Ukushumayela Izindaba Ezinhle—Ngesimo Sokuthandaza
1 Umphostoli uPawulu wabhalela abaseFilipi ngendlela ekhuthazayo, “Nginamandla ukwenza konke ngaye ongiqinisayo.” (Fil. 4:13) Nathi futhi sidinga ukuthembela kuJehova ngokugcwele ukuze sithole amandla okushumayela izindaba ezinhle ngesibindi. Singakwenza kanjani lokhu?
2 UJesu wagcizelela isidingo ngathi ‘sokukhuleka njalo, singadangali.’ (Luka 18:1) UPawulu wanxusa, “Khulekani ningaphezi.” (1 Thes. 5:17) Yebo, amandla avela emthandazweni. Sidinga ukushumayela izindaba ezinhle ngesimo sokuthandaza. Singase sithandazele amathuba okuba sifakaze kwabanye, ukuhlakanipha nokuqonda emsebenzini wendlu ngendlu, nawokuba siphumelele ekufinyeleleni izinhliziyo zabafundi bethu beBhayibheli. Njengoba kunesidingo esiphuthumayo sokuba izindaba ezinhle zoMbuso zishunyayelwe ngaphambi kokuba ukuphela kufike, sidinga futhi ukuthandazela ukuba izithakazelo zoMbuso ziqhutshekiselwe phambili emhlabeni wonke. (Math. 24:14) Kumelwe ‘sihlale siphapheme’ (NW) emthandazweni ukuze sigweme ukozela okungokomoya futhi sikhulise ukwazisa kwethu ngelungelo lokukhuluma nabanye ngezinjongo zikaJehova.—Kol. 4:2; wZU63 kk. 84-5.
EZIFUNDWENI ZEBHAYIBHELI
3 Kungani umthandazo ubaluleke kakhulu lapho siqhuba isifundo seBhayibheli? Ukuqalisa isifundo ngomthandazo kusibeka esimweni esihle sengqondo, futhi kusiza umfundi ukuba aqaphele ukubaluleka kwalokho okushiwoyo. Ufunda ukubheka kuJehova ukuze athole isiqondiso. Umfundi futhi ufunda indlela yokuthandaza ngesibonelo sethu.—Luka 11:1.
4 Yiziphi ezinye izinto okungaba okufanelekile ukuzihlanganisa emithandazweni ezifundweni zeBhayibheli zasemakhaya? Umthandazo kaJesu oyisibonelo nomthandazo kaPawulu ngenxa yabaseFilipi iyizibonelo ezinhle kakhulu. (Math. 6:9-13; Fil. 1:9-11) Imithandazo yethu akudingeki ibe mide, kodwa kumelwe iphathelane nezinto ezithile ezikhethekile. Kubalulekile ukuba sihlanganise amazwi afanelekayo okudumisa aya kuJehova ngenxa yemisebenzi yakhe emihle kakhulu engenakubalwa. Singabonisa ukuqaphela ubukhulu bakhe, ubukhosi, nezimfanelo zakhe eziphelele. (IHu. 145:3-5) Ukubiza umfundi weBhayibheli ngegama, mhlawumbe uthinte izimo zakhe, kanye nokuthandazela ukuba enze intuthuko engokomoya kungaba nenzuzo. Njengoba ethuthuka, singacela isibusiso sikaJehova emizamweni yakhe yokuba khona emihlanganweni nokuhlanganyela nabanye iqiniso alifundayo. Hlanganisa nezicelo zesibusiso sikaJehova emsebenzini wokushumayela emhlabeni wonke.
NGENXA YABAFOWETHU NODADEWETHU
5 Bonke abantu bakaJehova bayizisebenzi esikanye nazo. (1 Kor. 3:9) Ngakho-ke, lapho iziphathimandla zezwe zifuna ukuphazamisa ukushunyayelwa kwezindaba ezinhle, sishukunyiselwa ukuba sithandazele “amakhosi nabo bonke abakhulu.” Ngenxa yayiphi injongo? “Ukuze sihlale kahle nangokuthula, ngokumesaba uNkulunkulu nangesizotha esipheleleyo.” (1 Thim. 2:1, 2) Empeleni imithandazo enjalo isiza abafowethu emhlabeni wonke. Sithandazela ukuba iziphathimandla zibe nesimo esihle ngasemsebenzini wethu.
6 Ngomthandazo, singabacelela amandla abafowethu abashumayela ngaphansi kwezimo ezinzima kanye nalabo okungenzeka bayagula ngokomoya, ukuba bahlanganyele ngokugcwele enkonzweni. (2 Thes. 3:1, 2) Kuhle futhi ukuthandazela abadala bebandla, ababonisi abajikelezayo, neNdikimba Ebusayo—bonke labo “abakhandlekayo phakathi kwenu.”—1 Thes. 5:12.
7 Ngazo zonke izikhathi sidinga ukuphonsa izinkathazo zethu kuJehova. (IHu. 55:22; 1 Pet. 5:7) Siyaqinisekiswa ukuthi kungakhathaliseki ukuthi yini esiyicelayo ngokuvumelana nentando yakhe, uyosizwa. (1 Joh. 5:14) Ngakho-ke, uma sithandazela usizo lukaJehova lokuba sifeze inkonzo yethu ngokugcwele, kumelwe siqiniseke ukuthi uyolalela futhi enze indlela yethu iphumelele.—2 Thim. 4:5, qhathanisa neNW.