Shumayela Ngenjongo Yokwenza Abafundi

“Lapho oPrisila no-Akhwila bemuzwa [u-Apholo], bamfaka phakathi kwabo base bemchazela indlela kaNkulunkulu ngokuqonde ngokwengeziwe.”—IZENZO 18:26.

1. Yini u-Apholo ayeyidinga, yize “ayevutha emoyeni”?

UPRISILA no-Akhwila, umbhangqwana oshadile ongamaKristu wekhulu lokuqala, babebheke u-Apholo ebeka inkulumo esinagogeni emzini wase-Efesu. Ngamazwi akhe obugagu nethonya lokukholisa, u-Apholo wayehamba nazo izilaleli zakhe. ‘Wayevutha emoyeni,’ futhi ‘efundisa ngokuqondile ngezinto eziphathelene noJesu.’ Nokho, kwakusobala ukuthi u-Apholo ‘wayejwayelene nobhapathizo lukaJohane kuphela.’ Lokho u-Apholo ayekushumayela ngoKristu kwakuyiqiniso kona. Inkinga kwakuwukuthi kwakulinganiselwe, kungaphelele. U-Apholo kwakudingeka andise ulwazi lwakhe ngendima kaJesu Kristu ekugcwalisekeni kwenjongo kaJehova.—IzEnzo 18:24-26.

2. Iyiphi inselele uPrisila no-Akhwila abayamukela?

² UPrisila no-Akhwila basukumela phezulu baziveza ukuthi bakulungele ukumsiza u-Apholo ukuba akwazi ukugcina “konke” uKristu ayekuyalile. (Mathewu 28:19, 20) Ukulandisa kuthi bamthatha u-Apholo “bamfaka phakathi kwabo base bemchazela indlela kaNkulunkulu ngokuqonde ngokwengeziwe.” Nokho, kwakunezinto ezithile ngo-Apholo ezazingenza amanye amaKristu abe manqikanqika ukumfundisa. Zinto zini? Futhi yini esingayifunda emizamweni kaPrisila no-Akhwila yokuxoxa no-Apholo ngemiBhalo? Ukubukeza lokhu kulandisa okungokomlando kungasisiza kanjani ukuba sigxile ekuqaleni izifundo zeBhayibheli zasekhaya?

Gxila Ezidingweni Zabantu

3. Kungani uPrisila no-Akhwila bengavinjwanga isizinda sika-Apholo ukuba bamfundise?

³ Nakuba ayengumJuda ngokuzalwa, kubonakala sengathi u-Apholo wayekhulele emzini wase-Aleksandriya. Ngaleso sikhathi i-Aleksandriya yayiyinhloko-dolobha yaseGibhithe futhi iyisikhungo semfundo ephakeme, idume ngomtapo wayo wezincwadi omkhulukazi. Kulo muzi kwakunamaJuda amaningi, nezazi. Ngakho, inguqulo yolimi lwesiGreki yemiBhalo YesiHebheru ebizwa ngokuthi i-Septuagint yavela lapho. Shono u-Apholo “ayenolwazi oluhle lwemiBhalo”! U-Akhwila noPrisila babengabenzi bamatende. Ingabe ukuqephuza kuka-Apholo kwabenza bazeya? Cha. Ngenxa yothando bacabanga ngaye, izidingo zakhe, nokuthi bangamsiza kanjani.

4. U-Apholo walutholaphi futhi kanjani usizo ayeludinga?

⁴ Kungakhathaliseki ukuthi wayeqephuza kangakanani, u-Apholo wayedinga ukufundiswa. Usizo ayeludinga lwalungenakutholakala eyunivesithi ethile kodwa waluthola emalungwini ebandla lobuKristu ayekanye nawo. U-Apholo wayesezozuza emaphuzwini ayezomenza aliqonde ngokunembe kakhudlwana ilungiselelo likaNkulunkulu lensindiso. UPrisila no-Akhwila “bamfaka phakathi kwabo base bemchazela indlela kaNkulunkulu ngokuqonde ngokwengeziwe.”

5. Lalinjani ingokomoya likaPrisila no-Akhwila?

⁵ UPrisila no-Akhwila babegxilile ngokomoya, bezimelele okholweni. Cishe, ‘ngaso sonke isikhathi babekulungele ukuvikela phambi kwabo bonke abafuna ngenkani isizathu sethemba labo,’ kungakhathaliseki ukuthi ngumuntu ocebile, ompofu, isazi, noma isigqila. (1 Petru 3:15) U-Akhwila nomkakhe babekwazi ‘ukuphatha izwi leqiniso ngokufanele.’ (2 Thimothewu 2:15) Ngokusobala, babengabafundi abakhuthele bemiBhalo. U-Apholo kwamthinta ngokujulile ukufundiswa ngokusekelwe ‘ezwini likaNkulunkulu, eliphilayo nelinamandla,’ elithinta inhliziyo.—Hebheru 4:12.

6. Sazi kanjani ukuthi u-Apholo walwazisa usizo aluthola?

⁶ U-Apholo wasazisa isibonelo sabafundisi bakhe, waba nekhono nakakhulu ekwenzeni abafundi. Walusebenzisa ngokuphumelelayo ulwazi lwakhe emsebenzini wokumemezela izindaba ezinhle, ikakhulu emaJudeni. Waba usizo ngokuphawulekayo ekukholiseni amaJuda ngoKristu. Njengoba ‘ayemandla emiBhalweni,’ wayekwazi ukuwabonisa ukuthi bonke abaprofethi basendulo babelangazelela ukufika kukaKristu. (IzEnzo 18:24, Kingdom Interlinear Translation) Ukulandisa kunezela ukuthi u-Apholo wabe eseya e-Akhaya, lapho “abasiza kakhulu [khona] labo ababekholwe ngenxa yomusa ongafanelwe kaNkulunkulu; ngoba wabonisa ngokuphelele ukuthi amaJuda ayenephutha, kuyilapho ebonisa ngemiBhalo ukuthi uJesu unguKristu.”—IzEnzo 18:27, 28.

Funda Esibonelweni Sabanye Abafundisi

7. U-Akhwila noPrisila baba kanjani abafundisi abanekhono?

⁷ U-Akhwila noPrisila baba kanjani abafundisi beZwi likaNkulunkulu abanekhono? Ngaphandle kokukhuthalela kwabo isifundo somuntu siqu nokuba khona emihlanganweni, ubudlelwane babo obuseduze nomphostoli uPawulu kumelwe ukuba basiza kakhulu. UPawulu wahlala izinyanga ezingu-18 kwaPrisila beno-Akhwila eKorinte. Basebenza ndawonye bakha amatende futhi bewalungisa. (IzEnzo 18:2, 3) Cabanga ngezingxoxo ezijulile zemiBhalo okumelwe ukuba babeba nazo. Futhi yeka ukuthi kwakubafaka umfutho kanjani ngokomoya ukuba seduze kangaka noPawulu! “Ohamba nabahlakaniphile uyohlakanipha,” kusho izAga 13:20. Ukuzihlanganisa nomuntu okahle kwaba nethonya elihle emikhubeni yabo engokomoya.—1 Korinte 15:33.

8. UPrisila no-Akhwila bafundani ngokubheka uPawulu enkonzweni yakhe?

⁸ Lapho uPrisila no-Akhwila bebheka uPawulu njengommemezeli woMbuso, babebona isibonelo esihle somfundisi. Ukulandisa okukuzEnzo kuthi uPawulu “wayenikeza inkulumo esinagogeni [eKorinte] masabatha onke futhi ethonya amaJuda namaGreki.” Kamuva, lapho esenoSila noThimothewu, uPawulu “waba matasa kakhulu ngezwi, efakaza kumaJuda ukuze abonise ukuthi uJesu unguKristu.” Lapho kungatholakali sithakazelo esitheni emalungwini esinagoge, uPrisila no-Akhwila bambona uPawulu eya koshumayela endaweni engconywana, endlini eyayakhelene nesinagoge. Lapho, uPawulu wakwazi ukusiza uKrispu, “isikhulu esengamele sesinagoge,” waba umfundi. Cishe uPrisila no-Akhwila baphawula ukuthi ukuba kwalesi sikhulu ngumfundi kwaba nethonya elikhulu ensimini, kwayenza yathela. Ukulandisa kuthi: “UKrispu . . . wakholwa yiNkosi, nendlu yakhe yonke yakholwa. Abaningi kwabaseKorinte abezwa, bakholwa futhi babhapathizwa.”—IzEnzo 18:4-8.

9. UPrisila no-Akhwila benzani ngesibonelo sikaPawulu?

⁹ Isibonelo sikaPawulu enkonzweni yasensimini salingiswa abanye abamemezeli boMbuso, njengabo oPrisila no-Akhwila. Lo mphostoli wanxusa amanye amaKristu: “Yibani abalingisi bami, njengoba nje nami ngingumlingisi kaKristu.” (1 Korinte 11:1) Ngokuvumelana nesibonelo sikaPawulu, uPrisila no-Akhwila basiza u-Apholo ukuba aziqonde ngokunembe kakhudlwana izimfundiso zobuKristu. Naye wabe esesiza abanye. Akungabazeki ukuthi uPrisila no-Akhwila basiza ekwenzeni abafundi eRoma, eKorinte, nase-Efesu.—IzEnzo 18:1, 2, 18, 19; Roma 16:3-5.

10. Yini oyifundile kuzEnzo isahluko 18 eyokusiza emsebenzini wokwenza abafundi?

¹⁰ Yini esingayifunda ngokuhlola izEnzo isahluko 18? Njengoba nje u-Akhwila noPrisila kungenzeka bafunda kuPawulu, nathi singathuthukisa ikhono lethu lokwenza abafundi ngokulandela isibonelo sabafundisi abahle beZwi likaNkulunkulu. Singazihlanganisa nalabo ‘abamatasa kakhulu ngezwi’ futhi ‘abafakaza ngokugcwele’ kwabanye. (IzEnzo 18:5, Kingdom Interlinear Translation) Singaqaphela indlela abafinyelela ngayo izinhliziyo zabantu ngokusebenzisa amakhono okufundisa akholisayo. Amakhono anjalo angasisiza ukuba senze abafundi. Lapho sifundela umuntu othile iBhayibheli, singase sisikisele ukuba ameme amanye amalungu omkhaya wakhe noma omakhelwane ukuba babe khona nabo esifundweni. Noma singase simcele asitshele ngabanye esingabafundela iBhayibheli.—IzEnzo 18:6-8.

Yakha Amathuba Okwenza Abafundi

11. Bangatholakalaphi abafundi abasha?

¹¹ UPawulu namaKristu ayekanye nawo babezama ukwenza abafundi ngokushumayela endlini ngendlu, emakethe, nasohambweni—empeleni, yonke indawo. Njengesisebenzi soMbuso esishisekayo esizama ukwenza abafundi, ungawenabisa yini umsebenzi wakho wenkonzo yasensimini? Ungawasebenzisa yini ngokuphumelelayo amathuba okufuna abafanelekayo ushumayele kubo? Iziphi ezinye zezindlela abanye abamemezeli bezindaba ezinhle abaye babathola ngazo abafundi? Ake siqale sibheke insimu yokushumayela ngocingo.

12-14. Ukuze ubonise izinzuzo zokushumayela ngocingo, xoxa okuhlangenwe nakho kwakho noma okukulezi zigaba.

¹² Lapho eshumayela endlini ngendlu eBrazil, umKristu esizombiza ngoMaria wanika intokazi ethile ipheshana lapho iphuma esakhiweni samafulethi. Esebenzisa isihloko sepheshana njengesethulo, uMaria wabuza, “Ungathanda yini ukwazi okwengeziwe ngeBhayibheli?” Intokazi yaphendula: “Ngingathanda kakhulu. Inkinga nje ukuthi ngiwuthisha; manje ukufundisa kusithatha sonke isikhathi sami.” UMaria wachaza ukuthi bangaxoxa ngezihloko ezithile zeBhayibheli ocingweni. Lona wesifazane wanika uMaria inombolo yakhe yocingo, futhi ngalo lolo suku kusihlwa, waqala isifundo ngocingo esebenzisa incwajana ethi Yini UNkulunkulu Ayifunayo Kithi?a

¹³ Lapho sishumayela ngocingo, isikhonzi sesikhathi esigcwele saseTopiya sethuka lapho sikhuluma nendoda kodwa sezwa kunomsindo kulowo muzi. Le ndoda yacela lo dade ukuba abuye ashaye ucingo kamuva. Lapho ephinda eshaya, yaxolisa yathi ngenkathi eyishayele ucingo ekuqaleni, yona nomkayo bebephakathi kwengxabano eshubile. Udade wasebenzisa lokhu okwashiwo yile ndoda njengethuba lokuveza isiqondiso esihlakaniphile esinikezwa yiBhayibheli sokusingatha izinkinga zomkhaya. Wayitshela ukuthi imikhaya eminingi iye yasizwa yincwadi ethi Imfihlo Yenjabulo Yomkhaya, enyatheliswa oFakazi BakaJehova. Ngemva kwezinsuku ezimbalwa incwadi ihanjisiwe, udade waphinde wayishayela ucingo le ndoda. Yababaza: “Le ncwadi isindise umshado wami!” Empeleni, yayibize umhlangano womkhaya ukuze ixoxe nawo ngamaphuzu amahle eyayiwafunde encwadini. Kwaqalwa isifundo seBhayibheli sasekhaya, futhi ngokushesha le ndoda yaqala ukuba khona njalo emihlanganweni yobuKristu.

¹⁴ Ummemezeli woMbuso eDenmark owaqala isifundo seBhayibheli ngokushumayela ngocingo uthi: “Umbonisi wenkonzo wangikhuthaza ukuba ngishumayele ngocingo. Ngaqale ngaba manqikanqika, ngithi: ‘Akuzwani negazi lami.’ Kodwa ngelinye ilanga ngaqunga, ngashayela umninikhaya wokuqala ucingo. Kwaphendula uSonja, kwathi ngemva kwengxoxo emfushane, wavuma ukulethelwa izincwadi ezisekelwe eBhayibhelini. Ngelinye ilanga kusihlwa saxoxa ngendaba yendalo, wafuna ukufunda incwadi ethi Life—How Did It Get Here? By Evolution or by Creation.b Ngathi kungaba kuhle uma singahlangana sibonane sixoxe ngale ndaba. Wavuma. Ngafika uSonja esesilungele isifundo, futhi kusukela lapho, sifunda masonto onke.” Lo dadewethu uyaphetha: “Ngase ngineminyaka ngithandazela isifundo seBhayibheli, kodwa ngangingalindele ukusithola ngokushumayela ngocingo.”

15, 16. Ikuphi okuhlangenwe nakho ongakulandisa okubonisa inzuzo yokuphaphamela izindlela ezihlukahlukene zokuqala izifundo zeBhayibheli?

¹⁵ Abaningi bayaphumelela ngenxa yokusebenzisa ukusikisela kokushumayela kubantu nomaphi lapho bekhona. Owesifazane ongumKristu e-United States wapaka imoto yakhe eceleni kweveni yefemu ethile endaweni yokupaka izimoto. Lapho owesifazane owayesevenini embona, udade waqala ukuchaza umsebenzi wethu wokufundisa ngeBhayibheli. Lona wesifazane walalela, waphuma evenini weza emotweni kadade. Wathi: “Angive ngijabula ngokuma kwakho ukhulume nami. Senginesikhathi eside ngingazitholi izincwadi zenu zeBhayibheli. Kanti vele nje, ngifuna ukuphinde ngifundelwe iBhayibheli. Ungangifundela?” Ngaleyo ndlela udadewethu wakha isimo esikahle sokuxoxa ngezindaba ezinhle.

¹⁶ Udade othile e-United States waba nokuhlangenwe nakho okulandelayo lapho ehambela ikhaya lasebekhulile nabagulayo: Waya kumqondisi othile wakhona wafike wamtshela ukuthi angathanda ukuvolontiya asize ekwaneliseni izidingo ezingokomoya zabantu bakhona. Udadewethu wanezela nokuthi angajabula ukubaqhubela isifundo seBhayibheli samasonto onke samahhala bonke abathandayo ukuba khona. Umqondisi wamnika imvume yokuhambela izindlu zabantu. Kungakabiphi, wayeseqhuba isifundo seBhayibheli kathathu ngesonto nabantu abangu-26, omunye wabo okwaziyo ukuba khona njalo emihlanganweni yethu.

17. Iyiphi indlela evame ukuphumelela ekuqaleni izifundo zeBhayibheli zasekhaya?

¹⁷ Kwabanye abamemezeli boMbuso, ukusicela ngokuqondile isifundo seBhayibheli kuba nemiphumela emihle. Ngelinye ilanga ibandla elinabamemezeli abangu-105 lenza umzamo okhethekile wokucela umninikhaya ngamunye elihlangana naye ukuba aqhutshelwe isifundo seBhayibheli. Kwaphuma abamemezeli abangu-86 enkonzweni yasensimini, futhi ngemva kwamahora amabili emsebenzini wokushumayela, bathola ukuthi kwakuqalwe izifundo zeBhayibheli ezintsha okungenani ezingu-15.

Qhubeka Ufuna Abafanelekayo

18, 19. Isiphi isiqondiso sikaJesu esibalulekile okufanele sisikhumbule njalo, futhi yini okufanele siyenze ukuze sifeze lokho?

¹⁸ Njengommemezeli woMbuso, ungase uthande ukuzama ukusikisela okushiwo kulesi sihloko. Yebo, kungaba ukuhlakanipha ukucabanga ngamasiko endawo lapho ucabangela izindlela ezithile zokushumayela. Ngaphezu kwakho konke, masikhumbule isiqondiso sikaJesu sokufuna abafanelekayo sibasize babe abafundi.—Mathewu 10:11; 28:19.

¹⁹ Ukuze sifeze lokho, ‘masiliphathe ngokufanele izwi leqiniso.’ Lokho singakwenza ngokusebenzisa ukukholisa okusekelwe ngokuqinile emiBhalweni. Lokhu kuyosisiza ukuba sithinte izinhliziyo zabasabelayo futhi sibashukumisele esenzweni. Njengoba sincika kuJehova ngomthandazo, singaba nengxenye ekusizeni abathile babe abafundi bakaJesu Kristu. Futhi yeka indlela ovuza ngayo lo msebenzi! Ngakho-ke ‘masenze konke okusemandleni ethu ukuba sizinikele samukeleka kuNkulunkulu,’ sidumise uJehova ngaso sonke isikhathi njengabamemezeli boMbuso abashisekayo, abashumayela ngenjongo yokwenza abafundi.—2 Thimothewu 2:15.

[Imibhalo yaphansi]

Uyakhumbula?

• Kungani u-Apholo ayedinga ukuchazelwa indlela kaNkulunkulu ngokuphelele kakhudlwana?

• Iziphi izindlela uPrisila no-Akhwila abafunda ngazo kumphostoli uPawulu?

• KuzEnzo isahluko 18, yini oyifundile ngomsebenzi wokwenza abafundi?

• Ungawakha kanjani amathuba okwenza abafundi?

[Isithombe ekhasini 18]

UPrisila no-Akhwila ‘bachazela u-Apholo indlela kaNkulunkulu ngokuqonde ngokwengeziwe’

[Isithombe ekhasini 20]

U-Apholo waba nekhono ekwenzeni abafundi

[Isithombe ekhasini 21]

UPawulu wayeshumayela yonke indawo lapho ayehamba khona

[Izithombe ekhasini 23]

Yakha amathuba okushumayela