Ukushumayela Ngokwethukela Ensimini YaseMexico Yabakhuluma IsiNgisi
ESEBENZISA isikhathi asichitha elinde ayehamba nabo e-Athene, umphostoli uPawulu washumayela ngokwethukela. IBhayibheli liyabika: “Wabonisana . . . esigcawini nsuku zonke nalabo okwakwenzeka ukuba babe khona.” (IzEnzo 17:17) Ohambweni lwakhe esuka eJudiya eya eGalile, uJesu washumayela ngokwethukela kowesifazane ongumSamariya eceleni komthombo. (Johane 4:3-26) Ingabe uyawasebenzisa wonke amathuba okukhuluma ngezindaba ezinhle zoMbuso kaNkulunkulu?
Insimu yabakhuluma isiNgisi eMexico ikufanele ngokukhethekile ukushumayela ngokwethukela. Ababuki bamazwe bahambela izindawo zokungcebeleka, abafundi baseyunivesithi bayafika bahambe, nabantu bakwamanye amazwe asebathatha umhlala-phansi eMexico bavamile ukuya emapaki nasezitolo zokudlela. OFakazi BakaJehova abaningi abasaziyo isiNgisi sebengompetha ekuqaleni izingxoxo nalaba bantu. Empeleni, bakuphaphamele ngempela ukukhuluma nanoma ubani obonakala sengathi owakwelinye izwe noma okhuluma isiNgisi. Ake sibone ukuthi bakwenza kanjani lokho.
Ezikhathini eziningi oFakazi abavela kwamanye amazwe abakhonza ensimini yabakhuluma isiNgisi bamane bazazise kubantu okusobala ukuthi baphuma kwelinye izwe, bese bebabuza ukuthi bavelaphi. Lokhu kuye kuholele ekubuzweni kukaFakazi ukuthi uzokwenzani lapha eMexico, bese evulekelwa ithuba lokukhuluma ngezinkolelo zobuKristu. Ngokwesibonelo, uGloria, okhonza lapho kunendingeko enkulu khona ensimini yabakhuluma isiNgisi e-Oaxaca, ukuthola kulula ngokukhethekile ukuqala izingxoxo ngaleyo ndlela. Lapho ebuyela ekhaya evela koshumayela ngokwethukela edolobheni, uGloria wamiswa omunye umbhangqwana ovela eNgilandi. Inkosikazi yababaza: “Angikholwa ukuthi ngibona owesifazane onsundu la ezitaladini zase-Oaxaca!” Kunokuba acasuke, uGloria wazihlekela, base bexoxa ngesizathu sokuza kwakhe eMexico. Le nkosikazi yamema uGloria ukuba eze kwayo azophuza ikhofi. Ngemva kokuhlela isikhathi abazohlangana ngaso, uGloria wayihambisela omagazini INqabayokulinda ne-Phaphama!, kodwa le nkosikazi yabenqaba, ithi ayikholelwa ukuthi uNkulunkulu ukhona. UGloria wabe eseyitshela ukuthi uyakujabulela ukukhuluma nabantu abangakholelwa ukuthi uNkulunkulu ukhona nokuthi ubengathanda ukuzwa umbono wayo ngesihloko esithi “Izindawo Zokukhulekela—Ingabe Siyazidinga?” Le nkosikazi yavuma, ithi: “Uma ungangigculisa, uyobe wenze lukhulu impela.” Ziningana ezinye izingxoxo ezithakazelisayo ababa nazo bebe bephuza ikhofi. Kamuva lo mbhangqwana wabuyela eNgilandi, kodwa izingxoxo zaqhubeka nge-E-mail.
UGloria wabuye futhi waqala ingxoxo noSaron, umfundi waseWashington D.C., owayese-Oaxaca ezosebenza ngokuzithandela nabesifazane bomdabu bakhona ukuze aphothule iziqu zakhe ze-master. Ngemva kokutusa uSaron ngemizamo yakhe, uGloria wachaza isizathu sokuza kwakhe eMexico. Lokhu kwaholela engxoxweni emnandi yeBhayibheli nalokho uNkulunkulu ayokwenzela abampofu nabo bonke abantu. USaron wathi kuyaxaka ukuthi athi engakaze akhulume noFakazi e-United States, bese kuthi omunye wabantu bokuqala ahlangana nabo eMexico kube omunye woFakazi BakaJehova! USaron wasamukela isifundo seBhayibheli futhi waqala ngaso leso sikhathi ukuya emihlanganweni yobuKristu.
Abantu abaningi bakwamanye amazwe baye bathuthela ezindaweni zokungcebeleka ezingasolwandle eMexico, befuna indawo esapharadesi. ULaurel usebenzisa lesi sifiso sabo ukuze aqale izingxoxo e-Acapulco. Ubuza abantu ukuthi i-Acapulco ithi ayifane yini nepharadesi uma iqhathaniswa nendawo abaphuma kuyo nokuthi yini abayithandayo ngayo, bese echaza ukuthi maduze umhlaba wonke uzoba ipharadesi elingokoqobo. Ukuqala kwakhe ingxoxo ngale ndlela kwaholela esifundweni seBhayibheli nowesifazane waseCanada ahlangana naye endaweni kadokotela wezilwane. Kungenzeka yini indlela efana nale isebenze lapho uhlala khona?
Ukushumayela ‘Emigwaqweni Nasezigcawini’
Ngokuvamile emigwaqweni nasezigcawini ingxoxo iqalwa ngokubuza: “Uyasazi isiNgisi?” Abantu abaningi baseMexico bayasazi isiNgisi ngenxa yomsebenzi wabo noma ngenxa yokuthi bake bahlala e-United States.
Umbhangqwana ongoFakazi waya kowesifazane osekhulile owayeqhutshwa umhlengikazi ngesihlalo sabakhubazekile. Lo mbhangqwana wabuza lona wesifazane ukuthi uyasazi yini isiNgisi. Wathi uyasazi ngoba wayehlale iminyaka eminingi e-United States. Wathatha INqabayokulinda ne-Phaphama!, omagazini ayengakaze abafunde ngaphambili, wazisho negama lakhe, elinguConsuelo, wabanika nekheli lakhe. Lapho lo mbhangqwana uya kulelo kheli ngemva kwezinsuku ezine, wathola ukuthi kwakuyikheli lasekhaya labakhulile elaliphethwe izindela ezingamaKatolika. Ekuqaleni, kwaba nzima ukuxhumana noConsuelo ngoba izindela zazingawuthembi kahle lo mbhangqwana, zathi uConsuelo ngeke akwazi ukuwungenisa. Lo mbhangqwana wazincengisisa izindela ukuba zitshele uConsuelo ukuthi bebefikile befuna ukumbingelela. UConsuelo wawungenisa lo mbhangqwana. Kusukela lapho, lo gogo oneminyaka engu-86 ubudala ubelokhu ejabulela isifundo seBhayibheli esiqhutshwa njalo, naphezu kwezinkulumo ezingezinhle zezindela. Uye waya nakweminye yemihlangano yobuKristu.
IzAga 1:20 zithi: “Ukuhlakanipha kweqiniso kuqhubeka kumemeza kakhulu esitaladini. Kuqhubeka kuzwakalisa izwi lako ezigcawini.” Phawula indlela okwenzeka ngayo lokho esigcawini saseSan Miguel de Allende. Ngelinye ilanga ekuseni, uRalph waya kwenye indoda esiqinile eyayihleli ebhentshini. Le ndoda yamangala ngempela lapho ihanjiselwa INqabayokulinda ne-Phaphama! yabe isixoxela uRalph ngokuphila kwayo.
Le ndoda yayilwe isikhathi eside empini yaseVietnam, futhi yacindezeleka ngokomzwelo ngenxa yokubona abantu abaningi befa okwayibangela ukuba ibe nesifo sokuphazamiseka kwemizwa phakathi nempi. Yayikhishiwe lapho impi yayibambene khona yayiswa ekamu. Lapho, yabelwa ukugeza izidumbu zamasosha ekuzilungiseleleni ukuthunyelwa e-United States. Manje, ngemva kweminyaka engu-30, isahlushwa amaphupho angapheli asabisayo kanye netwetwe. Ngalelo langa ekuseni, njengoba yayihleli esigcawini, yayikade ithandazela usizo buthule.
Le ndoda yamukela labo magazini, yavuma nokuya eHholo LoMbuso. Ngemva kwemihlangano, yathi phakathi nalawo mahora amabili iseHholo LoMbuso, ibiqala ngqá ukuba nokuthula eminyakeni engu-30. Le ndoda yayize eSan Miguel de Allende amasonto ambalwa nje, kodwa yajabulela izifundo zeBhayibheli eziningana, yaya nakuyo yonke imihlangano kwaze kwaba yilapho ibuyela ekhaya. Kwenziwa amalungiselelo okuba iqhubeke ifundelwa.
Ukushumayela Ngokwethukela Emsebenzini Nasesikoleni
Ingabe uyaziveza ukuthi ungomunye woFakazi BakaJehova emsebenzini? U-Adrián, oqashisa ngamafulethi okuphumula eCape San Lucas, yilokho kanye akwenzayo. Ngenxa yalokho, uJudy, omunye wabasebenza no-Adrián, uthi: “Eminyakeni emithathu nje edlule, uma wawungangitshela ukuthi ngizoba omunye woFakazi BakaJehova, ngangizothi, ‘Ngeke ungibone!’ Kodwa nganquma ukuthi ngifuna ukufunda iBhayibheli. Ngacabanga, ‘Lingaba nzima kangakanani ngempela, njengoba ngikuthanda nokufunda?’ Angicabangi ukuthi ngawafunda amakhasi angaphezu kwayisithupha ngaphambi kokuba ngibone ukuthi ngangidinga usizo. Ukuphela komuntu engamcabanga kwakungu-Adrián, engangisebenza naye. Ngangikuthanda ukukhuluma naye ngoba nguyena kuphela umuntu owayelungile emsebenzini.” Ngokushesha u-Adrián wathi uzofika nengoduso yakhe, uKatie, bazophendula yonke imibuzo kaJudy. UKatie waqala ukutadisha naye iBhayibheli, futhi kungakabiphi uJudy waba uFakazi obhapathiziwe.
Kuthiwani ngokushumayela ngokwethukela esikoleni? OFakazi ababili babefunda iSpanishi eyunivesithi, kodwa ngolunye usuku babephuthile ekilasini beye emhlanganweni omkhulu wobuKristu. Lapho bebuyela ekilasini, bacelwa ukuba balandise ngeSpanishi lokho ababekade bekwenza. Basebenzisa lelo thuba ukuze bashumayele, ngezinga elingcono kakhulu ababengenza ngalo ngolimi lweSpanishi. Uthisha wabo, uSilvia, wayenesithakazelo esikhulu eziprofethweni zeBhayibheli. Wasivuma isifundo seBhayibheli esasizoqhutshwa ngesiNgisi futhi manje ungummemezeli wezindaba ezinhle. Amalungu amaningana omkhaya wakhe nawo ayafundelwa. USilvia uthi: “Ngakuthola engangikufune ukuphila kwami konke.” Yebo, ukushumayela ngokwethukela kungathela izithelo ezinhle.
Ukusebenzisa Amanye Amathuba
Ukuba nomoya wokungenisa izihambi kungavula ithuba lokushumayela. UJim noGail, abakhonza eSan Carlos, eSonora, bakuthola kuyiqiniso lokho. Owesifazane owayeshayisa izinja zakhe ngomoya ekuseni ngo-6:00, wama wababaza igceke labo. UJim noGail bamcela ukuba angene azophuza ikhofi. Ngokokuqala ngqá eminyakeni engu-60, lona wesifazane wezwa ngoJehova nangethemba lokuphila phakade. Kwaqalwa isifundo seBhayibheli.
U-Adrienne naye ubaphatha ngomusa abantu angabazi. Wayedla esitolo sokudla eCancún ngesikhathi umfana omncane eza kuye embuza ukuthi akaveli yini eCanada. Lapho ethi wayevela khona, lo mfanyana wachaza ukuthi yena nonina babezama ukusiza udadewabo ngombiko wesikole ophathelene nabantu baseCanada. Unina, owayekwazi ukukhuluma isiNgisi, weza. Ngemva kokuyiphendula ngesineke imibuzo yakhe ngabantu baseCanada, u-Adrienne wathi: “Kodwa kunesizathu esibaluleke ngempela sokuza kwami lapha ngisuka eCanada—ukusiza abantu bafunde ngeBhayibheli. Ubungakuthakazelela lokho?” Owesifazane wavuma. Wayelishiyile isonto lakhe eminyakeni eyishumi edlule futhi ubelokhu ezama ukuzitadishela ngokwakhe iBhayibheli. Wanika u-Adrienne ikheli lakhe nezinombolo zocingo, kwaqalwa nesifundo seBhayibheli esihle.
‘Phonsa Isinkwa Sakho Phezu Kwamanzi’
Ukukhuluma ngeqiniso leBhayibheli kuzo zonke izimo kuvamile ukuvula amathuba okushumayela kubantu abanesikhathi esincane noma abangenaso nhlobo isikhathi sokulalela isigijimi soMbuso. Esitolo sokudla esimatasa edolobheni elinetheku eZihuatanejo, uFakazi wacela umbhangqwana owawuvela kwelinye izwe ukuba uhlale naye, njengoba isitolo sase sigcwele. Lo mbhangqwana wawusuhambe ngesikebhe izindawo ngezindawo iminyaka eyisikhombisa. Waveza imizwa yawo yokungabathandisisi kahle oFakazi BakaJehova. Ngemva kwalokho kuhlangana esitolo sokudla, uFakazi wawuhambela esikebheni sawo lo mbhangqwana futhi wawumemela ekhaya lakhe. Wathatha omagazini abangaphezu kuka-20 nezincwadi ezingu-5, wathembisa ukufuna oFakazi edolobheni elilandelayo ozoma kulo.
UJeff noDeb baphawula umkhaya owawunomntwana omuhle wentombazane usendaweni yokudlela enxanxatheleni yezitolo eCancún. Lapho bencoma umntwana, abazali bakhe babacela ukuba bazodla nabo i-pizza. Kwabe sekuvela ukuthi lo mkhaya ngowaseNdiya. Babengakaze bezwe ngoFakazi BakaJehova, bengakaze bazibone nezincwadi zethu. Bahamba esitolo sebephethe ezinye zezincwadi zoFakazi.
Kwenzeka okufanayo esiqhingini esingasechwebeni laseYucatán. Umbhangqwana waseChina owawusanda kushada wacela uJeff ukuba awuthathe izithombe, okuyinto ayenza ngentokozo. UJeff wabe esethola ukuthi nakuba wawuhlale e-United States iminyaka engu-12 edlule, wawungakaze ubabone noma uzwe ngoFakazi BakaJehova! Kwabe sekulandela ingxoxo emnandi. UJeff wabakhuthaza ukuba bafune oFakazi lapho bebuyela ekhaya.
Kungenzeka kube nesenzakalo esikhethekile endaweni yakini esingase sikuvulele ithuba lokushumayela ngokwethukela. Lapho umongameli wase-United States evakashele umongameli waseMexico epulazini lakhe eduze kwaseGuanajuato, izintatheli ezazivela emhlabeni wonke zeza ukuzobika ngaleso senzakalo. Omunye umkhaya woFakazi wanquma ukusebenzisa lelo thuba ukuze ushumayele ngolimi lwesiNgisi. Ukusabela kwaba kuhle. Ngokwesibonelo, enye intatheli yayibike ngezimpi eziningana, njengeyaseKosovo neyaseKuwait. Uzakwabo wayefele ezandleni zayo le ntatheli ngemva kokudutshulwa umuntu owayecashile. Ngemva kokuzwa ngovuko, le ntatheli, ihlengezela izinyembezi, yabonga uNkulunkulu ngokuyivumela ukuba yazi ukuthi ukuphila kunayo injongo. Yathi nakuba yayingeke ibuye iwubone lo mbhangqwana ongoFakazi, lezi zindaba ezinhle ezivela eBhayibhelini ziyohlala zisenhliziyweni yayo.
Njengoba singabona, imiphumela yokushumayela kanjalo ayivamile ukwaziwa. Nokho, inkosi ehlakaniphile uSolomoni yathi: “Thumela isinkwa sakho ebusweni bamanzi, ngoba uyophinde futhi usithole ngokuhamba kwezinsuku eziningi.” Yathi futhi: “Hlwanyela imbewu yakho ekuseni futhi kuze kube kusihlwa ungasivumeli isandla sakho siphumule; ngoba awazi ukuthi yikuphi lapho le iyophumelela khona, kungaba lapha noma laphaya, noma ukuthi zombili ziyoba zinhle ngokufanayo.” (UmShumayeli 11:1, 6) Yebo, “thumela isinkwa sakho” ngentshiseko phezu kwamanzi amaningi futhi “hlwanyela imbewu yakho” ungagodli, njengoba kwenza uPawulu noJesu kanye nalabo Fakazi banamuhla ensimini yabakhuluma isiNgisi eMexico.