Yini Obungathanda Ukuyibuza UNkulunkulu?
ABANTU emhlabeni wonke bazibuza imibuzo enzulu ngokuphila. Ingabe kunjalo nangawe? Abaningi baye bayibuza abafundisi babo benkolo le mibuzo kodwa abazitholanga izimpendulo ezanelisayo. Abanye baye bazibuza le mibuzo bebodwa. Abanye baye bathandaza befuna isiqondiso. Kungenzeka ngempela yini ukuba uthole izimpendulo ezivela kuNkulunkulu zemibuzo ekukhungathekisayo? Phakathi kwemibuzo abaningi abaye bathi bebengathanda ukuyibuza uNkulunkulu yile elandelayo.
Ungubani ngempela, Nkulunkulu?
Indlela abantu ababheka ngayo uNkulunkulu ithonywa isiko labo, inkolo yabazali babo, cishe nayindlela bona abakhetha ukumbheka ngayo. Abanye banegama abambiza ngalo uNkulunkulu; abanye bambiza nje ngokuthi uNkulunkulu. Ingabe kunendaba ngempela? Ingabe munye kuphela uNkulunkulu weqiniso ozembula kithi futhi embule negama lakhe?
Kungani kunokuhlupheka okungaka?
Uma impilo yomuntu iwohloka noma eba mpofu ngenxa yokuphila ngokunganaki noma ngokuziphatha okubi, angase akhononde. Kodwa kungenzeka uyazi ukuthi kungani ehlupheka.
Nokho, abanye abaningi babhekene nobunzima obukhulu kungephutha labo. Abanye banezifo ezingamahlalakhona. Kwabanye, ukuthola nje indawo yokuhlala nokudla okwanele kwemikhaya yabo kuyizinkinga ezibonakala zingenakusonjululwa. Izigidi ziyizisulu zobugebengu, impi, ubudlova obungakhethi, izinhlekelele zemvelo, noma ukungabi nabulungisa kweziphathimandla.
Kuyaqondakala-ke ukuthi kungani abaningi bebuza bethi: ‘Kungani zande kangaka lezi zimo? Kungani uNkulunkulu ekuvumela konke lokhu kuhlupheka?’
Kungani ngilapha? Iyini injongo yokuphila?
Ngokuvamile le mibuzo ibangelwa ukukhungatheka umuntu aba nakho lapho umsebenzi wakhe wansuku zonke unganelisi ngempela—futhi kunjalo kubantu abaningi. Ezinye izigidi zikholelwa ukuthi okwenzeka ekuphileni komuntu ngamunye ngandlela-thile kunqunywa uNkulunkulu. Kunjalo? Uma ngempela uNkulunkulu enenjongo ekhethekile ngawe, ngokuqinisekile uzofuna ukwazi ukuthi iyini.
Kuzo zonke izincwadi ezikhona emhlabeni, yinye esho ngokucacile ukuthi iphefumulelwe uNkulunkulu. Njengoba ungase ulindele ngomyalezo waso sonke isintu ovela kuNkulunkulu ngempela, itholakala ngezilimi eziningi ukwedlula noma iyiphi incwadi eyake yabhalwa. Leyo ncwadi yiBhayibheli Elingcwele. Kulo, uMdali wezulu nomhlaba, uNkulunkulu ngokwakhe, uyazembula ukuthi ungubani nokuthi ubani igama lakhe. Uyalazi lelo gama? Ingabe uyakwazi okushiwo yiBhayibheli ngohlobo loMuntu uNkulunkulu ayilo? Ingabe uyakwazi elikushoyo ngalokho uNkulunkulu akufunayo kuwe?
[Umthombo Wesithombe ekhasini 2]
COVER: Chad Ehlers/Index Stock Photography
[Umthombo Wesithombe ekhasini 3]
Mountain: Chad Ehlers/Index Stock Photography