Ingabe Uyasinikeza Isizathu Sethemba Elikuwe?
1 Muva nje omunye umzalwane wabuzwa, “Ingabe ukholelwa ukuthi inkolo yakho ukuphela kwayo elungile?” Waphendula: “Yebo kunjalo. Ukuba bengingacabangi kanjalo, bengiyokuya kwenye.” Khona-ke waqhubeka echaza ngomusa ukuthi ziyini izinkolelo zoFakazi BakaJehova nezisekelo zazo ezingokomBhalo. Wayelandela isikhuthazo ‘sokuhlala singabalungele ukubaphendula bonke abasibuza isizathu sethemba elikithi, kodwa kube-ngobumnene nangokwesaba.’—1 Pet. 3:15.
2 Nsuku zonke, akhona amathuba okunikeza isizathu sethemba lethu. Emsebenzini, osebenza nabo bangase bazibuze ukuthi kungani ungahlanganyeli ezingxoxweni zabo ezihlazisayo. Esikoleni, othisha noma ofunda nabo bangase bakubuze ukuthi kungani ungawagubhi amaholide. Omakhelwane bangase bakubuze ukuthi kungani uya emihlanganweni kaningi kangaka. Izimo ezinjalo zingase zivule amathuba okusebenzisa iseluleko sikamphostoli uPetru. Uma uye wakulungiselela kusengaphambili ukuphendula, ungase usize ababuzayo abaqotho ukuba bafunde ukukhonza uJehova kanye nathi.
UKUFINYELELA IZINHLIZIYO ZEZILALELI
3 Ukuze uxoxe nabantu, kubalulekile ukuba uthole enivumelana ngakho. Lokho kuyiqiniso kungakhathaliseki ukuthi sisenkonzweni yasensimini noma sixoxa ngokwethukela. Isibonelo esingokweBhayibheli esihle ngokukhethekile sibhalwe kuzEnzo 17:22-31. Qaphela indlela umphostoli uPawulu athola ngayo ngokuhlakanipha zisuka nje lokho ababengavumelana ngakho nendlela akulondoloza ngayo engxoxweni yonke. Ngenxa yalokho, abanye balikholelwa iqiniso.—Bheka Incwadi Yokuchasisa Isikole, amakhasi 156-7, izigaba 15-24.
4 Njengoba uhamba endlini ngendlu phakathi nenyanga kaJanuary, bheka lokho eningavumelana ngakho ukuze uqalise izingxoxo. Sibhekana nezinkinga ezifana nezabaninikhaya. Lezi zihlanganisa ukukhathazeka ngokulondeka kwabantwana bethu nangekusasa labo, ukuntuleka kokuthula kwangempela, ukwanda kobugebengu, nokusetshenziswa kabi kwemilaliso. UMbuso kaNkulunkulu uyikhambi, ngakho iSihloko sethu Sengxoxo siqokomisa ezinye zezibusiso zoMbuso.
5 Amabandla ananoma yiziphi izincwadi ezinamakhasi ayi-192 ezilungiselelwe ukusetshenziswa kulomkhankaso ayozihambisa ngomnikelo ka-R1,00 iyinye. Lapho uhambisa izincwadi ezinjalo, qokomisa ukwazisa okuqondile okugxile eMbusweni kaNkulunkulu. Noma, khetha isahluko esiyothakazelisa futhi uxoxe kafushane nomninikhaya ngephuzu elilodwa noma amabili ayisihluthulelo. Uma zingekho izincwadi ezindala, kungahanjiswa noma iyiphi enye incwadi enamakhasi ayi-192 ngomnikelo ka-R2,00 iyinye.
EZIMPINDELWENI
6 Lapho uphindela uyohlakulela isithakazelo esibonisiwe, yiba okulungele ukusichaza ngokuningiliziwe kakhulu isizathu sethemba lakho. Yakhela kulokho enanivumelene ngakho esikhathini esidlule nomninikhaya. Lalela imibono yakhe. Bonisana naye. Mshiye elindele ukuthi ukuhambela kwesikhathi esizayo kuyomnikeza ukwaziswa okuhle okwengeziwe naye angakhela ithemba kukho.
7 Noma nini lapho kuvuleka indlela yokuba sinikeze isizathu sethemba elikithi, sifuna ukuyisebenzisa ngokuyinzuzo. Kungakhathaliseki ukuthi sibancane noma sibadala, kumelwe sikwazi ukunikeza izizathu ezizwakalayo, ezicacile, ezikholisayo zokholo lwethu. Kwangathi sonke singabonisa ukholo oluqinile ngokusinikeza ngentshiseko isizathu sethemba lethu.