Shiseka Ekusakazeni Isigijimi SoMbuso
1 UJehova unguNkulunkulu wemisebenzi emihle, futhi uyashiseka ekuyifezeni. Konke akwenzayo kuzuzisa labo abamkhonzayo. UJesu wabeka isibonelo esihle ekulingiseni intshiseko kaYise. Ngesinye isikhathi, ukushisekela indlu kaJehova kwamshukumisela ukuba akhiphe ethempelini labo ababelenza indlu yokuthengisa. (Joh. 2:14-17) Nathi ngokufanayo kumelwe sibonise intshiseko enkonzweni yethu eya kuJehova uNkulunkulu uma sifuna ukubhekwa njengabantu ‘abashisekela imisebenzi emihle.’—Thithu 2:14.
2 Imisebenzi emihle yamaKristu izuzisa abanye. Into ezuzisa kakhulu esingayenzela omunye umuntu ukumsiza ukuba azi uJehova futhi amkhonze. (Joh. 17:3) Usizo olunjalo silunikeza ngomsebenzi wethu wokushumayela ngoMbuso nokwenza abafundi ngentshiseko.
3 Iyini intshiseko? Intshiseko iwumfutho. Intshiseko yamaKristu ivela esifisweni esiqotho sokwenza okulungile nokufanele. Igama lesiGreki elithi “intshiseko” lisho “ukubila.” Njengezikhonzi zikaNkulunkulu, kufanele sibonise lemfanelo njengoba sisakaza isigijimi soMbuso. Ingabe siyashiseka enkonzweni? Ingabe senza konke esingakwenza ukuze sisize abanye ukuba bafunde ngezinjongo zikaJehova?
BONISA INTSHISEKO EKUHAMBISENI IZINCWAJANA
4 Phakathi nenyanga ka-August, sizophinde sibe nethuba lokuhambisa noma iyiphi incwajana engangomagazini enamakhasi angu-32 ngaphandle kwethi Isikole NoFakazi BakaJehova. Singase sihambise ethi Jabulela Ukuphila Emhlabeni Phakade!, “Bheka, Ngenza Konke Kube-Kusha!,” Ingabe Kufanele Ukholelwe KuZiqu-zintathu?, IGama LaPhezulu Eliyohlala Phakade, noma ethi Uhulumeni Oyoletha Ipharadesi. Lungiselela ukuhambisa noma iyiphi incwajana engangomagazini ebonakala iyifanelekele kakhulu insimu nomuntu omthola ekhaya.
5 Ukuze sishiseke ekusakazeni isigijimi soMbuso, sidinga ukulungiselela kahle. Ingabe sijwayelene neSihloko Sengxoxo samuva? Singasihlobanisa kanjani iSihloko Sengxoxo nencwajana esiyihambisayo? Imaphi amaphuzu akhethekile asencwajaneni esingawakhulumela? Uma senza isikhathi sokujwayelana nezincwajana ezinhlanu futhi sakhe intshiseko ezingqondweni zethu ngazo, siyohlonyiselwa ukuzihambisa ngentshiseko kulabo abasensimini yethu.
UKUSIKISELA KOKUHAMBISA IZINCWAJANA
6 Ngemva kokuzethula, ungase uthi: “Ingabe wake wazibuza ukuthi uNkulunkulu unendaba yini nobubi obusemhlabeni namuhla? [Lindela impendulo.] IBhayibheli lichaza ukuthi ngokushesha ababi bazobhujiswa. [Funda iHu. 92:7.] Njengoba kunjena, ubani esingaphendukela kuye ukuze sithole isiqondiso sangempela nesivikelo? [Funda iHu. 145:20.] Ngakho okuwukuphela kwendlela esingasinda ngayo iwukuba nobuhlobo noMdali wethu, uJehova uNkulunkulu. Sidinga ukucabangela izibusiso azithembisa sonke isintu esilalelayo.” Khona-ke ungaphenya emfanekisweni 49 encwajaneni ethi Jabulela bese ufunda amagama ahambisana nomfanekiso, uqokomisa izibusiso eziboniswa kuwo. Noma phenya ekhasini 29 encwajaneni ethi Uhulumeni, bese ukhuluma ngezibusiso ezichazwe lapho. Abanye bangase bafise ukusebenzisa izigaba 49 no-50 encwajaneni ethi “Bheka,” ukuze bachaze lokho uMbuso kaNkulunkulu oyokwenzela isintu.
7 Njengoba lezi kuyizikhathi ezinzima, isigijimi esisiphethe siyaphuthuma. Kunesidingo ngathi sokuba sishiseke ekusakazeni isigijimi soMbuso, sikhuthaza abanye ukuba bajwayelane noNkulunkulu neZwi lakhe. Ngokulusakaza ngentshiseko lolulwazi olunika ukuphila, sinikeza ubufakazi bokuzinikela kwethu kokwesaba uNkulunkulu nothando lwethu ngoJehova. Zibuze: ‘Ingabe ngiyayishisekela imisebenzi emihle? Ingabe ukusekela kwami umsebenzi wokushumayela kungachazwa njengokwentshiseko nokomphefumulo wonke?’ Izimpendulo zethu ziyositshela okuningi ngezinga lentshiseko yethu. Uma sihlanganyela kakhulu ekusakazeni isigijimi soMbuso, intshiseko yethu iyoba nkulu. Abanye bayobona ukuthi ngempela singabantu abashisekela imisebenzi emihle.