Ingabe Ukuphila Kunayo Injongo Yangempela?
ABANTU abaningi baye babuza lo mbuzo: “Ingabe ukuphila kunayo injongo?” Kuyadabukisa ukuthi kungakhathaliseki ukuthi ukuphila bakubheka kanjani, abaningi baba nomuzwa isazi sezinzwa sase-Austria, uViktor E. Frankl, esawuchaza ngokuthi “umuzwa wokungabi nanjongo nokunganeliseki” ekuphileni.
Kungani abaningi bezizwa ngale ndlela? Esinye isizathu siwukuthi izigidi zabantu emhlabeni wonke ziphila ngaphansi kwezimo ezibuhlungu nezidabukisayo. Usuku ngalunye zibhekana nobubha, izifo, ubudlova obungenangqondo nokucindezelwa. Ngempela ukuphila kwazo ‘kugcwele ukuyaluza,’ njengoba nje noJobe asho ngokuphathelene nokuhlupheka kwabantu. (Jobe 14:1) Umgomo wazo oyinhloko ukuphilela olwanamuhla.
Izigidi zabanye ziphakathi komhlane nembeleko. Zibonakala zinayo yonke into edingekayo ukuze zithole ukwaneliseka kwangempela ekuphileni. Kodwa kwabaningi akunjalo. Kungani? Kungenxa yokuthi njalo nje ‘izinkathazo nezinto ezilimazayo’—izinkinga zemali ezingalindelekile noma izinhlekelele ezibuhlungu, njengokufelwa ingane—kushabalalisa amathemba abo ayigugu nalokho abakufisayo.—IHubo 90:10.
Kunenye into eyenza ube namandla kakhulu lo muzwa owandile “wokungabi nanjongo nokunganeliseki.” Yini leyo? Yiqiniso lokuthi ukuphila kufushane kakhulu. Kwabaningi kuzwakala kungenangqondo ukuthi abantu bakwazi ukwenza izinto ezinkulu, kodwa baphila isikhathi esifushane. Kunzima ngabo ukuqonda iqiniso elibuhlungu sonke esibhekene nalo: Ngisho noma singaphunyuka ezintweni ezimbi kunazo zonke ezehlela abantu, kodwa ukufa kusihlwitha konke esinakho.—UmShumayeli 3:19, 20.
Ingabe Ukuphila Kuyohlale Kubonakala Kungenanjongo?
Inkosi yakwa-Israyeli wasendulo uSolomoni yasifingqa kahle lesi simo. Yabona indlela abantu bosuku lwayo ababezikhandla ngayo besebenzisa amakhono abo ekulimeni, ekuhlakuleni, ekwakheni nasekunakekeleni imindeni yabo, njengoba nje nathi senza namuhla. Empeleni, kunjengokungathi yazibuza lo mbuzo: ‘Iyini injongo yakho konke lokhu?’ Yabe isiphetha ngokuthi konke abantu abakwenzayo “kuyize nokujaha umoya.”—UmShumayeli 2:17, The New English Bible.
Kodwa ingabe iNkosi uSolomoni yayikholelwa ukuthi konke okwenziwa abantu kuyohlale “kuyize nokujaha umoya”? Cha. Yayimane iveza umbono oyiqiniso walokho okwenzeka ekuphileni. Nokho, iZwi likaNkulunkulu eliphefumulelwe lingakunikeza ithemba lokuthi izinto ngeke zihlale zinje!
Ungalithola kanjani lelo themba? Siza ufunde izihloko ezimbili ezilandelayo. Zingase zikusize uqonde ukuthi kungani ukuphila kubonakala kungenanjongo kangaka, ukuthi lesi simo siyolungiswa kanjani nokuthi ungakwenza kanjani ukuphila kwakho kube nenjongo yangempela ngisho kwamanje.