Bhekisisani Ukuthi Nihamba Kanjani
1 Isimiso esisha somhlangano wesifunda sonyaka wenkonzo ka-1990 siyoqala ngoSeptember. Siyogcizelela ukubaluleka kokubhekisisa indlela esihamba ngayo, ukuphishekela izinto eziletha ukuthula, kanye nokugwema izingibe eziningi ezibekwa endleleni yethu uSathane noquqaba lwakhe, olungokomoya kanye nolungabantu.
2 Ukuhamba endleleni yokulunga akuyikuba lula kulezinsuku zokugcina. Khona-ke, isimiso sezinsuku ezimbili somhlangano wesifunda siyonikeza isikhuthazo neseluleko esisebenzayo ukuze sisize abantu bakaJehova balondoloze ukulinganisela kwabo okungokomoya futhi bazibonakalise bengabagcini bobuqotho.
3 Isihloko somhlangano esithi, “Bhekisisani Ukuthi Nihamba Kanjani,” esisekelwe kwabase-Efesu 5:15,16, siyafaneleka ngempela ekuthuthukiseni nasekunikezeni ukwaziswa okulungiselelwe. Iseluleko siyonikezwa ngezinkulumo, imiboniso, okuhlangenwe nakho, izingxoxo, nemiboniso esangxoxo ebonisa izimo ezingokoqobo. NgoMgqibelo kuyoba nethuba ngabasanda kuzinikezela lokuba babhapathizwe. Khona-ke, labo abalungiselela ukubhapathizwa emhlanganweni wesifunda kumelwe bazise umbonisi owengamele kusengaphambili ukuze kwenziwe amalungiselelo okubukeza nabo imibuzo yabazobhapathizwa.
4 Isici esivelele somhlangano wesifunda inkulumo yeningi enikezwa umbonisi wesigodi. Isihloko senkulumo yakhe siyothi “Abaphathi Bokukhanya Ezweni Elimnyama.” Lengxoxo engokweBhayibheli iyoba nokwaziswa okubalulekile ngabantu abasanda kuthakazela, futhi iyoba ngekhuthazayo kulabo kakade asebekhonza njengezikhonzi zezindaba ezinhle.—Math. 24:14.
5 Umbonisi wenu wesifunda uyonazisa ukuthi umhlangano wenu wesifunda uyoba nini futhi kuphi. Yenzani amalungiselelo aqondile okuba khona kuzo zonke izingxenye zesimiso ngazo zombili izinsuku. Akumelwe silahlekelwe yinoma iyiphi ingxenye yesimiso. UJehova uyoyibusisa imizamo yenu ngokunisiza ukuba nibhekisise ukuthi nihamba kanjani.