“IJazi Elingcwele LaseTrier”

ITRIER enomlando ohlehlela emuva eminyakeni engu-2000, iyidolobha elidala kunawo wonke eJalimane.a Sekungamakhulu eminyaka iTrier inezibopho eziqinile neSonto LamaKatolika. Ngo-1996 isonto lombhishobhi eliseTrier labeka insalela ukuze libukise ngayo, insalela okuthiwa indala ngangaleli dolobha uqobo. Ibizwa ngokuthi iJazi Elingcwele LaseTrier.

Leli jazi lingamamitha angu-1,57 ubude nangu-1,09 ububanzi futhi linemikhono emifishane. Lenziwe ngokotini, futhi ngokusho kukaHans-Joachim Kann encwadini yakhe ethi Wallfahrtsführer Trier und Umgebung (Isiqondiso Ohambweni Lokuya Endaweni Engcwele YaseTrier Nangakhona), cishe laligqokwa njengesambatho sangaphandle. Okunye ukulinganisa kuthi isambatho sokuqala—ingxenye enkulu yaso esiye yavuselelwa futhi yachitshiyelwa ngezinye izindwangu phakathi neminyaka—singesakudala kangangekhulu lesibili leminyaka noma ngisho nelokuqala C.E. Uma kuyiqiniso lokho, kuyosho ukuthi liyisambatho esingandile, into ethakazelisayo yasemnyuziyamu.

Nokho, abanye bagomela ngokuthi lesi sambatho asigcini nje ngokungandi kodwa futhi singcwele—yingakho sibizwa ngokuthi iJazi Elingcwele. Lokhu kungenxa yokuthi asinamphetho, njengoba sasinjalo isambatho sangaphansi esasigqokwa uJesu Kristu. (Johane 19:23, 24) Abanye bathi empeleni “iJazi Elingcwele” kwakungelikaMesiya.

Ukuthi leli jazi lafika kanjani eTrier akuqinisekwa ngako. Enye incwadi yezikhombo ithi “lalethwa kuleli dolobha umbusi uHelena unina kaConstantine Omkhulu.” UKann uphawula ukuthi umbiko wokuqala onokwethenjelwa wokuba khona kwalengubo eTrier wavela ngo-1196.

Leli jazi, eligcinwe esontweni lombhishobhi, liye labekwa ukuze kubukiswe ngalo ngezikhathi ezithile kusukela ngekhulu le-16. Ngokwesibonelo, lokhu kwenziwa ngo-1655, ngemva nje kweMpi Yeminyaka Engamashumi Amathathu, eyayibe izindleko ezinkulu kuyiTrier. Ukudayiswa kwezinto zokukhunjulwa ngemva kohambo lokuya endaweni engcwele kuye kwangenisa imali eningi ngezikhathi ezithile.

Kuleli khulu leminyaka luye lwathathwa kathathu uhambo ‘lweJazi Elingcwele’ lokuya endaweni engcwele—ngo-1933, ngo-1959 nango-1996. Ngo-1933 uhambo lokuya endaweni engcwele lwamenyezelwa ngosuku olufanayo nalolo uHitler amiswa ngalo ukuba abe ishansela leGerman Reich. UKann uphawula ukuthi lokhu kuqondana kwalezi zenzakalo ezimbili osukwini olulodwa kuqokomisa izimo zangenkathi yohambo lokuya endaweni engcwele. Amasosha amaNazi ayengatshelwanga lutho aba abaqaphi basemkhosini bezihambeli zasendaweni engcwele ngaphandle kwesonto lombhishobhi. Ngalowo nyaka babeyizigidi ezimbili nengxenye abantu ababukela lesi sambatho.

UHerbert, osekuyiminyaka eminingi eyisakhamuzi saseTrier, waqhathanisa uhambo lokuya endaweni engcwele lwango-1959 nolwango-1996. “Ngo-1959 imigwaqo yayiminyene, kunezitolo ezidayisa izinto zokuzikhumbuza cishe kuwo wonke amajika omgwaqo. Kulonyaka wonke lomcimbi uthule kakhulu.” Empeleni, bangu-700 000 kuphela ababukela lesi sambatho ngo-1996, basilela ngesigidi esibalweni sango-1959.

Kungani Beya Kobukela Lesi Sambatho?

Isonto ligcizelela ukuthi akufanele lesi sambatho sibhekwe njengento yokukhulekelwa. Lesi sambatho esingenamphetho sibhekwa njengesiwuphawu lobunye besonto. I-Frankfurter Allgemeine Zeitung ibika ukuthi lapho ememezela uhambo lokuya endaweni engcwele, uMbhishobhi uSpital wathi: “Isimo esingavamile ezweni lethu sisiphonsela inselele thina maKristu yokuba sibe nezimpendulo ezingavamile. Kufanele siphikisane negagasi elikhulayo lenzondo, unya nobudlova.” Lombhishobhi wachaza ukuthi ukubukela isambatho kwakuyokhumbuza umuntu ngobunye.

Kodwa kungani umuntu edinga “iJazi Elingcwele” ukuze akhumbule ubunye besonto? Kungathiwani uma lesi sambatho singalimala noma sivithike noma kudalulwe ukuthi esomgunyathi? Ingabe ubunye besonto bungaba sengozini? Kuthiwani ngabantu abangenakukwazi ukuthatha uhambo lokuya endaweni engcwele yaseTrier? Ingabe bona ababukhathaleli kangako ubunye esontweni?

ImiBhalo Engcwele ayikhulumi ngamaKristu okuqala edinga izinto ezithile zokuwakhumbuza ngesidingo sobunye bobuKristu. Empeleni, umphostoli uPawulu wakhuthaza amaKristu ngamazwi athi: “Sihamba ngokholo, hhayi ngokubona.” (2 Korinte 5:7) Ngakho ubunye obujatshulelwa amaKristu eqiniso buchazwa ngokuthi ‘ubunye okholweni.’—Efesu 4:11-13.

[Umbhalo waphansi]