Lapho Imingcele Ingasho Lutho
OFakazi BakaJehova balwela ukunqoba imingcele ephakathi kwabantu. Balalela isimiso esitholakala emazwini kaJesu awatshela abafundi bakhe: “Nonke nina ningabafowabo bomunye nomunye.” (Mathewu 23:8) Lokhu kubonakala kahle ezindaweni ezimbili zoFakazi zokukhulekela—enye isePortugal, enye iseSpain.
IDOLOBHA elibiyelwe ngodonga laseValença do Minho elisenyakatho yePortugal, lakhiwa ezikhathini eziyingozi. Imibhoshongo yalo ibheke uMfula iMinho ohlukanisa iSpain nePortugal. Ngaphesheya komfula kunedolobha laseSpain okuthiwa iTui, elinesonto elimise okwenqaba. Izinqaba eziyinhloko zaseTui naseValença zakhiwa ngekhulu lesi-17 leminyaka lapho iSpain ibambene ngezihluthu nePortugal.
Ngo-1995, imingcele nokulawulwa kokungeniswa kwempahla phakathi kwala mazwe amabili e-European Union kwasuswa. Kodwa ukuhlanganisa abantu kusho okungaphezu kokuqeda imingcele. Kuhilela izingqondo nezinhliziyo zabo. EValença, kunesakhiwo esincane esikhangayo esibonisa ukuthi imingcele phakathi kwabantu ingaqedwa kanjani. Lesi sakhiwo indawo yokukhulekela—iHholo LoMbuso LoFakazi BakaJehova—okuhlangana kuso amabandla oFakazi akhuluma iSpanishi nesiPutukezi.
Le ndaba yaqala ngo-2001, ngesikhathi oFakazi baseTui bedinga iHholo LoMbuso elisha. Kwadingeka baphume endaweni ababeqashe kuyo futhi babengenayo imali yokwakha ihholo elisha. Babengenayo ngisho imali yokuqasha indawo ngenxa yokuthi babeyibandla elincane. Ngakho labo Fakazi abakhuluma iSpanishi bacela kubafowabo abakhuluma isiPutukezi eValença ukuba bahlanganyele nabo ehholo labo eliqhele ngamakhilomitha ambalwa eTui.
U-Eduardo oyilungu lebandla laseTui eSpain uyakhumbula: “Saxoxa ngale ndaba emhlanganweni owawungo-December 2001. Lapho ngiphuma kulowo mhlangano ngaqaphela ukuthi uJehova wayezithintile izinhliziyo zabafowethu abakhuluma isiPutukezi. Babedele lukhulu ukuze bakhe leli Hholo LoMbuso elikhangayo, futhi kwakuqinisa ukholo ukubona ukuthi bazimisele ukusivumela sihlanganyele nabo.”
U-Américo Almeida, uFakazi okhuluma isiPutukezi owayekhona kulowo mhlangano, uthi: “Sabamukela abafowethu abakhuluma iSpanishi eHholo lethu loMbuso. Sasethemba ukuthi uJehova uyolibusisa leli lungiselelo futhi savumelana ngazwi linye kulesi sinqumo.” OFakazi abasezingxenyeni zombili zomngcele bazwana kakhulu. UPaolo waseValença, uthi: “Kungase kubonakale kungavamile, kodwa asiqapheli nokuthi sivela emazweni angafani. Simane nje singabazalwane abangokomoya.”
Into yokuqala izivakashi eziyiphawulayo phakathi eHholo LoMbuso amawashi afanayo asodongeni abonisa izikhathi ezingafani. ISpain iphambili ngehora elilodwa ePortugal, ukushiyana kwesikhathi yikhona kuphela okwenza abafowethu baseSpain bahluke kwabasePortugal. Kwathi lapho leli hholo lidinga ukulungiswa, iKomiti Yokwakha Yesifunda yaseSpain yaqondisa izisebenzi ezizikhandlayo zabazalwane abavela kuwo womabili lama bandla. UPaolo uyakhumbula: “Abazalwane nodade abaningi abanamakhono beza bazosisiza, abanye babevela ezindaweni eziqhele ngamakhilomitha angaphezu kuka-160. Lo msebenzi waqinisa izibopho zothando kula mabandla.”
Ake sicabangele isibonelo sesibili sokunqoba izinselele zemingcele.
Ubunye Esigodini Esihlukene
IPuigcerdá yidolobha laseSpain eligudle umngcele waseFrance. Isesigodini esivundile esizungezwe izintaba zasePyrenees. Isigodi esaziwa ngokuthi iCerdaña, sake saba yingxenye yeSpain. Kodwa ngo-1659, kwenziwa isivumelwano sokuthula esasaziwa ngokuthi iTreaty of the Pyrenees, iSpain yanika iFrance ingxenye yalesi sigodi.
Namuhla abantu baseFrance bathenga ezitolo zasePuigcerdá, idolobha eliyinhloko lalesi sigodi. Kusukela ngo-1997, oFakazi BakaJehova ePuigcerdá baye bemukela abafowabo abakhuluma isiFulentshi eHholo labo loMbuso. Ngalowo nyaka oFakazi baseFrance kwadingeka bashiye indawo ababeyiqashile. Uma uhamba ngemoto kwakuthatha ihora elilodwa ukuba ufike eHholo LoMbuso eliseduze eFrance futhi phakathi nezinyanga zasebusika indlela yokuya eHholo LoMbuso enqamula entabeni ivame ukulala iqhwa.
Lapho oFakazi baseFrance bechaza ukuthi badinga indawo yokuhlangana, ngokushesha oFakazi baseSpain bavula iHholo labo loMbuso. UPrem, uFakazi wendawo, uyakhumbula: “Bonke abafowethu baseSpain babebheke phambili ekuhlanganyeleni iHholo LoMbuso nabo. Ukuqeqeshwa okungokomBhalo ebesilokhu sikuthola eminyakeni edlule kwasenza saba nesifiso sokufuna ukusizana. Emasontweni ambalwa kamuva, saqala ukuhlanganyela iHholo lethu LoMbuso, futhi besilokhu sindawonye kule minyaka engu-13 edlule.”
U-Eric, ongumdala ebandleni lesiFulentshi uyachaza: “IPuigcerdá yayiyindawo enhle kakhulu yokwakha iHholo LoMbuso. Futhi ngisayikhumbula imfudumalo ibandla elikhuluma iSpanishi elasibonisa yona. Lahlobisa ihholo ngezimbali labeka nombhalo othi, ‘Namukelekile bafowethu nodadewethu abathandekayo.’”
U-Eric uyanezela: “Abantu babecabanga ukuthi ukuvalwa kweHholo lethu loMbuso eFrance kwakusho ukuthi ibandla seliphelile. Kodwa ukushumayela kwethu njalo kule ndawo—okuhlanganisa ukusakaza izimemo ezibamemela emihlanganweni yethu eSpain—kwababonisa ukuthi akunjalo. Abantu abathakazelayo bayakujabulela ukuza ehholo eliseSpain. Ngaphezu kwalokho, kwakhona nje ukuthi sihlanganyela ihholo nabafowethu abakhuluma iSpanishi, kusenze sasondelana nakakhulu. Kuqala, sasazi ukuthi kunebandla leSpanishi ngalé komngcele, kodwa sasingaxhumani njalo nalo. Manje ngenxa yokuthi sibonana njalo, asisazizwa singonkom’ idla yodwa esigodini esisezintabeni.”
Ingabe ukuhluka kwamasiko kwenza izinto zibe nzima? UFakazi ongumFulentshi oseneminyaka engaphezu kuka-80 uyavuma: “Lapho ngizwa ukuthi imihlangano yethu izoqhutshelwa ngaphesheya komngcele eSpain, ngakhathazeka. Kodwa abafowethu basePuigcerdá basamukela ngobungane, lolu shintsho alubanga nankinga nhlobo. Kunalokho, luye lwaba yithuba lokuqinisa ubunye bomhlaba wonke babantu bakaJehova.”
Isisekelo Sobunye
Abasunguli be-European union bathi amalungu amanye amazwe “ayezimisele ukubeka izisekelo zobunye phakathi kwabantu baseYurophu.” Ukususwa kwemingcele ngawo-1980 kuya ko-1990 kwakuhloselwe ukusheshisa lokhu. Nokho, imingcele kusadingeka isuswe nasezingqondweni.
OFakazi BakaJehova basebenza kanzima ukuze basuse ubandlululo nokungathembani. Bayaqonda ukuthi ukungafani kwabo kuyabazuzisa nokuthi “uNkulunkulu akakhethi.” (IzEnzo 10:34) Emihlanganweni yabo yezizwe nasemaHholo abo oMbuso, baye babona ukuthi “kuhle futhi kumnandi kanjani ngabazalwane ukuba bahlale ndawonye ngobunye!” (IHubo 133:1) Ubunye oFakazi baseValença nabasePuigcerdá ababakhile nabafowabo basemazweni angomakhelwane buwubufakazi balokhu.
[Amazwi acashunwe esihlokweni ekhasini 13]
“Kungase kubonakale kungavamile, kodwa asiqapheli nokuthi sivela emazweni angafani. Simane nje singabazalwane abangokomoya”
[Amazwi acashunwe esihlokweni ekhasini 14]
“Lo msebenzi waqinisa isibopho sothando kula mabandla”
[Amazwi acashunwe esihlokweni ekhasini 15]
“Yeka ukuthi kuhle futhi kumnandi kanjani ngabazalwane ukuba bahlale ndawonye ngobunye!” IHUBO 133:1
[Isithombe emakhasini 12, 13]
ITui noMfula iMinho edolobheni elibiyelwe ngezindonga laseValença do Minho
[Isithombe ekhasini 14]
Ukulungisa iHholo LoMbuso
[Isithombe ekhasini 15]
IPyrenees nesigodi saseCerdaña
[Isithombe ekhasini 15]
Abadala bamabandla amabili ahlanganyela eHholo LoMbuso ePuigcerdá—omunye ukhuluma iSpanishi omunye isiFulentshi