Bhekana Nenselele Yokufakaza Kubantu Besilisa
1. Isiphi isidingo esiphuthumayo esikhona ekunakekeleni izithakazelo zoMbuso?
1 Njengoba umsebenzi wokufakaza ngoMbuso wanda kulezi zinsuku zokugcina, kunesidingo esiphuthumayo samadoda afanelekayo ngokomoya sokuba ahole. (Marku 4:30-32; IzE. 20:28; 1 Thim. 3:1-13) Kodwa, ezindaweni ezithile ambalwa amadoda amukela isigijimi soMbuso kunabesifazane. Ezindaweni ezithile, amadoda azishiyela kwabesifazane izindaba ezingokomoya nokufundisa izingane ngenkolo. Singawakhuthaza kanjani amadoda engeziwe ukuba aqaphele isidingo sawo esingokomoya ukuze ahlanganyele ekukhulekeleni kweqiniso?
2. Imizamo kaPawulu noPetru yokushumayela emadodeni yaba namuphi umphumela omuhle?
2 Ukufuna Abesilisa: Lapho inhloko yomkhaya yamukela iqiniso, ngokuvamile iyabathonya nabanye emkhayeni ukuba bahlanganyele ekukhulekeleni kweqiniso. Ngokwesibonelo, lapho besejele ngenxa yokushumayela, uPawulu noSila bashumayela kumgcini wejele. Le ndoda yabhapathizwa nawo wonke umkhaya wayo. (IzE. 16:25-34) Ngenxa yokushumayela kukaPawulu eKorinte, “uKrispu isikhulu esengamele sesinagoge wakholwa yiNkosi, nendlu yakhe yonke yakholwa.” (IzE. 18:8) UPetru wasetshenziswa uJehova ukuba ashumayele kuKorneliyu, isikhulu sebutho esichazwa ‘njengomuntu ozinikele nowesaba uNkulunkulu.’ UKorneliyu wabhapathizwa kanye nezihlobo zakhe nabangane bakhe abaseduze.—IzE. 10:1-48.
3. Silingisa uFiliphu, obani ‘abasezikhundleni eziphakeme’ esingashumayela kubo?
3 Ukushumayela emadodeni “asezikhundleni eziphakeme” kungaba nemiphumela emikhulu. (1 Thim. 2:1, 2) Ngokwesibonelo, ingelosi kaJehova yaluleka uFiliphu ukuba akhulume ‘nendoda eyayisesikhundleni sokuphatha’ yonke ingcebo yendlovukazi yaseTopiya. UFiliphu wayizwa le ndoda ‘ifunda ngokuzwakalayo umprofethi u-Isaya’ futhi wayichazela izindaba ezinhle eziphathelene noJesu. Le ndoda engumTopiya yaba ngumfundi futhi kungenzeka yashumayela izindaba ezinhle njengoba iya ezweni lakubo. Kungenzeka futhi yafakaza nasendlovukazini nakwabahlala endlini yayo, abantu okungenzeka ukuthi babenamathuba amancane okuzwa izindaba ezinhle.—IzE. 8:26-39.
4. Singawavula kanjani amathuba okuba amadoda engeziwe ezwe izindaba ezinhle?
4 Finyelela Abesilisa Abengeziwe: Njengoba ngokuvamile amadoda eba sezindaweni asebenza kuzo phakathi nosuku, ungahlela yini ukuchitha isikhathi esengeziwe enkonzweni ebusuku, ngezimpelasonto noma ngamaholide? Ukusebenza insimu yamabhizinisi njalo kuyokunika amathuba engeziwe okufakaza emadodeni angavamile ukutholakala emakhaya. Nabazalwane bangenza umzamo okhethekile wokushumayela ngokwethukela kulabo abasebenza nabo. Enkonzweni yendlu ngendlu, ikakhulukazi ensimini esetshenzwa njalo, ngezikhathi ezithile abazalwane bangase bacele ukukhuluma nenhloko yekhaya ngokuqondile.
5. Udade kufanele enze njani lapho ethola owesilisa osabela kahle esigijimini soMbuso?
5 Udade othola owesilisa onesithakazelo seqiniso ensimini kufanele angabuyeli yedwa kuye. Angase ahambe nomyeni wakhe noma omunye ummemezeli. Njengoba lowo muntu onesithakazelo ethuthuka, kuhle ukusinikeza umzalwane ofanelekayo leso sifundo.
6. Singamlingisa kanjani umphostoli uPawulu ukuze ‘sizuze abantu abaningi’?
6 Khetha Izihloko Ezithakazelisayo Kwabesilisa: Umphostoli uPawulu wayecabanga ngalabo azokhuluma nabo abese ehlela isingeniso sakhe ukuze ‘azuze abantu abaningi.’ (1 Kor. 9:19-23) Nathi ngokufanayo, kufanele sicabange ukuthi yiziphi izihloko ezizobathakazelisa abesilisa esingase sihlangane nabo futhi sizilungiselele. Ngokwesibonelo, amadoda avame ukukhathazeka ngezinselele zezomnotho, uhulumeni omuhle nangokulondeka kwemikhaya yawo. Angase abe nesithakazelo ngokuphathelene nenjongo yokuphila, ikusasa lomhlaba nangokuthi kungani uNkulunkulu evumela ukuhlupheka. Indlela esethula ngayo isigijimi sethu soMbuso iyokwamukelwa kangcono uma sibonisa ukuqonda okunjalo lapho sishumayela.—IzAga 16:23.
7. Singaba kanjani ithonya elihle sonke ebandleni kubayeni abangakholwa lapho beze esifundweni?
7 Lwela Ukusiza Abayeni Abangakholwa: Nakuba ngokuvamile ukuziphatha okuhle kodade abangamaKristu kuyithonya elikhulu kubayeni babo abangakholwa, amalungu ebandla nawo angaba yithonya elihle. (1 Pet. 3:1-4) Lapho indoda engakholwa iya nomkayo esifundweni, ukwamukelwa ngemfudumalo ekuthola ebandleni kuyoba ubufakazi obunamandla. Ukuba khona kwayo kubonisa izinga elithile lesithakazelo ngeqiniso, futhi ingase ivume ukwamukela isifundo seBhayibheli.
8. Abazalwane bangabasiza kanjani abayeni abangakholwa ababonise isithakazelo seqiniso?
8 Ngakolunye uhlangothi, abayeni abathile bangase bangabi naso isithakazelo esingako ezintweni ezingokomoya ekuqaleni, kodwa ngokuhamba kwesikhathi bangase bavume ukuxoxa ngeBhayibheli nomzalwane abazizwa bekhululekile ukuba naye. Kwelinye ibandla abazalwane bakwenza umkhuba ukuthi lapho bevakashele umkhaya ohlukene ngokwenkolo baxoxe nomyeni ongakholwa ngezinto azithandayo. Lokhu kwaholela ezingxoxweni ezingokomoya, futhi manje ubhapathiziwe. Kokunye, umzalwane wasiza umyeni ongakholwa onomusa ekubiyeni umuzi wakhe. Ngokubonisa isithakazelo ngale ndlela, kwaqalwa isifundo seBhayibheli. (Gal. 6:10; Fil. 2:4) Uma ungumzalwane ongumKristu, kungani ungazami ukujwayelana noyedwa noma ababili kubayeni abangakholwa?
9. Yimuphi umphumela ongaba khona ngokuqeqeshwa kwamadoda angamaKristu?
9 Ukuqeqeshela Ikusasa: Amadoda asabelayo esigijimini soMbuso futhi afune ukufinyelela amalungelo enkonzweni kaJehova angase abe phakathi ‘kwezipho ezingabantu,’ abadala abangamaKristu abasebenzisa amakhono namandla abo ukuze bazuzise ibandla labantu bakaJehova. (Efe. 4:8; IHu. 68:18) Amadoda anjalo alusa ibandla ngokuzithandela nangokuzimisela. (1 Pet. 5:2, 3) Yeka ukuthi baba yisibusiso esinjani kuyo yonke inhlangano yabazalwane!
10. Imizamo ka-Ananiya yokusiza uPawulu yabazuzisa kanjani abaningi?
10 Ngokwesibonelo, uSawulu waba ‘umphostoli ezizweni,’ nakuba ayeke waba umshushisi wamaKristu. (Roma 11:13) U-Ananiya umfundi waqale wangabaza ukufakaza kuSawulu ngenxa yalokhu. Kodwa, u-Ananiya walandela isiqondiso seNkosi futhi wakhuluma nale ndoda eyagcina isingumphostoli uPawulu. Kuyo yonke iminyaka eyalandela, inkonzo kaPawulu yazuzisa izinkulungwane ezamuzwa eshumayela nezigidi eziqhubekayo zizuza ezincwadini zakhe eziphefumulelwe eziseZwini likaNkulunkulu.—IzE. 9:3-19; 2 Thim. 3:16, 17.
11. Kungani kufanele silungise lapho kudingeka khona ukuze sifakaze kwabesilisa?
11 Kwangathi singalungisa lapho kudingeka khona ukuze sibhekane nenselele yokushumayela kwabesilisa. Njengoba siphishekela lo mgomo, siyaqiniseka ukuthi siyothola isibusiso sikaJehova ngemizamo yethu eqotho yokwenza intando yakhe nokuthuthukisa izithakazelo zoMbuso.