Ingabe Uyazazisa Ngempela Izibusiso ZikaJehova?

UKENICHI, insizwa esiqinile, waya ekhemisi eyofuna umuthi womkhuhlane ongemandla. Lapho ephuza lowo muthi, umzimba wakhe awuzange uwamukele kahle, waba nomqubuko olumayo namabhamuza anamanzi emzimbeni wonke. Akumangalisi ukuthi uKenichi waqala ukungabaza ukuthi usokhemisi wayezinakekele ngokwanele izidingo zakhe.

Abanye bangase bacabange ngoJehova uNkulunkulu ngendlela efanayo naleyo uKenichi abheka ngayo usokhemisi. Bayangabaza ukuthi uNkulunkulu umninimandla onke, uJehova, unesithakazelo ngempela kithi ngabanye. Nakuba beqaphela ukuthi uNkulunkulu muhle, abakholiseki ukuthi uyasinakekela ngabanye. Kuba njalo ikakhulukazi lapho izinto zingabahambeli kahle noma lapho ukunamathela ezimisweni zeBhayibheli kubalethela izinkinga ezinzima. Ngenxa yokuntula ukuqonda, babheka izinkinga zabo njengephutha likaNkulunkulu ngandlela-thile, kuhle komqubuko olumayo namabhamuza avela uKenichi ngokungalindelekile.—IzAga 19:3.

UJehova akumelwe afaniswe nabantu abangaphelele. Abantu banolwazi namakhono alinganiselwe. Bayehluleka ukuziqonda ngokugcwele izidingo zangempela zabanye, njengoba kwenza usokhemisi kaKenichi. Ngokuphambene, akukho okungabonakali emehlweni kaJehova. Ngokuvamile uJehova uyasisiza kodwa singakuqapheli lokho ngoba sithambekela ekugxileni kwesingenakho futhi singazinaki izibusiso eziningi esinazo. Kunokuba sisheshe sisole uJehova ngezinkinga esibhekana nazo, kufanele sizame ukubheka izibusiso esizijabulelayo ezivela kuJehova.

Ngokwe-Webster’s Ninth New Collegiate Dictionary, “isibusiso” singachazwa ‘njengento ebangela injabulo noma ukunethezeka.’ Ingabe uyaqaphela ukuthi kunjalo ikakhulukazi ngezibusiso ezivela kuJehova?

UnguMondli Ongenakuqhathaniswa

Lapho inkosikazi ithi umyeni wayo ungumondli omuhle, ngokuvamile isuke isho ukuthi uzinakekela kahle izidingo zomkhaya, ubathengela ukudla okwanele, indawo yokuhlala nezingubo zokugqoka ukuze umkhaya ujabule futhi unethezeke. UJehova usinakekela kahle kangakanani njengoMondli wethu? Hlolisisa iplanethi yethu uMhlaba, ikhaya labantu. Isebangeni elingamakhilomitha angu-150 000 000 ukusuka elangeni, okuyibanga elanele ukuze kube namazinga okushisa alingene ukuze kube nezinto eziphilayo emhlabeni. Ukutsheka kwembulunga yethu ngama-degree angu-23,5 kuklanywe kahle, kwenza kube nezikhathi ezihlukahlukayo ezisiza ekubeni kube nenala. Ngenxa yalokho, umhlaba wondla abantu abangaphezu kwezigidi eziyizinkulungwane ezinhlanu. Ngempela uJehova unguMondli omangalisayo!

Ngaphezu kwalokho, iBhayibheli liyasiqinisekisa ukuthi uJehova unesithakazelo esijulile kithi ngabanye nasenhlalakahleni yethu. Cabanga nje, uJehova wazi ngayinye yezigidigidi zezinkanyezi ngegama, futhi akukho ngisho nowodwa undlunkulu owela phansi engazi. (Isaya 40:26; Mathewu 10:29-31) Yeka ukuthi ubanakekela kakhulu kangakanani-ke abantu abamthandayo nabathengwa ngegazi eliyigugu leNdodana yakhe ethandekayo, uJesu Kristu! (IzEnzo 20:28) Indoda ehlakaniphile yasho ngokufanele, ukuthi: “Isibusiso sikaJehova siyacebisa; akenezeli usizi kuso.”—IzAga 10:22.

Izibusiso Ezisenza Sicebe

Sinokuthile okuyigugu kakhulu okufanele sikwazise ngokujulile. Kuyini? IBhayibheli liyakusho lapho lithi: “Umthetho womlomo wakho muhle kunezinkulungwane zegolide nezesiliva.” (IHubo 119:72; IzAga 8:10) Nakuba igolide elikhethekile lingase libe yigugu, umthetho kaJehova ufiseleka ngaphezu kwalo. Ulwazi olunembile lomthetho wakhe kanye nokuqonda uJehova akunika abafuna iqiniso ngobuqotho kuyizinto okufanele zibhekwe njengeziyigugu. Kusihlomisela ukuba sizivikele, sibhekane nezimo ezinzima, sisingathe izinkinga ngokuphumelelayo, ngaleyo ndlela saneliseke futhi sijabule.

Kunjalo ngisho nakwabancane kakhulu. Cabangela indlela intombazanyana ethile eyazixazulula ngayo izinkinga zayo ngokulandela umthetho kaJehova. Lentombazanyana, u-Akemi, ihlala eduze naseTokyo. Uyise nonina basebenzisa izimiso zeBhayibheli ekuyiqeqesheni futhi ngezwi nangesibonelo, basiza indodakazi yabo ukuba ibe nothando ngoJehova nangomakhelwane. Bebona kusengaphambili izinkinga eyayizobhekana nazo esikoleni, bazama ukuyilungiselela kahle ngangokunokwenzeka. Nokho, lapho u-Akemi engena esikoleni sabaqalayo, labo ayefunda nabo bambheka “njengohlukile” ngoba wayethandaza ngaphambi kokudla futhi engahlanganyeli ezintweni ezithile ezenziwayo ezingqubuzana nemibhalo ngenxa kanembeza. Ngokushesha waba isisulu sokuhlaselwa iqembu lezixhwanguxhwangu elalimqamekela ngemva kwesikole futhi limmukule ngezimpama, limsonte izingalo futhi limenze inhlekisa.

U-Akemi omncane wayengaphindiseli futhi engakhwantabali phambi kwalabo ababemhlupha. Kunalokho, wazama ukusebenzisa lokho ayekufundile. Ngenxa yokuziphatha kwakhe okuhle nesibindi, wahlonishwa abaningi balabo ayefunda nabo. Babikela uthisha ngalendaba, futhi kusukela ngalolo suku, u-Akemi akabange esaphathwa kabi esikoleni.

Yini eyasiza u-Akemi ukuba asisingathe ngokuphumelelayo lesi simo esinzima? Ulwazi olunembile, ukuqonda nokuhlakanipha okuvela kuJehova abazali bakhe ababekugxilise kuye. Wayejwayelene kahle nokukhuthazela kukaJesu, futhi lokho kwamshukumisela ukuba alingise isibonelo sakhe. IBhayibheli lamsiza ukuba aqonde ukuthi abanye abantu benza izinto ezingafanele ngenxa yokuntula ulwazi, futhi lamkhuthaza ukuba azonde ububi obenziwa yilezo zixhwanguxhwangu kuyilapho engazizondi zona ngokwazo.—Luka 23:34; Roma 12:9, 17-21.

Yiqiniso, abekho abazali abangathanda ukubona ingane yabo ihlekwa usulu futhi iphathwa kabi. Nokho, cabanga indlela abazali baka-Akemi abaziqhenya ngayo lapho bezwa yonke imininingwane yalokho okwakwenzekile. Ngempela, izingane ezinjalo ziyisibusiso esivela kuJehova.—IHubo 127:3; 1 Petru 1:6, 7.

Ukulindela UJehova Ngesineke

Nokho, ngaphambi kokuba uthole izibusiso zikaJehova, ngezinye izikhathi kumelwe ulindele isikhathi sakhe. UJehova uyasazi isimo sakho futhi unakekela isidingo sakho ngasinye ngesikhathi okuyoba inzuzo kakhulu kuwe ukwenza kanjalo. (IHubo 145:16; UmShumayeli 3:1; Jakobe 1:17) Ungase uthande isithelo, kodwa ubuyocabangani ngomuntu okumemile okunika isithelo ngaphambi kokuba silungele ukudliwa? Ungathanda ukudla isithelo esivuthiwe nesiconsisa amathe, kungakhathaliseki ukuthi i-apula, iwolintshi noma okunye. Ngokufanayo, uJehova ukunikeza okudingayo ngesikhathi esifanele—hhayi ngaphambi kwesikhathi noma sekwephuze kakhulu.

Khumbula lokho uJosefa abhekana nakho. Engonanga, wazithola esejele elisemgodini eGibithe. Lowo ayeboshwe naye, umphathizitsha kaFaro, wayethemba ukuthi wayezokhululwa futhi wathembisa ukubika udaba lukaJosefa kuFaro. Kodwa ngemva kokukhululwa kwakhe wakhohlwa ngoJosefa. Kwakubonakala sengathi uJosefa wayelahliwe. Nokho, ngemva kweminyaka emibili egcwele, wagcina ekhululiwe ejele futhi ekugcineni waba isekela lombusi waseGibithe. Kunokuba aphelelwe isineke, uJosefa walindela uJehova. Ngenxa yalokho, wabusiswa ngendlela eyasindisa ukuphila kwama-Israyeli nokwabantu baseGibithe.—Genesise 39:1–41:57.

UMasashi wayengumdala ebandleni elisenyakatho yeJapane. Wayengekho ejele elisemgodini, kodwa kwadingeka alindele uJehova. Ngani? Kusukela lapho iSikole Sokuqeqeshela Inkonzo, isikole sokuqeqesha izikhonzi ezingamaKristu ezifanelekayo, simiswa eJapane, wazibekela umgomo ngobuqotho wokuya kuso. Walithandazela kakhulu lelo lungelo. Lowo ayephayona naye wamenywa, kodwa naphezu kwesifiso sakhe esikhulu, uMasashi akazange amenywe. Wayedumele kakhulu.

Noma kunjalo, wathatha izinyathelo zokudambisa imizwa yakhe. Watadisha iBhayibheli nezincwadi ezinyatheliswa i-Watch Tower Society, egxila ezihlokweni eziphathelene nokuthobeka nokulawula imizwelo. Walungisa indlela yakhe yokucabanga futhi ngaleyo ndlela waneliseka ngokwengeziwe esabelweni sakhe. Khona-ke, lapho engasalindele, wathola isimemo sokuya kulesi sikole.

Njengoba ayesehlakulele izimfanelo ezinjengokubekezela nokuthobeka, wazuza ngokwengeziwe kuleso sikole. Kamuva, uMasashi wanikwa ilungelo lokukhonza abafowabo njengombonisi ojikelezayo. Yebo, uJehova wayekwazi okwakudingwa uMasashi futhi wamnika khona ngesikhathi okwakuzofeza okungcono kakhulu ngaso.

Funa Izibusiso Zakhe

Ngakho, uJehova akafani nosokhemisi. Nakuba singase singakuqondi ukunakekela nokukhathalela kukaJehova, umusa wakhe ungezinhlobo ezihlukahlukene—ngezikhathi nangezindlela ezisizuzisa kakhulu. Ngakho qhubeka ufuna izibusiso zakhe. Khumbula ukuthi kakade unezizathu eziningi zokubonga. Uye wabusiswa ngamalungiselelo ayisisekelo okuqhubeka uphila emhlabeni. Uye wanikwa ulwazi ngoJehova nangezindlela zakhe eziphelele. Futhi uye wazuza ukuqonda. Konke lokhu kukwenza ube nenhlalakahle nenjabulo.

Ukuze ujabulele izibusiso zikaJehova ngokugcwele, qhubeka ufunda iBhayibheli njalo. Nxusa uJehova ukuba akusize uqonde futhi usebenzise izimfundiso ezinjengamagugu eziseZwini lakhe eliphefumulelwe. Zizokwenza ucebe ngempela, ungasweli lutho. Yebo, ziyokwenza ujabule futhi waneliseke manje futhi ube nokuphila okuchichimayo ezweni elisha elizayo.—Johane 10:10; 1 Thimothewu 4:8, 9.

[Isithombe ekhasini 23]

Isibusiso sikaJehova siyigugu kunegolide