Ingabe Bewazi?
Kungani incwadi yeBhayibheli yoku-1 Korinte ikhuluma ngenyama eyayinikelwe ezithombeni?
▪ Umphostoli uPawulu wabhala: “Konke okuthengiswa emakethe yenyama qhubekani nikudla, ningabuzi ngenxa kanembeza wenu.” (1 Korinte 10:25) Leyo nyama yayivelaphi?
Ukwenziwa kwezilwane imihlatshelo kwakuyingxenye enkulu emathempelini amaGreki namaRoma, kodwa inyama yemihlatshelo yayingadliwa yonke phakathi naleyo mikhosi. Enye yayithengiswa emakethe. Incwadi ethi Idol Meat in Corinth ithi: “Izisebenzi zasemikhosini . . . ngezinye izikhathi zibizwa ngokuthi abapheki noma abasebenza ngenyama. Inyama ezaziyiphiwa njengenkokhelo yokuhlaba izilwane zemihlatshelo zaziyithengisa ezimakethe zenyama.”
Ngakho, akuyona yonke inyama eyayithengiswa ezimakethe eyayisuke isale emikhosini yenkolo. Ngesikhathi kuvubukulwa emakethe yenyama yasePompeii (ngesiLatini, macellum) kwatholakala amathambo ezimvu. Isazi uHenry J. Cadbury sithi lokhu kusikisela ukuthi “kungenzeka kwakuthengiswa nemfuyo ephilayo noma yayihlatshwa futhi ithengiswe khona ezimakethe noma ibe yimihlatshelo yasethempelini.”
Iphuzu likaPawulu laliwukuthi yize amaKristu ayengahlanganyeli ekukhulekeleni kwamaqaba, inyama eyayisuka ethempelini kwakungasho ngempela ukuthi ingcolile.
Kungani amaJuda namaSamariya ayengathelelani amanzi ngesikhathi sikaJesu?
▪ UJohane 4:9 uthi “amaJuda awadlelani namaSamariya.” Lokhu kungathelelani amanzi kubonakala sengathi kwaqala ngesikhathi uJerobowamu emisa ukukhulekelwa kwesithombe embusweni wakwa-Israyeli osenyakatho wezizwe eziyishumi. (1 AmaKhosi 12:26-30) AmaSamariya ayevela eSamariya, inhloko-dolobha yombuso wasenyakatho. Ngesikhathi abase-Asiriya benqoba izizwe eziyishumi ngo-740 B.C.E., bahlalisa izifiki ezingamaqaba eSamariya. Ngokusobala, lokhu kwaholela ekushadeni kwezifiki nabantu bendawo futhi lokho kwakonakalisa nakakhulu ukukhulekela kwamaSamariya.
Ngemva kwamakhulu eminyaka, amaSamariya amelana nemizamo yabathunjwa abangamaJuda ababebuya ekudingisweni eBhabhiloni yokuvuselela ithempeli nezindonga zomuzi waseJerusalema. (Ezra 4:1-23; Nehemiya 4:1-8) Ingxabano engokwenkolo yashuba ngesikhathi amaSamariya ezakhela elawo ithempeli eNtabeni iGerizimu, cishe ngekhulu lesine B.C.E.
Ngosuku lukaJesu, igama elithi “umSamariya” lalibhekisela kakhulu enkolweni kunasendaweni yokuhlala futhi lalisho ilungu lenkolo eyachuma eSamariya. AmaSamariya aqhubeka ekhulekela eNtabeni iGerizimu futhi amaJuda ayewadelela, ewabukela phansi.—Johane 4:20-22; 8:48.
[Isithombe ekhasini 12]
Isitsha sobumba sangekhulu lesithupha B.C.E. esibonisa isilwane esenziwa umhlatshelo
[Umthombo]
Musée du Louvre, Paris
[Isithombe ekhasini 12]
UJerobowamu waqala ukukhulekelwa kwesithombe