Isimiso Esisha Semihlangano Yebandla
1, 2. Yiluphi ushintsho lwemihlangano oluyoqala ngo-January 2009?
1 Ngesonto lika-April 21-27, 2008, abazalwane emhlabeni wonke bezwa isaziso esijabulisayo. “Kusukela ngo-January 1, 2009, iSifundo Sencwadi Sebandla siyoqhutshwa ngosuku olufanayo neSikole Senkonzo Esingokwasezulwini kanye noMhlangano Wenkonzo. Igama leSifundo Sencwadi Sebandla liyoshintsha libe iSifundo SeBhayibheli Sebandla.”
2 Isimiso Salo Mhlangano Wamasonto Onke: Ingqikithi yesikhathi salo mhlangano, kuhlanganise izingoma nemithandazo, iyoba ihora elilodwa nemizuzu engu-45. Umhlangano uyoqala ngengoma nomthandazo (5 imiz.), kulandele iSifundo SeBhayibheli Sebandla (25 imiz.). Ngemva kwalokho kuyolandela iSikole Senkonzo Esingokwasezulwini (30 imiz.). Kuyobe sekuba nengoma (5 imiz.) evula uMhlangano Wenkonzo (35 imiz.). Umhlangano uyophetha ngengoma nomthandazo (5 imiz.). Ukuze nisizakale lapho nilungiselela le mihlangano, isimiso seSifundo SeBhayibheli Sebandla, seSikole Senkonzo Esingokwasezulwini nesoMhlangano Wenkonzo ziyofakwa kuyi-Nkonzo Yethu YoMbuso inyanga ngayinye.
3. Siyoqhutshwa kanjani iSifundo SeBhayibheli Sebandla?
3 ISifundo SeBhayibheli Sebandla: Lo mhlangano uyoqhutshwa njengeSifundo Se-Nqabayokulinda. Ngeke kudingeke ukuba kuqalwe ngokubukeza isifundo sangesonto elidlule. Kunalokho, lesi sifundo kufanele sibe nesethulo esifushane kakhulu. Lokhu kuyokwenza ukuba bonke abakhona babe nesikhathi esanele sokunikeza izimpendulo ezimfushane. Umbonisi owengamele uyoqondisa ukwabelwa kwabadala abayoqhuba lo mhlangano, kwabelwe umdala ohlukile isonto ngalinye.
4. Uyoshintsha ngezinga elingakanani uMhlangano Wenkonzo?
4 UMhlangano Wenkonzo: UMhlangano Wenkonzo uyoqhubeka unjalo kodwa izinkulumo zawo ziyoncishiswa. Ngokuvamile izaziso ziyothatha imizuzu emihlanu. Lesi sikhathi siyokwanela ukwenza izaziso ezibalulekile nokufunda izincwadi ezithile ezivela egatsheni. Izaziso ezinjengamalungiselelo enkonzo yasensimini, isimiso sokuhlanza, imibiko yezimali nezincwadi ezivamile ezivela ehhovisi legatsha akufanele kufundwe endaweni yesikhulumi, kodwa kuyochonywa ebhodini ukuze abazalwane bazifundele. Labo ababelwe izinkulumo esimisweni kufanele balungiselele kahle futhi banamathele esikhathini abasabelwe naseziqondisweni ezinikeziwe.
5. Phakathi nesonto lokuhambela kombonisi wesifunda, siyoma kanjani isimiso semihlangano yebandla?
5 Ukuhambela Kombonisi Wesifunda: Isimiso sesonto lokuhambela kombonisi wesifunda ngeke sishintshe. NgoLwesibili kuyoba neSikole Senkonzo Esingokwasezulwini noMhlangano Wenkonzo bese kulandela ingoma. Umbonisi wesifunda uyobe esenikeza inkulumo yemizuzu engu-30. Njengoba kwenziwa namanje phakathi nesonto lokuhambela kwakhe, enye intambama iyohlelelwa iSifundo SeBhayibheli Sebandla bese kulandela ingoma nenkulumo yenkonzo yombonisi wesifunda. Umhlangano uyophetha ngengoma nomthandazo.
6. Iyini indima yombonisi weqembu?
6 Imihlangano Yenkonzo Yasensimini: Indikimba yabadala iyokwabela ababonisi bamaqembu ukuba banakekele amaqembu aya ensimini futhi beluse labo abakulelo qembu. Lapho kudingeka ukuba kube inceku ekhonzayo efeza le ndima, kufanele ibizwe ngokuthi “inceku yeqembu.”
7. Yini esingase siyilindele esimisweni esisha semihlangano yethu yebandla?
7 Njengoba sekushiwo, siyoba nethuba lokujabulela idili lakusihlwa elingokomoya elakhayo nelifundisayo. Lokhu kuyosenza sibe abashumayeli nabafundisi abaphumelelayo abaqeqeshelwe inkonzo ethela nakakhulu.—Efe. 4:13, 14; 2 Thim. 3:17.
8. Ukulungiselela kusengaphambili kuyosisiza kanjani thina siqu kanye nabanye?
8 Ukuyilungiselela kusengaphambili le mihlangano kuyosisiza ukuba sigxile kahle emaphuzwini abalulekile aqokonyiswayo phakathi nomhlangano ngamunye. Sonke siyoba nethuba lokuhlanganyela ngezimpendulo, sifake isandla ekukhuthazaneni. (Roma 1:11, 12; Heb. 10:24) Umgomo wethu kufanele ube ‘ukwenza intuthuko yethu ibonakale’ ‘ngokuphatha izwi leqiniso ngokufanele.’—1 Thim. 4:15; 2 Thim. 2:15.
9. Yini esizimisele ukuyenza, futhi ngani?
9 Siyajabula ngalolu shintsho olukhulu lwemihlangano yethu yebandla. Kwangathi singaqhubeka sonke sisebenzisa isiqondiso esisinikwa “inceku ethembekile neqondayo,” sinamathele kuMalusi wethu Omkhulu njengoba esilungiselela “usizi” olukhulu manje oluseduze.—Math. 24:21, 45; Heb. 13:20, 21; IsAm. 7:14.