“Isibonelo Sobunye Nobuzalwane”

Lena indlela owesifazane othile azichaza ngayo izenzo zoFakazi BakaJehova ngemva kokushonelwa kalusizi ilungu lomkhaya. Uyachaza:

“Mina nomkhaya wakithi, sithanda ukubonga oFakazi bebandla lesiNtaliyane laseFreiburg, eJalimane. Umkhaya wakithi awubona oFakazi BakaJehova, ngaphandle kukamfowethu u-Antonio nomkakhe u-Anna. Kudala siyigxeka inkolo abayikhetha, nakuba besilokhu siyihlonipha.

“Nokho, manje sesiye sashintsha indlela ebesicabanga ngayo. Eqinisweni, siye sabona isibonelo sobuzalwane nothando ebesingakulindele.

“Ngokudabukisayo, u-Anna washona ngaphambi kwesikhathi engozini yomgwaqo. Njengoba sihlala e-Italy, lalilinganiselwe izinga esasingasekela ngalo ngokomzwelo umfowethu u-Antonio nezingane zakhe. Nokho abafowabo abangoFakazi baba usizo. Baye bamsiza ngokuba khona kwabo, ngamazwi abo, ngokholo lwabo, nangokusekela kwabo ngokwenyama, ngokomzwelo nangokwezomnotho. Njengoba ngingenakuya ngokwami ngiyolibonga leli bandla, ngithanda ukulibonga kumagazini wenu ngesibonelo salo sobunye nobuzalwane esingasoze sabukhohlwa.”

La mazwi omusa alona wesifazane ayaziswa. Njengoba aqaphela, oFakazi BakaJehova bawubuzalwane bomhlaba wonke. (1 Petru 2:17) Bahlakulela izibopho eziqinile zokusondelana okungokomzwelo phakathi kwabo, bazi ukuthi uthando “luyisibopho esiphelele sobunye.” (Kolose 3:14) Ngisho nasezimweni eziyinhlekelele kakhulu, ezingasivelela sonke, oFakazi BakaJehova basondela eduze kukaNkulunkulu nabantu bakhe.—IzAga 18:24; UmShumayeli 9:11; Johane 13:34, 35.