Ukukhonza Iqembu Lolimi Olungavamile EKorea
IQEMBU elishisekayo kodwa elithulile lahlangana emhlanganweni wesigodi woFakazi BakaJehova ngehlobo lika-1997. Lona kwakungumhlangano wokuqala walolu hlobo eKorea, wezithulu nabangezwa kahle. Kwakunabangu-1 174. Sonke isimiso—kuhlanganise nezinkulumo, izingxoxo, nedrama—saqhutshwa ngoLimi Lwezandla LwaseKorea nangemifanekiso eyayibonakala kulo lonke iHholo Lomhlangano. Kwakungumvuthwandaba weminyaka eminingi yokuzikhandla kwezisebenzi zokuzithandela eziningi.
Siyofika isikhathi epharadesi lasemhlabeni lapho “izindlebe zabayizithulu ziyovulwa” khona. (Isaya 35:5) Ukuze ajabulele ukuphila kulelo Pharadesi, wonke umuntu, kuhlanganise nezithulu, kumelwe angene epharadesi elingokomoya kuqala, isimo sokuchuma okungokomoya kwabantu bakaNkulunkulu ababusisiwe. Kumelwe babe oFakazi BakaJehova abazinikezele, ababhapathiziwe, nabafundiswa nguye.—Mika 4:1-4.
Isiqalo Esincane
Nakuba ngawo-1960 zazike zashunyayezwa izithulu, kuze kwaba ngawo-1970 lapho ezimbalwa zaqala khona ukuya emihlanganweni yoFakazi BakaJehova eSeoul, inhlokodolobha yaseKorea. Umzalwane ongumKristu owayekwazi ukubhala ngokushesha wasebenzisa ibhodi ukuze abhale amaphuzu asemqoka ezinkulumo, kuhlanganise namavesi eBhayibheli akhulunyelwa.
Ngo-1971 edolobheni laseTaejon, omunye uFakazi owayenendodana eyisithulu waqala ukuyifundisa isigijimi soMbuso, yona nabangane bayo abayizithulu. Kuleli qembu kuphume abantu abaningi abashisekayo manje abakhonza njengomgogodla ensimini yolimi lwezandla.—Zakariya 4:10.
Intsha Izinikela Ngokuzithandela
Ukuze izithulu zikwazi ukungenisa ulwazi ngoJehova nangoJesu bese zingena endleleni eya ekuphileni, ezinye izisebenzi zokuzithandela kumelwe zenze umzamo othé xaxa. (Johane 17:3) Ngenxa yalokho, oFakazi BakaJehova abaningana baye bafunda ulimi lwezandla futhi babusiswa ngokuhlangenwe nakho okucebile.
UPark In-sun, oneminyaka engu-15 ubudala, wazibekela umgomo wokufunda ulimi lwezandla. Ukuze akwazi, wasebenza embonini lapho kwakuqashwe khona iqembu lezithulu ezingu-20. Wasebenzelana eduze nazo izinyanga ezingu-8 ukuze afunde ulimi nendlela yezithulu yokucabanga. Ngonyaka olandelayo, waba iphayona elivamile, noma ummemezeli woMbuso wesikhathi esigcwele, futhi wasebenza neqembu labantu abayizithulu ababenesithakazelo eqinisweni leBhayibheli. Iqembu lakhula ngokushesha, futhi masinyane kwase kuza abangaphezu kuka-35 emihlanganweni yangeSonto.—IHubo 110:3.
Ngemva kwalokho, ngokokuqala ngqa eSeoul, kwahlelwa imihlangano yobuKristu yolimi lwezandla kuphela. UMfoweth’ uPark In-sun wakhonza njengephayona elikhethekile kuleli qembu elandayo. Wayeseshelela manje olimini lwezandla. Ngezinye izinyanga, wayeqhuba izifundo zeBhayibheli zasekhaya ezingu-28 nabantu abayizithulu. Iningi labo lathuthuka laba oFakazi BakaJehova.
Ngenxa yalo msebenzi wokuzithandela wentshiseko, ngo-October 1976 kwamiswa ibandla lokuqala lolimi lwezandla eSeoul, linabamemezeli abangu-40 namaphayona avamile amabili. Lokhu kwagqugquzela umsebenzi nakwamanye amadolobha aseKorea. Abantu abaningi abayizithulu babelambele izindaba ezinhle futhi belindele ukuvakashelwa.
Ukusebenza Phakathi Kwezithulu
Ungase uzibuze ukuthi zazitholakala kanjani izithulu. Eziningi zazo zazitholakala ngokulayelana. Kwayiwa futhi nakubanikazi bezitolo zerayisi ezisendaweni abakhipha amagama namakheli abantu abayizithulu. Amahhovisi athile kahulumeni asiza ekunikezeni ukwaziswa okunjalo. Ukuhlanganisa ngenkuthalo insimu ehlala izithulu kwaphumelela kangangokuthi, esikhathini esithile, kwamiswa amabandla amane olimi lwezandla. Intsha eningi engamaKristu yakhuthazwa ukuba ifunde ulimi lwezandla.
Izikhonzi ezingamaphayona akhethekile ezazifunde ulimi lwezandla zabelwa yihhovisi legatsha loFakazi BakaJehova ukuba zisebenze nalawo mabandla. Muva nje, abaqeqeshwe eSikoleni Sokuqeqeshelwa Inkonzo baye bathunyelwa kula mabandla futhi baye bawaqinisa ngokomoya.
Kunezingqinamba okumelwe zinqotshwe. Ukukhonza kule nsimu kudinga ukwenza umzamo omkhulu wokuqonda isiko-mpilo lezithulu. Bangabantu abangagwegwesi ekucabangeni nasezenzweni. Kuyabamangaza abantu lokhu ngezinye izikhathi futhi kungase kubangele ukungezwani kahle. Ngaphezu kwalokho, lapho oFakazi beqhuba izifundo zeBhayibheli zasekhaya nabantu abayizithulu, kunesidingo sokubasiza ukuba bashelele olimini lwabo nokubakhuthaza ukuba belule isimiso sabo sokufunda nokutadisha.
Emisebenzini yazo yansuku zonke, izithulu zibhekana nezinkinga abanye abangazazi nhlobo. Ukuxhumana namahhovisi kahulumeni nezindawo zokunakekela impilo, kanye nezindaba ezilula zokuthengiselana, ngokuvamile kuba izinkinga ezinkulu kubo. Ngenxa yokuthi oFakazi abasemabandleni aseduze baye banikeza usizo lothando, abantu abayizithulu baye babona ubuzalwane bangempela ebandleni lobuKristu.—Johane 13:34, 35.
Ukufakaza Ngokwethukela Kuletha Imiphumela
EPusan, idolobha elikhulu eliyitheku eliseNingizimu yeKorea, kwenzeka ukuba uFakazi ahlangane nabantu ababili abayizithulu ababhala ephepheni: “Siyalithanda iPharadesi. Sifuna ukwazi imibhalo ekhuluma ngokuphila okuphakade.” Umzalwane wabhala ikheli labo wabe esehlela ukubavakashela. Lapho efika, wathola indlu igcwele izithulu zilindele ukuzwa isigijimi soMbuso. Lokho kwamshukumisela ukuba aqale ngokushesha ukufunda ulimi lwezandla. Ngokushesha kwamiswa ibandla labakhuluma ngezandla ePusan.
Umzalwane wakulelo bandla wabona abantu ababili abayizithulu bekhuluma ngezandla wabe eseya kubo. Lapho ezwa ukuthi babephuma esontweni, wabamemela eHholo LoMbuso ngehora lesibili ntambama ngosuku olufanayo. Bafika, futhi kwaqalwa isifundo seBhayibheli. Ngokushesha ngemva kwalokho, bobabili baya emhlanganweni wesigodi kanye nabangane babo abayizithulu abangu-20. Kulelo qembu, abaningi baye banikezela ukuphila kwabo kuJehova. Ababili sebengabadala bebandla kanti oyedwa uyinceku ekhonzayo emabandleni abakhuluma ngezandla.
Ukuzimisela Kunemivuzo
Njengoba abanye abantu abayizithulu behlala kude namabandla olimi lwezandla, ngokuvamile kuye kudingeke umzamo omkhulu nokuzimisela ukuze banikwe njalo ukudla okungokomoya okuvela eBhayibhelini. Ngokwesibonelo, indoda eneminyaka engu-31 yayiziphilisa ngokudoba ogwini lwesiqhingi. Yezwa isigijimi seBhayibheli kumfowabo omncane, owayethintwe oFakazi BakaJehova. Emzamweni wokwanelisa ukulamba kwakhe okungokomoya, lo mdobi oyisithulu wahamba ngesikebhe amakhilomitha angu-16 eya eDolobheni LaseTongyoung, ogwini oluseningizimu yeKorea. Wenza lokhu ukuze ahlangane nephayona elikhethekile elalivela ebandleni lolimi lwezandla eDolobheni LaseMasan. Njalo ngoMsombuluko, leli phayona elikhethekile lalihamba amakhilomitha angu-65 ukuze nje liyoqhuba isifundo seBhayibheli nomdobi oyisithulu.
Ukuze abe semhlanganweni wangeSonto eDolobheni LaseMasan, lo mfundi weBhayibheli oyisithulu kwakumelwe ahambe amakhilomitha angu-16 ngesikebhe abese egibela ibhasi amanye amakhilomitha angu-65. Ukuzimisela kwakhe kwaba nemiphumela. Ezinyangeni ezimbalwa, wayesethuthukile olimini lwezandla, wafunda nezinhlamvu zamagama ezengeziwe zolimi lwesiKorea, futhi—okubaluleke nakakhulu—wafunda indlela okuwukuphela kwayo yokwakha ubuhlobo noJehova. Eqaphela ukubaluleka kwemihlangano nokufakaza njalo, wathuthela ensimini yebandla lolimi lwezandla. Ingabe kwakulula lokho? Cha. Kwadingeka ashiye umsebenzi wakhe wokudoba owawumnika inzuzo efinyelela ku-R32 400 ngenyanga, kodwa ukuzimisela kwakhe kwavuzwa. Ngemva kokuthuthuka eqinisweni, wabhapathizwa futhi manje ukhonza uJehova ngenjabulo nomkhaya wakhe.
Ukuhumushela Izithulu
Izindaba ezinhle zoMbuso ngokuvamile zidluliselwa ngezwi lomlomo. Nokho, ukuze udlulisele isigijimi seZwi likaNkulunkulu ngokunembe kakhudlwana, kubalulekile ukuba imfundo yeBhayibheli idluliselwe ngendlela ehlala njalo. Ngenxa yalokho, ekhulwini lokuqala, imiqulu nezincwadi, yalotshwa amadoda amadala anokuhlangenwe nakho. (IzEnzo 15:22-31; Efesu 3:4; Kolose 1:2; 4:16) Esikhathini sethu, insada yokudla okungokomoya iye yatholakala ngezincwadi nangezinye izinto zobuKristu ezinyathelisiwe. Ziye zahunyushelwa emakhulwini ezilimi, kuhlanganise nezilimi zezandla ezihlukahlukene. Ukuze lenze lokhu ngoLimi Lwezandla LwaseKorea, ihhovisi legatsha linomnyango wokuhumusha ulimi lwezandla. Umnyango wezokuthwebula ukhiqiza ama-video olimi lwezandla. Lokhu kunikeza abamemezeli bezindaba ezinhle abayizithulu nalabo abanesithakazelo ukudla okungokomoya kuwo wonke amabandla aseKorea.
Nakuba abaningi sebelwazi kahle ulimi lwezandla futhi beye basiza ekukhiqizeni ama-video, ngokuvamile abahumushi abangcono kakhulu yizingane zabazali abayizithulu. Zafunda ulimi lwezandla kusukela ziseyizinsana. Azikhulumi ngezandla ngokunembile nje kuphela kodwa futhi zinikeza nencazelo esuka enhliziyweni nokugcizelela isigijimi ngokushukumisa imizimba nobuso bazo, kanjalo zifinyelele ingqondo nenhliziyo.
Njengoba kuphawuliwe, imihlangano yolimi lwezandla emikhulu nemincane iba khona njalo manje eKorea. Kungumsebenzi, izindleko, nokuzikhandla ukufeza lokhu. Nokho, labo ababa khona bayalazisa leli lungiselelo. Ngemva kokuphela kwale mihlangano, abaningi bayasala, befuna ukuqhuba ubudlelwano obunempilo nokwetshisa ukudla okumnandi okungokomoya abakutholile. Ngokusobala, ukukhonza kuleli qembu elikhethekile kunezinselele zako, kodwa izibusiso ezingokomoya zenza ukuba kuwufanelekele umzamo.
[Isithombe ekhasini 10]
Ama-video olimi lwezandla akhiqizwa eKorea: Ethi: “What Does God Require of Us?,” “Appreciating Our Spiritual Heritage,” “Warning Examples for Our Day,” nethi, “Respect Jehovah’s Authority”
[Izithombe ekhasini 10]
Kusuka kwesobunxele kuya ngezansi kwesokudla: Kuthwetshulwa ama-video olimi lwezandla egatsheni laseKorea; kulungiselelwa izimpawu zamagama angokwasezulwini; iqembu labahumusha ulimi lwezandla; kunikezwa uphawu lokuba kuqalwe phakathi nokuthwetshulwa kwe-video