Lokho UJesu Akufundisa NgoMbuso KaNkulunkulu

“Wahamba umuzi ngomuzi nomzana ngomzana, eshumayela . . . izindaba ezinhle zombuso kaNkulunkulu.”—LUKA 8:1.

SIYAKUTHANDA ukukhuluma ngezinto ezibalulekile kithina, izinto esizithandayo. UJesu ngokwakhe wathi “umlomo ukhuluma ngokuchichima kwenhliziyo.” (Mathewu 12:34) Uma sicabangela izinto akhuluma ngazo kakhulu phakathi nenkonzo yakhe emhlabeni, singaphetha ngokuthi uMbuso kaNkulunkulu wawubaluleke kakhulu kuye.

Uyini uMbuso kaNkulunkulu? Umbuso unguhulumeni obuswa yinkosi. Ngakho-ke, uMbuso kaNkulunkulu unguhulumeni omiswe uNkulunkulu. UJesu wakhuluma kakhulu ngoMbuso kaNkulunkulu, waba umgogodla wesigijimi sakhe. Elithi uMbuso livela izikhathi ezingaphezu kwezingu-110 emaVangelini amane. Kodwa uJesu akazange afundise ngamazwi kuphela. Izenzo zakhe nazo zafundisa lukhulu ngoMbuso kaNkulunkulu nalokho oyokufeza.

Ingubani iNkosi? INkosi yoMbuso kaNkulunkulu ayikhethwa abantu. Kunalokho, lo Mbusi ukhethwa nguNkulunkulu uqobo. Lapho efundisa, uJesu wembula ukuthi nguyena okhethwe nguNkulunkulu ukuba abe iNkosi.

UJesu wayazi ukuthi iziprofetho zeBhayibheli zazibikezele ukuthi nguMesiya othenjisiwe owayeyobusa eMbusweni oyokuma kuze kube phakade. (2 Samuweli 7:12-14; Daniyeli 7:13, 14; Mathewu 26:63, 64) Khumbula ukuthi uJesu wakubeka ngembaba ukuthi nguyena uMesiya owayebikezelwe. Ngokwenza kanjalo, wayevuma ukuthi uyiNkosi ebekwe uNkulunkulu. (Johane 4:25, 26) Kuyafaneleka ukuthi uJesu wasebenzisa inkulumo ethi “umbuso wami” izikhathi eziningana.—Johane 18:36.

UJesu wafundisa nokuthi kwakuyoba nabanye ababeyobusa naye eMbusweni. (Luke 22:28-30) Wabiza laba babusi ngokuthi ‘umhlambi omncane’ ngenxa yokuthi isibalo sabo sasiyoba sincane. Wathi ngabo: “UYihlo ukwamukele ukuba aninike umbuso.” (Luka 12:32) Incwadi yokugcina yeBhayibheli ibonisa ukuthi bangu-144 000 sebebonke abayoba nelungelo lokubusa noKristu.—IsAmbulo 5:9, 10; 14:1.

Umiswe kuphi lo Mbuso? UJesu wathi kuPontiyu Pilatu, umbusi ongumRoma: “Umbuso wami awuyona ingxenye yaleli zwe.” (Johane 18:36) UMbuso kaNkulunkulu ophethwe nguKristu ngeke umelelwe ababusi abangabantu. Ngokuphindaphindiwe, uJesu wabiza uMbuso kaNkulunkulu ngokuthi “umbuso wamazulu.”a (Mathewu 4:17; 5:3, 10, 19, 20) Ngakho-ke, uMbuso kaNkulunkulu unguhulumeni wasezulwini.

UJesu wayeqiniseka ngokuphelele ukuthi wayezobuyela ezulwini uma sesiphelile isikhathi sakhe emhlabeni. Lapho efika ezulwini, ‘wayezolungisa indawo’ ukuze labo ayobusa nabo babe naye.—Johane 14:2, 3.

Ufezani lo Mbuso? UJesu wafundisa izilaleli zakhe ukuba zithandaze kuNkulunkulu: “Umbuso wakho mawuze. Intando yakho mayenzeke nasemhlabeni, njengasezulwini.” (Mathewu 6:9, 10) Intando kaNkulunkulu iyenzeka ezulwini. UMbuso uyithuluzi alisebenzisayo ukuze afeze injongo yakhe ngomhlaba. Ukuze ufeze lokho, lo Mbuso uyokwenza izinguquko eziphawulekayo emhlabeni.

Yini eyokwenziwa uMbuso emhlabeni? UJesu wafundisa ukuthi uMbuso kaNkulunkulu uyoqeda ububi ngokubhubhisa bonke abenza okubi. (Mathewu 25:31-34, 46) Lokho kuyosho ukuphela kwazo zonke izinhlobo zokungathembeki nobubi. UJesu wafundisa ukuthi umhlaba uyogcwala abantu “abanomoya omnene,” abalungile, abanesihe, “abahlanzekile enhliziyweni” nabanokuthula.—Mathewu 5:5-9.

Ingabe labo bantu abathembekile bayohlala emhlabeni ongcolile? Lutho neze! UJesu wathembisa ukuthi umhlaba uyoguqulwa ngendlela emangalisayo lapho sekubusa uMbuso kaNkulunkulu. Indoda eyayibethelwe eceleni kwakhe yathi: “Jesu, ngikhumbule lapho ungena embusweni wakho.” UJesu wayiphendula: “Ngiqinisile ngiyakutshela namuhla, Uyokuba nami ePharadesi.” (Luka 23:42, 43) Yebo, uMbuso kaNkulunkulu uyoguqula umhlaba wonke ube ipharadesi—elifana nalelo elalikhona ensimini yase-Edene.

Yini enye uMbuso oyoyenzela abantu? UJesu wenza okungaphezu kokumane athembise izinto eziyokwenziwa uMbuso kaNkulunkulu. Wakubonisa lokho oyokwenza. Welapha ngokuyisimangaliso abantu ababephethwe izifo ezihlukahlukene, ngaleyo ndlela enikeza amazwibela okuthi yini ayoyenza phakathi nokubusa koMbuso ngesikhathi esizayo. IVangeli eliphefumulelwe lithi ngoJesu: “Walijikeleza lonke elaseGalile, efundisa emasinagogeni abo futhi eshumayela izindaba ezinhle zombuso, elapha yonke inhlobo yesifo nayo yonke inhlobo yobuthakathaka kubantu.”—Mathewu 4:23.

UJesu welapha izifo ezihlukahlukene. “Wavula amehlo omuntu owazalwa eyimpumputhe.” (Johane 9:1-7, 32, 33) Waphulukisa indoda eyayinesifo sochoko esenyanyekayo ngokuyithinta ngothando. (Marku 1:40-42) Lapho kulethwa kuye ‘umuntu oyisithulu nonamalimi,’ uJesu wabonisa ukuthi wayekwazi ukwenza ‘izithulu zizwe nabangakhulumi bakhulume.’—Marku 7:31-37.

Ngisho nokufa kwakungenamandla okumelana neNkosi emiswe nguNkulunkulu. Kunezindaba ezilotshiwe zabantu abathathu uJesu abavusa ekufeni. Wavusa indodana yomfelokazi okwakuwukuphela kwayo, intombazane eneminyaka engu-12 nomngane wakhe othandekayo uLazaru.—Luka 7:11-15; 8:41-55; Johane 11:38-44.

Echaza ikusasa elihle elizotholwa izikhonzi zoMbuso kaNkulunkulu, uJesu wasebenzisa umphostoli uJohane ukuba abikezele: “Bheka! Itende likaNkulunkulu likanye nabantu, uyohlala nabo, babe ngabantu bakhe. UNkulunkulu ngokwakhe uyoba nabo. Uyosula zonke izinyembezi emehlweni abo, ukufa ngeke kusaba khona, noma ukulila noma ukukhala noma ubuhlungu ngeke kusaba khona. Izinto zangaphambili zidlulile.” (IsAmbulo 1:1; 21:3, 4) Cabanga nje—abantu emhlabeni ngeke besakhaliswa usizi; ubuhlungu nokufa kuyophela! Khona-ke, amazwi omthandazo wokuba intando kaNkulunkulu yenzeke emhlabeni njengoba yenzeka ezulwini ayogcwaliseka.

Uyofika nini uMbuso kaNkulunkulu? UJesu wafundisa ukuthi ukuqala kokubusa kwakhe kwakuyoqondana nesikhathi esiphawulekayo asibiza ngokuthi ‘ukuba khona kwakhe.’ Wanikeza isiprofetho esiningiliziwe ukuze abonise ukuthi wayeyoqala nini ukuba semandleni ombuso. Lesi sikhathi sasiyobonakala ngezinkinga zomhlaba wonke ezihlanganisa izimpi, indlala, ukuzamazama komhlaba, izifo eziwumshayabhuqe nokwanda kokungabi namthetho. (Mathewu 24:3, 7-12; Luka 21:10, 11) Lezi zici nezinye eziningi uJesu azibikezela zabonakala kusukela ngo-1914, unyaka okwagqashuka ngawo iMpi Yezwe I. Ngakho, manje uJesu ubusa njengeNkosi. Maduzane sizofika isikhathi sokuba uMbuso uze futhi ubangele ukuba intando kaNkulunkulu yenzeke emhlabeni.b

Kuyokuthinta kanjani ukuza koMbuso kaNkulunkulu? Lokho kuxhomeke endleleni okhetha ukusabela ngayo esigijimini sikaJesu.

[Imibhalo yaphansi]