Bazali, Vikelani Ifa Lenu Eliyigugu
“Ukuhlakanipha kuyisivikelo . . . Kuyabalonda abaninikho.”—UMSHUMAYELI 7:12.
1. Kungani abazali kufanele babheke abantwana babo njengezipho?
ABAZALI baletha emhlabeni umuntu omusha ophilayo ofuze bona ngokubukeka nangobuntu. IBhayibheli libiza laba bantwana ngokuthi “ifa elivela kuJehova.” (IHubo 127:3) Njengoba kunguye uMniki-kuphila wangempela, empeleni uJehova uphathisa abazali lokho eqinisweni okungokwakhe. (IHubo 36:9) Bazali, nisamukela kanjani lesi sipho esiyigugu esivela kuNkulunkulu?
2. UManowa wasabela kanjani lapho ezwa ukuthi babezoba nomntwana?
2 Ngokuqinisekile isipho esinjalo kufanele samukelwe ngentobeko nangokwazisa. Eminyakeni engaphezu kwengu-3 000 edlule, uManowa ongumIsrayeli wasabela ngaleyo ndlela lapho ingelosi itshela umkakhe ukuthi wayezoba nomntwana. Lapho ezwa lezi zindaba ezinhle, uManowa wathandaza: “Uxolo, Jehova. Umuntu kaNkulunkulu weqiniso osanda kumthumela ngicela aphinde eze kithi asifundise lokho okufanele sikwenze kumntwana ozozalwa.” (AbaHluleli 13:8) Bazali, yini eningayifunda esibonelweni sikaManowa?
Okwenza Kudingeke Usizo LukaNkulunkulu Manje
3. Kungani usizo lukaNkulunkulu ekukhuliseni abantwana ludingeka kakhulu namuhla?
3 Manje kunanini ngaphambili, abazali badinga usizo lukaJehova ekukhuliseni abantwana. Ngani? Ngoba uSathane uDeveli nezingelosi zakhe baphonswe lapha emhlabeni besuswa ezulwini. IBhayibheli liyasiqwashisa: “Mayé ngomhlaba . . . , ngoba uDeveli wehlele kini, ethukuthele kakhulu, azi ukuthi unesikhathi esifushane.” (IsAmbulo 12:7-9, 12) “Njengengonyama ebhongayo,” kuchaza iBhayibheli, uSathane ‘ufuna umuntu angamshwabadela.’ (1 Petru 5:8) Izingonyama ngokuvamile zisizakala ngezinyamazane ezibuthaka kunezinye, okuvame ukuba kube ezisezincane. Khona-ke, kuwukuhlakanipha ngabazali abangamaKristu ukufuna isiqondiso sikaJehova sokuvikela abantwana babo. Nenza umzamo ongakanani wokubavikela?
4. (a) Ukwazi ukuthi kunengonyama eyeqile endaweni yangakubo kufanele kwenze abazali bathathe siphi isinyathelo? (b) Abantwana badingani ukuze bavikeleke?
4 Uma ubungezwa kuthiwa kunengonyama eyeqile ekhonjwa ngasendaweni yakini, into yokuqala obuyokhathazeka ngayo bekuyoba ukuvikela abantwana bakho. USathane unjengesilwane esizingelayo. Ufuna ukonakalisa abantu bakaNkulunkulu, kanjalo abenze bangakufanelekeli ukuvunyelwa uNkulunkulu. (Jobe 2:1-7; 1 Johane 5:19) Abantwana bayizisulu ezilula. Ukuze abantwana baphunyuke ezingibeni zikaDeveli, kumelwe bazi uJehova futhi bamlalele. Kudingeka babe nolwazi lweBhayibheli. UJesu wathi: “Lokhu kusho ukuphila okuphakade, ukungenisa kwabo ulwazi ngawe, owukuphela kukaNkulunkulu weqiniso, nangalowo omthumileyo, uJesu Kristu.” (Johane 17:3) Ngaphezu kwalokho, abantwana kudingeka bahlakaniphe—babe nekhono lokuqonda nokusebenzisa lokho abakufundayo. Ngenxa yokuthi “ukuhlakanipha kuyabalonda abaninikho,” nina bazali kudingeka nigxilise iqiniso ezinhliziyweni zabantwana benu. (UmShumayeli 7:12) Ningakwenza kanjani lokhu?
5. (a) Ukuhlakanipha kungadluliselwa kanjani? (b) IzAga ziyichaza kanjani inzuzo yokuhlakanipha?
5 Ningafundela abantwana benu iZwi likaNkulunkulu futhi kufanele nibafundele. Kodwa ukuze nibasize ukuba bathande uJehova futhi bamlalele kudingeka okungaphezu kwalokho—kudingeka babe nokuqonda. Ngokwesibonelo: Umntwana angase atshelwe ukuba angaweqi umgwaqo engazange aqalaze nxazonke. Kodwa kunabantwana abangakwenzi lokhu. Kungani? Kungenzeka ukuthi imiphumela yokushayiswa imoto ayizange ichazwe kaningi ngokwanele noma ngendlela eyenza le ngozi icace kumntwana, obekuyosusa “ubuwula” obungaholela engozini. Ukunikeza umuntu ukuhlakanipha kudinga isikhathi kanye nesineke esikhulu. Kodwa yeka ukuthi ukuhlakanipha kuzuzisa kangakanani! IBhayibheli lithi: “Izindlela zako ziyizindlela zobumnandi, futhi yonke imendo yako ingukuthula. Kungumuthi wokuphila kulabo abakubambayo, futhi labo abakubamba bakuqinise kuyothiwa bayajabula.”—IzAga 3:13-18; 22:15.
Ukufundisa Okunikeza Ukuhlakanipha
6. (a) Kungani abantwana bevame ukwenza ngendlela engahlakaniphile? (b) Iyiphi impi ekhona?
6 Ngokuvamile abantwana benza izinto ezingafanele, hhayi ngoba bengazange bafundiswe okulungile, kodwa ngoba abakufundisiwe kungazange kufinyelele inhliziyo—umuntu abanguye ngaphakathi. UDeveli ulwela ukulawula izinhliziyo zabantwana. Wakha amasu okuqinisekisa ukuthi bachayeka emathonyeni okungamhloniphi uNkulunkulu ezwe lakhe. Uzama nokusizakala ngokuthambekela abanako kokwenza izinto ezimbi ngenxa yesono esisizuzile. (Genesise 8:21; IHubo 51:5) Abazali kudingeka baqaphele ukuthi inkulu impi ekhona yokulawula izinhliziyo zabantwana babo.
7. Kungani kudingeka okwengeziwe kunokutshela umntwana ukuthi yikuphi okulungile noma okungalungile?
7 Ngokuvamile abazali baye bamtshele umntwana ukuthi yikuphi okulungile noma okungalungile, bekholelwa ukuthi bamfundise isimiso esithile sokuziphatha. Bangase batshele umntwana ukuthi akulungile ukuqamba amanga, ukweba noma ukuba nobuhlobo bobulili nomuntu ongashadile naye. Nokho, umntwana kudingeka abe nesisusa esinamandla sokulalela lokhu kunokumane alalele ngoba nje kusho abazali. Yimithetho kaJehova lena. Umntwana kufanele afunde ukuthi kuyinkambo yokuhlakanipha ukulalela imiyalo kaNkulunkulu.—IzAga 6:16-19; Hebheru 13:4.
8. Ukuze kusizwe umntwana ukuba enze ngokuhlakanipha kudingeka afundisweni?
8 Indawo yonke eyinkimbinkimbi, izinhlobonhlobo zezinto eziphilayo, ukushintsha kwezinkathi zonyaka—zonke lezi zinto zingasiza umntwana aqonde ukuthi kunoMdali ohlakaniphe ngaphezu kwabo bonke abantu. (Roma 1:20; Hebheru 3:4) Ngaphezu kwalokho, umntwana kufanele afundiswe ukuthi uNkulunkulu uyamthanda nokuthi wenze ilungiselelo lokumnika ukuphila okuphakade ngomhlatshelo weNdodana yaKhe nokuthi angamjabulisa uNkulunkulu ngokulalela lokho akushoyo. Khona-ke, cishe umntwana uyofuna ukukhonza uJehova, naphezu kwemizamo kaDeveli yokumyekisa.—IzAga 22:6; 27:11; Johane 3:16.
9. (a) Ukufundisa okuvikela ukuphila kudingani? (b) Yini obaba abayalwa ukuba bayenze, futhi lokhu kuhilelani?
9 Ukufundisa okuvikela umntwana futhi kumshukumisele ekwenzeni okuhle kudinga isikhathi, ukunaka nokuhlela. Kudingeka abazali bamukele isiqondiso sikaNkulunkulu. IBhayibheli lithi: “Nani bobaba, . . . qhubekani nibakhulisa [abantwana benu] ngesiyalo nangokuqondisa umqondo kukaJehova.” (Efesu 6:4) Kusho ukuthini lokho? Igama elisetshenziswe esiGrekini elihunyushwe ngokuthi ‘ukuqondisa umqondo’ linomqondo ‘wokufaka umqondo.’ Ngakho, empeleni obaba bakhuthazwa ukuba bafake umqondo kaJehova kubantwana babo. Yeka ukuthi lokho kuyoba yisivikelo esinjani kubantwana! Uma imicabango kaNkulunkulu, indlela yakhe yokucabanga, igxiliswe engqondweni yabantwana, iyobavikela ekwenzeni okubi.
Isifiso Esishukunyiswa Uthando
10. Ukuze uphumelele ekufundiseni umntanakho, yikuphi okubalulekile okumelwe ukwazi?
10 Nokho, ukuze kufezeke isifiso sakho sokubakhulisa kahle abantwana bakho, imizamo yakho kudingeka ishukunyiswe uthando. Isici esibalulekile ukukhulumisana okuhle. Yazi ukuthi kwenzekani ekuphileni komntanakho nokuthi ucabangani. Lapho nihlezi nikhululekile, mqhwande ngesu umntwana. Ngezinye izikhathi, akushoyo kungase kukushaqise. Qikelela ukuba ungasabeli ngamawala. Kunalokho, zwelana naye ulalele.
11. Umzali angawufaka kanjani umqondo kaNkulunkulu kumntanakhe?
11 Yiqiniso, kungenzeka uye wafundela umntanakho eBhayibhelini imithetho kaNkulunkulu enqabela ukuziphatha okubi kobulili, mhlawumbe izikhathi eziningana. (1 Korinte 6:18; Efesu 5:5) Kungenzeka ukuthi lokhu kuye kwagxilisa kubantwana bakho ukuthi yikuphi okuthokozisa uJehova nokungamthokozisi. Nokho, kudingeka okwengeziwe ukuze ufake umqondo wakhe kumntwana. Abantwana kudingeka basizwe ukuba bacabangele ukubaluleka kwemithetho kaJehova. Kudingeka baqiniseke ukuthi imithetho yakhe ilungile futhi mihle nokuthi ukuyilalela kufanele futhi kubonisa uthando. Kungashiwo ukuthi uwufakile umqondo kaNkulunkulu kubantwana bakho kuphela lapho uye wabonisana nabo ngemiBhalo baze bawamukela umbono kaNkulunkulu.
12. Umzali angamsiza kanjani umntanakhe ukuba abe nombono ofanele ngobuhlobo bobulili?
12 Lapho ukhuluma ngobulili, ungase umbuze, “Uma umuntu elalela umthetho kaJehova wokungabi nobuhlobo bobulili ngaphambi komshado, ucabanga ukuthi kuyomphuca injabulo?” Khuthaza umntanakho ukuba achaze ukuthi kungani ephendula ngaleyo ndlela. Ngemva kokubukeza ilungiselelo likaNkulunkulu eliyisimangaliso lokuveza umntwana, ungase ubuze: “Ucabanga ukuthi uNkulunkulu wethu onothando angabeka imithetho esenza singakujabuleli ukuphila? Noma ucabanga ukuthi imithetho yakhe ibekelwe ukuba sijabule futhi sivikeleke?” (IHubo 119:1, 2; Isaya 48:17) Thola umbono womntanakho kule ndaba. Khona-ke ungase uveze izibonelo zendlela ukuziphatha okubi kobulili okuholelé ngayo osizini nasenkathazweni. (2 Samuweli 13:1-33) Ngokubonisana nomntanakho aze aqonde umbono kaNkulunkulu futhi awamukele, uyobe ufeze lukhulu ekufakeni umqondo kaNkulunkulu kuye. Nokho, kunokunye futhi ongakwenza.
13. Yini abantwana okumelwe bayiqonde ngoJehova engabashukumisa kakhulu ukuba bamlalele?
13 Ukuhlakanipha kuyokwenza ukuba ungagcini nje ngokufundisa umntanakho ngemiphumela yokungamlaleli uJehova, kodwa futhi uyomchazela nokuthi indlela esiphila ngayo imphatha kanjani uJehova. Bonisa umntanakho ngeBhayibheli ukuthi singamzwisa ubuhlungu uJehova lapho singayenzi intando yakhe. (IHubo 78:41) Ungase umbuze, “Kungani kukubi ukuzwisa uJehova ubuhlungu?” bese uchaza: “Isitha sikaNkulunkulu uSathane sithi thina sikhonza uJehova ngenxa yezizathu zobugovu hhayi ngoba simthanda.” Yibe usuchaza ukuthi ngokugcina ubuqotho, uJobe wayijabulisa kanjani inhliziyo kaNkulunkulu, kanjalo enikeza impendulo ekumangaleleni kukaSathane kwamanga. (Jobe 1:9-11; 27:5) Umntanakho kudingeka aqonde ukuthi angamdabukisa uJehova noma amjabulise, kuye ngendlela aziphatha ngayo. (IzAga 27:11) Abantwana bangafundiswa lesi sifundo nezinye eziningi ezibalulekile ngokusebenzisa incwadi ethi Funda KuMfundisi Omkhulu.a
Imiphumela Ejabulisayo
14, 15. (a) Iziphi izifundo ezisencwadini ethi Funda KuMfundisi eziye zashukumisa abantwana? (b) Imiphi imiphumela emihle oye waba nayo ngokusebenzisa le ncwadi? (Bheka nebhokisi emakhasini 18-19.)
14 Umkhulu othile eCroatia ofundela umzukulu wakhe oneminyaka engu-7 incwadi ethi Funda KuMfundisi, ubhala ukuthi lo mfanyana wamtshela lokhu: “Umama wathi mangenze into ethile, kodwa ngangathanda ukuyenza. Ngase ngikhumbula isahluko esithi ‘Ukulalela Kuvikela Wena,’ ngakho ngaphindela kuye ngamtshela ukuthi ngizokwenza lokho ayengithuma kona.” Ngokuphathelene nesahluko esithi, “Isizathu Sokuba Singawaqambi Amanga,” umbhangqwana othile eFlorida, e-U.S.A., wathi: “[Lesi sahluko] sinemibuzo efuna ukuba umntwana akhiphe okusenhliziyweni yakhe futhi avume amaphutha abengeke awavume ezimweni ezivamile.”
15 Incwadi ethi Funda KuMfundisi inemifanekiso engaphezu kuka-230, futhi kunamazwana, noma incazelo ehambisana nomfanekiso noma iqoqo ngalinye lemifanekiso. “Indodana yami iye iwugqolozele umfanekiso ingavumi ukuba kudlulelwe kwelinye ikhasi,” kuphawula omunye umama oyazisayo le ncwadi. “Akukhona nje ukuthi imifanekiso yayo iyakhanga kodwa futhi iyodwa iyafundisa, noma okungenani yenze abantwana babuze. Emfanekisweni onomntwana obukele ithelevishini ekamelweni elingakhanyisiwe, indodana yami yabuza, ‘Mama, wenzani lo mfana?’ ibuza ngezwi elibonisa ukuthi iyabona ukuthi lo mfana uyaganga.” Amazwi ahambisana nalowo mfanekiso athi: “Ubani obona zonke izinto esizenzayo?”
Imfundo Ebalulekile Namuhla
16. Ikuphi okubalulekile abantwana okumelwe bakufundiswe namuhla, futhi ngani?
16 Abantwana kudingeka bazi ukuthi ikuphi okufanele nokungafanele ukwenziwa ngezitho zabo zobulili. Kodwa akulula njalo ukuxoxa ngale ndaba. Umlobeli wephephandaba elithile waphawula ukuthi wakhula enkathini lapho wawubhekwa njengomuntu ongenanhlonipho uma usebenzisa amagama abhekisele ezithweni zobulili. Ngokuphathelene nokufundisa abantabakhe, wabhala: “Kuzomelwe ngilwe namahloni ami.” Empeleni, uma abazali begwema ukukhuluma ngezindaba zobulili ngenxa yamahloni, akumvikeli umntwana. Abanukubeza izingane ngokobulili basizakala ngokungazi kwazo. Incwadi ethi Funda KuMfundisi Omkhulu ikhuluma ngalezi zindaba ngendlela enhle, ehloniphekile. Ukufundisa abantwana bakho ngezindaba zobulili akubaphuci ubumsulwa babo, kanti ukungabafundisi kungaholela ekuphucweni kwabo ubumsulwa babo.
17. Incwadi ethi Funda KuMfundisi ibasiza kanjani abazali ukuba bafundise abantwana babo ngezindaba zobulili?
17 Esahlukweni 10, lapho kuxoxwa khona ngezingelosi ezeza emhlabeni zafike zazala abantwana, umntwana uyabuzwa, “Wazini wena ngezindaba zobulili?” Le ncwadi inikeza impendulo elula, ehloniphekile. Kamuva, isahluko 32 siyachaza ukuthi abantwana bangavikelwa kanjani kubantu abafuna ukubanukubeza ngokobulili. Kubhalwé izincwadi eziningi ezibika ukuthi ukufundisa okunje kubalulekile. Omunye waphawula: “Ngesonto elidlule lapho indodana yami uJavan iye kudokotela wayo, lo dokotela wabantwana wabuza ukuthi sesixoxile yini noJavan ngokuthi yikuphi okufanele nokungafanele mayelana nezitho zakhe zobulili. Wajabula ukuzwa ukuthi sikwenzile lokhu sisebenzisa incwadi yethu entsha.”
18. Incwadi ethi Funda KuMfundisi iyidingida kanjani indaba yokukhulekela imifanekiso ewuphawu lwesizwe?
18 Esinye isahluko sikhuluma ngendaba eseBhayibhelini yabasha abathathu abangamaHebheru uShadiraki, uMeshaki, no-Abhedinego, abenqaba ukukhothamela umfanekiso omelela uMbuso WaseBhabhiloni. (Daniyeli 3:1-30) Abanye bangase bangaboni ukuthi ukukhulekela isithombe kuhlobene kanjani nokushayela ifulege indesheni, njengoba kusho incwadi ethi Funda KuMfundisi. Nokho, phawula ukuthi umlobi u-Edward Gaffney wathini lapho i-U.S. Catholic ixoxa naye. Wathi lapho indodakazi yakhe imtshela ukuthi yayifunde “umthandazo omusha esikoleni” ngemva kosuku lwayo lokuqala esikoleni somphakathi, wayicela ukuba iwusho. UGaffney wathi: “Yabeka isandla sayo esifubeni, yasho ngeqholo yathi, ‘Ngiyafunga ukuthi ngiyokwethembeka efulegeni . . . ’” Waqhubeka: “Khona manjalo, kwangikhanyela ukuthi oFakazi BakaJehova babeqinisile. Sikhona isici sokukhulekela ubuzwe esikhuthazwa ezikoleni zethu emabangeni aphansi impela—ubuqotho obungangatshazwa futhi obungenamkhawulo.”
Kuyazuzisa Ukwenza Konke Okusemandleni Akho
19. Imiphi imivuzo eba khona lapho sibafundisa abantwana?
19 Ngempela, kuyafaneleka ukuba wenze konke okusemandleni akho ekufundiseni abantabakho. Umama othile eKansas, e-U.S.A., wakhala izinyembezi zenjabulo lapho ethola incwadi evela endodaneni yakhe. Yabhala: “Ngizizwa ngibusiseke ngempela ngokuthi ngakhuliswa ngendlela engenzé ngazinza futhi ngavuthwa ngokomzwelo ngezinga elithile. Kumelwe nginincome impela ninobaba.” (IzAga 31:28) Incwadi ethi Funda KuMfundisi Omkhulu ingasiza abazali abaningi ngokwengeziwe ukuba bafundise abantwana ngendlela eyolivikela leli fa eliyigugu.
20. Yini abazali okufanele bahlale njalo beyikhumbula, futhi lokho kufanele kube namuphi umphumela kubo?
20 Abantwana bethu bayakufanelekela ukuthola sonke isikhathi sethu, ukubanaka nokuzikhandla. Baba abantwana isikhathi esifushane. Sebenzisa wonke amathuba okuba ube nabo futhi ubasize. Ngeke neze uzisole. Bayokuthanda. Hlale ukhumbula ukuthi abantwana bakho bayisipho osiphiwe uNkulunkulu. Yeka ukuthi bayifa eliyigugu kangakanani! (IHubo 127:3-5) Ngakho baphathise okwefa ngempela, njengokungathi uyolandisa kuNkulunkulu ngendlela obakhulisa ngayo, ngoba vele uyolandisa.
[Umbhalo waphansi]
a Inyatheliswa oFakazi BakaJehova. Bheka isahluko 40, esithi “Indlela Yokwenza UNkulunkulu Ajabule.”
Ungaphendula Kanjani?
• Kungani abazali kudingeka bavikele abantwana babo ikakhulukazi manje?
• Imfundo enjani enikeza ukuhlakanipha?
• Iziphi izindaba ezibalulekile namuhla okumelwe uzixoxe nabantwana bakho?
• Incwadi ethi Funda KuMfundisi ibasizé kanjani abazali ukuba bafundise abantwana babo?
[Ibhokisi/Izithombe ekhasini 18, 19]
Incwadi Yawo Wonke Umuntu
Incwadi ethi Funda KuMfundisi Omkhulu iklanyelwe ukusiza abazali noma abanye abantu abadala ukuba bafunde futhi baxoxe nezingane ngezimfundiso zikaJesu Kristu. Nokho, abantu abadala abaye bazifundela le ncwadi baye bazwakalisa amazwi aqotho okwazisa ngenxa yalokho abakufunde kuyo.
Indoda yaseTexas, e-U.S.A., yathi: “Incwadi ethi Funda KuMfundisi Omkhulu ilula kodwa iyashukumisa; ikhuthaza abantu babo bonke ubudala—ngisho nekhehla elineminyaka engu-76 njengami. Akeve enibonga lo muntu oyimi obelokhu ekhonza uJehova kusukela ebusheni.”
Umfundi waseLondon, eNgilandi, uyabika: “Izithombe ezinhle zale ncwadi ziyobakhanga nakanjani abazali nezingane. Indlela ehlelwe ngayo kanye nemibuzo ekuyo kuhle kakhulu. Azive zibekwe kahle izindaba ezibucayana, njengaleyo esesahlukweni 32, esithi ‘Indlela UJesu Avikelwa Ngayo.’” Lo mfundi waphetha: “Nakuba le ncwadi iklanyelwe izingane zoFakazi BakaJehova ngokuyinhloko, ngicabanga ukuthi othisha nabanye bangakujabulela impela ukuba nayo. Ngibheke phambili ekuyisebenziseni ezinyangeni naseminyakeni ezayo.”
Owesifazane waseMassachusetts, e-U.S.A., wakhuluma ‘ngezithombe zayo eziningi ezicatshangelwe kahle.’ Wabhala: “Ngiphawule ukuthi nakuba le ncwadi iklanyelwe izingane, izihloko ezikuyo zingasisiza nathi bantu abadala sicabange ngobuhlobo bethu noJehova.”
“Madoda! Akusibo ubuhle bencwadi lobu!” washo njalo owesifazane othile waseMaine, e-U.S.A. “Ayenzelwanga abantwana kuphela, kodwa yenzelwe thina sonke njengabantwana bakaNkulunkulu. Ingithinte ekujuleni futhi yashukumisa imizwelo yami yase iyithoba, ngaba nokuthula. Ngizizwa ngisondelene kakhulu noJehova njengoBaba wami. Ubuqede bonke ubuhlungu ebengibuthwele yonke le minyaka futhi wenze injongo yakhe yakhanya bhá.” Waphetha: “Ngitshela wonke umuntu ukuba ayifunde le ncwadi.”
Owesifazane waseKyoto, eJapane, wabika ukuthi lapho eyifundela abazukulu bakhe le ncwadi, babembuza imibuzo enjengokuthi: “‘Wenzani lo mfana gogo? Ithethiselwani le ntombazanyana? Lo mama yena wenzani? Ibhubesi lona?’ Le ncwadi isifundisa izinto esinesithakazelo kuzo, ngakho ngiyithanda ukudlula noma iyiphi incwadi engingayithola emtatsheni wezincwadi.”
Ubaba othile eCalgary, eCanada, uthi kwathi lapho eqeda ukuyithola le ncwadi, waqala ukuyifunda nendodakazi yakhe eneminyaka engu-6 ubudala nendodana yakhe eneminyaka engu-9. Uthi: “Izingane zami zavele zayithanda. Zazilalelisisa futhi ziphendule imibuzo ngokusuka enhliziyweni. Zazizizwa zinendima enkulu esifundweni, futhi zithole nethuba lokuveza ezikucabangayo. Zivele zaba nomdlandla futhi indodakazi yami ithi isifuna siyifunde nsuku zonke ntambama.”
Ngemva kokufunda isihloko esithile, omunye ubaba wathi: “Mina nendodana yami saxoxa amahora amaningi ngoJehova nangezinjongo zakhe. Yayinemibuzo eminingi esekelwe kule ncwadi. Ngagcwala izinyembezi lapho isiyolala futhi ingibuza: ‘Sizophinda futhi sifunde, angithi baba? Nginemibuzo eminingi futhi ngifuna ukwazi konke ngoJehova.’”
[Isithombe ekhasini 15]
Bazali, yini eningayifunda esibonelweni sikaManowa?
[Isithombe ekhasini 16]
Bantwana, yini eningayifunda esibonelweni samaHebheru amathathu?
[Izithombe ekhasini 17]
Imifanekiso namazwi ahambisana nayo encwadini ethi “Funda KuMfundisi” kungamathuluzi anamandla okufundisa
Uqamba amanga uthini u-Ananiya kuPetru?
Ubani obona zonke izinto esizenzayo?