

4. UJehova wabonisa kanjani ukuthi unguNkulunkulu onesihe? (Isaya 55:7)

⁴ UJehova ‘unguYise wesihe.’ (2 Kor. 1:3) Wayibonisa leyo mfanelo lapho ethembisa ukuthi wayeyobathethelela abaphendukile ababedingisiwe. (Funda u-Isaya 55:7.) Wathi: “Ngothando oluqotho oluhlala njalo, ngizoba nesihe kuwe.” (Isaya 54:8) UJehova wayeyosibonisa kanjani isihe? Nakuba amaJuda ayeyobhekana nemiphumela yezenzo zawo, uJehova wawathembisa ukuthi ayengeke ahlale eBhabhiloni unomphela. Ayeyodingiswa isikhathi esithile. (Isaya 40:2) Kumele ukuba lokho kwawaduduza futhi kwawaqinisa amaJuda ayephendukile!

5. Kungani sinezizathu ezengeziwe kunamaJuda ayethunjiwe zokubonga ngesihe sikaJehova?

⁵ Yini esiyifundayo? UJehova uzimisele ukuthethelela izinceku zakhe ngokukhululekile. Namuhla sinezizathu ezengeziwe kunamaJuda ayethunjiwe zokubonga ngokuthi uJehova uyasithethelela. Kungani sisho kanjalo? Kungenxa yokuthi siyaqonda ukuthi yini uJehova ayenzile ukuze asithethelele. Ngemva kwamakhulu eminyaka u-Isaya aprofetha, uJehova wathumela iNdodana yakhe ethandekayo emhlabeni ukuze ibe isihlengo sazo zonke izoni eziphendukayo. Lowo mhlatshelo uyisisekelo ‘sokusulwa’ kwezono zethu—zicishwe ngokuphelele. (IzE. 3:19; Isaya 1:18; Efe. 1:7) Sikhonza uNkulunkulu onesihe ngempela!

6. Kungasizuzisa kanjani ukucabanga ngesihe sikaJehova? (Bheka nesithombe.)

⁶ Amazwi kaJehova aphefumulelwe aku-Isaya 55:7 angasiduduza uma sihlushwa umuzwa wecala. Abanye bethu bangase baqhubeke bezizwa benecala ngephutha abalenza ngisho noma sebephendukile. Lokho kungenzeka ngisho nakakhulu uma sisabhekana nemiphumela yephutha lethu. Nokho, uma sizivumile izono zethu, sayeka nokwenza okungalungile, singaqiniseka ukuthi uJehova usesithethelele. Lapho uJehova esithethelela, ukhetha ukungasikhumbuli isono sethu. (Qhathanisa noJeremiya 31:34.) Ngakho uma uJehova engaqhubeki ecabanga ngezono esazenza esikhathini esidlule, nathi akufanele senze kanjalo. Okubalulekile kuJehova yilokho esikwenzayo manje, hhayi amaphutha esawenza esikhathini esidlule. (Hez. 33:14-16) Maduze, uBaba wethu onesihe uzosikhulula ngokuphelele emiphumeleni yamaphutha ethu.

7. Yini engasenza sifune usizo uma kunesono esisifihlile?

⁷ Yini okufanele siyenze uma sihlushwa umuzwa wecala obangelwa ukufihla isono esikhulu? IBhayibheli lisikhuthaza ukuba sicele usizo kubadala. (Jak. 5:14, 15) Nokho, singase sikuthole kunzima ukubatshela ngesono esisenzile. Kodwa siyofuna ukukhuluma nalawo madoda athembekile uma siphendukile futhi sikhumbula ukuthi uJehova namadoda awamisile ukuba asisize bazosibonisa uthando nesihe. Cabanga ngendlela isihe sikaJehova esamduduza ngayo umzalwane okuthiwa u-Arthur,a owayehlushwa umuzwa wecala ngenxa yento ayeyenzile. Uthi: “Kwase kuphele isikhathi esingangonyaka ngibukela izithombe ezingcolile zocansi. Kodwa ngemva kokulalela inkulumo ekhuluma ngonembeza, ngavuma isono sami kumkami nakubadala. Ngemva kokukhuluma nabo, ekugcineni ngazizwa ngikhululekile, kodwa ngangisadumele ngalokho engangikwenzile. Abadala bangikhumbuza ukuthi uJehova wayengangilahlile. Usiyala ngoba esithanda. Amazwi abo anomusa angithinta kakhulu, angisiza nokuba ngilungise indlela engicabanga ngayo.” Namuhla u-Arthur uyiphayona elivamile nenceku ekhonzayo. Kududuza ngempela ukwazi ukuthi uJehova usibonisa isihe uma siphenduka!

UJEHOVA USINIKA ITHEMBA

8. (a) Yiliphi ithemba uJehova alinika ababedingisiwe? (b) Ngokuka-Isaya 40:29-31, ithemba laliyowenza azizwe kanjani amaJuda aphendukile?

⁸ Ngokombono womuntu, isimo samaJuda ayethunjiwe sasibonakala singenathemba. UMbuso Wezwe WaseBhabhiloni wawaziwa ngokungabakhululi abantu owawubathumbile. (Isaya 14:17) Nokho, uJehova wabanika ithemba abantu bakhe. Wathembisa ukubakhulula futhi akukho okwakungamvimba. (Isaya 44:26; 55:12) KuJehova iBhabhiloni lalifana nothuli. (Isaya 40:15) Into ongavele uyiphephethe iphephuke. Ithemba lalingabasiza kanjani abadingisiwe? Laliyobaduduza. Kodwa lalingenza okungaphezu kwalokho. U-Isaya wabhala: “Labo abathembele kuJehova bayothola amandla kabusha.” (Funda u-Isaya 40:29-31.) Impela, ithemba laliyobavuselela; ‘babeyokhuphuka ngamaphiko njengezinkozi.’

9. Yini eyayingenza abadingisiwe bazethembe izithembiso zikaJehova?

⁹ UJehova wanika ababedingisiwe isizathu sokuzethemba izithembiso zakhe. Kanjani? Cabanga ngeziprofetho abase bezibonile zigcwaliseka. Babazi ukuthi i-Asiriya lalinqobe umbuso wezizwe eziyishumi zakwa-Israyeli, lathatha abantu bawo labayisa ekudingisweni. (Isaya 8:4) Babebone abaseBhabhiloni bebhubhisa iJerusalema, bedingisa nabantu balo. (Isaya 39:5-7) Babesaphila ngesikhathi iNkosi uZedekiya ikhishwa amehlo iyiswa eBhabhiloni. (Jer. 39:7; Hez. 12:12, 13) Yonke into uJehova ayeyibikezele yagcwaliseka. (Isaya 42:9; 46:10) Zonke lezi zinto zabenza baqiniseka nakakhulu ukuthi isithembiso sikaJehova sokubakhulula naso sasiyofezeka!

10. Yini engasisiza sihlale sinethemba kulezi zinsuku zokugcina?

¹⁰ Yini esiyifundayo? Lapho sizizwa sidangele, ithemba lingasiduduza, lisisize siphinde sithole amandla. Siphila ezikhathini ezibucayi futhi sibhekene nezitha ezinamandla. Noma kunjalo, akumele siphele amandla. UJehova usinike ithemba elimangalisayo—ukuphila okuphakade okunokuthula kwangempela nokulondeka. Lelo themba kumele siligcine likhanya bha ezingqondweni zethu nasezinhliziyweni zethu. Ngale kwalokho, ithemba lethu lingagqwala, lifane nokubuka indawo enhle kodwa engabonakali kahle ngenxa yokuthi siyibuka ngewindi elingcolile. “Singaliwasha kanjani iwindi,” sigcine ithemba lethu likhanya bha? Lokho singakwenza ngokuhlale sizinika isikhathi sokubona ngeso lengqondo ukuthi ukuphila kuyoba mnandi kangakanani ezweni elisha. Singafunda izihloko, sibukele amavidiyo, silalele nezingoma ezikhuluma ngethemba lethu. Singakhuluma noJehova ngomthandazo simtshele ngezithembiso esilangazelela ukuzibona zigcwaliseka.

11. Yini esiza omunye udade onezifo ezingamahlalakhona ukuba aphinde athole amandla?

¹¹ Cabanga indlela ithemba eladuduza ngayo futhi laqinisa udade onezifo ezingamahlalakhona okuthiwa uJoy. Uthi: “Lapho ngiphelelwa amandla, ngithululela isifuba sami kuJehova ngazi ukuthi uyangiqonda. Ngezikhathi ezinjalo, uJehova uye wanginika ‘amandla angaphezu kwavamile.’”(2 Kor. 4:7) UJoy uzibona esezweni elisha, lapho ‘kungekho ohlala khona oyothi: ‘Ngiyagula.’’ (Isaya 33:24) Uma nathi sithulula isifuba sethu kuJehova sigxile ethembeni lethu, singakwazi ukuphinde sithole amandla.

12. Yiziphi izizathu esinazo zokwethemba izithembiso zikaJehova? (Bheka nesithombe.)

¹² Njengoba enza kwababedingisiwe, nathi uJehova usinike izizathu eziningi zokwethemba izithembiso zakhe. Cabanga ngeziprofetho esizibona zigcwaliseka. Ngokwesibonelo, sibona uMbuso Wezwe WamaNgisi NamaMelika ‘ongxenye yawo inamandla futhi enye ingxenye ibuthaka.’ (Dan. 2:42, 43) Sizwa ‘nangokuzamazama komhlaba ezindaweni ngezindawo,’ futhi sishumayela “ezizweni zonke.” (Math. 24:7, 14) Lezi ziprofetho kanye nezinye eziningi zisenza sibe nokholo ngisho nakakhulu ezithembisweni zikaJehova eziduduzayo ezisazogcwaliseka.

UJEHOVA USENZA SIZOLE SINGESABI

13. (a) Yiziphi izinselele amaJuda ayeyobhekana nazo lapho sekusondela isikhathi sokukhululwa kwawo? (b) Njengoba kuchazwe ku-Isaya 41:10-13, uJehova wawaduduza kanjani amaJuda ayedingisiwe?

¹³ Nakuba uJehova abaduduza ngethemba elimangalisayo ababedingisiwe, babazi ukuthi babeyobhekana nezinselele lapho isikhathi sokukhululwa kwabo sisondela. UJehova wayebikezele ukuthi inkosi enamandla yayiyobhubhisa izizwe ezizungeze iBhabhiloni bese ihlasela iBhabhiloni. (Isaya 41:2-5) Ingabe amaJuda kwakuyodingeka esabe? UJehova wabaduduza kusengaphambili abantu bakhe, ethi: “Ungesabi ngoba nginawe. Ungakhathazeki ngoba nginguNkulunkulu wakho.” (Funda u-Isaya 41:10-13.) Wayesho ukuthini uma ethi “nginguNkulunkulu wakho”? Wayengakhumbuzi amaJuda ukuba amkhonze—lokho ayekwazi kakade. Kunalokho, wayewakhumbuza ukuthi wayesalokhu engasohlangothini lwawo.—IHu. 118:6.

14. Yini enye uJehova ayenza ukuze asize ababedingisiwe ukuba bazole bangesabi?

¹⁴ UJehova waphinde wasiza ababedingisiwe ukuba bazole futhi bangesabi ngokubakhumbuza amandla akhe angenamkhawulo nolwazi lwakhe. Wacela amaJuda ayedingisiwe ukuba abheke emazulwini abuke izinkanyezi. Wawatshela ukuthi akagcinanga nje ngokudala izinkanyezi, kodwa zonke uzazi ngamagama azo. (Isaya 40:25-28) Uma uJehova azi igama lenkanyezi ngayinye nakanjani uyalazi igama lenceku yakhe ngayinye! Uma ayenamandla okudala izinkanyezi, ngokuqinisekile unawo amandla okusiza abantu bakhe. Ngempela amaJuda ayedingisiwe ayengenaso isizathu sokukhathazeka noma sokwesaba.

15. UNkulunkulu wawenza kanjani amaJuda ayedingisiwe alungela okwakuseza?

¹⁵ UJehova wenza nokuba abantu bakhe balungele okwakuseza. Engxenyeni engasekuqaleni kwencwadi ka-Isaya, uNkulunkulu watshela abantu bakhe: “Ngenani emakamelweni enu angaphakathi, nivale iminyango ngemva kwenu. Zifihleni umzuzwana kuze kudlule intukuthelo.” (Isaya 26:20) Cishe lesi siprofetho sagcwaliseka okokuqala lapho iBhabhiloni linqotshwa iNkosi uKoresi. Isazi-mlando sasendulo esingumGreki sithi lapho uKoresi engena eBhabhiloni “wayala [amasosha akhe] ukuba abulale wonke umuntu ayemthola ngaphandle komnyango.” Cabanga indlela okumele ukuba babethuke ngayo abantu ababehlala eBhabhiloni! Kodwa cishe amaJuda ayedingisiwe asinda ngoba alalela iziqondiso zikaJehova.

16. Kungani kungafanele sikhathazeke ngokweqile ngekusasa lethu? (Bheka nesithombe.)

¹⁶ Yini esiyifundayo? Maduze sizobhekana nosizi olukhulu olungakaze lube khona emlandweni wesintu. Lapho luqala, abantu ezweni bayodideka futhi besabe. Kodwa hhayi abantu bakaJehova. Siyazi ukuthi uJehova unguNkulunkulu wethu. Siyoba nesibindi, sazi ukuthi “ukukhululwa [kwethu] kuyasondela.” (Luka 21:28) Ngisho nalapho izizwe eziyohlangana ukuze zilwe nabantu bakaNkulunkulu zisihlasela, siyoma siqine. UJehova uyosivikela esebenzisa izingelosi neziqondiso eziyosindisa ukuphila kwethu. Lezo ziqondiso ziyodluliselwa kanjani? Kuyodingeka silinde sibone. Nokho, kungenzeka iziqondiso ezinjalo sizithole emabandleni ethu. Ngomqondo othile lawo mabandla angaba ‘amakamelo ethu angaphakathi,’ lapho siyovikeleka khona. Singakulungela kanjani lokho okuseza? Kumele sisondelane nabafowethu nodadewethu, sikulungele ukulalela iziqondiso ezivela enhlanganweni kaJehova, siqiniseke nangokuthi nguye ohola inhlangano yethu.—Heb. 10:24, 25; 13:17.

17. Ungayithola kanjani induduzo kuJehova?

¹⁷ Nakuba amaJuda ayedingisiwe ayezobhekana nesimo esinzima, uJehova wawanika induduzo ayeyoyidinga. Uyokwenza okufanayo nakithi. Ngakho kungakhathaliseki ukuthi yini ongase ubhekane nayo esikhathini esizayo, qhubeka uthola induduzo kuJehova. Yiba nokholo esiheni sakhe esikhulu. Ligcine liphila ithemba lakho. Khumbula ukuthi akudingeki wesabe ngoba uJehova unguNkulunkulu wakho.