Isibonakaliso Sethu NjengoFakazi BakaJehova

Njengezikhonzi zezindaba ezinhle, saziwa kabanzi njengoFakazi BakaJehova. Ukuhlanganyela kwethu kokuzithandela enkonzweni yasensimini kushukunyiswa uthando ngoNkulunkulu nangomakhelwane. Akwenziwa ngenxa yokuphoqelelwa umuntu othile noma inhlangano kodwa kungokuvumelana nokuthunywa kwethu esikunikwe uNkulunkulu kokushumayela “ivangeli” nokwenza abafundi. (Math. 24:14; 28:19, 20) Ngakho-ke, abamemezeli benza kahle ukugwema ukuzibiza ngokuthi bangamanxusa noma abameleli beJehovah’s Witnesses of South Africa, noma noma iyiphi inhlangano yakuleyondawo esetshenziswa “inceku ethembekileyo neqondayo” ukuze ithuthukise izithakazelo zoMbuso.—Math. 24:45-47.

Uma kwenzeka ingozi noma kuba nesimo esiphuthumayo noma uma kuhlangatshezwana nezinkinga lapho kusetshenzwa amapaki amacaravan, amabhilidi, noma enye insimu ethile, abamemezeli bangase badinge indlela ethile yokuzibonakalisa ngale kokunikeza amagama abo kanye nencazelo emfushane engokomBhalo yohlobo lomsebenzi wethu ongokwenkolo. Uma bebuzwa, noma lapho becelwa izitifiketi, abamemezeli ababhapathiziwe bangasebenzisa ikhadi lesibonakaliso (S-65) elisayinwe umbonisi owengamele, elibonisa ukuthi umuntu ushumayela izindaba ezinhle zoMbuso ehlanganyela ebandleni lakuleyondawo elibhalwe ekhadini.

Amakhadi esibonakaliso (S-65), angase anikezwe abamemezeli lapho kunesidingo, anga-odwa eNhlanganweni. Lelikhadi lesibonakaliso alinikezwa bonke abamemezeli. Uma abamemezeli besebenzisa ikhadi legama lomuntu siqu maqondana nemisebenzi yabo yenkonzo yasensimini, akufanele babhale kulo ukuthi bangabameleli beJehovah’s Witnesses of South Africa.