Sindisa Ukuphila Kwengane Yakho!

UMICHAEL no-Alphina bahlala esigodini esisemaphandleni emagqumeni aluhlaza KwaZulu-Natal, eNingizimu Afrika. Babhekana nezinselele eziningi ekukhuliseni izingane ezingu-7. Esekelwa ngokugcwele umkakhe, uMichael wenza konke okusemandleni akhe ukuba alalele umyalo weBhayibheli kobaba, othi: “Qhubekani nibakhulisa [abantwana benu] ngesiyalo nangokuqondisa umqondo kukaJehova.” (Efesu 6:4) Kodwa ngezinye izikhathi kuba nezinkinga.

Ngokwesibonelo, kuvamile ukuba abafana abelusayo base-Afrika bahlanganise izinkomo zabazali babo ukuze babe nesikhathi esengeziwe sokudlala ndawonye. Ngezinye izikhathi bayaganga futhi baxoxe ngezinto ezingafanele. Lapho amadodana kaMichael eyokwalusa izinkomo zakubo, wayewayala ngokuqinile ukuba angahlangani nezingane ezithile. (Jakobe 4:4) Nokho, ngezinye izikhathi lapho efika ekhaya ebuya emsebenzini, wayewathola enza khona lokho. Ngakho, kwakudingeka awajezise.—IzAga 23:13, 14.

Ingabe ucabanga ukuthi uMichael wayenesandla esiqine kakhulu ezinganeni zakhe? Abanye bangase babe nalowo muzwa, kodwa uJesu Kristu wathi “ukuhlakanipha kubonakaliswa kulungile yimisebenzi yako.” (Mathewu 11:19) UMichael no-Alphina bakha umoya wothando emkhayeni wabo, bechitha isikhathi nezingane zabo futhi bezifundisa ukulandisa namaqiniso eBhayibheli.

UMichael no-Alphina banamadodakazi amane—uThembekile, uSiphiwe, uTholakele noThembekani. Wonke angabashumayeli besikhathi esigcwele bezindaba ezinhle zoMbuso kaNkulunkulu. Amadodana abo amabili akhonza njengababonisi abengamele emabandleni oFakazi BakaJehova. Indodana yabo yesithathu, umkayo naye ongumshumayeli wevangeli wesikhathi esigcwele, ikhonza njengenceku ekhonzayo.

Abazali abaningi abangamaKristu abanemikhaya emikhulu baye babusiswa ngokuba nempumelelo ekukhuliseni izingane zabo. Nokho, ezinye izingane ezikhuliswa kahle abazali ziyalishiya iqiniso. Akungabazeki ukuthi abazali bazo bakhumbula umfanekiso kaJesu wendodana esaphazayo futhi bahlale benethemba lokuthi indodana noma indodakazi yabo iyophenduka futhi ekugcineni izuze insindiso.—Luka 15:21-24.

Nokho, ngokudabukisayo abanye abazali abangamaKristu balahlekelwa yizo zonke izingane zabo ziye ezweni. Lokhu kubangela ukukhathazeka ikakhulukazi ezingxenyeni zase-Afrika lapho izingane zibonakala zenza kahle kuze kube yilapho zeva eshumini nambili. Ngemva kwalokho, ekuqhumeni kobusha, ziyengwa izindlela zokuziphatha okubi zezwe likaSathane. (1 Johane 5:19) Ngenxa yalokho, obaba abaningi abafaneleki ukukhonza njengabadala ebandleni. (1 Thimothewu 3:1, 4, 5) Ngokusobala, ubaba ongumKristu kufanele abheke ukusindiswa kwabendlu yakhe siqu njengendaba ebaluleke kakhulu. Ngakho, yini abazali abangayenza ukuze basindise ukuphila kwezingane zabo?

Yiba Umngane Oseduze

UJesu wayephelele futhi enolwazi nokuhlangenwe nakho okukhulu kakhulu kunokwanoma imuphi omunye umuntu. Noma kunjalo, waphatha abafundi bakhe abangaphelele njengabangane abaseduze. (Johane 15:15) Yingakho babefisa ukuba naye futhi bathuthuka kahle lapho benaye. (Johane 1:14, 16, 39-42; 21:7, 15-17) Abazali bangafunda kulokhu. Njengezitshalo ezincane ezinamaqabunga alulekele ngasekukhanyeni kwelanga okufudumele, izingane ziyathuthuka lapho kunesimo sothando nesobungane ekhaya.

Bazali, ingabe izingane zenu zizizwa zikhululekile ukuza kini nakho konke okuzikhathazayo? Ingabe niyazilalela? Ngaphambi kokufinyelela iziphetho, ingabe niyazikhuthaza ukuba ziveze imicabango nemizwa yazo ukuze nibe nombono ophelele kakhudlwana? Ingabe nizisiza ngesineke ukuba zithole izimpendulo zemibuzo ethile ngokucwaninga nazo ezincwadini zeBhayibheli?

Umama waseNingizimu Afrika uyachaza: “Kusukela ngosuku lokuqala indodakazi yethu eyaya ngalo esikoleni, sayikhuthaza ukuba ixoxe ngezenzakalo zosuku. Ngokwesibonelo, ngangibuza: ‘Usichithe nobani isikhathi sekhefu? Ake ungitshele ngothisha wakho omusha. Ubukeka kanjani? Yiziphi izinto ezihlelelwe leli sonto?’ Ngesinye isikhathi, indodakazi yethu yafika ekhaya yasitshela ukuthi uthisha wesiNgisi wayezohambisa ikilasi liyobona ifilimu elalizobhala ukuhlaziywa kwayo kamuva. Isihloko saleyo filimu sasingabazisa. Lapho senza ukuhlola, sathola ukuthi yayingenakumfanela umKristu. Saxoxa ngayo njengomkhaya. Ngosuku olulandelayo indodakazi yethu yaya kuthisha, yamchazela ukuthi ayithandi ukuyibona leyo filimu, ngoba izimiso zokuziphatha ezibonisayo zazingeke zivumelane nezinkolelo zayo zobuKristu. Uthisha wayicabangisisa lendaba futhi kamuva wabonga indodakazi yethu, ethi wayengafuni ukuhambisa ikilasi liyobona okuthile azozisola ngakho.” Isithakazelo sothando laba bazali abasibonisa ngokungaguquguquki ekusindisweni kwendodakazi yabo sathela izithelo ezinhle. Inesimo sengqondo esihle nesenjabulo futhi manje ikhonza njengesisebenzi sokuzithandela egatsheni le-Watch Tower Bible and Tract Society eNingizimu Afrika.

UJesu wabeka isibonelo esihle ekusebenzelaneni nezingane zabanye abantu. Wakujabulela ukuba nazo. (Marku 10:13-16) Yeka indlela abazali okufanele ukuba bakujabulela ngayo ukwenza izinto nezingane zabo siqu! Ezingxenyeni ezithile ze-Afrika, ubaba uba namahloni okubonakala edlala ibhola noma eminye imidlalo namadodana akhe. Kodwa akufanele nanini ukuba ubaba ongumKristu abe nomuzwa wokuthi ubaluleke kakhulu ukuba angabonakala enza izinto nezingane zakhe. Intsha idinga abazali abakujabulelayo ukuchitha isikhathi benayo. Lokhu kwenza kube lula kakhudlwana ngezingane ukuba zizwakalise ukukhathazeka kwazo. Lapho izidingo ezinjalo ezingokomzwelo zinganakwa, izingane zingase zicasuke noma zizihlukanise, ikakhulukazi uma zikhuzwa njalo.

Lapho ebhalela abaseKolose ngobuhlobo bomkhaya, uPawulu wathi: “Nina bobaba, ningabathukuthelisi abantwana benu, ukuze bangadangali.” (Kolose 3:21) Lokhu kungase kubonise ukuthi ngezinye izikhathi kuba nokungalinganiseli, kube nokuyala okuningi kakhulu nobungane obuncane kakhulu. Izingane ezithandwayo nezaziswayo, kuhlanganise nezeve eshumini nambili, ziyothambekela kakhudlwana ekusabeleni ekuyaleni okudingekile.

Uthando NgoNkulunkulu

Ifa eliyigugu kunawo wonke abazali abangalidlulisela ezinganeni zabo isibonelo sabo siqu sokubonisa uthando. Izingane zidinga ukubona nokuzwa abazali bazo bezwakalisa futhi bebonisa uthando lwangempela ngoNkulunkulu. Insizwa ekhonza egatsheni le-Watch Tower Bible and Tract Society eNingizimu Afrika iyachaza: “Lapho ngisewumfana, ngangisiza ubaba ngemisebenzi yasekhaya. Ngangithanda ukumsiza, ngenxa nje yokuthi wayekwazisa okuncane engangikwenza. Wayesebenzisa leso sikhathi ukuze angitshele izinto eziningi ngoJehova. Ngokwesibonelo, ngikhumbula ngomunye uMgqibelo lapho sasisebenza kanzima sigunda utshani. Kwakushisa ngempela. Ubaba wayejuluka, ngakho ngagijima ngayothela amanzi ezingilazini ezimbili futhi ngafaka iqhwa phakathi. Ubaba wathi: ‘Ndodana, uyayibona indlela uJehova ahlakaniphe ngayo? Iqhwa liyantanta emanzini. Uma belingazika, konke okuphila ngaphansi kwamachibi neziziba bekuyokufa. Kunalokho, iqhwa lisebenza njengengubo eyisivikelo! Ingabe lokhu akusisizi yini ukuba simazi kangcono uJehova?’a Kamuva, lapho ngiboshelwe ukungathathi hlangothi, ngaba nesikhathi sokucabanga. Ngobunye ubusuku ngicindezelekile esitokisini engangikuso ejele, ngakhumbula lawo mazwi kababa. Yeka ukuthi ayenengqondo kangakanani! Ngiyomkhulekela phakade uJehova uma ngingakwazi.”

Yebo, izingane zidinga ukubona uthando ngoNkulunkulu lubonakaliswa kukho konke okwenziwa abazali bazo. Uthando ngoNkulunkulu nokumlalela ngokuzithandela kufanele kubonakale ikakhulukazi njengamandla ashukumisela ukuba khona emihlanganweni yobuKristu, ukuhlanganyela enkonzweni yasensimini nokufunda iBhayibheli njengomkhaya nesifundo somkhaya. (1 Korinte 13:3) Okubaluleke kakhulu, uthando ngoNkulunkulu kufanele lubonakaliswe emithandazweni eqotho yomkhaya. Ukubaluleka kokunika izingane zakho ifa elinjalo kufanele kugcizelelwe kakhulu. Yingakho ama-Israyeli ayalwa: “Wothanda uJehova uNkulunkulu wakho ngayo yonke inhliziyo yakho, nangawo wonke umphefumulo wakho, nangawo onke amandla akho. Lawamazwi engikuyala ngawo namuhla ayakuba-senhliziyweni yakho, ubafundise impela wona abantwana bakho, uwakhulume lapho uhlezi endlini yakho, nalapho uhamba endleleni, nalapho ulala, nalapho uvuka.”—Duteronomi 6:5-7; qhathanisa noMathewu 22:37-40.

Isithiyo esikhulu sokuthanda nokulalela uNkulunkulu yisimo sethu sokuba nesono esisizuze njengefa. (Roma 5:12) Ngakho-ke, iBhayibheli futhi liyayala: “Nina enithanda uJehova zondani okubi.” (IHubo 97:10) Ngokuvamile imicabango emibi iholela ezenzweni ezimbi. Ukuze igweme lokhu, ingane kumelwe ihlakulele enye imfanelo ebalulekile.

Ukwesaba UNkulunkulu

Uthando oluhambisana nokwesaba okunenhlonipho ukudumaza uJehova kungokuthile okufiseleka kakhulu. UJesu Kristu ngokwakhe wasibekela isibonelo esiphelele somuntu owathola injabulo “ekumesabeni uJehova.” (Isaya 11:1-3) Ukwesaba okunjalo kubalulekile njengoba ingane ifinyelela ekuqhumeni kobusha futhi iqala ukuba nenkanuko enamandla yobulili. Ukwesaba uNkulunkulu kungasiza osemusha ukuba alwe nokucindezela kwezwe okungase kuholele ekuziphatheni okubi. (IzAga 8:13) Kweminye imiphakathi, abazali bayakugwema ukufundisa izingane zabo indlela yokubhekana nezilingo ezingokobulili. Empeleni, abaningi banomuzwa wokuthi akulungile ukuxoxa ngalezi zindaba. Kodwa uye waba yini umphumela walokhu kudebesela kwabazali?

Izazi ezintathu zezokwelapha uBuga, u-Amoko noNcayiyana zaxoxa namantombazane angu-1 702 nabafana abangu-903 basemaphandleni aseTranskei, eNingizimu Afrika. I-South African Medical Journal yabika ukuthi “amantombazane angu-76% nabafana abangu-90,1% kulokhu kuhlola base benokuhlangenwe nakho kobulili.” Isilinganiso seminyaka yobudala yalawo mantombazane kwakuyiminyaka engu-15, futhi amaningi ayephoqelelwe ukuba abe nobuhlobo bobulili. Angaphezu kuka-250 ayeseke akhulelwa kanye noma ngaphezulu. Omunye umphumela kwakuyizinga eliphakeme lezifo ezithathelwana ngobulili.

Ngokusobala, abazali abaningi abasiboni isidingo sokufundisa izingane zabo indlela yokugwema ubuhlobo bobulili ngaphambi komshado. Kunalokho, iphephabhuku elingenhla liyachaza: “Ukuba nezingane nokuba umama yizimfanelo ezaziswa kakhulu zobufazi emphakathini wasemaphandleni aseTranskei, futhi amantombazane asanda kuthomba asheshe akuqaphele lokhu.” Kutholakala ubufakazi benkinga efanayo nakwezinye izingxenye zezwe.

Intsha eningi yase-Afrika isola abazali bayo ngokungayisizi ukuba iqonde imizwa yayo yobulili. Abanye abazali abangamaKristu baye baba namahloni kakhulu ukusebenzisa incwadi ethi Ubusha Bakho—Ukuthola Okungcono Kakhulu Kubo.b Emakhasini 20-3, ichaza indlela ehloniphekayo yokusebenzisa izitho zobulili noshintsho olwenzeka ngesikhathi sokuthomba.

Abazali abangamaKristu ababhekana nenselele yokuxoxa nezingane zabo ngombono kaNkulunkulu ngobulili kufanele banconywe. Lokhu kuba ngcono kakhulu uma kwenziwa ngokuqhubekayo, ngokwekhono lengane lokuqonda izinto. Kuye ngesici ezinjengeminyaka yengane, abazali kungase kudingeke bangagwegwesi lapho bebhekisela ezithweni zomzimba nendlela ezisebenza ngayo. Uma kungenjalo, intsha engenakho okuhlangenwe nakho ingase ingakuqondi lokho okushiwoyo.—1 Korinte 14:8, 9.

Omunye ubaba waseNingizimu Afrika onamadodakazi amabili nendodana uyachaza: “Ngokuvamile, ngangiba namathuba okuxoxa ngisho nanamantombazane ngezindaba ezibucayi zobulili. Nokho, umkami wayewanakekela ngokukhethekile amadodakazi ethu, esebenzisa incwadi ethi Ubusha Bakho—Ukuthola Okungcono Kakhulu Kubo. [Bheka amakhasi 26-31.] Lapho indodana yami ineminyaka engu-12, nganquma ukuhamba nayo ibanga elide ezintabeni. Ngaleso sikhathi, saxoxa ngokuningiliziwe ngokwakheka komzimba womfana nenjongo ekhethekile lokhu okuyoyifeza kamuva emshadweni. Ngaxoxa nayo nangesidingo sokugwema umkhuba owonakalisayo wokushaya indlwabu nokubheka amantombazane ngenhlonipho—ngendlela ebheka ngayo unina nodadewabo.”

Imivuzo Ejabulisayo

Ubaba nomama okusanda kukhulunywa ngabo bazikhandla futhi bayajabula ngokuthi baba nemiphumela emihle ekukhuliseni izingane zabo ezintathu. Zontathu manje zingabantu abadala, abashade namaKristu akholekile. Indodana nabakhwenyana babo bonke bakhonza njengabadala ebandleni lobuKristu, futhi emibili yalemibhangqwana iye yaba semsebenzini wokushumayela ivangeli isikhathi esigcwele iminyaka eminingi.

Yebo, abazali abazikhandlayo ukuze basindise imikhaya yabo bangalindela umvuzo ojabulisayo ezinganeni ezikhetha ukusabela emfundisweni enjalo yeBhayibheli, ngoba IzAga 23:24, 25 zithi: “Ozala ohlakaniphileyo uyathokoza ngaye. Mabathokoze uyihlo nonyoko.” Cabangela umkhaya omkhulu okukhulunywe ngawo ekuqaleni kwalesi sihloko. “Lapho ngicabanga ngentuthuko engokomoya izingane zami eziye zayenza,” kusho u-Alphina, “inhliziyo yami ichichima injabulo.” Kwangathi bonke abazali abangamaKristu bangasebenzela ukuzuza lomvuzo ojabulisayo.

[Imibhalo yaphansi]

[Isithombe ekhasini 23]

Ubaba angahlela isimo esifanelekile ukuze achaze amaqiniso okuphila