Indlela Yokuphila Ngeholo Elincane
U-OBED ungubaba wezingane ezimbili. Usesebenze iminyaka eyishumi ehhotela eliphambili edolobheni elikhulu lase-Afrika futhi ubelokhu enakekela izidingo zomndeni wakhe ngaphandle kwenkinga. Ngezinye izikhathi ubekwazi nokuwuhlelela ukuba uye eholidini eziqiwini ezisezweni lakubo. Konke lokhu kwaphela ngesikhathi elahlekelwa umsebenzi ngenxa yokwehla kwamakhasimende eza ehhotela.
UStephen wayesesebenze iminyaka engaphezu kwengu-22 ebhange elikhulu futhi wayesekhushulelwe esikhundleni sokuba umqondisi. Phakathi kwezinto eziningi inkampani eyamnika zona ngenxa yesikhundla sakhe kwaba umuzi omkhulu, imoto, izisebenzi zasendlini nokufundisa izingane zakhe ezikoleni eziphezulu. Kwathi lapho ibhange lenza ushintsho ezisebenzini zalo wazithola esephelelwe umsebenzi. Uthi: “Mina nomkhaya wami sasingazi ukuthi sithatheni sihlanganise nani, ngagajwa imizwa yokudangala, ukuthukuthela nokukhathazeka.”
Ukuzwa izindaba ezifana nalezi kuyinto ejwayelekile. Ukuwohloka kwezomnotho okwenzeka emhlabeni wonke kuye kwashiya izigidi zabantu ebezihola kahle zingasebenzi. Abaningi abakwazile ukuthola umsebenzi kuye kwadingeka bavume ukwamukela iholo elincane kuyilapho amanani ezinto elokhu enyuke njalo. Kungakhathaliseki ukuthi izwe lithuthukile noma cha, alikho elivikeleke ngokuphelele ekuhlaselweni ukuwohloka kwezomnotho.
Isidingo Sokuhlakanipha Okusebenzayo
Uma sithola iholo elincane noma silahlekelwa umsebenzi kulula ukuba sinqotshwe imizwa yokudangala. Kuyavunywa, umuntu ngeke akwazi ukungakhathazeki nhlobo. Nokho, indoda ehlakaniphile yake yathi: “Ingabe uzibonise udangele ngosuku losizi? Amandla akho ayoba mancane.” (IzAga 24:10) Kunokuba sixhamazele lapho izimo zomnotho ziba zimbi, kudingeka senze njengoba iZwi likaNkulunkulu lisinxusa: ‘Bekelelani ukuhlakanipha okusebenzayo.’—IzAga 2:7.
Nakuba iBhayibheli lingeyona incwadi efundisa ngokuphathwa kwezimali, kodwa iseluleko salo ezindabeni ezinjalo siye sasiza izigidi zabantu emhlabeni wonke. Ake sihlole ezinye zezimiso eziyisisekelo ezitholakala eBhayibhelini.
Balani izindleko. Cabangela amazwi kaJesu atholakala kuLuka 14:28: “Ngubani kini othi efuna ukwakha umbhoshongo angahlali phansi kuqala abale izindleko, ukuze abone ukuthi unakho yini okwanele ukuba awuqede?” Ukusebenzisa lesi simiso kusho ukuba nohlelo lokusebenzisa imali bese unamathela kulo. U-Obed uyavuma ukuthi lokhu kungase kube inselele. Uthi: “Ngisasebenza sasivame ukuthenga izinto eziningi esingazidingi ngempela. Asikaze sibe nohlelo lokusebenzisa imali ngoba imali yayibonakala ingeyona inkinga uma sifuna ukuthenga.” Ukuhlela kusengaphambili kuyokwenza ukuba imadlana ekhona isetshenziselwe izinto ezibalulekile ezidingwa umkhaya.
Shintshani indlela yenu yokuphila. Kuyiqiniso ukuthi ukushintshela endleleni yokuphila okuphansi akulula kodwa kuyadingeka. Isaga seBhayibheli sithi: “Ihlakaniphile indoda eboné inhlekelele iza yase icasha.” (IzAga 22:3, The New English Bible) UStephen uthi: “Ukuze songe imali, mina nomkhaya wami kwadingeka sithuthe emzini wethu siye endlwaneni encane eyayingakaqedwa ukwakhiwa. Izingane kwadingeka zishintshele ezikoleni ezingabizi kakhulu kodwa ezinikeza imfundo ekahle.”
Ukuze niphumelele ekushintsheni izinga lokuphila kubalulekile ukuba nikhulumisane ngokukhululekile njengomkhaya. U-Austin, owasebenza iminyaka engu-9 esikhungweni sezimali ngaphambi kokuba alahlekelwe umsebenzi uthi: “Sinomkami sahlala phansi sabhala izinto esizidinga ngempela. Kwadingeka siyeke ukuthenga ukudla okubizayo, ukuya emaholidini amba eqolo nokuthenga izimpahla ezintsha kungenasidingo. Ngiyajabula ngokuthi umndeni wami wabambisana nami kuzo zonke lezi zinguquko.” Yiqiniso, izingane zingase zingaqondi ngokugcwele ukuthi kungani kwenziwa lezi zinguquko, kodwa nina njengabazali ningazisiza ukuba ziqonde.
Zimiseleni ukwamukela uhlobo olusha lomsebenzi. Uma usujwayele ukusebenza ehhovisi, kungase kungabi lula ukwenza umsebenzi odinga amandla. U-Austin uthi: “Ingqondo yami yakuthola kunzima ukwamukela imisebenzi ephansi, kwazise ngangijwayele izikhundla zokuqondisa enkampanini enkulu.” Lokhu akumangazi uma sicabangela lokho iBhayibheli elikushoyo encwadini yezAga 29:25: “Ukwesaba abantu kubeka ugibe.” Ukuhlale ucabanga ukuthi abantu bazothini ngeke kulingenise isaka lempuphu endlini. Yini engakusiza ukuba unqobe ukwesaba okunjalo?
Kudingeka ukuthobeka. Ngemva kokuba u-Obed ephelelwe umsebenzi ehhotela, waqashwa umuntu ayeke wasebenza naye olungisa izimoto. Lo msebenzi wawumenza ahambe amabanga amade emigwaqweni ewubhuqu efunana nopende wezimoto nezinye izinsimbi. U-Obed uthi: “Ngangingawuthandi nhlobo lo msebenzi kodwa akukho engangingakwenza. Ukuthobeka kwangisiza ukuba ngizivumelanise nawo yize ngangihola ubala uma kuqhathaniswa neholo lami langaphambili, kodwa lwalanele ukunakekela izidingo zomkhaya wami.” Ingabe kungakuzuzisa ukubheka izinto ngendlela efanayo?
Yanelisekani. Esinye isichazamazwi sichaza umuntu owanelisekayo ngokuthi “ojabulayo ngalokho anakho angafuni okwengeziwe.” La mazwi angase abonakale engasebenzi kumuntu obhekene nezinkinga zezimali. Nokho, cabangela amazwi omphostoli uPawulu, isithunywa sevangeli esasazi ukuthi kusho ukuthini ukuswela: “Ngiye ngafunda ukwaneliseka kungakhathaliseki ukuthi ngikuziphi izimo. Ngempela ngiyakwazi ukuphelelwa ukudla, ngiyakwazi ukuba nensada.”—Filipi 4:11, 12.
Kungenzeka izimo zethu zibe ngcono, kodwa kulezi zikhathi ezishintshayo kungenzeka nokuba zibe zimbi kakhulu. Singazuza ngempela uma silalela iseluleko sikaPawulu esiphefumulelwe: “Empeleni, kuyindlela yokuthola inzuzo enkulu, lokhu kuzinikela kokuhlonipha uNkulunkulu kanye nokwaneliseka. Ngakho, uma sinokudla nokokwembatha, siyokwaneliswa yilezi zinto.” Nakuba ayengakhuthazi ubuvila, uPawulu wabonisa ukuthi singakwazi kanjani ukugcina izidingo ezingokwenyama zisendaweni yazo.—1 Thimothewu 6:6, 8.
Umthombo Wenjabulo Yangempela
Injabulo yangempela ayitholakali ngokuqongelela zonke izinto esizifunayo noma ngokuphila ukuphila okuntofontofo. UJesu ngokwakhe wathi: “Kukhona injabulo eyengeziwe ekupheni kunasekwamukeleni.” Yebo, injabulo nokwaneliseka kutholakala ngokusebenzisa esinakho ekusizeni abanye nokubakhuthaza.—IzEnzo 20:35.
UMdali wethu, uJehova uNkulunkulu, uzazi kahle izidingo zethu. EZwini lakhe, iBhayibheli, uye wafaka iseluleko esisebenzayo esiye sasiza abaningi ukuba bathuthukise ukuphila kwabo futhi bakhululeke ekukhathazekeni okungadingekile. Kuyavunywa, akunakwenzeka ukuba isimo somuntu sezimali sivele sisimame ngokuyisimangaliso. Kodwa uJesu waqinisekisa labo abaqhubeka ‘befuna umbuso kaNkulunkulu kuqala nokulunga kwakhe’ ukuthi izidingo zabo zansuku zonke ziyonakekelwa.—Mathewu 6:33.