“Hlalani Nilindile”—Kungani Kubaluleke Kangaka?

“SIYOBA yini isibonakaliso sokuba khona kwakho nesesiphelo sesimiso sezinto?” (Math. 24:3) Ephendula lowo mbuzo, uJesu wanikeza abafundi bakhe isibonakaliso esicacile, esinemininingwane, esibonakala kalula nesingenakudidaniswa nalutho, njengoba silotshwe kuMathewu isahluko 24, kuMarku isahluko 13 nakuLuka isahluko 21. Wanezela: “Hlalani nilindile.”—Math. 24:42.

Uma isibonakaliso ngokwaso sasiyoba esicace kangaka, kungani anezela lo myalo? Cabanga ngalezi zizathu ezimbili okungenzeka zamenza wanikeza lo myalo. Okokuqala, iziphazamiso zazingase zenze abanye bathambekele ekusishayeni indiva isibonakaliso, kubenze bafe ngokomoya futhi bangaqaphi. Okwesibili, umKristu wayengase azibone izici zesibonakaliso kodwa izimo ezimzungezile zimenze abe nomuzwa wokuthi azimthinti ngokuqondile. Khona-ke, wayengase acabange ukuthi “usizi olukhulu,” umvuthwandaba wesiprofetho sikaJesu, lwalusekude kakhulu, ngakho akukadingeki ukuba ‘ahlale elindile.’—Math. 24:21.

‘Abanakanga’

UJesu wakhumbuza abalandeli bakhe ngabantu bosuku lukaNowa. Kumelwe ukuthi babembona uNowa eshumayela, akha umkhumbi omkhulu, bebubona nobudlova bangalolo suku. Noma kunjalo, iningi labo ‘alinakanga.’ (Math. 24:37-39) Isimo sengqondo esifanayo ngezixwayiso sivamile namuhla. Ngokwesibonelo, izimpawu ezibonisa ijubane elisemthethweni emigwaqweni zicace bha, kodwa abaningi abazinaki. Ngokuvamile iziphathimandla ziphoqeleka ukuba zifake amagqunyana okwehlisa ijubane (speed bump) emigwaqweni yasemadolobheni ukuze ziphoqe abashayeli ukuba behlise ijubane. Ngokufanayo, umKristu angase asibone isibonakaliso sezinsuku zokugcina kodwa aqhubeke enza ngokuphambene nalokho okushiwo isibonakaliso. Lokhu kwenzeka ku-Arielle, intombazane eyevile eminyakeni eyishumi nambili yaseNtshonalanga Afrika.

U-Arielle wayekujabulela ukubuka abesifazane bedlala ibhola lohlobo lukanobhutshuzwayo elidlalwa ngezandla (handball) kuthelevishini. Lapho isikole sakhe sihlela iqembu, ithuba lokudlalela isikole lamenza wangazibona izingozi ezazingaba khona engokomoyeni lakhe. Wabhalisa ukuba unozinti. Yini eyalandela? Uyachaza: “Abanye engangidlala nabo kuleli qembu babenamasoka adla izidakamizwa nabhemayo. Babehlekisa ngami ngoba ngihlukile, kodwa ngazitshela ukuthi ngeke ngizihluphe ngakho. Nginganakile, lo mdlalo waqala ukukhukhula ingokomoya lami. Kwase kuduma wona ekhanda lami futhi ngiwuthanda. Phakathi nemihlangano yobuKristu, ingqondo yami yayivame ukuzula isuke eHholo LoMbuso iye enkundleni ye-handball. Ubuntu bami bobuKristu nabo bawohloka. Angigcinanga ngokuwuthanda kuphela kodwa ngase ngifuna ukunqoba. Ngaziqeqesha kakhulu ukuze nganelise umoya wami wokuncintisana omusha. Ngaqala ukucindezeleka. Ngaze ngadela nabangane bami ngenxa yalo mdlalo.

“Umvuthwandaba waba mhla iqembu esasiqhudelana nalo linikezwa i-penalty komunye umdlalo. Ngama sengilindele ukuba ngivimbe ibhola lingangeni ezintini. Ngazithola sengithandaze kuJehova ngimcela ukuba angisize ngilivimbe! Yilapho ngaqaphela khona ukuthi sengilimele kangakanani ngokomoya. Ngasilungisa kanjani lesi simo?

“Ngangike ngabuka i-DVD yethu enesihloko esithi Young People Ask—What Will I Do With My Life?a Nganquma ukuphinde ngiyibuke, kodwa kulokhu ngikunakisise ekuqukethe. Kakade, isimo engangikuso sasifana nesika-André, insizwa ekuleyo DVD. Ngaqaphela kakhulu lokho umdala asikisela ukuba u-André akwenze—ukufunda nokuzindla ngeyabaseFilipi 3:8. Kwasa kimi. Ngashiya eqenjini lesikole.

“Yeka ukuthi lokho kwenza umahluko ongakanani! Umoya wami wokuncintisana nokucindezeleka okwakuhambisana nawo kwanyamalala. Ngazizwa ngijabule futhi ngasondelana nabangane bami abangamaKristu. Imisebenzi engokomoya yaqala ukuba ebaluleke kakhulu kimi. Ngakwazi ukuphinde ngigxilise ingqondo emihlanganweni yebandla futhi ngiyijabulele. Inkonzo yami nayo yathuthuka. Manje ngivame ukukhonza njengephayona elisizayo.”

Uma kunesiphazamiso esikwenza ungasinaki isibonakaliso esanikezwa uJesu, thatha izinyathelo ezinqala, njengoba kwenza u-Arielle. Ungase uzame ezinye zalezi ezilandelayo. Bheka i-Watch Tower Publications Index, eye yabizwa abanye ngokuthi ibalazwe lokuthola amagugu afihliweyo. Inezikhombo ezizokuholela ezelulekweni ezinengqondo nakokuhlangenwe nakho kwendlela abanye abaye babhekana ngayo ngokoqobo nezilingo. Zuza ngokugcwele emihlanganweni yobuKristu ngokuyilungiselela kahle nangokubhala amaphuzu. Abanye baye bakuthola kuwusizo ukuhlala phambili eduze kwesiteji. Lapho kunenkulumo enemibuzo, zama ukusheshe uphendule. Ngaphezu kwalokho, hlale uphapheme ngokomoya ngokubheka izindaba zamuva bese uzihlobanisa nezici zesibonakaliso nezinye izici ‘zezinsuku zokugcina.’—2 Thim. 3:1-5; 2 Pet. 3:3, 4; IsAm. 6:1-8.

“Yibani Abakulungele”

Isibonakaliso sezinsuku zokugcina sibonakala yonke indawo, “emhlabeni wonke owakhiwe.” (Math. 24:7, 14) Izigidi zihlala ezindaweni ezikhungethwe izifo eziwumshayabhuqe, ukusweleka kokudla, ukuzamazama komhlaba nezinye izenzakalo ezabikezelwa. Nokho, abanye abaningi bahlala ezindaweni ezinokuthula nezingenazigemegeme uma ziqhathaniswa nezinye. Uma singakaze sikuthinte ngokoqobo esinye sezici zesibonakaliso, ingabe kufanele ucabange ukuthi usizi olukhulu lusekude kakhulu? Lokho ngeke kube ukuhlakanipha.

Ngokwesibonelo, cabanga ngalokho uJesu akubikezela ‘ngezifo eziwumshayabhuqe nokusweleka kokudla.’ (Luka 21:11) Okokuqala, akazange athi lezi zinto zaziyokwenzeka yonke indawo kanyekanye noma ngezinga elifanayo. Kunalokho, wathi zaziyokwenzeka “ezindaweni ngezindawo.” Ngakho, ngeke silindele ukuba izenzakalo ezifanayo zenzeke yonke indawo ngesikhathi esisodwa. Okwesibili, ngemva nje kokukhuluma ngokusweleka kokudla, uJesu wabonisa ukuthi abanye abalandeli bakhe kwakuyodingeka baqaphe ukuminza. Wathi: “Qaphelani ukuba izinhliziyo zenu zingalokothi zisindwe ukuminza.” (Luka 21:34) Ngakho, amaKristu akufanele alindele ukuba wonke abhekane nazo zonke izici zesibonakaliso. Kunalokho, uJesu wathi: “Lapho nibona lezi zinto zenzeka, yazini ukuthi umbuso kaNkulunkulu useduze.” (Luka 21:31) Ezokuxhumana zanamuhla zisenza sikwazi ukubona zonke izici zesibonakaliso, kungakhathaliseki ukuthi iziphi ezisithinta ngokoqobo endaweni yakithi.

Khumbula nokuthi uJehova uselubekile kakade ‘usuku nehora’ okuyoqala ngalo usizi olukhulu. (Math. 24:36) Ukuqhubeka kwezenzakalo emhlabeni akunakulushintsha lolo suku.

UJesu wayala amaKristu yonke indawo: “Yibani abakulungele.” (Math. 24:44) Kufanele sihlale sikulungele. Yiqiniso, asinakukwazi ukuhlanganyela emisebenzini engokwasezulwini usuku lonke nsuku zonke. Ngaphezu kwalokho, akekho kithi owaziyo ukuthi sizobe senzani lapho kuqala usizi olukhulu. Kungenzeka ukuthi abanye bayobe besemasimini abo noma bezenzela imisebenzi yasekhaya. (Math. 24:40, 41) Ngakho, yini esingayenza ukuze sibe abakulungele?

U-Emmanuel, uVictorine namadodakazi abo ayisithupha bahlala engxenyeni ye-Afrika izenzakalo eziphawula isibonakaliso ezingenzeki zonke kuyo. Ngakho, banquma ukuba nezingxoxo ezingokomoya nsuku zonke ukuze zibasize babe abakulungele. U-Emmanuel uyachaza: “Kwakunzima ukuthola isikhathi esisilungele sonke. Ekugcineni sakhetha isigamu sehora esiqala ngehora lesithupha ekuseni. Ngemva kokuxoxa ngomBhalo wosuku, silungiselela izigaba ezimbalwa kwenye yezincwadi ezizofundwa emhlanganweni webandla walelo sonto.” Ingabe lesi simiso siye sabasiza ukuba bahlale bephapheme? Impela! U-Emmanuel ungumxhumanisi wendikimba yabadala ebandleni. UVictorine uvame ukukhonza njengephayona elisizayo futhi usesize abantu abaningi ukuba bamukele iqiniso. Wonke amadodakazi abo athuthuka kahle ngokomoya.

UJesu uyasiyala: “Hlalani nibhekile, nihlale niphapheme.” (Marku 13:33) Ungavumeli iziphazamiso zinciphise ukuqapha kwakho ngokomoya. Kunalokho, silalelisise iseluleko esihle esisithola ezincwadini zethu nasemihlanganweni yebandla, njengoba kwenza u-Arielle. Njengomkhaya ka-Emmanuel, zama ukwenza okuthile usuku ngalunye ukuze ube okulungele futhi ‘uhlale ulindile.’

[Umbhalo waphansi]

[Isithombe ekhasini 4]

Izingxoxo ezingokomoya zansuku zonke zisiza u-Emmanuel nomkhaya wakhe ukuba ‘babe abakulungele’