Ungakhuthazela Naphezu Kokudumazeka

1. Yiziphi izibusiso esizijabulelayo ngenxa yokuba ingxenye yenhlangano kaJehova?

KUYISIBUSISO ngempela ukuba ingxenye yenhlangano kaJehova kulezi zinsuku zokugcina ezinzima. Njengoba izimo zaleli zwe ziba zimbi nakakhulu, uJehova usinike umndeni ongokomoya onobunye, abafowethu nodadewethu. (IHu. 133:1) Usisiza sibe nemindeni enobunye. (Efe. 5:33–6:1) Usinika ukuqonda nokuhlakanipha esikudingayo ukuze sibe nokuthula kwangempela.

2. Yini okudingeka siyenze, futhi kungani?

² Nokho, kumele sisebenze kanzima ukuze siqhubeke sikhonza uJehova ngokwethembeka. Kungani? Kungenxa yokuthi ngezinye izikhathi singase siphatheke kabi ngenxa yamaphutha abanye. Singase sidunyazwe ngisho amaphutha ethu, ikakhulukazi uma silokhu senza amaphutha afanayo. Kudingeka sikhuthazele enkonzweni kaJehova (1) lapho esikholwa naye esiphatha kabi, (2) lapho esishade naye esidumaza, nalapho (3) sidunyazwa amaphutha ethu. Kulesi sihloko, sizoxoxa ngesimo ngasinye. Sizoxoxa nangalokho esingakufunda kumlingiswa oseBhayibhelini othembekile.

KHUTHAZELA LAPHO OKHOLWA NAYE EKUPHATHA KABI

3. Iyiphi inselele abantu bakaJehova ababhekana nayo?

³ Inselele. Abanye esikholwa nabo banobuntu esingabuthandi. Abanye bangase basidumaze noma basiphathe ngendlela engabonisi umusa noma ukuthi bayasicabangela. Abaholayo bangawenza amaphutha. Lokho kungenza abanye bangabaze ukuthi lena inhlangano kaNkulunkulu. Kunokuba baqhubeke bakhonze uNkulunkulu “ngobunye” nabafowabo nodadewabo, bangase bayeke ukuzihlanganisa nalabo ababaphathe kabi noma baze bayeke ngisho ukuya emihlanganweni. (Zef. 3:9) Kuhlakaniphile yini lokho? Cabanga ngalokho esingakufunda kumlingiswa oseBhayibhelini owabhekana nezinkinga ezifanayo.

4. Yiziphi izinselele umphostoli uPawulu abhekana nazo?

⁴ Isibonelo esiseBhayibhelini. Umphostoli uPawulu wayazi ukuthi abafowabo nodadewabo abangamaKristu bayawenza amaphutha. Ngokwesibonelo, lapho nje esanda kuzihlanganisa nebandla abanye bamahlulela. (IzE. 9:26) Kamuva, abanye bakhuluma kabi ngaye ukuze bonakalise idumela lakhe. (2 Kor. 10:10) UPawulu wabona umdala enza isinqumo esibi esasingakhuba abanye. (Gal. 2:​11, 12) Kanti futhi omunye umngani omkhulu kaPawulu, uMarku, wamdumaza kakhulu. (IzE. 15:​37, 38) UPawulu wayengase avumele esinye salezi zimo simyekise ukuzihlanganisa nalabo ababemphatha kabi. Nokho, akayekanga ukucabanga izinto ezinhle ngabafowabo nodadewabo, waqhubeka ekhuthele enkonzweni kaJehova. Yini eyasiza uPawulu wakhuthazela?

5. Yini eyasiza uPawulu wangabadikila abafowabo nodadewabo? (Kolose 3:​13, 14) (Bheka nesithombe.)

⁵ UPawulu wayebathanda abafowabo nodadewabo. Ukuthanda abanye kwamsiza wagxila ezimfanelweni zabo ezinhle, hhayi emaphutheni abo. Uthando lwamsiza nokuba enze lokho akubhala, njengoba kulotshwe kweyabaseKolose 3:​13, 14. (Yifunde.) Phawula indlela lokhu okwaba yiqiniso ngayo endabeni kaMarku. Nakuba uMarku amshiya uPawulu ohambweni lwakhe lokuqala lokuba isithunywa sevangeli, uPawulu akahlalanga ecasukile. Kamuva, lapho uPawulu ebhalela ibandla laseKolose incwadi emnandi, wancoma uMarku wathi uyisisebenzi esibalulekile, “umthombo wenduduzo enkulu.” (Kol. 4:​10, 11) Ngesikhathi eboshiwe eRoma, uPawulu wacela uMarku ngokukhethekile ukuba azomsiza. (2 Thim. 4:11) Ngokusobala, uPawulu akazange abadikile abafowabo. Yini esingayifunda kuPawulu?

6-7. Yini engasisiza sikhuthazele siqhubeke sibabonisa uthando abafowethu nodadewethu naphezu kwamaphutha abo? (1 Johane 4:7)

⁶ Isifundo. UJehova ufuna sikhuthazele, siqhubeke sibabonisa uthando abafowethu nodadewethu. (Funda eyoku-1 Johane 4:7.) Uma othile engazibonisi izimfanelo zobuKristu ezithile mhlawumbe kungakuhle ukumane sizitshele ukuthi uyafuna ukulandela izimiso zeBhayibheli, umane nje wenza engacabanganga. (IzAga 12:18) UNkulunkulu uyazithanda izinceku zakhe ezithembekile ngisho noma zinamaphutha. Akayeki ukuba umngani wethu lapho senza amaphutha futhi akahlali ecasukile. (IHu. 103:9) Kubaluleke ngempela ukuba silingise uBaba wethu othethelelayo!—Efe. 4:32–5:1.

⁷ Khumbula nokuthi njengoba ukuphela sekuseduze kudingeka sihlale sisondelene nabafowethu nodadewethu. Singalindela ukuba ushushiso lube nzima nakakhulu. Singaze siboshwe ngisho nokuboshwa ngenxa yokholo lwethu. Uma lokho kwenzeka siyobadinga nakakhulu abafowethu nodadewethu. (IzAga 17:17) Cabanga ngalokho okwenzeka kuJosep,a umdala waseSpain. Yena nabanye abazalwane babeboshwe ndawonye beboshelwe ukungathathi hlangothi. Uthi: “Ejele ayemaningi amathuba okucasulwa okholwa naye ngoba sasihlala ndawonye. Kwakudingeka sibekezelelane futhi sithethelelane ngokukhululekile. Lokho kwasisiza sahlala sinobunye sakwazi nokuvikelana. Sasiboshwe nabantu abangamkhonzi uJehova. Ngesinye isikhathi ngalimala futhi ingalo yami yayingasebenzi, ngakho ngangingakwazi ukuzenzela izinto. Kodwa omunye wabafowethu wangiwashela izingubo zami, wanginakekela nangezinye izindlela ezingokoqobo. Ngaboniswa uthando lwangempela ngesikhathi engangiludinga ngaso kakhulu.” Ngempela sinezizathu ezinhle zokuxazulula izinkinga esinazo nabanye manje!

KHUTHAZELA LAPHO OSHADE NAYE EKUDUMAZA

8. Abashadile babhekana nayiphi inselele?

⁸ Inselele. Yonke imishado iyaba nazo izinkinga. IBhayibheli likusho ngokucacile ukuthi abantu abashadile bayoba “nosizi enyameni yabo.” (1 Kor. 7:28) Kungani? Kungenxa yokuthi umshado uhlanganisa abantu ababili abanesono, abanobuntu obungafani, nabathanda izinto ezingafani. Abashadile bangase babe namasiko angafani noma izizinda ezingafani. Ngokuhamba kwesikhathi bangase benze izinto ababengazenzi bengakashadi. Lezo zinto zingase zibangele izinkinga. Kunokuba baqaphele ukuthi ngamunye wabo unesandla kulezo zinkinga bazame ukuzixazulula, bangase basole abashade nabo. Bangase babheke ngisho ukuhlala ngokwahlukana noma ukudivosa njengesixazululo salezo zinkinga. Kodwa ingabe ukuhlala ngokwahlukana noma ukudivosa kuyisixazululo?b Ake sifunde kumlingiswa oseBhayibhelini owakhuthazelela ukuba semshadweni owawunezinkinga.

9. Iyiphi inselele u-Abhigayili abhekana nayo?

⁹ Isibonelo esiseBhayibhelini. U-Abhigayili wayeshade noNabali, iBhayibheli elimchaza ngokuthi wayenokhahlo nemikhuba emibi. (1 Sam. 25:3) Kumele ukuba kwakunzima ngo-Abhigayili ukuhlala nendoda enjalo. Ikhona yini indlela elula u-Abhigayili ayengaqeda ngayo umshado wakhe? Lavela ithuba lokukwenza lokho lapho uDavide owayezolandela abe yinkosi kwa-Israyeli efika ezobulala umyeni wakhe ngenxa yokuthi wayemdelelile yena namadoda akanye naye. (1 Sam. 25:​9-13) U-Abhigayili wayengabaleka, okwakuyokwenza uDavide akwazi ukubulala uNabali. Kodwa wangenela, wancenga uDavide ukuba angambulali uNabali. (1 Sam. 25:​23-27) Yini eyamenza wenza lokho?

10. Yini okungenzeka yenza u-Abhigayili wakhuthazela emshadweni onezinkinga?

¹⁰ U-Abhigayili wayemthanda uJehova eyihlonipha nemithetho yakhe ephathelene nomshado. Akungabazeki ukuthi wayekwazi lokho uNkulunkulu akusho ku-Adamu no-Eva lapho esungula umshado wokuqala. (Gen. 2:24) U-Abhigayili wayazi ukuthi umshado ungcwele kuJehova. Wayefuna ukujabulisa uNkulunkulu futhi lokho kwamenza wenza konke okusemandleni ukuze asindise umndeni wakhe, kuhlanganise nomyeni wakhe. Wathatha isinyathelo ngokushesha ukuze anqande uDavide angambulali uNabali. Wayezimisele nokuxolisa ngobubi ayengabenzanga. Kusobala ukuthi uJehova wayemthanda lona wesifazane onesibindi nongazicabangeli yena yedwa. Amakhosikazi nabayeni bangafundani esibonelweni sika-Abhigayili?

11. (a) Yini uJehova ayilindele kubantu abashadile? (Efesu 5:33) (b) Yini oyifundile endleleni uCarmen enza ngayo ukuze alondoloze umshado wakhe? (Bheka nesithombe.)

¹¹ Isifundo. UJehova uthi abantu abashadile mabalihloniphe ilungiselelo lomshado ngisho noma kunzima ukuhlala nabantu abashade nabo. Kumele ukuba uNkulunkulu uyajabula lapho ebona abantu abashadile besebenza kanzima ukuze baxazulule izinkinga zabo, babonisane nothando olungenabugovu nenhlonipho. (Funda eyabase-Efesu 5:33.) Cabanga ngesibonelo sikaCarmen. Ngemva kweminyaka engaba yisithupha eshadile, uCarmen waqala ukutadisha iBhayibheli noFakazi BakaJehova, kamuva wabhapathizwa. Uthi: “Umyeni wami akakujabulelanga lokho engangikwenza. Wacasuka ngokuthi ngase ngichitha isikhathi ngenza izinto zikaJehova. Wayengithuka, angisongele ngokuthi uzongishiya.” Noma kunjalo, uCarmen wakhuthazela emshadweni wakhe. Kwaphela iminyaka engu-50 esebenza kanzima ukuze umshado wakhe ube nothando nenhlonipho. Uthi: “Njengoba iminyaka iqhubeka, ngafunda ukuba umuntu oqonda kakhudlwana ngafunda nokukhuluma ngendlela enomusa nomyeni wami. Ukwazi ukuthi umshado ungcwele kuJehova kwangenza ngenza konke okusemandleni ukuze ngiwulondoloze. Angikaze ngizame ukushiya umyeni wami ngoba ngiyamthanda uJehova.”c Uma kuvela izinkinga emshadweni wakho ungaqiniseka ngokuthi uJehova uzokusekela akusize ukhuthazele.

KHUTHAZELA LAPHO UDUNYAZWA AMAPHUTHA AKHO

12. Iyiphi inselele esingase sibhekane nayo uma senze isono esikhulu?

¹² Inselele. Singase sidikibale kakhulu lapho senze isono esikhulu. IBhayibheli liyasho ukuthi izono zethu zingasishiya ‘siphukile’ futhi ‘sidabukile.’ (IHu. 51:17) Umzalwane okuthiwa uRobert wayesebenze kanzima iminyaka eminingi ukuze afanelekele ukuba inceku ekhonzayo. Nokho, wenza isono esikhulu esamenza wabona ukuthi wayemzwise ubuhlungu uJehova. Uthi, “Unembeza wami wangihlupha kakhulu kwaba sengathi kuwele indunduma yamatshe phezu kwami. Ngazizwa kabi kakhulu. Ngadinda isililo, ngathandaza kuJehova. Ngiyakhumbula ngicabanga ukuthi uNkulunkulu ngeke aphinde azihluphe ngokungilalela. Wayengazihluphelani nje? Ngangimdumazile.” Uma sonile, singase siphele amandla ngenxa yokuthi inhliziyo yethu edabukile ikholelwa ukuthi uJehova akasasithandi. (IHu. 38:4) Uma wake wazizwa ngaleyo ndlela, cabanga ngesibonelo somlingiswa oseBhayibhelini othembekile owakhuthazela waqhubeka ekhonza uJehova nakuba ayenze isono esikhulu.

13. Yisiphi isono esikhulu esenziwa umphostoli uPetru, futhi yini eyaholela kuso?

¹³ Isibonelo esiseBhayibhelini. Ngobusuku bangaphambi kokubulawa kukaJesu, umphostoli uPetru wenza amaphutha amaningana aholela esonweni esikhulu kunazo zonke ekuphileni kwakhe. Okokuqala, uPetru wazithemba ngokweqile eqhosha ngokuthi yena wayezothembeka ngisho noma abanye abaphostoli bemshiya uJesu. (Marku 14:​27-29) Okwesibili, ngesikhathi besensimini yaseGetsemane, ngokuphindaphindiwe uPetru wahluleka ukuhlala elindile. (Marku 14:​32, 37-41) Ngemva kwalokho, uPetru washiya uJesu nesixuku esasizombopha. (Marku 14:50) Okokugcina, uPetru waphika uJesu kathathu, waze wenza ngisho isifungo efakazela lawo manga. (Marku 14:​66-71) Wenzenjani uPetru lapho ebona ukuthi wayenze isono esikhulu kangaka? Wahluleka ukuzibamba wakhala kalusizi, mhlawumbe egajwe umuzwa wecala. (Marku 14:72) Awubucabange nje ubuhlungu obukhulu uPetru abuzwa lapho umngani wakhe uJesu ebulawa emahoreni ambalwa kamuva. Kumele ukuba uPetru wazizwa engelusizo lwalutho!

14. Yini eyasiza uPetru wakhuthazela waqhubeka ekhonza uJehova? (Bheka isithombe esisekhasini 1.)

¹⁴ UPetru wakwazi ukukhuthazela waqhubeka ekhonza uJehova ngenxa yezizathu eziningana. Akazange azihlukanise; waya kubafowabo abangokomoya futhi akungabazeki ukuthi bamduduza. (Luka 24:33) Ngaphezu kwalokho, uJesu ovusiwe wabonakala kuPetru, cishe ezomkhuthaza. (Luka 24:34; 1 Kor. 15:5) Kamuva, kunokuba asole uPetru ngamaphutha akhe, uJesu watshela umngani wakhe ukuthi wayezothola imithwalo eyengeziwe. (Joh. 21:​15-17) UPetru wayazi ukuthi wayenze isono esikhulu, kodwa akayekanga ukuzama ukwenza okulungile. Kungani? Kungenxa yokuthi wayeqiniseka ukuthi iNkosi yakhe, uJesu, yayisamthanda. Abafowabo bakaPetru abangokomoya nabo baqhubeka bemsekela. Yini esingayifunda esibonelweni sikaPetru?

15. Yini uJehova afuna siqiniseke ngayo? (IHubo 86:5; Roma 8:​38, 39) (Bheka nesithombe.)

¹⁵ Isifundo. UJehova ufuna siqiniseke ngokuthi uyasithanda futhi ukulungele ukusithethelela. (Funda iHubo 86:5; eyabaseRoma 8:​38, 39.) Lapho senza isono siba nomuzwa wecala. Kungokwemvelo lokho futhi kufanele sizizwe ngaleyo ndlela. Noma kunjalo, akumele sicabange ukuthi uJehova akasasithandi noma ngeke akwazi ukusithethelela. Kunalokho, kufanele sithole usizo ngokushesha. URobert, okukhulunywe ngaye ekuqaleni, uthi: “Ngenza isono ngoba ngathembela emandleni ami ukuba angisize ngimelane nesilingo.” Wabona ukuthi kwakufanele akhulume nabadala. Uthi: “Ngemva kokuthatha leso sinyathelo, ngokushesha ngayizwa indlela uJehova ayengithanda ngayo esebenzisa abadala. Abadala abazange bangidikile. Bangisiza ngakholelwa ukuthi uJehova akangilahlile.” Nathi singaqiniseka ngokuthi uJehova uyasithanda kakhulu futhi uyasithethelela uma siphenduka ezonweni zethu, sifuna usizo esiludingayo futhi sizame ngobuqotho ukungawaphindi amaphutha ethu. (1 Joh. 1:​8, 9) Lokho kusisiza singapheli amandla lapho sikhubeka noma siwa.

16. Kungani uzimisele ukukhuthazela uqhubeke ukhonza uJehova?

¹⁶ UJehova ujabula kakhulu ngemizamo esiyenzayo ukuze simkhonze phakathi nalezi zinsuku zokugcina ezinzima. Ngosizo lukaJehova, singakwazi ukukhuthazela naphezu kokudumazeka. Singakwazi ukuqhubeka sithanda abafowethu nodadewethu, sibathethelele ngisho noma besiphatha kabi. Singabonisa ukuthi siyamthanda kakhulu uNkulunkulu futhi siyalihlonipha ilungiselelo lakhe lomshado ngokuthi senze konke esingakwenza ukuze sixazulule izinkinga ezingase zivele emshadweni wethu. Uma senza isono, singafuna usizo kuJehova, samukele ukuthi uyasithanda futhi ukulungele ukusithethelela, siqhubeke simkhonza. Singaqiniseka ngokuthi siyothola izibusiso eziningi uma “singayeki ukwenza okuhle.”—Gal. 6:9.