Sebenzisa Wonke Amathuba Okufakaza—Ingxenye 1
1 Lapho ebhalela amaKristu angamaHeberu, umphostoli uPawulu wayala: “Masinikele njalonjalo kuNkulunkulu ngaye umhlatshelo wokubonga, okungukuthi isithelo sezindebe ezivuma igama lakhe.” (Heb. 13:15) Enye indlela esingakwenza ngayo lokhu ingokusekela njalo amalungiselelo ebandla lethu enkonzo yasensimini. Enye indlela ephumelelayo yokunikela kuNkulunkulu umhlatshelo wokubonga ingokusebenzisa amathuba okufakaza ngokwethukela.
2 Phakathi nemisebenzi yethu yansuku zonke, abaningi bethu bathintana nabanye abantu. Uma sikuphaphamele ukubona amathuba futhi senze umzamo, kufanele sikwazi ukutshala imbewu eningi yeqiniso loMbuso ngokufakaza ngokwethukela. Ukuqalisa ingxoxo engavula indlela yokunikeza ubufakazi kungase kudinge okungengaphezu kokukhulumela okufushane noma umbuzo ngezimo zezwe noma izinkathazo zendawo. Singase sikwazi ngisho nokuhambisa incwadi kuye ngezimo nangokusabela kwalowomuntu.
YIBA NGOLUNGISELELE
3 Ukufakaza ngokwethukela okuphumelelayo kudinga ukulungiselela kusengaphambili. Ingabe sizimisele ukwenza lowomzamo? Uma sihlola lokho esizokwenza phakathi nosuku, sicabanga ngabantu esingase sihlangane nabo, futhi sicabangela lokho esingase sikusho ukuze siqalise ingxoxo, kufanele sibe abakulungiselele ngokwengqondo futhi sikuthole kulula ukufakaza ngokwethukela. Qiniseka ukuthi unawo amapheshana, omagazini, noma ezinye izincwadi ongase uzinike abasabelayo. Kuthiwani ngeBhayibheli? IBhayibheli elingangena ephaketheni lingena kalula esikhwameni noma ephaketheni lebantshi futhi lingasetshenziswa lapho ithuba liziveza. Ingabe kukhona okunye esingakwenza ukuze sibe abalungiselele kahle?
4 Kufanele sihlale sinolwazi ngezenzakalo ezenzekayo ezihlobene nesiprofetho seBhayibheli futhi sikulungele ukungenisa izihloko zengxoxo zeBhayibheli eziyokhanga kubantu abalambele iqiniso namuhla. Isihloko esithi “Watching the World” kuyiPhaphama! yesiNgisi nesithi “Ukuqondisisa Izindaba” komagazini bethu ziwusizo olubalulekile ngokuqondene nalokhu. Uma sinalezozindaba ezingqondweni, singayethula ngesibindi indaba eyokhanga kwabaningi.
THATHA ISINYATHELO KUQALA
5 Cishe noma isiphi isikhathi lapho sithintana nabantu kusinikeza ithuba lokunikeza ubufakazi. Ngisho nabamemezeli abasezibhedlela baye basizakala ngezimo zabo futhi baphumelela ekukhulumeni ngeqiniso nodokotela, kumanesi, ezisebenzini zasesibhedlela, ezivakashini, nakwezinye iziguli. Abanye abamemezeli basebenzisa isikhathi sabo sekhefu lasemini emsebenzini noma esikoleni nesikhathi abasichitha belindile. Amathuba okufakaza angase avele lapho sithenga, lapho siseholidini, noma sihamba ngebhasi, indiza, noma isitimela. Abanye abamemezeli bayaphumelela ekufakazeni ngokwethukela emakhaya abo lapho kufika abathengisi, abalethe izimpahla, omakhelwane, izihlobo, nabanye.—Bheka iYearbook ka-1970 amakhasi 97-8, 231-2, no-263-4.
6 Ukulazisa okuvela enhliziyweni iqiniso nokuqaphela ukuphuthuma kwezikhathi zethu kufanele kusishukumisele ekubeni sisebenzise wonke amathuba ukuze sihlanganyele nabanye isigijimi esimangalisayo sethemba esinalo. Sengathi singaqhubeka sisebenzisa wonke amathuba ukuze sitshale izimbewu zeqiniso loMbuso ngokufakaza ngokwethukela.—Math. 24:14.