“Akukungakanani Ebengikwazi NgoNkulunkulu”

INDODA ethile ehlala eKerala, eNdiya, yabhala yathi: “Onyakeni odlule, oFakazi BakaJehova bebelokhu bengivakashela bengitshela izindaba ezimangalisayo zoMbuso kaNkulunkulu. Besekuyiminyaka engu-8 ngingumKatolika, kodwa akukungakanani ebengikwazi ngoNkulunkulu. Ngalo nyaka owodwa nje, ngifunde okuningi.” Yaqhubeka, “kuyangijabulisa kakhulu ukwazi ukuthi INqabayokulinda ikhishwa ngezilimi ezingu-139 [manje sezingu-146]. Kuyamangalisa ukuthi abantu bazo zonke izilimi bezwa umyalezo omayelana noNkulunkulu.”

Nakuba izazi eziningi zefilosofi zithi akunakwenzeka ukwazi uNkulunkulu, umphostoli uPawulu wakwenza kwacaca ukuthi kungenzeka. Ekhuluma neqembu labantu base-Athene, abanye ababekhulekela e-altare elinikezelwe “kuNkulunkulu Ongaziwa,” uPawulu wathi: “Lokho enizinikele kukho ngokungazi, yikho engikumemezela kini. UNkulunkulu owenza umhlaba nakho konke okukuwo . . . unika bonke abantu ukuphila nomoya nazo zonke izinto. Futhi ngomuntu oyedwa wenza zonke izizwe zabantu, ukuba zihlale kubo bonke ubuso bomhlaba.”—IzEnzo 17:23-26.

UPawulu wakhuthaza izilaleli zakhe ukuba zifune ukwazi uMdali, ngoba ‘akakude kulowo nalowo kithi.’ (IzEnzo 17:27) OFakazi BakaJehova bayokujabulela ukukusiza ukuba wazi uNkulunkulu weqiniso nezimfanelo zakhe ezikhangayo.