Sondela KuNkulunkulu
Kungenzeka Yini Ukuba UNkulunkulu Azisole?
NJENGABANTU abangaphelele, ngezinye izikhathi siyazisola. Ngokwesibonelo, singase sizisole ngemva kokuqaphela ukuthi senze iphutha. Kuyathakazelisa ukuthi iBhayibheli lithi kuyenzeka uJehova azisole noma adabuke. Ungase uthi: ‘Kodwa uNkulunkulu uphelele nje. Akawenzi amaphutha!’ UNkulunkulu uzisola ngamuphi umqondo? Impendulo ingasisiza ukuba siqonde into eyisimanga: UJehova unemizwa futhi esikwenzayo kuyamthinta. Cabangela amazwi alotshwe encwadini yabaHluleli 2:11-18.
Incwadi yeBhayibheli yabaHluleli ilandisa ngesikhathi esinzima kakhulu emlandweni ka-Israyeli. Lesi sizwe sase sihlala eKhanani, izwe uNkulunkulu ayelithembise u-Abrahama. Amakhulu eminyaka amaningana alandela, kunezinto ezine eziphawulekayo ezazenzeka ngokuphindaphindiwe ekuphileni kuka-Israyeli: Wayehlubuka, acindezelwe ezinye izizwe, anxuse uNkulunkulu abese emkhulula.a
Ukuhlubuka. Ethonywa abantu baseKhanani, u-Israyeli ‘wamshiya uJehova’ waqala ukukhonza abanye onkulunkulu; ngokukhethekile ‘ekhonza uBhali nemifanekiso ka-Ashitoreti.’b Lokhu kuhlamuka uJehova kwaholela ekuhlubukeni. Akumangazi ukuthi u-Israyeli ‘wamcasula uJehova,’ uNkulunkulu owayemkhulule eGibhithe!—Amavesi 11-13; AbaHluleli 2:1.
Ukucindezelwa. Ethukuthele kufanele, uJehova wayebe esesisusa isivikelo sakhe. Ngakho, u-Israyeli wayebe esewela “esandleni sezitha zakhe” ezazifike ziphange izwe.—Ivesi 14.
Ukunxusa. Ecindezeleke kakhulu, u-Israyeli wayezisola ngokuphambuka kwakhe abese ekhalela usizo lukaNkulunkulu. Amazwi athi “ngokububula kwakhe ngenxa yabacindezeli bakhe” asibonisa indlela ayemnxusa ngayo uNkulunkulu. (Ivesi 18) Ngemva kokuphambuka, wayemnxusa ngokuphindaphindiwe uNkulunkulu. (AbaHluleli 3:9, 15; 4:3; 6:6, 7; 10:10) UNkulunkulu wayenzenjani?
Ukukhululwa. UJehova wayekuzwa ukububula kuka-Israyeli futhi ‘azisole.’ Igama lesiHebheru elisetshenziswe lapha lingase futhi lihunyushwe ngokuthi “ukudabuka.” (Qhathanisa noGenesise 6:6, iBhayibheli lesiZulu elivamile.) Lapho lihunyushwe ngokuthi “ukudabuka” lisuke lisho “ukushintsha umqondo noma izinhloso.” Enye incwadi ithi: “Ethintwa ukububula kwakhe, uJehova wayehoxisa umqondo wokumjezisa, kunalokho amkhulule.” Ngomusa, ‘wayevusa abahluleli’ ababekhulula abantu bakhe ezitheni zabo.—Ivesi 18.
Uphawulile yini ukuthi kungani uNkulunkulu ayezisola, noma ayeshintsha umqondo? Yingoba abantu bakhe babeshintsha isimo sabo sengqondo. Nasi isibonelo salokhu: Ubaba onothando angase ajezise ingane eyonile, mhlawumbe ngokuyigodlela izinto ezithile ezithandayo. Kodwa lapho ebona ukuthi izisola ngempela, ubaba angase anqume ukuyibuyisela lezo zinto ebigodlelwe zona.
Yini esiyifunda ngoJehova kule ndaba? Nakuba isono sangamabomu simthukuthelisa, abantu abaphendukayo bamshukumisela ukuba abonise isihe. Kuyasangulukisa ukucabanga ukuthi izinto esizenzayo zingayithinta imizwa kaNkulunkulu. Ngakho, zinike isikhathi sokufunda indlela ‘ongayijabulisa ngayo inhliziyo’ kaJehova. (IzAga 27:11) Awusoze wazisola.
[Imibhalo yaphansi]
a Incwadi yabaHluleli 2:11-18 isinikeza amazwibela endlela u-Israyeli ayeziphatha ngayo, futhi lokho kuziphatha kuchazwa ngokuningiliziwe ezahlukweni ezilandelayo zale ncwadi.
b UBhali wayengunkulunkulu wamaKhanani ovelele, futhi u-Ashitoreti wayengunkulunkulukazi owayebhekwa njengomkaBhali.