Ingabe UJehova Uyakwazi?
“UJehova uyabazi abangabakhe.”—2 THIM. 2:19.
1, 2. (a) Yini uJesu ayeyikhathalela? (b) Imiphi imibuzo okufanele siyicabangele?
NGOLUNYE usuku umFarisi othile waya kuJesu futhi wambuza: “Yimuphi umyalo omkhulu kunayo yonke eMthethweni?” UJesu waphendula: “Kumelwe uthande uJehova uNkulunkulu wakho ngayo yonke inhliziyo yakho nangawo wonke umphefumulo wakho nangayo yonke ingqondo yakho.” (Math. 22:35-37) UJesu wayemthanda kakhulu uYise osezulwini futhi waphila ngokuvumelana nala mazwi angenhla. UJesu wayekukhathalela nokuma kwakhe noJehova, wabonisa lokhu ngenkambo yakhe yokwethembeka. Ngakho-ke, ngaphambi nje kokuba afe, wayengase asho ukuthi uNkulunkulu wayemazi njengomuntu owayelalela imiyalo yaKhe ngokwethembeka. Lokho kwamenza wahlala othandweni lukaJehova.—Joh. 15:10.
2 Namuhla abantu abaningi bathi bayamthanda uNkulunkulu. Akungabazeki ukuthi yilokho esikushoyo nathi. Nokho, nazi izinto ezibalulekile okufanele sizicabangele: ‘Ingabe uNkulunkulu uyangazi? UJehova ungibheka kanjani? Ngiyaziwa yini ukuthi ngingowakhe?’ (2 Thim. 2:19) Yeka ilungelo esinalo lokwazi ukuthi singaba nobuhlobo obunjalo obuseduze noMbusi wendawo yonke!
3. Kungani abanye bengabaza ukuthi bangaba abakaJehova, futhi yini engabasiza ukuba banqobe lokho kucabanga?
3 Nokho, abanye abamthanda ngempela uJehova bakuthola kuyinselele ukukholelwa ukuthi uNkulunkulu angabazi njengabantu abalungile. Abanye bazizwa bengelutho, ngakho bayakungabaza ukuthi bangaba abakaJehova. Nokho, yeka ukuthi sijabula kangakanani ngokuthi uNkulunkulu usibheka ngendlela ehlukile! (1 Sam. 16:7) Umphostoli uPawulu watshela amaKristu ayekanye nawo: “Uma umuntu emthanda uNkulunkulu, lowo uyaziwa nguye.” (1 Kor. 8:3) Ukuthanda uNkulunkulu kuyimfuneko yokuqala ebalulekile ukuze asazi. Ake ucabange: Kungani ufunda lo magazini? Kungani ulwela ukukhonza uJehova ngenhliziyo, umphefumulo, ingqondo namandla akho onke? Uma uzinikezele kuNkulunkulu futhi wabhapathizwa, yini eyakwenza wathatha lezo zinyathelo? IBhayibheli lithi uJehova, ohlola izinhliziyo, udonsa abafiselekayo. (Funda uHagayi 2:7; Johane 6:44.) Ngakho-ke, ungaphetha ngokuthi ukhonza uJehova ngoba ekudonsile. Akasoze abashiya labo abadonsile uma behlala bethembekile. Ubabheka njengabayigugu futhi ubathanda kakhulu.—IHu. 94:14.
4. Kungani kufanele siqhubeke sizindla ngokwaziwa kwethu uNkulunkulu?
4 Lapho uJehova esesidonsile, kufanele sikhathalele ukuhlala othandweni lwakhe. (Funda uJude 20, 21.) Khumbula, iBhayibheli libonisa ukuthi kungenzeka sikhukhuleke noma siqhele kuNkulunkulu. (Heb. 2:1; 3:12, 13) Ngokwesibonelo, ngaphambi kokuba asho amazwi atholakala kweyesi-2 Thimothewu 2:19, umphostoli uPawulu wakhuluma ngoHimenewu noFiletu. Kusobala ukuthi lawo madoda amabili ake aba akaJehova, kodwa kamuva aphambuka eqinisweni. (2 Thim. 2:16-18) Khumbula nokuthi emabandleni aseGalathiya, abanye ababaziwa uNkulunkulu abazange baqhubeke besekukhanyeni okungokomoya ababekukho. (Gal. 4:9) Kwangathi singelokothe sikuthathe kalula ukuma kwethu noNkulunkulu okuyigugu.
5. (a) Iziphi ezinye zezimfanelo uNkulunkulu azazisayo? (b) Iziphi izibonelo esizoxoxa ngazo?
5 Kunezimfanelo uJehova azazisa ngokukhethekile. (IHu. 15:1-5; 1 Pet. 3:4) Ukholo nokuthobeka kwenza abathile ababaziwa uNkulunkulu bavelela. Ake sihlole izibonelo zamadoda amabili sibone indlela lezi zimfanelo ezawenza ngayo athandeka kuJehova. Sizophinde sixoxe ngendoda eyayicabanga ukuthi yaziwa uNkulunkulu kodwa eyathatha inkambo yokuqhosha yabe isithola ukuthi uJehova useyalile. Singafunda izifundo ezibalulekile kulezi zibonelo.
Uyise Walabo Abanokholo
6. (a) U-Abrahama wabonisa ukholo olunjani ezithembisweni zikaJehova? (b) UJehova wayemazi kanjani u-Abrahama?
6 U-Abrahama wayeyindoda ‘eyaba nokholo kuJehova.’ Empeleni, ubizwa ngokuthi “uyise wabo bonke abanokholo.” (Gen. 15:6; Roma 4:11) Ngokholo, u-Abrahama washiya umuzi wakhe, abangane nezinto ezibonakalayo waya ezweni elikude. (Gen. 12:1-4; Heb. 11:8-10) Ukholo luka-Abrahama lwalusaqinile ngisho nangemva kweminyaka eminingi. Lokhu kwaba sobala lapho elalela umyalo kaJehova enza isenzo ‘esafana nokuthi wayesenikele ngo-Isaka’ indodana yakhe. (Heb. 11:17-19) U-Abrahama wabonisa ukholo ezithembisweni zikaJehova, ngakho waba okhethekile kuNkulunkulu; wamazi ngempela. (Funda uGenesise 18:19.) Akukhona ukuthi uJehova wayazi nje ukuthi kunomuntu okuthiwa u-Abrahama; cha, wamazisa njengomngane wakhe.—Jak. 2:22, 23.
7. Yini ephawulekayo ngokugcwaliseka kwezithembiso zikaJehova, futhi lokho kwamthinta kanjani u-Abrahama?
7 Kuyaphawuleka ukuthi u-Abrahama akazange alithole ifa lezwe alithenjiswa phakathi nokuphila kwakhe. Akazange futhi ayibone inzalo yakhe iba “ngangesihlabathi esisogwini lolwandle.” (Gen. 22:17, 18) Nakuba lezi zithembiso zingazange zigcwaliseke u-Abrahama esaphila, wahlala enokholo oluqinile kuJehova. Wayazi ukuthi uma uNkulunkulu amethembisa, kwakufana nokuthi wayesekufezile. Yebo, u-Abrahama waphila ngokuvumelana nalolo kholo. (Funda amaHebheru 11:13.) Ingabe uJehova usazi njengabantu abanokholo olunjengoluka-Abrahama?
Ukulinda UJehova Kuwuphawu Lokuba Nokholo
8. Iziphi izifiso ezifanelekayo abanye abalangazelela ukuzibona zigcwaliseka?
8 Singase sibe nezifiso esilangazelela ukuzibona zigcwaliseka. Ukushada, ukuba nezingane nokuba nempilo enhle konke kuyizifiso ezingokwemvelo nezifanelekayo. Nokho, kwabaningi lezi zifiso azigcwaliseki zonke. Uma kunjalo kithi, indlela esibhekana ngayo nesimo ingabonisa ukuthi sinokholo olungakanani.
9, 10. (a) Abanye baye bakufuna kanjani ukugcwalisa izifiso zabo? (b) Uzizwa kanjani ngokugcwaliseka kwezithembiso zikaNkulunkulu?
9 Yeka ukuthi kungaba ubuwula kanjani ukufuna ukugcwalisa lezi zifiso ngendlela engqubuzana nokuhlakanipha kukaNkulunkulu. Lokhu kungamlimaza umuntu ngokomoya. Ngokwesibonelo, abanye baye bakhetha izinhlobo zokwelapha ezingqubuzana neseluleko sikaJehova. Abanye baye bamukela umsebenzi obenza babe kude nemikhaya yabo noma bangabi khona emihlanganweni yebandla. Noma, kuthiwani ngokuhlakulela imizwa yothando nomuntu ongakholwa? Uma umKristu elandela inkambo enjalo, ingabe ngempela ufuna ukwaziwa uJehova? UJehova wayeyozizwa kanjani ukube u-Abrahama waphelelwa isineke lapho izithembiso zikaNkulunkulu zingagcwaliseki kuye? Kuthiwani ukube u-Abrahama wazenzela izinto ngendlela yakhe waphinde waphila ukuphila okuzinzile futhi wazenzela igama kunokuba alinde uJehova? (Qhathanisa noGenesise 11:4.) Ingabe uJehova wayeyoqhubeka emazi futhi emthanda?
10 Iziphi izifiso olangazelela ukuzibona zigcwaliseka? Ingabe unokholo oluqine ngokwanele ukuba ulinde uJehova, othembisa ukwanelisa izifiso zakho ezifanele? (IHu. 145:16) Njengoba kwenzeka ku-Abrahama, izithembiso ezithile zikaNkulunkulu zingase zingagcwaliseki ngokushesha njengoba besingathanda. Noma kunjalo, uJehova uyasazisa uma sihlakulela ukholo olunjengoluka-Abrahama futhi senze ngokuvumelana nalo. Ngokuqinisekile, ukwenza kanjalo kuyogcina ngokusizuzisa.—Heb. 11:6.
Umehluko Phakathi Kokuthobeka Nokuqhosha
11. UKhora wayenamaphi amalungelo, okubonisa ukuthi cishe wayenasiphi isimo sengqondo kuNkulunkulu?
11 UMose noKhora babehluke ngokuphelele endabeni yokubonisa inhlonipho ngelungiselelo likaJehova nezinqumo zakhe. Indlela abasabela ngayo yathonya indlela uJehova ababheka ngayo. UKhora wayengumLevi womndeni wamaKohati, futhi wayenamalungelo amaningi cishe ayehlanganisa nokuthi wabona ukukhululwa kwesizwe oLwandle Olubomvu, wasekela isahlulelo uJehova asikhipha kuma-Israyeli ayengalaleli eNtabeni YaseSinayi futhi wayenendima ekuthwaleni umphongolo wesivumelwano. (Eks. 32:26-29; Num. 3:30, 31) Cishe wayeseneminyaka eminingi ethembekile kuJehova futhi ngenxa yalokho abaningi ekamu lakwa-Israyeli babembheka njengesibonelo.
12. Njengoba kuboniswe ekhasini 28, ukuqhosha kwakuthinta kanjani ukwaziwa kukaKhora uNkulunkulu?
12 Noma kunjalo, ngesikhathi isizwe sakwa-Israyeli silibangise eZweni Lesithembiso, uKhora wabona izinto ezithile acabanga ukuthi ziyizinkinga elungiselelweni likaNkulunkulu. Amanye amadoda angu-250 ayevelele esizweni abe esehlanganyela naye emzamweni wokwenza izinguquko. Kumelwe ukuba uKhora nalawa amanye amadoda babenomuzwa wokuthi ubuhlobo babo noJehova bulondekile. Batshela uMose: “Kwanele ngani, ngoba yonke inhlangano ingcwele futhi uJehova uphakathi kwayo.” (Num. 16:1-3) Yeka isimo sengqondo sokuzethemba ngokweqile nokuqhosha! UMose wabatshela: “UJehova uzokwenza kwaziwe ukuthi ngubani ongowakhe.” (Funda uNumeri 16:5.) Lwathi luphela usuku olulandelayo, uKhora nabo bonke labo ababesohlangothini lwakhe ekuhlubukeni base befile.—Num. 16:31-35.
13, 14. UMose wabonisa kanjani ukuthi wayethobekile?
13 Ngokuphambene, uMose “wayemnene ukubadlula kude bonke abantu ababesebusweni bomhlaba.” (Num. 12:3) Wabonisa ubumnene nokuthobeka ngokuzimisela kwakhe ukulandela isiqondiso sikaJehova. (Eks. 7:6; 40:16) Akukho okubonisa ukuthi uMose wayevame ukungabaza indlela kaJehova yokwenza izinto noma ukuthi kwakumcasula ukulandela izinqubo ezibekwe uJehova. Ngokwesibonelo, uJehova wanikeza imiyalo ngisho nemininingwane emincane ngokuphathelene nokwakha itabernakele, njengombala wentambo nenani lezihibe okwakufanele zenziwe ezindwangwini zetende. (Eks. 26:1-6) Uma umbonisi ongumuntu enhlanganweni kaNkulunkulu ebengakunikeza iziqondiso ezibonakala zinanemininingwane yezinto ezincane, lokhu bekungakwenza ngezinye izikhathi uzizwe ukhungathekile. Nokho, uJehova ungumbonisi ophelele, ophathisa izinceku zakhe amalungelo athile ngokukhululekile futhi ozethembayo. Lapho enikeza imininingwane eminingi, ukwenza lokho ngesizathu esihle. Nokho, qaphela ukuthi uMose akazange acasuke lapho uJehova emnikeza ngisho naleyo mininingwane emincane, abe nomuzwa wokuthi uJehova umbukela phansi noma umncisha inkululeko noma ithuba lokusebenzisa ikhono lakhe lokusungula. Kunalokho, uMose waqinisekisa ukuthi ababenza lowo msebenzi “benza kanjalo nje” ekulandeleni iziqondiso zikaNkulunkulu. (Eks. 39:32) Yeka inkambo yokuthobeka! UMose waqaphela ukuthi lona kwakungumsebenzi kaJehova futhi yena wayemane eyithuluzi laKhe lokwenza lowo msebenzi.
14 Ukuthobeka kukaMose kwabuye kwabonakala lapho ebhekene nezimo ezazingezinhle ezazimthinta ngokuqondile. Ngesinye isikhathi uMose wahluleka ukuzithiba futhi wahluleka ukungcwelisa uNkulunkulu lapho esebenzelana naleso sizwe esikhonondayo. Ngenxa yalokho, uJehova wamtshela uMose ukuthi wayengeke esabangenisa abantu eZweni Lesithembiso. (Num. 20:2-12) Kwase kuyiminyaka eminingi yena nomfowabo, u-Aroni, bebekezelela ukukhononda kwama-Israyeli. Manje, ngenxa yokuthi uMose wenza iphutha kuleso senzakalo, wayengeke esakuthola lokho okwakukade ekulindele! Wasabela kanjani? Nakuba kumelwe ukuba wadumala, wazithoba wasamukela isinqumo sikaJehova. Wayazi ukuthi uJehova unguNkulunkulu olungile, okwakungekho ukungabi nabulungisa kuye. (Dut. 3:25-27; 32:4) Lapho ucabanga ngoMose, awumboni yini njengomuntu owayaziwa uJehova?—Funda u-Eksodusi 33:12, 13.
Ukulalela UJehova Kudinga Ukuthobeka
15. Yini esingayifunda enkambweni kaKhora yokuqhosha?
15 Indlela esisabela ngayo ezinguqukweni ezenziwa ebandleni lobuKristu lomhlaba wonke nasezinqumweni ezenziwa yilabo abaholayo kulo inomthelela ekwaziweni kwethu uJehova. UKhora nabangane bakhe bazihlukanisa noNkulunkulu ngenxa yokuzethemba ngokweqile, ukuqhosha nokuntula ukholo. Nakuba uKhora ayebona kunguMose osekhulile owayenza izinqumo zansuku zonke, empeleni nguJehova owayeqondisa isizwe. UKhora akakubonanga lokhu futhi ngenxa yalokho wahluleka ukuba qotho kulabo ababesetshenziswa uNkulunkulu. Yeka ukuthi kwakuyoba ukuhlakanipha kanjani ngoKhora ukube walinda uJehova ukuba acacise izinto noma enze izinguquko uma zazidingeka ngempela. Ngaleyo ndlela, uKhora wonakalisa umlando wakhe wokwethembeka enkonzweni ngezenzo zakhe zokuqhosha!
16. Ukulingisa isibonelo sikaMose sokuthobeka kungakuthinta kanjani ukwaziwa kwethu uJehova?
16 Lokhu kulandisa kuyisixwayiso esingathí sina kubadala nakwabanye ebandleni namuhla. Ukulinda uJehova nokulandela iziqondiso zalabo abamisiwe ukuba bahole kudinga ukuthobeka. Ingabe sizibonisa sithobekile futhi simnene njengoMose? Asinankinga yini yokuqaphela isikhundla salabo abasiholayo nokulalela isiqondiso abasinika sona? Lapho sidumazekile, ingabe siyakwazi ukungavumeli ukuthonywa indlela esizizwa ngayo? Uma senza kanjalo, siyokwaziwa uJehova futhi asithande. Ukuthobeka nokulalela kuyosenza sithandeke kuye.
UJehova Uyabazi Abangabakhe
17, 18. Yini engasisiza ukuba siqhubeke saziwa njengabakaJehova?
17 Kuyazuzisa ukuzindla ngalabo uJehova abadonsa, wabazi futhi wabathanda. U-Abrahama noMose babengaphelele futhi benamaphutha njengathi. Kodwa uJehova wayebazi njengabakhe. Nokho, isibonelo sikaKhora sibonisa ukuthi kungenzeka siqhele kuJehova futhi lokho kwenze ukuba angabe esasazi noma esasamukela. Ngamunye wethu wenza kahle ngokuzibuza: ‘UJehova ungibheka kanjani? Yini engingayifunda kulezi zibonelo eziseBhayibhelini?’
18 Kungakududuza kakhulu ukwazi ukuthi uJehova ubabheka njengabangabakhe abantu abathembekile aye wabadonsa. Qhubeka uhlakulela ukholo, ukuthobeka nezinye izimfanelo eziyokwenza uthandeke ngokwengeziwe kuNkulunkulu wethu. Ngokuqinisekile, ukwaziwa uJehova kuyilungelo eliyigugu eliletha ukwaneliseka ekuphileni kwethu manje, futhi esikhathini esizayo eliyosenza sithole izibusiso ezimangalisayo.—IHu. 37:18.
Ingabe Uyakhumbula?
• Ikuphi ukuma okuyigugu ongaba nakho noJehova?
• Ungalulingisa kanjani ukholo luka-Abrahama?
• Iziphi izifundo esingazifunda kuKhora nakuMose?
[Isithombe ekhasini 26]
Njengo-Abrahama, ingabe sinokholo lokuthi uJehova uyozigcwalisa ngokuphelele izithembiso zakhe?
[Isithombe ekhasini 28]
UKhora wayengazimisele ukuthobeka, alalele isiqondiso
[Isithombe ekhasini 29]
Ingabe uJehova ukwazi njengomuntu othobekile, olalela iziqondiso?