Ingabe Ukhona Okhathalela Ngempela?
“Izinyembezi zabacindezelwayo” ziye zaba umfula. Kukhala izisulu ‘zokucindezelwa’ okungenakubalwa emhlabeni wonke. Labo abaye baba izisulu bavame ukuba nomuzwa wokuthi ‘abanamduduzi’—ukuthi akekho obakhathalelayo ngempela.—UmShumayeli 4:1.
NAPHEZU kwalo mfula wezinyembezi, abanye akubathinti ukuhlupheka kwabanye abantu. Ababushayi mkhuba ubuhlungu babanye abantu, njengoba kwenza umpristi nomLevi emfanekisweni kaJesu Kristu wendoda eyahlaselwa, yaphangwa yashiywa kusele umndondo eduze nomgwaqo. (Luka 10:30-32) Uma nje izinto zisabahambela kahle ngezinga elithile bona nemikhaya yabo, abanandaba nabanye. Eqinisweni bathi, “Sinandabani?”
Akufanele kusimangaze lokhu. Umphostoli uPawulu wabikezela ukuthi “ezinsukwini zokugcina” abantu abaningi bayontula “ukusondelana ngokomzwelo okungokwemvelo.” (2 Thimothewu 3:1, 3) Enye ingqapheli yakhala ngesimo sokungakhathalelani esesikhona. Yathi: “Ifilosofi nesiko lakudala lase-lreland lokukhathalelana nokwabelana sekuthathelwe indawo isimiso esisha sikamazibonele.” Emhlabeni kabanzi, abantu bazicabangela bona, cishe bengakushayi mkhuba ngokuphelele ukuswela kwabanye.
Isidingo Sokuba Nothile Okhathalelayo
Ngokuqinisekile sikhona isidingo sokuba kube nothile okhathalelayo. Ngokwesibonelo, cabanga ngendoda ethile eJalimane eyayihlala yodwa “eyatholakala ihlezi phambi kwethelevishini yayo—ngemva kokushona ngoKhisimusi eminyakeni emihlanu edlule.” Le “[ndoda] ekhubazekile, ehlukanisile, eyayihlala yodwa,” futhi eyayiphatheke kabi ngenxa yesimo esidabukisayo eyayiye yabhekana naso ekuphileni, akuzange kuqapheleke ukuthi ayikho kwaze kwaba yilapho imali yayo yasebhange yokuthelela indlu isiphelile. Akekho owayeyikhathalela ngempela.
Cabanga nangezisulu ezingenakuzisiza ezingaphansi kwababusi abanamandla nabanobugovu. Kwenye indawo, abantu abangaba ngu-200 000 (ingxenye eyodwa kwezine zomphakathi) “bafa ngenxa yokucindezelwa nendlala” ngemva kokuba izwe labo lithathwe ngobudlova. Noma cabanga ngezingane ezachayeka onyeni cishe olungakholakali. Omunye umbiko wathi: “Liyashaqisa inani lezingane [zakwelinye izwe] eliye labona izenzo eziningi zobudlova—ukubulala, ukushaya, ukudlwengula, ngezinye izikhathi zenziwa enye intsha.” Ungaqonda ukuthi kungani umuntu oye wabhekana nezenzo ezingenabulungisa kanjalo angase abuze ngezinyembezi athi, “Ingabe ukhona ongikhathalela ngempela?”
Ngokombiko weZizwe Ezihlangene, abantu abayizigidi eziyizinkulungwane ezingu-1,3 emazweni asathuthuka kudingeka baphile ngamaRandi angaphansi kwamahlanu ngosuku. Kumelwe ukuba bayazibuza ukuthi ukhona yini obakhathalelayo. Kungokufanayo nangezinkulungwane zababaleki, ngokombiko we-Irish Times, “ababhekene nokukhetha okubuhlungu kokuhlala ekamu elonakele noma ezweni abangamukeleki kulo noma bazame ukubuyela ezweni lakubo elisahlukaniswe yimpi noma ukuhlukana ngokobuzwe.” Lowo mbiko uhlanganisa nale nqubo ecindezelayo: “Cimeza, ubale kathathu, kusanda kushona ingane eyodwa. Enye yezingane ezingu-35 000 ezizokufa namuhla ngenxa yokungondleki noma ngenxa yesifo esingagwemeka.” Akumangalisi ukuthi abaningi bayakhala ngenxa yosizi nokuthukuthela!—Qhathanisa noJobe 7:11.
Ingabe konke lokhu kumane kudalelwe ukuba kube njena? Ingabe ukhona ngempela ongakhathaleli kuphela kodwa onawo namandla okuqeda ukuhlupheka futhi elaphe bonke ubuhlungu abantu abaye babuzwa?
[Umthombo Wesithombe ekhasini 2]
Cover and page 32: Reuters/Nikola Solic/Archive Photos
[Umthombo Wesithombe ekhasini 3]
A. Boulat/Sipa Press