Qhubeka “Wenza Okuhle”
1 Wénza into enhle lapho uba yinceku kaJehova uNkulunkulu. Nokho, manje kulezi zikhathi ezibucayi inselele iwukuqhubeka “wenza okuhle.” (Gal. 6:9) Nakuba lokhu kudinga umzamo wangempela, ungakwenza. Kanjani?
2 Hlakulela Isimo Sengqondo SikaJesu: NjengoJesu, ungakukhuthazelela ukuvivinywa ngokuhlala ugxile ethembeni loMbuso. (Heb. 12:2, 3) Qiniseka ukuthi uJehova uyakuthanda nokuthi ufuna uphumelele. (2 Pet. 3:9) Methembe ngokugcwele, uqiniseka ukuthi uzokusiza. (1 Kor. 10:13) Phikelela emthandazweni, ucela uJehova ukuba akusize ukhuthazele. (Roma 12:12) Jabula ethembeni lokuthi ukukhuthazela kwakho kuyoholela esimweni esamukelekayo emehlweni kaNkulunkulu. (Roma 5:3-5) Ukwethembeka kwakho ekuhlakuleleni ‘isimo sengqondo esifanayo naleso uKristu Jesu ayenaso’ kuyokulethela ukwaneliseka futhi kwenze inhliziyo kaJehova ijabule.—Roma 15:5; IzAga 27:11.
3 Qhubeka Wenza Izinto Ezifanele: Wasebenzise ngokugcwele amalungiselelo uJehova aye wawenzela abantu bakhe ukuze abasize baqhubeke benza okuhle. Londoloza isimiso esihle somuntu siqu sokufunda iZwi likaNkulunkulu nokutadisha izincwadi ezisekelwe eBhayibhelini zesigaba sesigqila esithembekile nesiqondayo. Ngokwethembeka lungiselela, ube khona futhi uhlanganyele kuyo yonke imihlangano yebandla. Ngaphambi nangemva kwemihlangano yobuKristu, sebenzelana eduze nabafowenu nawodadewenu abangokomoya. Beka imigomo efinyelelekayo enkonzweni yakho ukuze uhlanganyele ngokunenjongo enkonzweni yasensimini futhi uthuthukise amakhono akho ekwethuleni izindaba ezinhle kwabanye.
4 Lena indlela ongaqhubeka ngayo wenza okuhle futhi uthole injabulo enkulu ngesikhathi esifanayo. Ngokuphathelene nalokhu, umzalwane othile e-Italy wathi: “Yiqiniso ukuthi uma sekuhlwile futhi sengibuyela ekhaya ngemva kokuba senkonzweni kaJehova usuku lonke, ngisuke ngikhathale. Kodwa ngiyajabula futhi ngibonga uJehova ngokunginika injabulo okungekho muntu ongangephuca yona.” Ngakho-ke, qhubeka wenza okuhle, nawe uyothola injabulo enkulu.