Isenzakalo Esingenakulitshalwa EFrance
KULO lonke idolobha kwakunezingqwembe ezithi: “PHANSI NGESIKHUNGO SIKAJEHOVA!” Elinye iqembu eliphikisayo lanxusa: “Masihlanganeni Ngobunye Simelane Nomsebenzi KaJehova.” Amakhulukhulu ezihloko zamaphephandaba enza le ndaba yaqashelwa umphakathi. Kwasayinwa izicelo, futhi izinqwabanqwaba zamapheshana angaphezu kwengxenye yesigidi akhuluma ngalo msebenzi atheleka emabhokisini eposi endawo. Wawuyini lo msebenzi owawuyaluzisa leli dolobha elalinokuthula laseLouviers, enyakatho-ntshonalanga yeFrance? Ukwakhiwa kwehhovisi legatsha elisha nendawo yokuhlala yoFakazi BakaJehova okwakuhlongozwa.
UJehova Uyakhulisa
Umsebenzi woFakazi BakaJehova eFrance waqala emuva ekupheleni kwekhulu le-19 leminyaka. Indawo yokuqala yokugcina izincwadi zeBhayibheli yavulwa ngo-1905 eBeauvène, eningizimu yeFrance, futhi ngo-1919 kwase kunehhovisi elincane eParis. Ihhovisi legatsha lavulwa ngokomthetho ngo-1930 kulelo dolobha, futhi ngonyaka owalandela izisebenzi zasehhovisi zaqala ukuhlala ekhaya laseBethel elalise-Enghien-les-Bains, enyakatho yeParis. Ngemva kweMpi Yezwe II, umkhaya waseBethel wabuyela eParis, futhi ngo-1959 leli gatsha lathuthelwa esakhiweni esinezitezi ezinhlanu eBoulogne-Billancourt, ngasemaphethelweni entshonalanga yenhloko-dolobha.
Ngenxa yokwanda komsebenzi wokushumayela ngoMbuso, ngo-1973 indawo yokunyathelisa neyokuthumela impahla zathuthelwa eLouviers, esebangeni elingamakhilomitha ayikhulu ukuya entshonalanga yeParis, kuyilapho amahhovisi asala eBoulogne-Billancourt. Nokho, ukwanda kwenani labamemezeli eFrance kwenza izakhiwo zaseLouviers zaba zincane, naphezu kokwandiswa kwazo ngo-1978 nango-1985. Ngakho kwanqunywa ukuba kwandiswe bese kuhlanganiselwa ndawonye wonke umkhaya waseBethel. Akubona bonke abawuthanda lo msebenzi, njengoba kushiwo esingenisweni. Naphezu kokuphikisa okunjalo, isiza satholakala ebangeni eliyikhilomitha nengxenye ukusuka endaweni yokunyathelisa. Kwaqala iminyaka eyisithupha yokusebenza kanzima, futhi ekugcineni, ngemva kweminyaka engu-23 umkhaya waseBethel uhlukene, wahlanganiswa eLouviers ngo-August 1996.
Ngakho, isixuku esijabulayo sabangu-1 187, esihlanganisa amalungu angu-300 omkhaya waseBethel yaseFrance nezihambeli ezingu-329 ezivela kwamanye amagatsha angu-42, sahlangana ngenjabulo enkulu ngoMgqibelo, ngo-November 15, 1997, ukuze silalele inkulumo yokunikezela eyayinikezwa uMfoweth’uLloyd Barry, ilungu leNdikimba Ebusayo. Nokho, ngenxa yokuthi lokhu kunikezela kwakwenzeka ngesikhathi somkhankaso wabezindaba ononya, osuthathe isikhathi eside nonyundela oFakazi BakaJehova kulo lonke elaseFrance, kwaba khona umuzwa wokuthi kufanele bonke oFakazi baseFrance bakwazi ukuhlanganyela ekuhalaliseni lokhu kunqoba. Ngenxa yalokho, kwahlelwa umhlangano okhethekile wangeSonto, ngo-November 16, owawunesihloko esithi “Hlalani Othandweni LukaKristu” eVillepinte Exhibition Center, enyakatho yeParis. Kwamenywa bonke oFakazi BakaJehova eFrance kuhlanganise noFakazi abakhuluma isiFulentshi baseBelgium naseSwitzerland, kanye namabandla aseBrithani, eJalimane, eLuxembourg nawaseNetherlands.
Umbuthano Oyingqopha-mlando
Amalungiselelo alo mbuthano aqala ezinyangeni eziyisithupha ngaphambi kwesikhathi. Khona-ke, emasontweni amabili nje ngaphambi kokunikezelwa, abashayeli bamaloli baseFrance bateleka, bavimba imigwaqo emikhulu nokungeniswa kukaphethiloli. Ingabe izihlalo nezinye izinto kwakuyofika ngesikhathi? Ingabe ukuvinjwa kwemigwaqo kwakuyovimbela abazalwane ukuba beze? Wonke umuntu wakhululeka lapho isiteleka siphela lingakapheli nesonto, futhi imigwaqo ibuye ivuleka ukuze ihambe izimoto. NgoLwesihlanu ebusuku ngaphambi kwempelasonto yokunikezela, amaloli angu-38 aletha izihlalo ezingu-84 000 emahholo amabili amakhulu ayeqashelwe lesi senzakalo. Abafowethu nodadewethu abangaphezu kuka-800 basebenza ubusuku bonke kwaze kwaba ngu-9:30 ekuseni ngoMgqibelo befaka izihlalo, indawo yesikhulumi, umshini we-sound nezindwangu ezinkulukazi ezingu-9 zokubukela i-video.
Ngo-6:00 ekuseni ngeSonto, iminyango yavulwa, futhi izixuku zaqala ukutheleka. Izitimela ezingu-17 ezaziqashwe ngokukhethekile zaletha oFakazi abangaphezu kuka-13 000 enhloko-dolobha. Eziteshini zezitimela kwakunabafowethu nodadewethu abangaphezu kuka-200 ababezobingelela izihambi futhi baziphelekezele ngamaqembu baziyise endaweni yomhlangano. Omunye udadewethu wathi leli lungiselelo lothando labenza baba “nomuzwa wokulondeka nowenhlalakahle.”
Abanye beza ngezindiza noma ngezimoto eParis. Nokho, iningi lafika ngamabhasi angu-953, kuyilapho oFakazi baseParis babesebenzisa izinto zokuhamba zomphakathi ukuze baye e-Exhibition Center. Abaningi babehambe ubusuku bonke noma babesuke emakhaya ekuseni kakhulu, kodwa injabulo yabo yokuba kulo mhlangano yayiphawuleka. Izinyembezi zenjabulo nokusingathana ngokufudumele kwaphawula ukuhlangana kwabangane okwase kuyiminyaka eminingi bengabonani. Izingubo zokugqoka ezinhlobonhlobo zamazwe ngamazwe zenza lesi sixuku esijabule saba esezizwe zonke. Ngokungangabazeki, kwakwenzeka okuthile okungavamile.
Lapho isimiso siqala, ngo-10:00 ekuseni, kwakungasenazihlalo ezingenabantu, kodwa amakhulukhulu abantu ayetheleka umzuzu ngamunye. Nomaphi lapho ubheka khona, wawubona ubuso obuningi obumamathekayo. Izinkulungwane zama ngezinyawo noma zahlala phansi kusimende. Bebonisa umoya ovumelana nesihloko somhlangano, abaningi abasebasha basukuma ngothando ukuze bahlalise asebekhulile. Omunye umbhangqwana wabhala: “Yeka ukuthi sakujabulela kanjani ukusuka ezihlalweni zethu ukuze sihlalise abafowethu nodadewethu esasingabazi, kodwa esibazisa kakhulu!” Abaningi babonisa umoya omuhle wokuzidela: “Sama usuku lonke eceleni kwezihlalo esasisize ekuzibekeni ubusuku bonke bangoLwesihlanu. Kodwa ukuba khona nje, kwasenza sagcwala ukumbonga uJehova.”
Naphezu kokukhathala nokungahlali kahle, izihambeli zalalela ngesithakazelo esikhulu imibiko evela kwamanye amazwe nenkulumo kaLloyd Barry nekaDaniel Sydlik, naye oyilungu leNdikimba Ebusayo. UMfoweth’ uBarry wakhuluma ngesihloko esithi “UJehova Uyandisa Izikhwepha,” futhi waqokomisa ngokugqamile indlela uJehova aye wababusisa ngayo abantu bakhe ngokwanda naphezu kokulingwa okuhlukahlukene. Inkulumo kaMfoweth’uSydlik yayinesihloko esithi “Bayajabula Abantu AbaNkulunkulu Wabo UnguJehova!” Zombili lezo zinkulumo zazifike ngesikhathi uma kucatshangelwa ukuphikiswa oFakazi BakaJehova ababebhekene nako eFrance. UMfoweth’ uSydlik wabonisa ukuthi injabulo yangempela ayixhomekile ezicini ezingaphandle kodwa ebuhlotsheni bethu noJehova nasesimweni sethu sengqondo ngokuphila. Umbuzo awubuza izilaleli othi, “Ingabe niyajabula?” waphendulwa ngehlombe eliqeqebulayo.
Omunye udadewethu ‘owayeselahlekelwe injabulo’ kamuva wabhala: “Ngokushesha ngaqaphela ukuthi ngangingaba nenjabulo. Ngangiqondise imizamo yami endaweni okungeyona, futhi ngale nkulumo, uJehova wangibonisa indlela okwakudingeka ngishintshe ngayo.” Omunye umzalwane wathi: “Manje ngifuna ukulwela ukwenza inhliziyo kaJehova ijabule. Angifuni ukuvumela noma yini isuse injabulo esengiqale ukuyizwa ngaphakathi.”
Lapho umhlangano usuya esiphethweni, usihlalo wamemezela ngentshiseko enkulu inani lababekhona: abangu-95 888—umbuthano woFakazi BakaJehova omkhulu kunayo yonke eyake yaba khona eFrance!
Ngemva kwengoma yokuphetha, leyo iningi elayihlabelela ngezinyembezi zenjabulo, nomthandazo wokuphetha, abafowethu bathatha uhambo lokubuyela emakhaya bejabule futhi bedumele ngesikhathi esifanayo. Umoya womhlangano wemfudumalo nobungane waqashelwa. Abashayeli bamabhasi bakhuluma okuningi okuhle ngesimo sengqondo sezihambeli. Babehlatshwe umxhwele nawukuhleleka okwenza wonke lawo mabhasi angu-953 aphume e-Exhibition Center kungakapheli namahora amabili ngaphandle kokuvimbeka kwezimoto ngisho nokukodwa! Ukuziphatha kwezihambeli kwaziswa kakhulu nayizisebenzi zikaloliwe nezezinto zokuhamba zomphakathi. Kwaqalwa izingxoxo eziningi ezinhle, futhi kwanikezwa ubufakazi obuhle.
“Umthombo Ogwadule”
Umphostoli uPawulu wanxusa amaKristu ayekanye naye: “Masicabangelaneni ukuze sivuselelane othandweni nasemisebenzini emihle, . . . sikhuthazane, futhi ikakhulu njengoba nibona usuku lusondela.” (Heberu 10:24, 25) Ngokuqinisekile, lo mhlangano okhethekile waba umthombo omkhulu wesikhuthazo kubo bonke, “umthombo ogwadule” njengoba omunye udadewethu akuchaza. Abazalwane basegatsheni laseTogo babhala: “Sahamba sivuselelekile, sikhuthaziwe, siqinisiwe, futhi sizimisele ngokwengeziwe kunanini ngaphambili ukujabula enkonzweni kaJehova.” Omunye umbonisi wesifunda wathi: “Labo ababedangele baya emakhaya bejabulile.” Omunye wathi: “Abafowethu bavuselelwa futhi baqiniswa.” Omunye umbhangqwana washukumiseleka ukuba ubhale: “Asikaze sizizwe siseduze kangaka nenhlangano kaJehova.”
Umhubi wathi: “Unyawo lwami lumi ebaleni; ngizakudumisa uJehova emihlanganweni.” (IHubo 26:12) Imibuthano enjena yobuKristu yenza wonke umuntu avuseleleke kabusha ukuba ame eqinile ngokomoya lapho ebhekene nezithiyo. Omunye udadewethu wavuma: “Lezi zikhathi eziyingqayizivele zingene zagxila ezinhliziyweni zethu futhi ziyohlala zikhona ukuze zisiduduze kunoma iluphi usizi.” Ngokufanayo, umbonisi ojikelezayo wabhala: “Lapho kuphakama izikhathi ezinzima, inkumbulo yaleli Pharadesi esilinambithe kusengaphambili iyosisiza ukuba sibhekane nazo.”
IHubo 96:7 liyasinxusa: “Mnikeni uJehova nina-mindeni yabantu, mnikeni uJehova inkazimulo namandla.” Ngokungangabazeki, ukunikezelwa kwezakhiwo zegatsha ezintsha zaseFrance kuwukunqoba okusobala kukaJehova. Nguye kuphela owayengenza lo msebenzi uphumelele phakathi nokuphikisa okwakwenziwa ngokuzimisela okungaka nokwakusakazeke kangaka. OFakazi BakaJehova eFrance bazimisele kakhulu kunanini ngaphambili ‘ukuhlala othandweni lukaKristu’ futhi benze ‘ukukhanya kwabo kukhanye.’ (Johane 15:9; Mathewu 5:16) Bonke ababa khona esimisweni sokunikezela bahlanganyela ngokungazigodli emuzweni womhubi: ‘Kuvela kuJehova; kuyisimangaliso emehlweni ethu.’—IHubo 118:23.
[Isithombe ekhasini 26]
ULloyd Barry
[Isithombe ekhasini 26]
UDaniel Sydlik
[Isithombe ekhasini 26]
Kwaba nabangu-95 888 esimisweni esikhethekile eVillepinte Exhibition Center
[Izithombe ekhasini 28]
Izinkulungwane zababekhona zazimi ngezinyawo noma zihlezi phansi kusimende ukuze zilalele