Umsebenzi Osekelwa NguNkulunkulu
1 Phakathi kwezinceku zikaNkulunkulu namuhla, zimbalwa ezifunde kakhulu, ezicebe kakhulu, noma eziyizilomo kulesi simiso samanje sezinto. Ngenxa yalokho, abanye abantu bayibukela phansi inkonzo yethu. (Isaya 53:3) Nokho, umsebenzi esiwenzayo wokufundisa iBhayibheli uye walethela izigidi zabantu emhlabeni wonke induduzo nethemba. Abantu abavamile baye bayithola kanjani imiphumela emihle kanjalo? Ngenxa yokusekelwa uNkulunkulu kuphela. (Math. 28:19, 20; IzE. 1:8) Umphostoli uPawulu wachaza: “UNkulunkulu wakhetha izinto ezibuthakathaka zezwe, ukuze ahlazise izinto ezinamandla.”—1 Kor. 1:26-29.
2 Iningi labaphostoli namanye amaKristu ekhulu lokuqala ‘lalingafundile’ futhi lingabantu ‘abavamile.’ (IzE. 4:13) Noma kunjalo, bawenza ngesibindi umsebenzi wabo wokushumayela izindaba ezinhle, futhi uJehova wayibusisa imizamo yabo. Naphezu kwezingqinamba zokuphikiswa, “izwi likaJehova laqhubeka likhula futhi linqoba ngendlela enamandla.” Akukho okwakungavimba lo msebenzi ngoba wawusekelwa uNkulunkulu. (IzE. 5:38, 39; 19:20) Kunjalo nanamuhla. Ngisho nokuphikisa okunonya kwababusi abanamandla kuye kwahluleka ukunqanda izindaba ezinhle ukuba zingandi futhi zinqobe.—Isaya 54:17.
3 Lonke Udumo Luya KuNkulunkulu: Kufanele yini sizishaye izifuba ngelungelo elikhethekile esinalo lokuba izikhonzi zikaNkulunkulu? Lutho neze. Ekhuluma ngenkonzo yamaKristu, uPawulu wabhala: “Sinale ngcebo ezitsheni zobumba, ukuze amandla angaphezu kwavamile abe ngakaNkulunkulu angabi ngavela kithi.” (2 Kor. 4:7) UPawulu wakuqaphela ukuthi wakwazi ukufeza inkonzo yakhe kuphela ngamandla awanikwa uNkulunkulu.—Efe. 6:19, 20; Fil. 4:13.
4 Nathi siyaqaphela ukuthi umsebenzi wokushumayela siwenza kuphela ngenxa yokuthi siye ‘sathola usizo oluvela kuNkulunkulu.’ (IzE. 26:22) Ngalokhu kushumayela emhlabeni wonke, uJehova usisebenzisa ngendlela ephawulekayo ukuba sizamazamise izizwe zonke—okuyisixwayiso sembhubhiso yokwahlulela esisemnyango. (Hag. 2:7) Yeka ukuthi sinelungelo elingakanani lokuba ‘yizisebenzi ezikanye noNkulunkulu’ ekuvuneni okukhulu okungokomoya!—1 Kor. 3:6-9.