‘Babemesaba UNkulunkulu Weqiniso’

LAPHO ama-Israyeli esebugqilini eGibithe, ababelethisi abangamaHeberukazi oShifira noPhuwa babesesimweni esicindezelayo. Emzamweni wokuvimbela ukwanda okusheshayo kwala bantu besinye isizwe, uFaro wayala laba besifazane: “Nxa nibelethisa amaHeberukazi . . . , uma kuyindodana anoyibulala.”—Eksodusi 1:15, 16.

OShifira noPhuwa “babemesaba uNkulunkulu,” ngakho bama isibindi futhi “abenzanga njengalokho yasho kubo inkosi yaseGibithe.” Kunalokho, bazilondoloza izinsana ezingabafana, nakuba lesi sibindi sasingababeka engozini. UJehova “wabenzela ababelethisi okuhle,” futhi wabavuza ngezenzo zabo zokusindisa ukuphila.—Eksodusi 1:17-21.

Lokhu kulandisa kugcizelela indlela uJehova azisa ngayo labo abamkhonzayo. Nakuba kwakudinga isibindi, lokho okwenziwa nguShifira noPhuwa, wayengase akubheke njengokubonisa ubuntu nje. Kakade, akekho owesifazane ohluzekile engqondweni ongabulala izinsana! Noma kunjalo, akungabazeki ukuthi uJehova wacabangela iqiniso lokuthi abanye abantu baye benza izenzo ezimbi kakhulu, ngenxa yokwesaba umuntu. Wayazi ukuthi laba babelethisi babengashukunyiswa nje kuphela ububele bobuntu kodwa nokwesaba uNkulunkulu kanye nokuzinikela.

Yeka indlela esibonga ngayo ngokukhonza uNkulunkulu oqaphela izenzo zethu zokwethembeka! Yiqiniso, mhlawumbe akekho kithi owake wabhekana novivinyo lokholo olufana nolukaShifira noPhuwa. Nokho, uma sikumelela ngokuqinile okulungileyo—kungakhathaliseki ukuthi kusesikoleni, emsebenzini, noma kunoma isiphi esinye isimo—uJehova akaluthathi kalula uthando lwethu oluqotho. Kunalokho, uba “umvuzi walabo abamfuna ngobuqotho.” (Heberu 11:6) Yebo, “uNkulunkulu akayena ongalungile ukuba akhohlwe umsebenzi wenu nothando enalubonisa kulo igama lakhe, ngoba niye nakhonza abangcwele futhi niyaqhubeka nibakhonza.”—Heberu 6:10.