Ukwandisa Egatsheni LaseNingizimu Afrika
1 Njengamanje, igatsha lalapha eNingizimu Afrika linelungelo lokunyathelisa omagazini abaya emazweni amaningi lapha e-Afrika. Ngaphandle kokunyathelisela insimu yethu, ehlanganisa neBotswana, iLesotho, iNamibia, iSt. Helena neSwaziland, sibuye sinyathelise omagazini nezincwajana eziya e-Angola, eBurundi, eCongo, eMalawi, eMozambique, eZambia naseZimbabwe. Sinyathelisa omagazini ngezilimi ezingu-25.
2 Umkhaya waseBethel wajabula kakhulu lapho uzwa izindaba zokuthi iNdikimba Ebusayo ivumile ukuthengela amagatsha emhlabeni wonke imishini yokunyathelisa emisha engu-7 eyi-rotary web offset enejubane elikhulu yohlobo lwe-MAN Lithoman. Igatsha laseNingizimu Afrika lizothola omunye wale mishini. Lo mshini omusha uzokhiqiza omagazini nezingxenye zezincwadi ezingu-90 000 ngehora. Uzothatha isikhundla se-TKS yethu esineminyaka engu-24 ikhona, ekhiqiza 19 000 ngehora, futhi esinyathelise izigidi eziningi zomagazini nezincwajana. Njengoba le MAN inkulu futhi yesinda kakhulu kunemishini yokunyathelisa esinayo, ngeke yanele esakhiweni esikhona manje.
3 Ngalesi sizathu kumelwe sisandise isakhiwo sokunyathelisa. Ngemvume yeNdikimba Ebusayo sesiqalile ukunweba isakhiwo sokunyathelisa ngamamitha-skwele angu-8 000. Futhi njengoba lo mshini omusha uzofika ngo-April 2004 uvela eJalimane, lesi sakhiwo esisha kumelwe siphele ngo-February ngonyaka ozayo. Ukuze lo msebenzi siwuqede ngesikhathi esifushane kangaka sisebenzisa izinkontileka zangaphandle. Enye ilungisa indawo enye izokwakha isakhiwo ngokwaso. Kulesi sakhiwo esikhulu kuyoba ne-MAN kanye noMnyango Othumela Izincwadi noMnyango Othumela Omagazini, ngoba le minyango idinga indawo eyengeziwe.
4 Ngenxa yejubane elikhulu abazokhiqizwa ngalo omagazini, ngeke sisakwazi ukubancwela, sibabale futhi sibapakishe ngezandla. Kuzofakwa imishini emisha ezokwenza le misebenzi. Ngemizuzu embalwa nje umagazini uzonyatheliswa, ugoqwe, uncwelwe, upakishwe, ubalwe, ufakwe amalebula, usongwe ngepulasitiki futhi ubekwe emapulangweni okupakishela ukuze uthuthwe ngamaloli uye kwamanye amagatsha noma emabandleni alapha eNingizimu Afrika. Kulapha ekugcineni kuphela lapho umagazini uyothintwa khona ngezandla. Ngenxa yobuchwepheshe banamuhla, kuzodingeka abantu abambalwa futhi kongeke nesikhathi. Leli jubane elithé xaxa lisho ukuthi kuningi okungenziwa isikhathi ngasinye. Iphepha elizosetshenziswa lizoba nobubanzi obubuphinda kabili obaleli esilisebenzisa manje futhi lizophela esikhathini esingaphansana kwesigamu sehora.
5 I-MAN Lithoman ingumshini wokunyathelisa omusha kakhulu futhi osezingeni eliphezulu kwetholakalayo ofanelana nezidingo zethu. Ukuze isisekelo sesakhiwo sikwazi ukuthwala isisindo salo mshini esingamathani angu-240, kufanele kumbiwe kwakhiwe isisekelo sikakhonkolo esinohlonze olungamamitha angu-1,6 kuya ku-1,8 esizoba ngamathani angu-700 isisindo.
6 Intuthuko enkulu yezobuchwepheshe izoba ukusetshenziswa kwesimiso okuthiwa i-computer-to-plate (ukunyatheliswa kukangcwecwe ngaphandle kwefilimu), osekuyiyona nqubo esetshenziswayo ezimbonini zokunyathelisa. Zonke izincwadi okufanele zinyatheliswe zizothunyelwa egatsheni nge-computer. Ngesikhashana, umsebenzi ohunyushiwe uzofika uvela e-Angola, eCongo, eZambia noma kubahumushi bethu khona lapha, ufakwe kuyi-template, kwenezelwe izithombe. Ngemva kwalokho, kusetshenziswa lobu buchwepheshe obusha be-computer-to-plate, ukwaziswa kuzodluliselwa ngokuqondile ongcwecweni we-aluminium, ozobe usulungiswa bese ufakwa emshinini wokunyathelisa lapho uzokhiqiza khona amakhophi aleyo ncwadi ayisigidi noma ngaphezulu.
7 Ngeke nje kuphela sinyathelise omagazini nezincwajana ezengeziwe, kodwa iNdikimba Ebusayo inqume ukuthi igatsha lalapha eNingizimu Afrika kufanele futhi liqale ukukhiqizela yonke i-Afrika izincwadi ezinoqwembe oluthambile. Ngalesi sizathu kuvunyiwe ukuba igatsha laseJalimane lisithumelele olunye lochungechunge lwemishini yokuhlanganisa izincwadi elingalusebenzisi njengamanje. Lo mshini, ongamamitha angu-40 ubude, uzokwazi ukuhlanganisa izincwadi ezingangena ephaketheni, njengencwadi Ulwazi, kanye nezincwadi ezinkulu. Lolu chungechunge lokuhlanganisa izincwadi luzofakwa esakhiweni sethu sokunyathelisa esikhona manje uma sekwenziwe izinguquko ezithile. Ngaphezu kwalokho, sizothola umshini onyathelisa ngemibala emine, iHeidelberg Speedmaster enyathelisa iphepha eselisikiwe kakade, ezonyathelisa izembozo zezincwadi nokunye okunemibala emine.
8 Kulokhu okungenhla kusobala ukuthi mkhulu umsebenzi ongaphambi kwethu kodwa sizizwa sinelungelo ukusetshenziswa inhlangano kaJehova ukuba sikhonze abafowethu kwamanye amagatsha la e-Afrika.
9 Zonke lezi zinguquko, imishini esizoyithola kanye nale ntuthuko kubiza imali enkulu. Ivelaphi imali yokukhokhela zonke lezi zinto? Ivela eminikelweni yokuzithandela efakwa ebhokisini elibhalwe ukuthi “Iminikelo Yomsebenzi Womhlaba Wonke—Mathewu 24:14” elikuwo wonke amaHholo OMbuso, naseminikelweni ethunyelwa egatsheni abantu ngabanye namabandla afisa ukubona intando kaNkulunkulu yenziwa. Njengenhlalayenza, lapho kuba nesidingo, izinceku zikaJehova ezithembekile zinikela ngesandla esivulekile. Ngokwesibonelo, cabanga ngesidingo sezinto ezibonakalayo osukwini lukaMose zokwakha itabernakele kanye nazo zonke izinto zalo zokusebenza ezikhazimulayo. (Eks. 35:4-19) Phawula inkulumo ethi “wonke umuntu onenhliziyo ethandayo” evesini 5 nethi “bonke abanenhliziyo ehlakaniphile” evesini 10. Yisimo senhliziyo sama-Israyeli esawenza abonisa ukuzithandela nokuhlakanipha ekunikeleleni umsebenzi kaJehova ngesandla esivulekile. Phawula futhi indlela abantu abenza ngayo ku-Eksodusi 35:20, 21. Zonke izinceku zikaNkulunkulu zanikwa ilungelo lokuba nesandla ekwakhiweni kwetabernakele futhi zanikela ngokwamandla azo.
10 Ngokufanayo, amaKristu okuqala ashukunyiswa ukuba avule isandla lapho epha uJehova, ngoba ayelalela amazwi kaPawulu akweyesi-2 Korinte 9:7: “Yilowo nalowo makenze njengoba nje enqumile enhliziyweni yakhe, kungabi ngokungathandi noma ngaphansi kokucindezelwa, ngoba uNkulunkulu uthanda umuphi onamileyo.” Nakuba kungenzeka ukuthi abanye babecebile, akungabazeki ukuthi iningi kwakungabantu abavamile abangenakho okuningi, kodwa abanikela ngalokho ababenamandla ako. UPawulu wathi: “Ngoba uma ukulungela kukhona kuqala, kwamukeleka ngokukhethekile ngokwalokho umuntu anakho, hhayi ngokwalokho umuntu angenakho.”—2 Kor. 8:12.
11 INqabayokulinda ka-January 15, 1992, ikhasi 18, isigaba 16 yathi: “Bambalwa oFakazi BakaJehova abacebile ngokwezinto ezibonakalayo. Nakuba iningi labo lingase linikele ngemali elinganiselwe ukuze kuthuthukiswe izithakazelo zoMbuso, iminikelo yabo ibalulekile. Lapho uJesu ebona umfelokazi oswele efaka amafadingi amabili emphongolweni owawusethempelini, wathi: ‘Lomfelokazi ompofu ubeké okuningi kunabo bonke. Ngokuba bonke laba [abanye ababenikela] babeka eminikelweni kokuchichimileyo kwabo, kepha yena ebumpofini bakhe ubeké konke abephila ngakho.’ (Luka 21:1-4) Nakuba isipho sakhe sasisincane, wayengumuntu opha ethokoza futhi umnikelo wakhe waziswa.”
12 Konke okwenziwa egatsheni lalapha eNingizimu Afrika njengamanje nasesikhathini esizayo kwenzeka ngoba uJehova ushukumisa izinhliziyo zabesilisa, abesifazane nezingane ezingamaKristu. Yonke imishini esizoyithola, i-MAN neHeidelberg, uchungechunge lokuhlanganisa izincwadi, kanye neminye eminingi edingekayo, sizoyithunyelelwa njengeminikelo evela kwamanye amagatsha ngisho noma izobiza izigidi zamaRandi. Asibongi yini ngalokhu? Konke lokhu kwenzeka ngenxa yomoya wokuphana wabafowethu bakwamanye amazwe. Siyabakhuthaza ngokukhonza kwethu ngokwethembeka lapha e-Afrika, ngezinye izikhathi ngaphansi kwezimo ezinzima, ngakho bayasisiza njengoba kushiwo ngenhla. Ngaleyo ndlela kuba khona “ukulingana.”—2 Kor. 8:14.
13 Kodwa kuthiwani ngezindleko zokunweba isakhiwo sethu sokunyathelisa? Nalokhu kuzobiza amashumi ezigidi zamaRandi. INdikimba Ebusayo ihlele ukuba isinike izimali zokwakha, kodwa ingabe nathi la eNingizimu Afrika singaphonsa esivivaneni salezi zindleko? Abanye babafowethu bayakwenza kakade lokhu ngokufaka umnikelo ebhokisini lomsebenzi womhlaba wonke. Abanye bakhetha ukuyithumela ngqo ehhovisi legatsha iminikelo yabo. Noma ngabe iyiphi indlela yokunikela evumelana nawe, kungaba kuhle sonke sizibuze: “Yini engingayenza ukuze ngisekele umsebenzi, ikakhulukazi ngalesi sikhathi sokwakha?” Ngenxa yalokhu kwandisa bonke abafowethu la e-Afrika, abaningi babo abampofu kakhulu, bazoqhubeka bethola izincwadi nomagazini ababadingayo ukuze batadishe futhi babasebenzise emsebenzini wokushumayela.
14 Sicela ukusebenzisa leli thuba sinibonge ngokusekela kwenu umsebenzi woMbuso kuleli zwe. Sengathi ngenxa yalokhu uJehova angaqhubeka esibusisa sonke ngokomoya.
[Izithombe ekhasini 3]
Umshini wokunyathelisa uqhathaniswa neloli lokuthutha izincwadi
Ubude: amamitha angu-44
Ukuphakama: amamitha angu-5,5
Isisindo: amathani angu-240
Umshini wokunyathelisa i-MAN Lithoman
[Umthombo]
Copyright by MAN Roland Druckmaschinen AG
[Isithombe ekhasini 4]
Umsebenzi wokwakha esakhiweni sokunyathelisa esenezelwayo
[Isithombe ekhasini 4, 5]
“INqabayokulinda” inyatheliswa ngezilimi ezingu-25 egatsheni
IsiVenda
IsiKaonde
IsiFulentshi
Isi-Umbundu
IsiTswana
IsiZulu
IsiNgisi
IsiChewa
IsiSwahili
IsiPutukezi
IsiTsonga
IsiKiluba
IsiTumbuka
IsiPedi
IsiTonga
IsiKirundi
IsiLozi
IsiKwanyama
IsiSuthu
IsiBemba
IsiBhunu
IsiXhosa
IsiLuvale
IsiShona
IsiLingala
[Isithombe ekhasini 5]
Isakhiwo esisha sokunyathelisa esenezelwayo
[Isithombe ekhasini 6]
Usekelwa ngeminikelo yokuzithandela