Siza Izingane Zakho Zithuthuke Enkonzweni
1 Abazali abangamaKristu banomthwalo wemfanelo omkhulu wokuqeqesha izingane zabo enkonzweni kusukela zisencane. Lokhu bangakwenza ngezindlela eziningana. Ezinye izingane ziyakwazi ukubamba ngekhanda ivesi leBhayibheli elifanele zingakakwazi ngisho nokufunda. Lokhu kungaba nethonya elinamandla kwabalalele. Njengoba izingane zikhula, zingenza nokwengeziwe enkonzweni. Bazali, ningazisiza kanjani izingane zenu ukuba zibe nengxenye emsebenzini wokushumayela? Mhlawumbe ukusikisela okulandelayo kuzonisiza ngokwengeziwe.
2 Ngemva kokubingelela, ungase uthi:
◼ “Indodana yami, [isho igama layo], inomBhalo obalulekile engathanda ukuba uwuzwe.” Yona-ke ingase ithi: “Lo mBhalo otholakala kumaHubo ungifundisé igama likaNkulunkulu. [Umntwana ufunda noma asho ngekhanda iHubo 83:18.] Lab’ omagazini bakhuluma ngalokho uJehova uNkulunkulu azosenzela kona. Ngingakushiyela bona?” Ungaphetha ingxoxo ngokuchaza indlela umsebenzi wethu womhlaba wonke osekelwa ngayo.
3 Noma ungase uzame le ndlela:
3◼ “Sawubona. Ngiqeqesha indodakazi yami, [isho igama layo], ukuba ikhathalele abanye abantu emphakathini. Ingathanda ukukushiyela umyalezo omfushane ovela eBhayibhelini.” Yona-ke ingase ithi: “Enye indlela engithanda ukusiza abantu ngayo iwukubaxoxela ngethemba leBhayibheli ngekusasa. [Umntwana ufunda noma asho ngekhanda isAmbulo 21:4.] Lab’ omagazini bachaza lokho uMbuso kaNkulunkulu ozosenzela kona. Ngicabanga ukuthi uzokujabulela ukubafunda.”
4 Ukusebenzisa intshumayelo elula njalo kwenza izingane zilethembe ikhono lazo lokukhuluma ngesigijimi soMbuso. Ukuba nezikhathi zokuprakthiza ekhaya ezigxile ekukhulumeni ngokucacile nangokuzwakalayo kuzozisiza ukuba zikwazi ukukhuluma ngaphansi kwezimo ezihlukahlukene. Ukulungiselela kahle kusengaphambili nokuncoma izingane ngobuqotho kuyozisiza ukuba zikwazi ukukhuluma ngokholo lwazo.
5 Ngokukhuthazwa ngaleyo ndlela, izingane eziningi ziye zakufanelekela ukuba abamemezeli abangabhapathiziwe. Yeka ukuthi kujabulisa kanjani ukubona izingane zethu zithuthuka enkonzweni yobuKristu!—IHubo 148:12, 13.