INDLELA YOKUQEDA UKUZONDANA OKUNGAPHELI

1 | Ungakhethi

IBhayibheli Lithi:

“UNkulunkulu akakhethi, kodwa ezizweni zonke [wonke] umuntu omesabayo nowenza okulungile uyamukeleka kuye.”—IZENZO 10:34, 35.

Lokho Okukushoyo:

UJehovaa uNkulunkulu akasahluleli ngokobuzwe bethu, uhlanga, ibala lesikhumba noma ngokwesiko lethu. Kunalokho ugxila kokubaluleke kakhulu—lokho esiyikho ngaphakathi. Kuyiqiniso, “umuntu ubona okubonakala emehlweni, kodwa uJehova ubona okusenhliziyweni.”—1 Samuweli 16:7.

Lokho Ongakwenza:

Nakuba singeke sikwazi ukufunda izinhliziyo, singazama ukulingisa uNkulunkulu sibheke abanye ngokungakhethi. Kunokubheka abantu njengeqembu zama ukubona umuntu ngamunye ngokwalokho ayikho. Uma uzwa sengathi unemizwa engemihle ngabanye—mhlawumbe labo bolunye uhlanga noma ubuzwe—thandaza kuNkulunkulu umcele akusize ukuba uyisuse leyo mizwa. (IHubo 139:23, 24) Uma umcela ngobuqotho uJehova ukuba akuphe amandla okungakhethi, ungaqiniseka ngokuthi uzowulalela umthandazo wakho futhi akusize.—1 Petru 3:12.

a UJehova igama likaNkulunkulu.—IHubo 83:18.

“Ngangingakaze ngihlale ngokuthula nomlungu . . . Manje ngase ngiyingxenye yobuzalwane bangempela bomhlaba wonke.”—UTITUS

Indaba Yokuphila—UTITUS

Wanqoba Ukuba Nenzondo Engapheli

UTitus wayeyilungu leqembu lezigebengu elinobudlova elalicasulwa imithetho yobandlululo. Uthi: “Sasihamba siye ezindaweni lapho abantu abamnyama babenga vunyelwe khona, njengasemahhotela nasezindaweni zokuphuza, ukuze nje siyosusa impi.” UTitus uthi lokhu wayekwenziswa yinzondo, uyenezela: “Ngaso sonke isikhathi uma kwenzeka ngiqagulisana nothile owesilisa noma owesifazane, ngangigadla kuqala.”

UTitus waqala ukushintsha lapho eqala ukufunda iBhayibheli noFakazi BakaJehova. IBhayibheli lakuthinta kakhulu ukuphila kwakhe. Samthinta kakhulu isithembiso somhlaba wangesikhathi esizayo lapho ‘ukufa kungeke kusaba khona, noma ukulila noma ukukhala noma ubuhlungu kungeke kusaba khona.’—IsAmbulo 21:3, 4.

Kwaqale kwaba nzima ukuba uTitus akhiphe inzondo esenhliziyweni yakhe. Uthi: “Kwakunzima ngempela ukushintsha indlela yami yokucabanga nezenzo zami.” Kodwa wasizwa yilokho akufunda emBhalweni wezEnzo 10:34, 35 ochaza uNkulunkulu ngokuthi akakhethi.

Waba yini umphumela? UTitus uyachaza: “Ngangiqiniseka ngokuthi oFakazi BakaJehova bayinkolo yeqiniso lapho ngibona uthando phakathi kwabo, kungakhathaliseki ubuzwe noma ibala. Ngisho nangaphambi kokuba ngibhapathizwe njengomunye woFakazi, elinye ilungu lebandla elingumlungu langimemela emzini walo ukuze ngizodla nomndeni walo. Kwakungathi ngiyaphupha. Ngangingakaze ngihlale ngokuthula nomlungu, ngingasayiphathi-ke eyokudlela emzini wakhe. Manje ngase ngiyingxenye yobuzalwane bangempela bomhlaba wonke.”