Insimu ‘Emhlophe Elungele Ukuvunwa’

Echosheni elisenyakatho yeNingizimu Melika kuneNhlonhlo YaseGuajira. Isenyakatho yeColombia futhi isenyakatho-ntshonalanga yeVenezuela. Ilanga likhipha inhlanzi emanzini kule ndawo esagwadule, ethola imvula encane futhi enamazinga okushisa afinyelela ku-43°C. Naphezu kwalesi simo sezulu, kule ndawo abantu bakhuthele futhi bangabalimi abakhiqizayo. Umoya oheleza kamnandi wasolwandle nomoya wasenyakatho-mpumalanga wenza ukuphila kubekezeleleke, wenze nokuba izivakashi zikujabulele ukubuka ubuhle bezwe namabhishi amahle.

UYAMUKELWA ezweni lamaNdiya angamaWayuu. KunamaWayuu angaba ngu-305-000, angu-135 000 kuwo ahlala eColombia. Lesi sizwe saqala ukuhlala lapha kudala ngaphambi kokuba abaseSpain benze le ndawo ibe ikoloni.

Ngokuyinhloko amaWayuu aziphilisa ngokufuya nokulima. Abuye adobe futhi ahwebelane namazwe angomakhelwane. Abesifazane banobuciko ekulukeni izinto ezinemibala egqamile, futhi imikhiqizo yabo ithandwa kakhulu izivakashi.

AmaWayuu aziwa ngokuba qotho nangokungenisa izihambi. Nokho, nawo aphila ‘ezikhathini ezibucayi okunzima ukubhekana nazo.’ (2 Thimothewu 3:1) Ubumpofu bungenye yezinkinga ezinkulu ebangela ukuba kube nezinye izinkinga, ezinjengokungafundi, ukungondleki kwezinsana, ukuntuleka kwezokwelapha futhi kwezinye izindawo nobuhlongandlebe.

Sekungamashumi eminyaka amasonto eLobukholwa ethumela abasakazi bevangeli ukuze bahlale phakathi kwamaWayuu. Ngenxa yalokho, iningi lezikole eziqeqesha othisha nezikole okuhlalwa kuzo lilawulwa amasonto. AmaWayuu amaningi aye amukela amasiko okuthiwa awubuKristu, anjengokukhonza izithombe nobhapathizo lwezinsana, kodwa awazange azilahle izinkolelo namasiko anomsuka wasezinganekwaneni kanye nezinkolelo-ze.

Ngokuvamile, amaWayuu ayamesaba uNkulunkulu futhi ayawathanda amaqiniso eBhayibheli afundiswa oFakazi BakaJehova. Ekuqaleni kwawo-1980 kwakunoFakazi abangu-7 kuphela abangamaWayuu eGuajira, abathathu babehlala enhloko-dolobha eRíohacha. Ngaphezu kwalab’ oFakazi bomdabu, kwakunabanye abamemezeli abangu-20 ababeshumayela izindaba ezinhle zoMbuso ngeSpanishi.

Isigijimi Ngolimi Abaluncela

Ngaphandle kolimi aluncela isiWayuunaiki, iningi lamaWayuu ahlala eRíohacha likhuluma neSpanishi kancane. Ekuqaleni ukushumayela isigijimi soMbuso akuzange kuphumelele kangako. Abomdabu babewagwema ama-arijuna, njengoba bebabiza kanjalo abangewona amaWayuu. Lapho oFakazi bewavakashela emakhaya, iningi lamaWayuu laliphendula ngolimi lwalo, hhayi ngeSpanishi. OFakazi babevele badlulele emzini olandelayo.

Nokho, ekupheleni kuka-1994, ihhovisi legatsha loFakazi BakaJehova labela iqembu lamaphayona akhethekile, noma abafundisi beBhayibheli besikhathi esigcwele, ukuba liyokhonza eBandleni LaseRíohacha. La maphayona acela uFakazi ongumWayuu ukuba awafundise isiWayuunaiki. Ngemva kokubamba ngekhanda izintshumayelo ezilula, lezo zikhonzi zaya ensimini futhi ngokushesha zaphawula ushintsho olukhulu endleleni abantu abasabela ngayo. Ngisho noma la bafundisi beBhayibheli babengasikhulumi kahle isiWayuunaiki, abaninikhaya bamangala, bajabula futhi bavuma ukulalela, ngezinye izikhathi kuqhubeke nengxoxo emnandi ngeSpanishi sabo esincane!

‘Imhlophe Ilungele Ukuvunwa’

Umphostoli uPawulu wafanisa umsebenzi wamaKristu wokwenza abafundi nokuvuna ensimini, isifaniso asiqonda kahle amaWayuu njengoba engabalimi. (1 Korinte 3:5-9) Ngomqondo ongokomfanekiso, insimu yamaWayuu ngempela ‘imhlophe ilungele ukuvunwa.’—Johane 4:35.

UNeil, iNdiya elingumWayuu elalihlala eManaure, wazalwa ekhubazekile. Egxeka uNkulunkulu, uNeil wacindezeleka kangangokuthi wazama ukuzibulala. Omunye uFakazi owasebenzisa ithuba lokushumayela endlini ngendlu ngenkathi evakashele amadolobha ahlukahlukene maqondana nomsebenzi wokuziphilisa wakhuluma noNeil ngoMbuso kaJehova. UNeil wayeneminyaka engu-14 nje ubudala. Ebona ukuthi uNeil unesithakazelo, lo Fakazi waqala isifundo seBhayibheli naye. UNeil wajabula lapho efunda ukuthi uJehova unothando, futhi lokho kwamenza waphetha ngokuthi akuyena owabangela ukuhlupheka kwakhe. Yeka indlela athinteka ngokujule ngayo lapho efunda ngesithembiso sikaNkulunkulu somhlaba oyipharadesi, lapho kuyobe kungasekho khona ukugula!—Isaya 33:24; Mathewu 6:9, 10.

Ngaleso sikhathi, umkhaya wakubo kaNeil wawuxabene nomunye umkhaya. Zizama ukuqinisekisa ukuthi bavikelekile, izihlobo zikaNeil zenza isiko elithile lesizwe. UNeil uyakhumbula: “Ekuqaleni ngangesaba ukutshela umndeni wakithi ngenkolo yami entsha, ikakhulu abantu abadala ekhaya, abahlonishwa kakhulu.” Abazali bakaNeil bathukuthela lapho bezwa ukuthi wayengeke esaphila ngezinkolelo ezingqubuzana nemiBhalo noma enze amasiko ahlobene nemimoya. UNeil wabe esethuthela eRíohacha futhi waqala ukuhlanganyela nebandla lakuleyo ndawo. Kamuva wabhapathizwa. Ngo-1993 watuswa njengenceku ekhonzayo, futhi ngemva kweminyaka emithathu waba iphayona elivamile. Kwabe sekuthi ngo-1997 wamiswa njengomdala ebandleni. Ngo-2000, wandisa inkonzo yakhe, waba iphayona elikhethekile.

Cabanga nangendaba kaTeresa, ongumWayuu wendabuko owaqala ukutadisha iBhayibheli noFakazi. Indoda ayekipite nayo, uDaniel, yamgcona futhi yamhlukumeza ngokomzimba yena nabantwana babo abathathu. Ngisho noma kamuva yavuma ukutadisha iBhayibheli noTeresa, yayivame ukuzitika ngotshwala nabangane bayo, ngezinye izikhathi kube izinsuku ezine noma ezinhlanu. Umkhaya wayo wahlupheka. UTeresa waqhubeka etadisha ngobuqotho futhi eba khona emihlanganweni yobuKristu. Lokhu kwasiza uDaniel ukuba abone ukubaluleka kokutadisha iBhayibheli. Ngengozi enye yezingane zabo yawela egedleleni elalinamanzi abilayo futhi yasha kakhulu yashona. Ngaphandle kokukhuthazelela ubuhlungu obukhulu bokushonelwa indodana, uTeresa kwadingeka abhekane nokucindezela kwabangane nomakhelwane bokuba enze amasiko omngcwabo angqubuzana nemiBhalo.

Phakathi naleso sikhathi esinzima, lo mbhangqwana wathola isikhuthazo nenduduzo emalungwini ebandla eliseduze. Ngemva komngcwabo, amalungu ebandla lendawo elisebenzisa isiWayuunaiki aqhubeka evakashela lo mkhaya. Lapho ebona izenzo ezibonisa uthando lobuKristu, uDaniel washukumiseleka ukuba athuthuke ngokomoya. Wayeka ukuphuza nokuphatha kabi uTeresa. UDaniel noTeresa bashada, futhi uDaniel waqala ukusebenza kanzima ukuze ondle umkhaya wakhe. Bathuthuka ngokomoya futhi babhapathizwa ngo-2003. Bobabili baqhuba izifundo zeBhayibheli eziningana. Ngenxa yobufakazi obuhle bukaTeresa emkhayeni wakhe, manje izihlobo zakhe zizimisele ukulalela oFakazi uma bezivakashele. Omunye umshana kaDaniel usengummemezeli ongabhapathiziwe nabanye abashana bakhe ababili bafundelwa iBhayibheli futhi baba khona emihlanganweni yebandla. Udadewabo kaDaniel, naye owashonelwa indodana engozini, yena nomkhaya wakhe baye babonisa isithakazelo sokutadisha iBhayibheli.

Ukudla Okungokomoya NgesiWayuunaiki

Ngo-1998 kwakhululwa incwajana ethi Jabulela Ukuphila Emhlabeni Phakade!a ngesiWayuunaiki. Leli kwaba ithuluzi eliyigugu kakhulu ekusebenzeni insimu yesiWayuunaiki nasekuqhubeni izifundo zeBhayibheli zasekhaya. Ngo-2003 kwenziwa amalungiselelo okuqeqesha abazalwane abaningana ukuba bahumushe izincwadi zoFakazi BakaJehova ngesiWayuunaiki. Ngenxa yokuzikhandla kwaleli qembu labahumushi eRíohacha, sekuye kwatholakala izincwajana ezengeziwe, okubangela ukukhula ngokomoya kubafundi abakhuluma isiWayuunaiki.

Kusukela ngo-2001, ezinye izinkulumo zomhlangano wesigodi ziye zahunyushelwa olimini lwesiWayuunaiki. Abafundi beBhayibheli bayakhuthazeka ngokomoya lapho bezwa izinkulumo ngolimi abaluncela. Babheke phambili lapho namadrama eBhayibheli eyodlalwa khona ngesiWayuunaiki.

Insimu Ethelayo

I-Uribia yidolobha elingaba amakhilomitha ayikhulu ukusuka enyakatho-mpumalanga yeRíohacha. IBandla Lase-Uribia LesiWayuunaiki linabamemezeli boMbuso abangu-16 futhi iningi labo lenza imizamo eyengeziwe yokushumayela emaNdiyeni ahlala emaphandleni. Nakhu okushiwo omunye umdala webandla ngolunye uhambo lokuya khona: “Saya epulazini elinezindlu ezingaba ngu-12 ezinophahla oluphansi namafasitela amancane. Ngaphambili kwaleyo naleyo ndlu kunompheme oyisicaba owenziwe nge-yotojolo, ingaphakathi lesiqu somdolofiya. Lapho, umkhaya nezivakashi zithola umthunzi elangeni elishisa bhe. Sajabula ukubona ukuthi abaningi babebonisa isithakazelo esikhulu, ngakho senza amalungiselelo okubuyela futhi siqale izifundo zeBhayibheli. Lapho sibuyela, saphawula ukuthi abaningi babengafundile. Basitshela ngesikole esavalwa ngenxa yokungabikho kwemali eyanele. Umphathi waba nomusa kithi wasivumela ukuba sisebenzise elinye lamakilasi ukuze sifundise abantu ukubhala futhi siqhube nezifundo zeBhayibheli. AmaWayuu ayisithupha aye afunda ukufunda nokubhala futhi ayathuthuka esifundweni sawo seBhayibheli. Kusithinta ngokujulile ukwazisa abakubonisayo, ngakho sihlela ukuqhuba imihlangano kulelo pulazi.”

Iningi loFakazi abavela kwamanye amazwe liye lafunda isiWayuunaiki futhi lwaziswa kakhulu usizo lwabo. ENhlonhlweni YaseGuajira, manje kunamabandla angu-8 namaqembu amabili asebenzisa lolu limi.

Kusobala ukuthi uJehova uyayibusisa le mizamo. Akungabazeki ukuthi kuningi okungafezwa ngokushumayela izindaba ezinhle kumaWayuu. Kulindeleke imiphumela emihle njengoba labo abaqaphela isidingo sabo esingokomoya beba abafundi abangamaKristu. Kwangathi uJehova angathumela izikhonzi ezengeziwe ukuze ziyovuna kule nsimu, ‘esimhlophe elungele ukuvunwa.’—Mathewu 9:37, 38.

[Umbhalo waphansi]

[Ibalazwe ekhasini 16]

(Ukuze ubone ukuthi indaba ihlelwe kanjani, bheka encwadini)

IVENEZUELA

ICOLOMBIA

ILA GUAJIRA

IManaure

IRíohacha

I-Uribia

[Umthombo Wesithombe ekhasini 16]

Wayuu camp below: Victor Englebert