Ukusebenza Indlu Ngendlu Ngokungakhathali
1 Kwa-Israyeli wasendulo, iminikelo yayinikelwa nsuku zonke. (Eks. 29:38-42) Umlilo we-altare wawuhlala uvutha; intuthu ekhuphukayo ‘yayiyiphunga elimnandi’ elalimjabulisa uJehova. (Eks. 29:18) Namuhla, sikhuthazwa ukuba “sinikele njalonjalo kuNkulunkulu ngaye umhlatshelo wokubonga‚ okungukuthi isithelo sezindebe ezivuma igama lakhe.” (Heb. 13:15) Esikhundleni sokusebenzisa iminikelo eyayifunwa uMthetho, sikhulekela uJehova ngokulandisa udumo lwakhe ngokungakhathali.—Isaya 43:21; IzE. 5:42.
2 UJesu Kristu, uFakazi omkhulu kunabo bonke abake baphila kulomhlaba, wasifundisa ukuthi kufanele sikuqhube kanjani ukukhulekela okuhlanzekile ngokunikela iminikelo yokudumisa. Wafundisa abafundi bakhe ukuthi isigijimi ababesishumayela sasiphuthuma. Wayazi ukuthi indlela ephumelela kakhulu yokufinyelela abantu ngezindaba ezinhle yayingokukhuluma nabo siqu emizini yabo. (Math. 10:7, 12) Ngakho sithola ukuthi abaphostoli balandela isiqondiso sakhe esiphefumlelwe ngokwaphezulu sokushumayela endlini ngendlu.—IzE. 20:20.
3 Kungokufanayo nanamuhla. Njengabafundi bakaJesu, amaKristu eqiniso alandela isibonelo sakhe ngokushumayela izindaba ezinhle endlini ngendlu. Nakuba singagxekwa noma sishushiswe ngenxa yalokho, izigidi ziye zafunda iqiniso futhi amakhulu ezinkulungwane abafundi abasha angena ezinhlwini zesixuku esikhulu unyaka ngamunye, enikeza ubufakazi bokuthi lena indlela kaJehova yokufeza intando yakhe. Yingakho siphikelela enkonzweni yethu.
4 Izinzuzo Zokushumayela Endlini Ngendlu: “UNkulunkulu akabheki ubuso bamuntu . . . omesabayo nowenza ukulunga uyamukeleka kuye.” (IzE. 10:34, 35) Ukuya ngokuqondile endlini ngayinye esensimini yethu ngokusobala kubonisa ukungakhethi, kunikeza wonke umuntu ithuba lokuzwa isigijimi soMbuso njalo. Kanti nabantu abasamukelayo bathola usizo lomuntu siqu kuye ngokwezidingo zomuntu ngamunye.
5 Cishe bonke abamemezeli, kuhlanganise nentsha, asebegugile, ngisho nalabo abasanda kuhlanganyela, bangahlanganyela emsebenzini wendlu ngendlu. Ngalendlela umuntu ngamunye ‘angavuma kube-ngukusindiswa.’ (Roma 10:10) Ukuhlanganyela nabanye enkonzweni yendlu ngendlu kusihlanganisa esibophweni sothando nobunye. Ngesikhathi esifanayo, sinikezwa ithuba lokubonisa ukukhuthazela kwethu lapho sihlangana nabantu abanganaki noma abaphikisayo. Lokhu kubonakaliswa obala kokholo kusenza sibe “umbukwane,” okusiza abantu abaqotho baqaphele ukuthi sinelungiselelo elihlelekile lokufundisa iBhayibheli nokuthi nabo bangazuza kulo. (1 Kor. 4:9) Yonke into ibonisa ngokusobala ukuthi uJehova uyawubusisa umsebenzi wendlu ngendlu futhi yiwona awusebenzisela ukuqoqela isixuku esikhulu “endlini” yakhe yokukhulekela okuhlanzekile.—Isaya 2:2-4.
6 Manje ngaphezu kwanoma isiphi isikhathi emlandweni, abantu badinga ukuzwa isigijimi soMbuso. Masiqhubeke sishumayela endlini ngendlu singakhathali kuze kube yilapho uJehova ethi kwanele. (Isaya 6:11) Ngokwenza kanjalo, siyovuzwa ngenjabulo ebangelwa ukuhlanganyela enkonzweni yendlu ngendlu ebalulekile nezuzisayo kulesisikhathi sokuphela.—1 Kor. 15:58.