Ukushumayela Kudinga Ukukhuthazela
1 Umphostoli uPawulu wajabulela umsebenzi ojabulisayo wokuba umvangeli iminyaka engaphezu kuka-30. Njenganoma imuphi umsebenzi omuhle, umsebenzi wakhe wokushumayela wawunezinselele. (2 Kor. 11:23-29) Kodwa, uPawulu akazange ayeke. (2 Kor. 4:1) Wayazi ukuthi amandla okukhuthazela lapho efeza inkonzo yakhe ayevela kuJehova. (Fil. 4:13) Ngenxa yesibonelo sakhe sokukhuthazela ngokwethembeka, uPawulu wakwazi ukusho la mazwi: “Yibani abalingisi bami, njengoba nje nami ngingumlingisi kaKristu.”—1 Kor. 11:1.
2 Ukukhuthazelela Uvivinyo Namuhla: Nsuku zonke, iningi labazalwane bethu lihlekwa usulu, liyaphikiswa, noma linganakwa amalungu omkhaya, elisebenza nabo noma elifunda nabo esikoleni. (Math. 10:35; Joh. 15:20) Mhlawumbe nawe ubhekene nesimo esifanayo. Ngakolunye uhlangothi, kungenzeka ulwa nenkinga yempilo, noma kungenzeka kudingeka ulwe kanzima usuku ngalunye ukuze uvimbe iziphazamiso nezilingo ezivivinya ukholo nokukhuthazela kwakho. Singawathola amandla ngokucabangela izibonelo zezinceku ezithembekile zesikhathi esidlule nezamaKristu esiphila nawo namuhla aye abhekana nezinselele futhi azinqoba.—1 Pet. 5:9.
3 Singathola amandla ngokuhlala siqinile enkonzweni yethu ngokuqikelela ukuthi ‘sigqoka zonke izembatho zempi ezivela kuNkulunkulu.’ (Efe. 6:10-13, 15) Kubalulekile nokuthandaza sicele ukukhuthazela. UNkulunkulu usinika umoya wakhe ongcwele ukuze sikhuthazelele uvivinyo. (2 Kor. 6:4-7) Ukuze siphumelele empini yethu engokomoya, kufanele silalele izikhumbuzo zikaNkulunkulu zokuvuselela umoya wethu. (IHu. 119:24, 85-88) Njengoba nje umntwana engayifunda kaningi incwadi ayibhalelwe ubaba onothando, ukufunda kwethu iBhayibheli nsuku zonke kuqinisa ubuhlobo bethu noJehova. Sithola ukuhlakanipha okusisiza ekubhekaneni nezinselele ngesifundo somuntu siqu sasikhathi sonke, ngaleyo ndlela sivumele ukuba ukucabanga kukaNkulunkulu kuthonye izinqumo zethu futhi kuqinise nokwethembeka kwethu.—IzAga 2:10, 11.
4 Ukukhuthazela Kuletha Izibusiso: Njengoba kwaba njalo ngoPawulu, ukukhuthazela kwethu ngokwethembeka lapho sifeza inkonzo yethu kwenza inhliziyo kaJehova ijabule futhi kulethele thina nabanye izibusiso. (IzAga 27:11) Kwangathi singazimisela ukukhuthazela enkonzweni, ngaleyo ndlela sibonise ukuthi ukholo lwethu luqinile futhi ‘lungolwenani elikhulu kakhulu kunegolide elishabalalayo naphezu kokuvivinywa kwalo ngomlilo.’—1 Pet. 1:6, 7.