Ukufinyelela Abantu Abaningi Ngangokunokwenzeka
1. Yini amaKristu okuqala ayenza ukuze afinyelele abantu abaningi ngangokunokwenzeka ngezindaba ezinhle?
1 Abalandeli bakaJesu bokuqala bafuna ukusakaza isigijimi soMbuso ngenkuthalo. Basebenzisa izindlela eziphumelelayo ukuze bafinyelele abantu abaningi ngangokunokwenzeka ngezindaba ezinhle. Abalobi beBhayibheli abangamaKristu babhala imibhalo yabo ephefumulelwe ngesiGreki esivamile, okwakuwulimi olusetshenziswa izizwe ezihlukahlukene eMbusweni WaseRoma. Ngaphezu kwalokho, abashumayeli abashisekayo bangekhulu lesibili nelesithathu C.E. kuqhubeke kungenzeka babengabokuqala ukusebenzisa i-codex, okwakulula kakhudlwana ukuyisebenzisa kunomqulu ogoqwayo lapho bebheka imiBhalo.
2, 3. (a) Ugcwaliseka kanjani u-Isaya 60:16 namuhla? (b) Ubuchwepheshe busetshenziswa kanjani ukuze kuthuthukiswe ukukhulekela okumsulwa?
2 Ukusebenzisa Ubuchwepheshe: Ngomprofethi u-Isaya, uJehova wabikezela: “Ngokuqinisekile uyoncela ubisi lwezizwe.” (Isaya 60:16) Ekugcwalisekeni kwalesi siprofetho namuhla, izinceku zikaJehova zisebenzisa umnotho wezizwe ukuze zithuthukise umsebenzi wokushumayela. Ngokwesibonelo, ngo-1914, kusasele iminyaka ngaphambi kokuba izithombe ezinyakazayo nezikhulumayo zibe ibhizinisi eliphumelelayo kwabezentengiselwano, abaFundi BeBhayibheli baqala ukubonisa “i-Photo-Drama of Creation.” Lo mbukiso wama-slide nezithombe ezinyakazayo, othatha amahora angu-8 futhi onombala nomsindo, wanikeza ubufakazi obunamandla kubantu abayizigidi.
3 Namuhla, abantu bakaNkulunkulu basebenzisa imishini yokunyathelisa enesivinini esikhulu namathuluzi asebenza nge-computer ukuze banyathelise amaBhayibheli nezincwadi zeBhayibheli ngezilimi eziningi. Basebenzisa nezindlela ezisheshayo zokuthutha izincwadi zeBhayibheli ziye ezingxenyeni ezikude zomhlaba, zifinyelele abantu abasemazweni angu-235. Ngomoya wakhe, uJehova uye washukumisela izinceku zakhe ukuba zisebenzise lobo buchwepheshe ngendlela ephumelelayo, ukuze zifinyelele abantu abaningi kunanini ngaphambili ngeqiniso leBhayibheli.
4. Yiluphi ushintsho oluye lwenziwa abanye ukuze bafinyelele abantu abengeziwe ngezindaba ezinhle?
4 Ukushintsha Izimo Zomuntu: Abakhulekeli beqiniso baye bakhuthazwa ukuba bashintshe izimo zabo ukuze bafinyelele abantu abengeziwe ngezindaba ezinhle. Abaningi baye benza ukuphila kwabo kwaba lula ukuze bahlanganyele ngokwengeziwe emsebenzini wokushumayela. Abanye baye bathuthela lapho kunendingeko enkulu khona yabamemezeli boMbuso. Abanye baye bandisa inkonzo yabo ngokufunda ulimi lwakwelinye izwe.
5, 6. Ensimini yenu, yini engenziwa ukuze kufinyelelwe abantu abaningi ngangokunokwenzeka?
5 Ngaphezu kwalokho, singabafinyelela abantu abengeziwe ngezindaba ezinhle ngokushumayela ngesikhathi abantu besemakhaya nalapho bengatholakala khona. Uma ngokuvamile ensimini yenu abantu besuke bengekho emakhaya emini, ungasishintsha yini isimiso sakho ukuze ufakaze kusihlwa? Ingabe zikhona izindawo zomphakathi okungashunyayelwa kuzo? Uke wakuzama yini ukufakaza ngocingo nokufakaza ensimini yamabhizinisi? Ingabe uyawafuna amathuba okufakaza ngokwethukela?
6 Yeka ukuthi sinelungelo elingakanani lokuhlanganyela emsebenzini omkhulu wokushumayela ngegama nangoMbuso kaJehova! Kwangathi singaqhubeka sixoxa nabantu abaningi ngangokunokwenzeka ngeqiniso elinikeza ukuphila eliseZwini likaNkulunkulu.—Math. 28:19, 20.