Hambisa Omagazini Abafakazela Iqiniso
1. Iyiphi indima efezwa INqabayokulinda ne-Phaphama!?
1 INqabayokulinda Ememezela UMbuso KaJehova nomagazini owumngane wayo, i-Phaphama! banengxenye eyinhloko emsebenzini wokushumayela ngoMbuso nokwenza abafundi. (Math. 24:14; 28:19, 20) Siyakujabulela ukubahambisa njalo lab’ omagazini ababili abafika ngesikhathi lapho sihlanganyela ezicini ezihlukahlukene zenkonzo yoMbuso.
2. Iluphi ushintsho oluye lwenziwa kuyi-Nqabayokulinda ne-Phaphama!, futhi ngani?
2 Phakathi nale minyaka edlule siye sabona ushintsho ebukhulwini nakulokho okuqukethwe yilab’ omagazini, kanjalo nezindlela esizisebenzisayo ekubahambiseni. Lezi zinguquko ziye zenziwa ngenhloso yokwenza lab’ omagazini bakhange futhi baphumelele kakhudlwana, ukuze isigijimi soMbuso sifinyelele izinhliziyo zazo ‘zonke izinhlobo zabantu ukuze zisindiswe futhi zifinyelele olwazini olunembile lweqiniso.’—1 Thim. 2:4.
3. Omagazini bayosetshenziswa kanjani enkonzweni?
3 Kusukela ngo-January 2006, siye salola amakhono ethu okusebenzisa izintshumayelo ezihlukahlukene ekuhambiseni i-Phaphama! eyodwa ngenyanga. Manje sesizosebenzisa indlela efanayo ekuhambiseni umagazini owodwa kwababili banyanga zonke be-Nqabayokulinda Ememezela UMbuso KaJehova enkonzweni yethu yasobala. Izintshumayelo eziyisibonelo zikamagazini ngamunye zivela ekhasini lokugcina le-Nkonzo Yethu YoMbuso. Lezi zintshumayelo ngokuvamile ziqokomisa esinye sezihloko zokuqala kumagazini kodwa ngezinye izikhathi kusetshenziswa ezinye izihloko eziyokhanga abaningi. Ukusikisela okunyathelisiwe kungasetshenziswa ngokuphumelelayo uma sisazi kahle isihloko esikhulunyelwayo futhi sisebenzisa amazwi ethu ukuze sivumelanise intshumayelo nensimu yethu.
4. Kungani kungase kube yinzuzo ukusebenzisa ezinye izintshumayelo ngaphandle kwezisikiselwe kuyi-Nkonzo Yethu YoMbuso?
4 Nakuba INkonzo Yethu YoMbuso ihlanganisa izintshumayelo ezimbili zikamagazini ngamunye, ungase uzizwe ukhululekile ukusebenzisa intshumayelo ehluke ngokuphelele. Esinye isizathu sokwenza kanjalo kungase kube ukuthi esinye salezi zihloko eziseceleni singase sibakhange kakhudlwana abantu ensimini yenu. Noma ungase ube nomuzwa wokuthi unganikeza intshumayelo ephumelela kakhudlwana ngokusebenzisa isihloko esikuthakazelisa kakhulu.
5. Ngaphambi kokulungiselela intshumayelo kamagazini ozohanjiswa, yini okumelwe uyenze?
5 Indlela Yokulungiselela Intshumayelo Yakho: Okokuqala, kumelwe usazi kahle isihloko okhetha ukusikhulumela. Ungase ungazazi zonke izihloko ezikumagazini njalo ngaphambi kokuqala ukuwuhambisa enkonzweni yasensimini. Kodwa kumelwe ubonise intshiseko nobuqotho ngezihloko okhetha ukuzikhulumela. Lokho ungakwenza kuphela uma ujwayelene kahle nendaba ozoyethula.
6. Singazilungiselela kanjani izintshumayelo zethu?
6 Okulandelayo, vumelana nezimo lapho ulungiselela isethulo sakho. Kungase kusetshenziswe umbuzo ofanele ovusa isithakazelo ohlobene nesihloko ukuze kuqalwe ingxoxo. Ncika njalo emandleni eZwi likaNkulunkulu ukuze uthinte inhliziyo. (Heb. 4:12) Khetha umbhalo ofanelekayo ohlobene nendaba ozoyethula, kutuswa ukuba kube umbhalo okhonjiwe noma ocashunwe esihlokweni ozosikhulumela. Cabangela indlela yokuhlanganisa lowo mbhalo nesihloko.
7. Singaqhubeka kanjani sithuthukisa izintshumayelo zethu?
7 Njalo Lapho Kuvela Ithuba: Ukuze intshumayelo iphumelele ngempela, kumelwe isetshenziswe. Hlanganyela nebandla ekuhambiseni umagazini ngoMgqibelo. Bahambisele abantu abamukela ezinye izincwadi ngokudlule. Njalo bahambisele omagazini labo obafundela iBhayibheli nabanye abantu okungenzeka bakhona lapho wenza impindelo. Ungase ukwazi ukuhambisa omagazini kubantu oxoxa nabo lapho uyothenga, usendleleni, noma lapho ulindile kwadokotela. Thuthukisa izintshumayelo zakho njengoba uzisebenzisa phakathi nayo yonke inyanga.
8. Omagazini INqabayokulinda ne-Phaphama! bayingqayizivele ngaziphi izindlela?
8 INqabayokulinda ne-Phaphama! bangomagazini abayingqayizivele. Baphakamisa uJehova njengoMbusi wendawo yonke. (IzE. 4:24) Baduduza abantu ngezindaba ezinhle zoMbuso kaNkulunkulu futhi bakhuthaza ukholo kuJesu Kristu. (Math. 24:14; IzE. 10:43) Ngaphezu kwalokho, banaka izenzakalo zezwe ezigcwalisa isiprofetho seBhayibheli. (Math. 25:13) Siza abantu ensimini yenu ukuba bazuze kulab’ omagazini ngokulungiselela ukubahambisa njalo lapho kuvela ithuba elifanele!
9. Singasibeka kanjani isisekelo sokwenza impindelo?
9 Lapho uphumelela ekuhambiseni umagazini, noma ngisho ube nengxoxo enobungane ngezinto ezingokomoya nomuntu othile, lungiselela umbuzo noma amazwi ashukumisa ingqondo angase avule indlela yokwenza impindelo nokujabulela enye ingxoxo ngezinto ezingokomoya. Uma sishiseka ekuhlwanyeleni imbewu yeqiniso, singaqiniseka ngokuthi uJehova uyovula izinhliziyo zalabo abafisa ngobuqotho ukumazi futhi bamkhonze.—1 Kor. 3:6.