Sebenza NoJehova Usuku Ngalunye

1. Yiziphi izindlela esingasebenza ngazo noJehova?

UMDALI wayefuna ukuba abantu abangenaso isono basebenze naye ukuze kufezwe injongo yakhe. Yize bengaphelele, abantu abaqotho bangakwazi ukusebenza noJehova nsuku zonke. Ngokwesibonelo, siba “yizisebenzi ezikanye noNkulunkulu” ngokushumayela izindaba ezinhle zoMbuso wakhe nangokwenza abafundi. (1 Kor. 3:5-9) Cabanga nje ngethuba eliyigugu esinalo lokubhekwa njengabakufanelekelayo ukubambisana noMdali wezulu nomhlaba emsebenzini awubheka njengobalulekile! Nokho, zikhona ezinye izindlela zokusebenza noJehova ngaphandle kokushumayela nokwenza abafundi. Lesi sihloko sizoxoxa ngezinye izindlela esingasebenza ngazo noNkulunkulu—lapho sisiza imindeni yethu nesikholwa nabo, lapho simema abanye, lapho siba yizisebenzi zokuzithandela nalapho sandisa inkonzo yethu.—Kol. 3:23.

2. Kungani kungekhona ukuhlakanipha ukuqhathanisa lokho okwazi ukukwenzela uJehova nalokho abanye abakwazi ukukweza?

² Njengoba sixoxa ngalesi sihloko, ungaqhathanisi lokho okwazi ukukwenzela uJehova nalokho abanye abakwazi ukukwenza. Khumbula ukuthi ubudala, impilo, izimo namakhono ethu akufani. Umphostoli uPawulu waphefumulelwa ukuba abhale: “Yilowo nalowo makahlole umsebenzi wakhe siqu, khona-ke uyoba nesizathu sokwethaba ngokuqondene naye yedwa, hhayi ngokuziqhathanisa nomunye umuntu.”—Gal. 6:4.

SIZA UMNDENI WAKHO NOKHOLWA NABO

3. Kungani kungathiwa umuntu onakekela umndeni wakhe usebenza noNkulunkulu?

³ UJehova ulindele ukuba izinceku zakhe zinakekele imindeni yazo. Ngokwesibonelo, kungase kudingeke usebenze ukuze unakekele umndeni wakho ngokwezimali. Omama abaningi bahlala emakhaya ukuze banakekele izinsana zabo. Abanye kungase kudingeke banakekele abazali babo asebekhulile. Lena imisebenzi okumelwe siyenze. IZwi likaNkulunkulu lithi: “Uma umuntu engabondli abakubo, ikakhulukazi labo abangamalungu endlu yakhe, uluphikile ukholo futhi mubi kakhulu kunomuntu ongenalo ukholo.” (1 Thim. 5:8) Uma unale mithwalo, cishe ngeke ukwazi ukuchitha isikhathi esiningi emisebenzini yenhlangano ngendlela ongase uthande ngayo. Nokho ungadikibali. UJehova uyajabula lapho uwunakekela umndeni wakho.—1 Kor. 10:31.

4. Abazali bangayibeka kanjani inkonzo kuqala, futhi lokhu kube namiphi imiphumela?

⁴ Abazali abangamaKristu basebenza noJehova lapho besiza izingane zabo ukuba zizibekele imigomo engokomoya. Abaningi abaye benza lokho kamuva baye babona amadodana namadodakazi abo engenela inkonzo futhi ethuthela ezindaweni eziqhelile. Amanye amadodana namadodakazi ayizithunywa zevangeli, amanye akhonza lapho kunesidingo esikhulu sabamemezeli, kanti amanye akhonza eBethel. Ukuqhelelana kusho ukuthi umndeni ngeke ukwazi ukubonana kaningi ngendlela ongase uthande ukubonana ngayo. Noma kunjalo, abazali abazidelayo bakhuthaza izingane zabo ukuba zihlale enkonzweni. Kungani? Kungenxa yokuthi bajabula kakhulu ngokuthi izingane zabo zibeka uJehova kuqala ekuphileni kwazo. (3 Joh. 4) Mhlawumbe abaningi kulaba bazali bazizwa njengoHana, owathi uboleka uJehova indodana yakhe uSamuweli. Laba bazali babheka lokhu njengethuba eliyingqayizivele. Ngeke bathande ukuba izinto zenzeke ngenye indlela.—1 Sam. 1:28.

5. Yiziphi izindlela ongasiza ngazo okhonza nabo ebandleni? (Bheka isithombe esisekuqaleni.)

⁵ Uma ungenayo imithwalo eminingi yomndeni, ungabasiza yini abafowenu nodadewenu okholwa nabo abanakekela abathile abagulayo, asebekhulile noma abanezinye izidingo? Kungani ungabheki ebandleni abantu abadinga usizo? Mhlawumbe ungasiza udade ongumKristu onakekela umzali wakhe osekhulile ngokuchitha isikhathi nomzali lapho udade esayokwenza ezinye izinto. Mhlawumbe ungasiza labo abadinga into yokuya emihlanganweni, ukuya ezitolo, ukuyelwa ezindaweni ezithile, noma abadinga ukuthathwa ukuze bayovakashela othile osesibhedlela. Uma wenza lokho kungenzeka uyobe usebenza noJehova ekuphenduleni umthandazo wothile.—Funda eyoku-1 Korinte 10:24.

NGENISA IZIHAMBI

6. Kusho ukuthini ukungenisa izihambi?

⁶ Abantu abasebenza noNkulunkulu babonakala ngokungenisa izihambi. EmiBhalweni YamaKristu YesiGreki igama elihunyushwe ngokuthi “ukungenisa izihambi” lisho ukubonisa abantu ongabazi umusa. (Heb. 13:2) IZwi likaNkulunkulu lilandisa ngezenzakalo ezisifundisa ukuthanda abanye. (Gen. 18:1-5) Kufanele sihlale siwafuna amathuba okusiza abanye, kungakhathaliseki ukuthi ‘sihlobene nabo okholweni’ noma cha.—Gal. 6:10.

7. Yiziphi izinzuzo oyozithola lapho ubonisa izikhonzi zesikhathi esigcwele umusa?

⁷ Ungasebenza yini noNkulunkulu ngokubonisa umusa kubantu abasenkonzweni yesikhathi esigcwele abadinga indawo yokuhlala? (Funda eyesi-3 Johane 5, 8.) Izikhathi ezinjalo ngokuvamile ziba yizikhathi ‘zokukhuthazana.’ (Roma 1:11, 12) Cabanga ngokwenzeka ku-Olaf. Ukhumbula okwenzeka emashumini eminyaka edlule, ebandleni lakubo wayengekho onendawo yokuhlalisa umbonisi ojikelezayo, owayengashadile. U-Olaf owayesemusha wacela abazali bakhe ababengebona oFakazi ukuba umbonisi ahlale nabo. Bavuma kodwa bathi u-Olaf kumelwe alale kusofa. Lokho akuzange kumkhathaze. U-Olaf uthi: “Lelo kwaba yisonto elimnandi! Mina nombonisi sasivuka njalo ekuseni sixoxe ngezihloko ezimnandi njengoba sidla ukudla kwasekuseni. Isikhuthazo engasithola sakha isifiso sokungenela inkonzo yesikhathi esigcwele.” U-Olaf uye wakhonza ezindaweni eziningi njengesithunywa sevangeli iminyaka engu-40.

8. Kungani kufanele sibe nomusa ngisho nalapho abanye bengabongi? Bonisa.

⁸ Ungabonisa abantu ongabazi uthando ngezindlela eziningi ngisho noma ekuqaleni imizamo yakho ingase inganakwa. Cabanga ngalesi sibonelo. Ngesikhathi eqhuba isifundo seBhayibheli, ummemezeli waseSpain waqaphela ukuthi uYesica owayedabuka e-Ecuador ayefunda naye iBhayibheli, wayelokhu ekhala. Ummemezeli wabuza ukuthi kwenzenjani. UYesica wamtshela ukuthi ngaphambi kokuba athuthele kulelo zwe wayehlupheka kangangokuba ngolunye usuku wayengenakho ukudla. Ukuphela kwento ayengayinika indodakazi yakhe amanzi. UYesica washushuzela ingane yakhe ukuze ilale njengoba ayethandazela usizo. Ngokushesha ngemva kwalokho, oFakazi ababili bamvakashela, kodwa uYesica akabanga nomusa kubo futhi wadabula umagazini odade ababemnike wona. Wababuza: “Ingabe yilokhu ukudla okufanele ngikunike indodakazi yami?” Odade bazama ukumduduza kodwa kwanhlanga zimuka nomoya. Ngemva kwalokho, bashiya ubhasikidi onokudla emnyango. Umusa wabo wamthinta uYesica futhi wazizwa kabi lapho ekhumbula ukuthi akaqaphelanga lapho uNkulunkulu ephendula umthandazo wakhe. Manje wayezimisele ukukhonza uJehova. Ukupha kwalab’ odade kwaba nemiphumela emihle.—UmSh. 11:1, 6.

UKUSEBENZA NGOKUZITHANDELA EMISEBENZINI YENHLANGANO

9, 10. (a) Yiziphi ezinye zezimo ngezikhathi zeBhayibheli ezazidinga izisebenzi zokuzithandela kubantu bakaNkulunkulu? (b) Abazalwane bangasiza ngaziphi izindlela ebandleni namuhla?

⁹ Kwa-Israyeli wasendulo, kwakuba nezimo eziningi ezazidinga izisebenzi zokuzithandela. (Eks. 36:2; 1 IziKr. 29:5; Neh. 11:2) Namuhla, nawe unamathuba amaningi okusebenzisa isikhathi sakho, izinto onazo namakhono ukuze usize abafowenu nodadewenu. Uyojabula kakhulu futhi uthole izibusiso lapho usebenza ngokuzithandela.

¹⁰ IZwi likaNkulunkulu likhuthaza amadoda ebandleni ukuba asebenze noJehova ngokukhonza abanye ngokuba izinceku ezikhonzayo nabadala. (1 Thim. 3:1, 8, 9; 1 Pet. 5:2, 3) Labo abenza lokhu bafuna ukusiza abanye ngokoqobo futhi baqinise ukholo lwabo. (IzE. 6:1-4) Ingabe abadala bake bakubuza ukuthi ungathanda yini ukuba umlindi noma ukusiza ezincwadini, ensimini, ekulungisweni kweHholo noma kokunye? Labo abanakekela lezi zabelo bazokutshela ukuthi akuve kumnandi ukusiza abanye.

11. Udade othile wazuza kanjani kubangane abathola lapho kwakhiwa izakhiwo zenhlangano?

¹¹ Labo abavolontiya emisebenzini yokwakha ngokuvamile baba nabangane abasha. Cabanga ngesibonelo sikaMargie, udade osekhonze iminyaka engu-18 emsebenzini wokwakha amaHholo OMbuso. Phakathi nalesi sikhathi uye wasondeza kuye futhi waqeqesha odade abaningi abasebasha. Uye waqaphela ukuthi lokhu kuyindlela ephumelelayo yokukhuthazana. (Roma 1:12) Ezikhathini ezinzima ekuphileni kwakhe, uMargie uye wakhuthazwa abangane abathole emsebenzini wokwakha. Ingabe wake wavolontiya emsebenzini wokwakha? Kungakhathaliseki ukuthi unalo ikhono noma cha, ungazenza yini utholakale?

12. Ungasekela kanjani lapho kugadle khona inhlekelele?

¹² Lapho kugadla inhlekelele, abantu bakaNkulunkulu baba nethuba lokusebenza noNkulunkulu ngokusiza abafowabo ngokoqobo. Ngokwesibonelo, basekela ngokwezimali labo abathintekile. (Joh. 13:34, 35; IzE. 11:27-30) Enye indlela yokusiza, ukuhlanza isakhiwo noma ukusakha kabusha. Umuzi kaGabriela, udade odabuka ePoland, wacekelwa phansi yizikhukhula, kodwa wajabula lapho abafowethu abasemabandleni angomakhelwane befika bezomsiza. Uthi: “Angifuni ukukhuluma ngokwangilahlekela—lezo kumane kuyizinto ezibonakalayo. Kunalokho, ngifuna ukuxoxa ngalokho engikuzuzile. Lokhu kungiqinisekise ngokuthi ukuba yingxenye yebandla lobuKristu kuyigugu ngempela nokuthi kungumthombo wenjabulo.” Abaningi abasiziwe ngemva kwenhlekelele nabo bathi bazizwa ngendlela efanayo. Labo abasebenza noJehova ukuze basize bathola ukwaneliseka.—Funda izEnzo 20:35; 2 Korinte 9:6, 7.

13. Yisho isibonelo esibonisa indlela ukuvolontiya okungabuqinisa ngayo ubuhlobo bethu noJehova.

¹³ UStephanie nabanye abamemezeli bajabulela ukusebenza noNkulunkulu ngokusiza oFakazi abathuthele e-United States njengababaleki. Baye basiza ekutholeni nasekulungiseni imizi okuzohlala kuyo imindeni ebalekele impi. UStephanie uthi: “Kwasithinta kakhulu ukubona indlela ababejabule ngayo nababebonga ngayo njengoba bebona uthando lobuzalwane olukhona emhlabeni wonke. Imindeni icabanga ukuthi siyisizile kodwa empeleni yithi esisizakele kakhulu. Uthando, ubunye, ukholo nokuthembela kuJehova esiye sakubona kuye kwasenza samthanda nakakhulu uJehova futhi sakwazisa kakhulu lokho esikuthola enhlanganweni yakhe.”

YANDISA INKONZO YAKHO

14, 15. (a) Wayenasiphi isimo sengqondo umprofethi u-Isaya? (b) AmaKristu angasilingisa kanjani isimo sengqondo sika-Isaya?

¹⁴ Ungathanda yini ukusebenza noJehova ngokugcwele? Ungathuthela yini endaweni enesidingo esikhulu sabamemezeli? Kuyiqiniso ukuthi akudingeki ukuba izikhonzi zikaNkulunkulu zihambe amabanga amade ukuze zibonise umusa kwabanye. Nokho, izimo zabanye abafowethu nodadewethu ziyabavumela ukuba baye kude. Isimo sabo sengqondo siyafana nesomprofethi u-Isaya. Ephendula umbuzo kaJehova othi: “Ngizothuma bani, ubani ozosiyela?” wathi: “Nangu mina! Thuma mina.” (Isaya 6:8) Ingabe uyafuna ukwenza okwengeziwe enhlanganweni kaJehova? Ingabe izimo zakho ziyakuvumela? Kukuphi lapho ungasiza khona?

¹⁵ Ngokuphathelene nokushumayela nomsebenzi wokwenza abafundi, uJesu wathi: “Ukuvuna kukhulu, kodwa izisebenzi zimbalwa. Ngakho-ke, ncengani iNkosi yokuvuna ukuba ithumele izisebenzi ekuvuneni kwayo.” (Math. 9:37, 38) Ungakhonza yini endaweni enesidingo esikhulu sabamemezeli, mhlawumbe njengephayona? Noma ungamsiza yini othile ukuba enze kanjalo? Abafowethu nodadewethu abaningi baye bathola ukuthi indlela enhle kakhulu yokubonisa ukuthi bathanda uNkulunkulu nomakhelwane ukuphayona ezindaweni ezinesidingo esikhulu sabamemezeli. Ingabe zikhona ezinye izindlela zokwandisa inkonzo yakho? Ukwandisa inkonzo kuyosenza sijabule.

16, 17. Yimaphi amanye amathuba akhona uma ufisa ukwandisa umsebenzi owenzela uJehova?

¹⁶ Ingabe ungakwazi ukuyokhonza eBethel noma ukusiza emsebenzini wokwakha izakhiwo zenhlangano, usuku olulodwa noma izinsuku eziningana? Kuhlale kunesidingo sabantu abangakhonza uJehova kunoma isiphi isabelo abangase basinikwe. Lokhu kungasho ukwenza isabelo abasinikiwe kungakhathaliseki ukuthi banekhono komunye umsebenzi. UJehova uyawuthanda umoya wokuzidela oboniswa yilabo abazidelayo ukuze bakhonze noma kuphi lapho kunesidingo khona.—IHu. 110:3.

¹⁷ Ingabe unaso isifiso sokuthola ukuqeqeshwa okwengeziwe ukuze uhlonyiselwe ukwenza inkonzo engcwele? Uma kunjalo, kungenzeka uyakufanelekela ukuya eSikoleni Sabashumayeli Bevangeli LoMbuso. Kulesi sikole kuqeqeshwa amadoda nabesifazane abangokomoya abasenkonzweni yesikhathi esigcwele ukuze bakhonze noma kuphi lapho inhlangano ibathumela khona. Labo abafaka izicelo zokuya kulesi sikole kudingeka bakulungele ukwamukela noma yisiphi isabelo lapho bephothula. Ungathanda yini ukusebenzisa leli thuba ukuze wandise inkonzo yakho?—1 Kor. 9:23.

18. Yini ozoyizuza ngokusebenza noJehova nsuku zonke?

¹⁸ Njengabantu bakaJehova, sishukumiseleka ukuba siphe abanye futhi sibakhathalele nsuku zonke—okuyisenzo esibonisa ubuhle, umusa nothando. Lapho senza lokho, umphumela uba injabulo nokuthula. (Gal. 5:22, 23) Kungakhathaliseki ukuthi izimo zakho zinjani, ungajabula uma ulingisa ukupha kukaJehova futhi ube esinye sezisebenzi eziyigugu ezikanye naye.—IzAga 3:9, 10.