“Angiphuphi, Angithi?”
Umbiko olandelayo uvela eMalawi, uphathelene nomunye weMihlangano Yesigodi “Yabadumisi Abajabulayo” yoFakazi BakaJehova eyingqopha-mlando eyaba khona kuleyo ndawo ehlobo lango-1995.
“ECELENI komgwaqo omkhulu, cishe maphakathi nogu olungasentshonalanga lweLake Malawi, kugxunyekwe isaziso okokuqala ngqá eminyakeni engu-29. Sifundeka kanje, ‘UMhlangano Wesigodi WoFakazi BakaJehova.’
“Eceleni kwalesi saziso kumi iloli elikhulukazi, futhi enqoleni yalo kuphuma izihambeli ezingaphezu kuka-200 ezivela edolobhaneni laseMzuzu. Zize nemishuqulu yezembatho, izingubo zokulala, amabhodwe, amabhakede, ukudla, izinkuni zokubasa, namaBhayibheli zizohlangana nabafowabo nodadewabo abangaba ngu-3 000 abavela kwezinye izindawo.
“Sisabingelela abazalwane abehla elolini, kufika uGeorge Chikako, oneminyaka engu-63 ubudala, eqhuba ibhayisekili lakhe esihlabathini, sekuyizinsuku ezimbili ehamba ngalo esuka eNkhotakota. Eminyakeni edlule, uMfoweth’ uChikako wadonsa izigwebo zejele ezine ngenxa yokwenqaba kwakhe ukuhlehla ezindinganisweni zeBhayibheli. Umzala wakhe wafa ngokushaywa ngenkathi esejele. ‘Angiphuphi, angithi?’ kubuza uMfoweth’ uChikako. ‘Lomhlangano uqhutshwa emini kabhá, futhi labantu bahlabelela izingoma zoMbuso ngokuzwakalayo! Sonke lesi sikhathi, bekudingeka sihlangane ebumnyameni ebusuku, sihlebeze izingoma zoMbuso, sihlikihle izandla uma sishaya ihlombe. Manje sihlangana obala, futhi abantu bayamangala ukubona ukuthi sibaningi kangaka njengoba bebecabanga ukuthi siyidlanzana nje!’
“Indawo yomhlangano ibiyelwe ngotshani yabe isimbozwa ngomhlanga ukuze kube nomthunzi. Kwakhiwa amaqhugwanyana nezindawo zokulala ezivulekile ukuze kuhlaliswe izihambeli. Ebusuku kunkeneneza umsindo wamazwi amtoti ahlabelelayo angasabanjiwe ngenxa yokwesaba ukushushiswa.
“Yeka ukuthi kufaneleka kanjani ukuthi lomhlangano ube nesihloko esithi ‘Abadumisi Abajabulayo’!”
[Umthombo Wesithombe ekhasini 32]
Mountain High Maps® Copyright © 1995 Digital Wisdom, Inc.