Ngathola Injongo Yokuphila

Njengoba ilandiswa uGaspar Martínez

Ngandlela-thile, ukuphila kwami kuyefana nokomfana ompofu wasemaphandleni oya edolobheni afike achume. Kodwa uzobona ukuthi ngaqongelela ingcebo ethe ukwehluka kwengangiyibabele.

NGAKHULELA emaphandleni akwahlongasibi ngawo-1930 esifundeni saseRioja enyakatho neSpain. Kwadingeka ngiyeke esikoleni ngineminyaka eyishumi, kodwa ngase ngikwazi ukufunda nokubhala. Mina nabafowethu nodadewethu abayisithupha sasichitha izinsuku zethu sisemadlelweni seluse izimvu noma silima iziqeshana zamasimu asekhaya.

Ububha basenza sacabanga kakhulu ngezinto ezibonakalayo. Sasinomona ngalabo ababenokuningi kunathi. Kuyathakazelisa nokho ukuthi umbhishobhi wethu wake wathi indawo yakithi “yayikholwe kakhulu kunazo zonke izindawo ayezengamele.” Wayengazi ukuthi ngokuhamba kwesikhathi abaningi babeyolishiya iSonto LamaKatolika.

Ukufuna Okuthile Okungcono

Ngashada noMercedes, intombazane yasendaweni. Kungakabiphi, saba nomfana okwakufanele simkhulise. Ngo-1957 sathuthela edolobheni elalibudebuduze laseLogroño futhi ngokuhamba kwesikhathi wonke umndeni wakithi wasilandela. Ngasheshe ngabona ukuthi njengoba ngangingenawo amakhono engangiwafundele, ayemancane amathuba okuba ngithole iholo elibhekile. Ngazibuza ukuthi ngizolutholaphi usizo. Ngaqala ukuya emtatsheni wezincwadi wendawo, nakuba ngangingazi ngempela ukuthi ngifunani.

Kamuva, ngezwa ngohlelo oluthile lomsakazo olwalunikeza abantu izifundo zeBhayibheli ngeposi. Ngemva nje kokuba sengiziqedile, kweza amaProthestani Obuvangeli ezongibona. Ngemva kokuya esontweni lawo izikhathi ezimbalwa, ngabona ukuthi kunombango phakathi kwamalungu avelele alelo qembu. Angibange ngisaphindela, ngiphetha ngokuthi kumelwe ukuba zonke izinkolo ziyefana.

Kusuka Inkungu Emehlweni

Ngo-1964 kwafika insizwa ethile egama layo lingu-Eugenio kwami. Yayingomunye woFakazi BakaJehova, inkolo engangingakaze ngizwe ngayo. Kodwa ngangizimisele impela ukuxoxa ngeBhayibheli. Ngangicabanga ukuthi ngiyazi kahle imiBhalo. Lapho ngiphendula, ngangisebenzisa amavesi ambalwa engangiwafunde lapho ngifunda ngeposi. Nakuba ngazama ukuvikela izimfundiso ezithile zamaProthestani, enhliziyweni yami ngangingazikholelwa ngempela.

Ngemva kwezingxoxo ezimbili ezinde, kwadingeka ngivume ukuthi u-Eugenio wayesebenzisa iZwi likaNkulunkulu njengochwepheshe. Kwangimangaza ukubona indlela ayekwazi ngayo ukuthola imiBhalo futhi angibonise indlela esebenza ngayo yize ngangifunde kangconywana kunaye. U-Eugenio wangibonisa eBhayibhelini ukuthi siphila ezinsukwini zokugcina nokuthi uMbuso kaNkulunkulu maduze uzoletha umhlaba oyipharadesi. Ngahlabeka umxhwele.​—IHu. 37:11, 29; Isaya 9:6, 7; Math. 6:9, 10.

Ngasamukela ngokukhulu ukushesha isifundo seBhayibheli. Cishe yonke into engangiyifunda yayiyintsha, futhi yayithinta inhliziyo yami. Kwasuka inkungu, ngabona ukuthi ukuphila kunenjongo. Ekugcineni ngase ngikutholile engangikufuna. Manje ngabona kungasadingekile ukulwela ukuthuthukisa isimo sami sezomnotho, nokushabashekela ukuthola amakhambi ezinkinga zomsebenzi akubange kusaba yinto esemqoka kimi. Ngangizobuye ngizihlupheleni ngako uma kanti nokugula nokufa kuzoqedwa!​—Isaya 33:24; 35:5, 6; IsAm. 21:4.

Ngaqala ngaso leso sikhathi ukuxoxela izihlobo zami ngezinto engangizifunda, ngizichazela ngesasasa ukuthi uNkulunkulu uthembisa ukuletha umhlaba oyipharadesi abantu abathembekile abazohlala phakade kuwo.

Umndeni Wakithi Wamukela Iqiniso

Kungakabiphi sase siyiqembu elingaba yishumi nambili futhi sanquma ukuhlangana njalo ngeSonto ntambama kwabab’ omncane sixoxe ngezithembiso zeBhayibheli. Sasixoxa amahora amabili noma amathathu isonto ngalinye. Lapho u-Eugenio ebona ukuthi kwakuneqembu elikhulu lezihlobo zami elalinesithakazelo eBhayibhelini, wahlela ukuba umkhaya ngamunye uthole isifundo sawo.

Nganginezinye izihlobo eDurango, idolobha elincane elaliqhele ngamakhilomitha angu-120, elalingenabo oFakazi. Ngakho, ngemva kwezinyanga ezintathu ngathatha iholidi lezinsuku ezimbalwa ngazivakashela ukuze ngiyozichazela ngenkolo yami entsha. Ngaleso sikhathi, sasihlangana siyishumi njalo kusihlwa, futhi sasixoxa cishe kuze kuse. Bonke ababekhona babekujabulela ukulalela. Lapho iholide lami liphela, ngabashiyela amaBhayibheli nezincwadi zeBhayibheli. Kamuva, sasilokhu sithintana.

Lapho oFakazi befika eDurango—indawo okwakungakaze kushumayele muntu kuyo—bathola kunabantu abangu-18 ababekulindele ngabomvu ukuqhutshelwa izifundo zeBhayibheli. OFakazi bakujabulela ukuhlela ukuba umkhaya ngamunye uqhutshelwe isifundo sawo.

Kuze kube ngaleso sikhathi uMercedes wayengakalamukeli iqiniso. Inkinga yakhe kwakungekhona kangako ukuthi akathandi ukwamukela izimfundiso zeBhayibheli, kodwa, ngokuyinhloko wayesaba abantu. Umsebenzi woFakazi BakaJehova wawuvinjelwe eSpain ngaleso sikhathi, ngakho wacabanga ukuthi izingane zethu ezimbili zaziyoxoshwa esikoleni nokuthi umphakathi wawuyosikhipha inyumbazana. Kodwa lapho ebona umndeni wonke wamukela iqiniso leBhayibheli, naye wakujabulela ukufunda.

Phakathi neminyaka emibili, amalungu angu-40 omndeni wakithi ayesengoFakazi BakaJehova futhi esebhapathiziwe ebonakalisa ukuzinikezela kwawo ukuze akhonze uNkulunkulu. Yebo, umndeni wakithi wawunomgomo nenjongo efanayo neyami. Ngaba nomuzwa wokuthi ngangifeze into ebaluleke ngempela. UNkulunkulu wayesibusise kakhulu ngengcebo engokomoya.

Ukuphila Kwami Kwaceba Njengoba Ngikhula

Phakathi neminyaka engu-20 eyalandela, ngagxila ekukhuliseni abafana bethu ababili nasekusizeni ebandleni. Lapho sithuthela eLogroño kwakunoFakazi abangaba ngu-20 kuphela kulo lonke leli dolobha elinezakhamuzi ezingu-100 000. Ngathola nemithwalo yemfanelo eminingi ngemva kwalokho.

Kwathi lapho ngiba neminyaka engu-56, ifektri engangisebenza kuyo yavalwa ngokungazelelwe, wangiphelela kanjalo umsebenzi. Ngangilokhu nginesifiso esinamandla sokungenela inkonzo yesikhathi esigcwele, ngakho ngazisebenzisa kahle lezi zimo ezintsha ukuze ngibe iphayona. Impesheni engayithola yayiwubala, futhi kwakungelula ukuphila ngayo. UMercedes walekelela ngokuthi abambe amatoho okuhlanza. Sakwazi ukuciciyela futhi asikaze silale singadlile. Ngisaphayona futhi naye uthatha ubuphayona obusizayo ngezikhathi ezithile, futhi akeve ewujabulela umsebenzi wokushumayela.

Eminyakeni embalwa edlule, kunentokazi uMercedes ayevame ukuyihambisela omagazini. Igama layo uMerche futhi yayike yafundelwa ngesikhathi isencane. Yayikushisekela ukubafunda futhi uMercedes wabona ukuthi uMerche wayesalazisa iqiniso leBhayibheli enhliziyweni yakhe. Ekugcineni, uMerche wavuma ukufundelwa iBhayibheli futhi wathuthuka kahle kakhulu. Umyeni wakhe uVicente, wayephuza kakhulu futhi wayexoshwa njalo emsebenzini. Lokho kwakwenza kube nzima ngaye ukondla umkhaya wakhe; ukulusebenzisa kabi kwakhe uphuzo oludakayo kwabeka umshado wabo engcupheni.

Umkami wasikisela kuMerche ukuba acele uVicente ukuba akhulume nami futhi wagcina evumile. Ngemva kokumvakashela izikhathi eziningana, wasamukela isifundo seBhayibheli. UVicente waqala ukwenza ushintsho ekuphileni kwakhe, ngokuthi azame ukuyeka ukuphuza ngezinye izinsuku. Izinsuku zokungaphuzi zaya ngokuya zanda, ngezinye izikhathi ekwazi ukuqeda isonto lonke nangaphezulu engaphuzi. Makhathaleni, wabuyeka ngokuphelele utshwala. Waba ncwaba ngendlela ephawulekayo nomkhaya wakhe waba nobunye. Wonke umkhaya wakhe, ohlanganisa umkakhe nendodakazi yabo, ulisekela kahle kakhulu ibandla elincane laseCanary Islands njengoba sebehlala khona.

Ukucabanga Ngokuphila Kwami Okunenjongo

Nakuba ezinye zezihlobo zami ezafunda izimfundiso zeBhayibheli eminyakeni edlule sezalala, umndeni wakithi uye waqhubeka ukhula, futhi uNkulunkulu uye wasibusisa ngokucebile. (IzAga 10:22) Yeka ukuthi kujabulisa kanjani ukubona ukuthi cishe bonke abaqala ukufunda iBhayibheli eminyakeni engaba ngu-40 edlule basakhonza uJehova ngokwethembeka—bona nabantababo nabazukulu!

Manje nginenqwaba yezihlobo zegazi ezingoFakazi futhi iningi lazo likhonza njengabadala, izinceku ezikhonzayo namaphayona. Indodana yami endala nomkayo bakhonza ehhovisi legatsha loFakazi BakaJehova eMadrid, eSpain. Lapho ngiba uFakazi, kwakunoFakazi abacishe babe ngu-3 000 eSpain. Manje bangaphezu kuka-100 000. Ngiyijabulela kakhulu inkonzo yesikhathi esigcwele, futhi angive ngimbonga uNkulunkulu ngokungenza ngibe nokuphila okujabulisayo enkonzweni yakhe. Nakuba nginemfundo encane yezwe, ngiyakwazi ukukhonza njengombonisi wesifunda obambele ngezikhathi ezithile.

Eminyakeni embalwa edlule, ngathola ukuthi cishe indawo engakhulela kuyo ayisenabantu. Ububha bagcina bubaphoqe bonke ababehlala kuyo ukuba bashiye amasimu nemizi yabo bayofuna impilo engcono. Kuyajabulisa ukuthi abaningi balabo bantu abathutha—kuhlanganise nami—baye bathola ingcebo engokomoya. Sifunde ukuthi ukuphila kunayo injongo nokuthi ukukhonza uJehova kuletha injabulo enkulu kunazo zonke ongazicabanga!

[Isithombe ekhasini 32]

Cishe yiwo wonke amalungu omndeni kaMfoweth’ uMartínez aseqinisweni