Odokotela Abangochwepheshe Bacabangela Okungasetshenziswa Esikhundleni Segazi
ODOKOTELA abangochwepheshe abacishe babe ngu-200 bakulo lonke elase-United States bahlangana eCleveland, e-Ohio, ngoMgqibelo, ngo-October 7, 1995, bezoxoxa ngendaba edonsa isithakazelo ngokwandayo kwezokwelapha: ukwelapha nokuhlinza ngaphandle kwegazi.
Kwaxoxwa ngezimo eziningana eziyinselele. Ngokwesibonelo, kuthiwani uma isiguli sihlushwa ukuntuleka kwegazi okungathi sína? Umntwana ozelwe kusekude ngaphambi kwesikhathi sakhe angelashwa kanjani ngaphandle kwegazi? Ingabe ukuhlinzwa kwenhliziyo kungenziwa yini ngokuphumelelayo ngaphandle kwegazi? Ngokuthakazelisayo, ukuhlinza ngaphandle kwegazi—ngokuvamile okusebenzisa izindlela ezisiza umzimba uzakhele igazi ngokwawo—kakade kuye kwenziwa kulezi zimo kwaba nemiphumela emihle.a
Kungani kunesidingo sezinye izindlela kunokumpompela igazi? “Sifundile ukuthi ukumpompela igazi ngokuvamile kudlulisela izifo, ikakhulukazi isifo sokusha kwesibindi,” kusho uSharon Vernon, umqondisi we-Center for Bloodless Medicine and Surgery eSt. Vincent Charity Hospital e-Cleveland. Uyaqhubeka: “Ngisho nalapho igazi lingadluliseli isifo esithile lingase likhinyabeze ukusabela kwesimiso sesiguli sokuzivikela komzimba.” Nakuba ukudluliselwa kwengculaza sekuncishisiwe ngokuhlolwa kwegazi, kusekhona izifo eziningi ezingase zingabambeki ngalokhu kuhlola. Futhi naphezu kwesidingo selungiselelo elithé thuthu, ukuhlinza ngaphandle kwegazi kubonakala kunciphisa izindleko zezibhedlela, njengoba kunciphisa izinkinga zomthetho ezingase ziphakame lapho iziguli zithola igazi elingalungile.
KoFakazi BakaJehova, kunesizathu esibaluleke ngokwengeziwe sokugwema ukumpontshelwa igazi: Umthetho kaNkulunkulu uyakwenqabela. (IzEnzo 15:29) Nakuba kunjalo, bafuna ukuthola ukwelashwa okungcono okungatholakala. Khona-ke baye babambisana nodokotela abangumhlahla-ndlela wokucwaninga ngendaba yokwelapha ngaphandle kwegazi. Lokhu akuzuzisi nje oFakazi BakaJehova kuphela kepha nabanye abaningi abakhathazekile ngezingozi zokumpontshelwa igazi.
[Umbhalo waphansi]
a Bheka i-Phaphama! ka-November 22, 1993, amakhasi 24-7, neka-January 22, 1996, ikhasi 31.
[Umthombo Wesithombe ekhasini 32]
WHO photo by P. Almasy