Ukubonakalisa Uthando Emhlanganweni “Wokufundisa Kwaphezulu”
1 Abazalwane abangu-99 baseNingizimu Afrika ababeye emhlanganweni okhethekile wezizwe zonke eKiev, e-Ukraine, babuya nemibiko evusa amadlingozi yalowomhlangano oqophe umlando. Kwakunengqikithi yababhapathizwa abangu-7402 okuyinani elikhulu kakhulu kunanini ngaphambili, elingaphezu ngisho nakwelalabo ababhapathizwa emhlanganweni womhlaba wonke eNew York ngo-1958. Izihambeli zaluthola luvelele uthando olufudumele ezaluboniswa abazalwane base-Ukraine naseRussia. Nakuba ulimi lwaluyisithiyo sangempela, abazalwane ababesezingxenyeni zenkundla zabakhuluma isi-Ukraine nesiRussia ngaphambi kokuba isimiso siqale, phakathi namakhefu, nangemva kwaso babevakashela izihambeli zomhlangano ezivela kwamanye amazwe ezingxenyeni zazo zenkundla. Babehlanganyela okuhlangenwe nakho, bethatha izithombe nezihambeli zomhlangano ezivakashile, bephana izipho ezincane njengezinto eziyoba isikhumbuzo. Yeka uthando lobuzalwane abalubonakalisa!
2 Lokhu kufanele kusenze sicabange. Sizoba nezihambeli zomhlangano eziningi ezivela kuwo wonke umhlaba emihlanganweni yethu ekhethekile yezizwe zonke ezoba seCape Town, eThekwini, eGoli, nasePitoli. Ingabe sizozibonisa uthando olufudumele olufanayo kanye nobungane?
3 Futhi sekuyiminyaka eminingi manje sinenkululeko kulelizwe, yokujabulela imihlangano yesigodi ethanyelwa yizo zonke izinhlanga neqhutshwa ngazo zonke izilimi. Siye sakujabulela ukuba ndawonye, ngamunye wethu elalela isimiso ehholo noma engxenyeni yenkundla okukhulunywa kuyo ulimi lwakhe. Ngezikhathi zekhefu, siye sakujabulela ukudla ndawonye kanye nobudlelwane obulinganiselwe. Kodwa isikhathi esiningi siye sahlala ehholo noma engxenyeni yenkundla yolimi lwethu. Asizange senze mzamo ongako wokuvakashela abafowethu abakhuluma ulimi oluhlukile noma abanesizinda sohlanga esihlukile. Izinhlanga ezihlukahlukene kanye namaqembu ezilimi ngokuvamile aye ahlala ndawonye ezingxenyeni zawo. Ngaleyondlela ngezinye izikhathi siye sadlulana nje kweminye yalemihlangano yobuKristu. Ingabe singathuthuka kulokhu eMhlanganweni “Wokufundisa Kwaphezulu” kulonyaka?
4 Yeka amathuba amahle esizoba nawo emhlanganweni wethu, ikakhulukazi emihlanganweni emine yezizwe zonke, ukuze sibonise izwe, ngothando esinalo phakathi kwethu, ukuthi singabafundi bakaKristu ngempela. (Joh. 13:35) Njengamanje eNingizimu Afrika kunenzondo enkulu phakathi kwezinhlanga namaqembu ezizwe ezihlukahlukene. Ngakho sinethuba elihle kakhulu emhlanganweni wethu lokubonisa ukuthi sihlukile, ukuthi asiyona ingxenye yezwe.—Joh. 17:16.
5 Lemihlangano yaminyaka yonke ingamathuba okuba sazane kangcono. Zibuze, ‘Uma ngingumzalwane okhuluma isiZulu, ngibazi kahle kangakanani abafowethu abakhuluma isiNgisi noma isiBhunu? Uma ngingumzalwane okhuluma isiNgisi, ngibazi kahle kangakanani abafowethu abakhuluma isiXhosa, isiSuthu, iSipedi?’ Kodwa ungase uthi, ‘Angilwazi ulimi lwabo. Ngingahlanganyela kanjani nabo ubudlelwane?’ Abazalwane abaningi eNingizimu Afrika okungenani bayawazi amagama ambalwa esiNgisi, kodwa abazalwane abaningi baseRussia nase-Ukraine babengasazi nhlobo isiNgisi. Kwakudingeka bacele abambalwa abasaziyo kancane isiNgisi ukuba babahumushele ingxoxo. Kwakumangalisa ukubona izihambeli zomhlangano zixoxa nabazalwane naphezu kwesithiyo solimi, zisebenzisa izandla ikakhulukazi.
6 Abazalwane baseRussia nase-Ukraine, ababehlukanisiwe nabazalwane abangamaKristu iminyaka eminingi, babefuna nje ukuba nabazalwane babo bakwamanye amazwe ukuze bajabulele ukukhuthazana. Ngokuqinisekile abazange bavakashele abazalwane babo ngenjongo yokuzofuna izinto zokuphiwa, ngisho nakuba abaningi babo babempofu ngokwezinto ezibonakalayo. Kwakuyisifiso sabo sokuba nobudlelwane obungokomoya esenza umhlangano eKiev waba okuhlangenwe nakho abangeke bakukhohlwe labo ababa nelungelo lokuba khona. Ingabe ngamunye wethu angazenzela umgomo wokwazi okungenani umkhaya owodwa noma umuntu okhuluma olunye ulimi noma wesinye isizwe emhlanganweni kulonyaka? Okuthile okwakusiza ngempela ekuqaliseni izingxoxo kwakuwukuthi wonke umuntu wayefake ibheji. Ngakho-ke sikhuthaza wonke umuntu ukuba aqikelele ukuthi uyalifaka ibheji lakhe emhlanganweni.
7 Esinye isifundo esingafundwa kubo ukwazisa okujulile abanakho ngezinto ezingokomoya. Babecula ngokusuka ezinhliziyweni zabo kangangokuba ukucula kwabo kwakuhlokoma kuyo yonke inkundla. Futhi labo bazalwane balazisa kakhulu ilungelo lokucula izingoma zoMbuso obala, kangangokuba babeshaya izandla ngemva kwengoma ngayinye. Babeze bashaye izandla ngisho nangemva komthandazo ngamunye ukuze babonise ukwazisa kwabo! Futhi ihlombe labo lalingesikho nje ukugcina icala; babelishaya isikhathi eside. Ingabe singabonisa ukwazisa okukhudlwana emihlanganweni yethu ekupheleni konyaka? Kanjani? Phakathi kokunye, ngokucula izingoma zethu ezimnandi ngokukhamuluka nangokucacile sidumise uNkulunkulu wethu, uJehova. Zonke izingoma esizozicula zihlelwe esenezelweni se-Nkonzo Yethu YoMbuso ka-October. Yibani nesikhathi sokuprakthiza lezizingoma ukuze sikwazi ukucula ngokusuka ezinhliziyweni emhlanganweni.
8 Iyiphi enye indlela esingabonisa ngayo ukwazisa kwethu? Ngokuhlala ezihlalweni zethu nangokulalelisisa izinkulumo phakathi nazo zonke izingxenye zesimiso. Izihambeli ezivela kwamanye amazwe ezazisemhlanganweni eKiev zacelwa ukuba zihlale ezihlalweni zazo kuso sonke isimiso, ngisho nakuba ingxenye enkulu yaso yayinikezwa ngesiRussia noma isi-Ukraine. Izinkulumo ezimbalwa kuphela ezazinikezwa amalungu eNdikimba Ebusayo kanye nemikhonzo evela kwamanye amagatsha okwanikezwa ngesiNgisi. Zahlala phansi naphezu kokuba senkundleni evulekile elangeni elikhiph’ inhlanzi emanzini, ngaleyondlela zibeka isibonelo esihle. Ingabe nathi singenza isinqumo esiqinile sokuhlala ezihlalweni zethu nemikhaya yethu phakathi nezingxenye zesimiso? UJehova uye wasilungiselela isimiso esihle kakhulu ngenhlangano yakhe. Ngeke sifune ukuphuthelwa yinoma iyiphi ingxenye yaso.