IBhayibheli Liyakushintsha Ukuphila
Yini eyayingashukumisa ilungu leqembu lentsha eyizigebengu eMexico okuthiwa oSathane Abancane ukuba lishintshe libe isakhamuzi esithembekile, esizikhandlayo? Yini eyayingenza owesifazane waseJapane ongusomabhizinisi ochumayo ayeke umgomo oyinhloko wokuphishekela ingcebo ekuphileni kwakhe, futhi uzizwa kanjani ngoshintsho alwenzile? Yini eyayingashukumisa umdayisi wezikhali waseRussia ukuba ashiye ibhizinisi lakhe elinenzuzo kodwa elingekho emthethweni? Cabangela lokho okushiwo yilaba bantu.
UMLANDO WAKHE OMFUSHANE
IGAMA: U-ADRIAN PEREZ
IMINYAKA YOBUDALA: 30
IZWE: EMEXICO
UMLANDO: WAYEYILUNGU LEQEMBU LEZIGEBENGU
UMLANDO WAMI: Lapho ngineminyaka engu-13 ubudala, umkhaya wakithi wathuthela e-Ecatepec de Morelos, eSifundeni saseMexico. Ngaleso sikhathi, le ndawo yayigcwele intsha engamahlongandlebe, ukucekelwa phansi kwempahla nezidakamizwa. Ngokushesha ngaqala ukuphuza kakhulu, ukucekela phansi impahla nokuziphatha kabi.
Kamuva, sabuyela eSan Vicente, idolobha engazalelwa kulo. Kodwa izidakamizwa zaziyinkinga enkulu lapho. Kwakuyinto evamile ukubona intsha idindilize emgwaqweni. Ngazibandakanya neqembu okuthiwa oSathane Abancane. Saseba futhi sisebenzisa izidakamizwa, sibhema i-thinner noma inhlaka (i-glue). Ngokuvamile, ngangingakhumbuli ukuthi ngifike kanjani ekhaya, futhi ngezinye izikhathi ngangilala emgwaqweni ngiqulekile. Abanye babangane bami bagcina besejele ngenxa yokweba nokubulala.
Naphezu kwakho konke, ngangikholelwa kuNkulunkulu. Ukuze ngithobe unembeza, ngangihlanganyela ezicini zenkolo, njengokuthwala isiphambano phakathi neSonto Elingcwele. Kodwa ngemva kwalokho, sonke, kuhlanganise nendoda eyayidlala indima yokuba uKristu, sasigubha ukuhlanganyela kwethu kulesi senzakalo ngokudakwa.
INDLELA IBHAYIBHELI ELAKUSHINTSHA NGAYO UKUPHILA KWAMI: Lapho sengicela eminyakeni engu-20, ngaqala ukufunda iBhayibheli noFakazi BakaJehova. Ngangiqaphela ukuthi ukuphila kwami akunanjongo nokuthi uma ngiqhubeka ngale nkambo, kwakuzongihambela kabi. Okwangihlaba umxhwele kakhulu kwakuyiphuzu elilotshwe kweyabaseGalathiya 6:8: “Lowo ohlwanyela enombono wenyama yakhe uyovuna ukonakala enyameni, kodwa lowo ohlwanyela enombono womoya uyovuna ukuphila okuphakade okuvela emoyeni.” Lo mbhalo wangenza ngaqaphela ukuthi uma ngifuna ukuba izinto zingihambele kahle, kwakuyodingeka ngihlwanyele nginombono wekusasa.
Njengoba ngangifunda iBhayibheli, ngaqala ukuqonda ukuthi uJehova unguNkulunkulu ophilayo onesithakazelo somuntu siqu kimi, nokuthi ukulungele ukuthethelela izono engazenza esikhathini esidlule. Ngazibonela mathupha ukuthi uyayilalela futhi ayiphendule imithandazo.
Kwakungelula ukwenza izinguquko endleleni yami yokuphila. Ukushiya leli qembu kwakunzima. Kwakunemingcele, ngakho ngangingasakwazi ukuya kwezinye izindawo, nakuba ngangingaselona ilungu leqembu. Ngezinye izikhathi, kwakudingeka ngicashele ababengabangane bami ngoba babengithungatha, bezama ukungibuyisela ngenkani emikhutsheni yami emidala.
Ngokuphambene nalokho, lapho ngiqala ukuya emihlanganweni yoFakazi eHholo LoMbuso, ngathola ukuthi ibandla linemfudumalo nothando. Kwangihlaba umxhwele ukuthi laba bantu babenokholo oluqinile futhi bephila ngokuvumelana nalokho abakufundisayo. Kwakuyisimo esihluke ngokuphelele kwengangisijwayele.
INDLELA ENGIZUZE NGAYO: Sengineminyaka eyishumi ngibhapathiziwe njengomunye woFakazi BakaJehova. Ngizama ngamandla ukusebenzisa izimfundiso zeBhayibheli ekuphileni kwami. Ngenxa yalokho, umkhaya wakithi uya ngokuya ungihlonipha. Manje usungazi njengomuntu okhuthele, futhi ngiyakwazi ukuwusiza ngokwezimali. Umama waqala ukufunda iBhayibheli futhi manje usengomunye woFakazi BakaJehova. Ubaba naye usenza izinguquko endleleni yakhe yokuphila. Abaningi emndenini wakithi ababona oFakazi BakaJehova, kodwa ngemva kokubona okwenzeke kimi, bayavuma ukuthi iBhayibheli lingamsiza umuntu ukuba athuthukise ukuphila kwakhe.
UMLANDO WAKHE OMFUSHANE
IGAMA: UYAYOI NAGATANI
IMINYAKA YOBUDALA: 50
IZWE: EJAPANE
UMLANDO: USOMABHIZINISI OCHUMAYO
UMLANDO WAMI: Ngakhulela edolobheni elincane lasemaphandleni elalinabantu abanobungane. Ubaba wayenesitolo esikhulu edolobheni, enezisebenzi eziyishumi. Umuzi wakithi wawakhelene nesitolo, ngakho nakuba ubaba nomama babematasa, ngangingenaso isizungu.
Ngiyizibulo emadodakazini amathathu, futhi kusukela ngisemncane, ngaqeqeshelwa ukuba ngiphathe ibhizinisi lomkhaya. Ngashada ngisemncane. Umyeni wami wayeka umsebenzi ebhange wazosiza ebhizinisini lomkhaya. Saba nabantwana abathathu ababelamana eduze. Umama wayenakekela abantwana kuyilapho enza umsebenzi wasendlini, kanti mina ngangisebenza kusukela ekuseni kuze kuhlwe esitolo. Noma kunjalo, sasisithola isikhathi sokuba ndawonye njengomkhaya.
Izitolo zendawo zabe sezibhekana nokwehla kwezomnotho, ngakho nelethu ibhizinisi laqala ukudonsa kanzima. Ukuze silwe nalesi simo, sanquma ukuvula isitolo sezinto zokwakha eduze nomgwaqo omkhulu. Ngosuku olwandulela umcimbi wokuqala ukwakha, ubaba, owayengumongameli wenkampani yethu, wazunywa isifo sobuchopho waquleka. Walahlekelwa ikhono lokukhuluma, ngakho umthwalo wokunakekela isitolo esisha waba semahlombe ami. Umyeni wami wasala esitolo esidala. Ukuphila kwethu kwaba matasa kakhulu.
Isitolo sethu esisha saba impumelelo enkulu. Ngangiziqhenya ngengangikufinyelele futhi ngangingalali ngisebenza. Nakuba ngangibathanda abantabami, into engangiyicabanga kwakuwumsebenzi kuphela. Ngangingenaso isikhathi sokuxoxa nomyeni wami, futhi uma kwenzeka sixoxa, sasiqagulisana. Ukuze ngidambise ukucindezeleka, ngaqala ukuhamba cishe njalo ebusuku ngiyophuza nabangane bami nozakwethu kwezebhizinisi. Engangikwenza nje kwakuwukusebenza, ngiphuze, ngilale. Ngangicebile ngokwezimali kodwa injabulo yami yayilokhu incipha futhi ngingaqondi ukuthi kungani.
INDLELA IBHAYIBHELI ELAKUSHINTSHA NGAYO UKUPHILA KWAMI: Lapho ngiqala ukufunda iBhayibheli noFakazi BakaJehova, kwakunemibhalo emithathu eyangithinta kakhulu. Ngakhala lapho ngiqonda okushiwo uMathewu 5:3: “Bayajabula abaqaphela isidingo sabo esingokomoya, ngoba umbuso wamazulu ungowabo.” Leli vesi lachaza ukuthi kungani ngangizizwa ngingenelisekile nakuba ngangicebile ngokwezimali futhi ngidunyiswa abangane bami. Ngaqaphela ukuthi ngangiyojabula ngempela uma ngiqaphela futhi nganelisa isidingo sami esingokomoya kuphela.
Ngaleso sikhathi, umnotho weJapane wawuntengantenga, futhi lapho ngibheka abangane bami, ngabona iqiniso elikweyoku-1 Thimothewu 6:9: “Labo abazimisele ngokuceba bawela esilingweni nasogibeni nasezifisweni eziningi ezingenangqondo nezilimazayo, eziphonsa abantu ekubhujisweni nasencithakalweni.” Ngaba nomuzwa wokuthi amazwi kaJesu alotshwe kuMathewu 6:24, athi “anikwazi ukuba yizikhonzi zikaNkulunkulu nezeNgcebo,” ayesebenza ngqo kimi, ngakho nganquma ukwenza izinguquko ezithile ekuphileni kwami.
Ngabona ukuthi ngangibalahlile abazali bami, umyeni wami nabantabami. Kwangicacela nokuthi ngase nginezici zobuntu ezingathandeki. Ngangizazisa, ngingababekezeleli abantu futhi ngicasuka kalula. Ekuqaleni, ngangicabanga ukuthi kwakungenakwenzeka ukuba ngishintshe ngibe umKristu. Kodwa, ngangibathanda ngempela abantabami futhi ngiqaphela ukuthi njengoba ngisebenzisa iseluleko seBhayibheli ekusebenzelaneni nomkhaya wami, babejabula. Ngachitha isikhathi esengeziwe nabo futhi ngiya nabo emihlanganweni yobuKristu.
INDLELA ENGIZUZE NGAYO: Ukwazi injongo yokuphila nokukhonza uNkulunkulu, ukuphila ngendlela emthokozisayo, kuye kwangilethela injabulo nokwaneliseka kwangempela. Angisawudeli umkhaya wami ngenxa yomsebenzi, ngakho ngiye ngabuyelwa ukuzihlonipha okwase kungilahlekele.
Ukubona indlela ubuntu bami obathuthuka ngayo lapho ngisebenzisa izimiso zeBhayibheli kwashukumisela umama ukuba afunde iBhayibheli futhi abe ngumKristu. Okujabulisayo ukuthi ubaba nomyeni wami abazange basiphikise isinqumo sethu. Ubuhlobo bami nabantabami sebuqinile, futhi sengijabulela ukuphila komkhaya okujabulisa ngempela.
UMLANDO WAKHE OMFUSHANE
IGAMA: UMIKHAIL ZUYEV
IMINYAKA YOBUDALA: 51
IZWE: ERUSSIA
UMLANDO: WAYENGUMDAYISI WEZIKHALI EZINGEKHO EMTHETHWENI
UMLANDO WAMI: Idolobhana lakithi, iKrasnogorsk, lizungezwe izimfunda ezinhle. UMfula iMoscow unqamula lapho uye eningizimu. Imizi ezungeze leli dolobhana ngasentshonalanga nangasenyakatho cishe yembozwe amahlathi.
Lapho ngisemncane, ngangikuthanda ukushaya amankomane nokudlala ngezikhali. Ngangichitha isikhathi esiningi ngizilolonga. Ngangenza nezibhamu ezingekho emthethweni, izinhlamvu nemimese. Ngokuhamba kwesikhathi, lokhu kwaba ibhizinisi lami. Ngangihlelekile futhi ngiphumelela kakhulu ekudayiseleni izigebengu izinto engangizenza.
INDLELA IBHAYIBHELI ELAKUSHINTSHA NGAYO UKUPHILA KWAMI: Ekuqaleni kwawo-1990, ngahlangana noFakazi BakaJehova, kodwa ekuqaleni ngangingabethembi. Babebuza imibuzo eminingi kakhulu.
Ngolunye usuku, omunye wangifundela eyabaseRoma 14:12: “Ngamunye wethu uyozilandisela kuNkulunkulu.” Ngazibuza ukuthi ngangiyothini kuNkulunkulu. Lo mbhalo wangishukumisela ukuba ngifunde lokho uNkulunkulu akufunayo kimi.
Ngazikhandla ekusebenziseni iseluleko seBhayibheli esikweyabaseKolose 3:5-10: “Ngakho-ke, bulalani amalungu emizimba yenu asemhlabeni ngokuqondene nobufebe, ukungcola, isifiso sobulili, isifiso esilimazayo, nokuhaha, okuwukukhonza izithombe. Ulaka lukaNkulunkulu luyeza ngenxa yalezo zinto. . . . Kulahleni konke kude nani, ulaka, intukuthelo, ububi, inkulumo eyihlazo, nenkulumo eyichilo ephuma emlonyeni wenu. Ningaqambi amanga omunye komunye. Hlubulani ubuntu obudala nemikhuba yabo, nigqoke ubuntu obusha.”
Ngakuthola kunzima ukwenza lezo zinguquko. “Ababengabalingani bami kwezebhizinisi” babelokhu benginika imali befuna izikhali, futhi ngangikuthola kunzima ukuzithiba lapho abantu bengithuka. Noma kunjalo, ngazishisa izikhali zami eziningi ezaziyigugu. Njengoba ngangifunda ngothando uNkulunkulu noKristu ababengibonise lona, ngashukumiseleka ukuba ngibathande. Ngaphikelela esifundweni sami seBhayibheli, ngaya emihlanganweni yebandla lendawo, futhi ngathandazela usizo lukaNkulunkulu.
INDLELA ENGIZUZE NGAYO: Kancane kancane nakuba kwakunzima, futhi ngisizwa abafowethu abangamaKristu, ngiye ngahlakulela ubuntu obungcono. Ukuqonda ukuthi uJehova uNkulunkulu ukhathalela ngamunye wethu, ngisho nabantu abafile, kuyangijabulisa kakhulu. (IzEnzo 24:15) Ngiyabuthanda ubuqotho nokuthembeka engikubona koFakazi BakaJehova. Futhi ngiyasazisa isithakazelo esiqotho abaye bangibonisa sona nokuthembeka kwabo kuNkulunkulu.
Ekuqaleni, abanye emkhayeni wakithi nabangane babeluphikisa ukholo lwami olusha. Kodwa-ke babeziduduza ngokucabanga ukuthi kungcono ukuba ngizibandakanye nenkolo kunokuhileleka ebugebengwini obuhleliwe. Ngiyajabula ngokuthi ukuphila kwami akusagxilile ekudayiseni izikhali zempi kodwa sengikunikele ekusizeni abanye ukuba bafunde ngoNkulunkulu wokuthula.
[Isithombe ekhasini 27]
Ngangihlanganyela emikhosini yamaKatolika ukuze ngida-mbise unembeza
[Isithombe ekhasini 28]
Ngangi-cebile ngokwezimali kodwa ngingajabule neze