Kufanele Sithandaze kanjani KuNkulunkulu?
LAPHO umfundi othile ecela ukufundiswa ngokuqondene nomthandazo, uJesu akenqabanga. NgokukaLuka 11:2-4, waphendula: “Lapho nithandaza, anothi: Baba, malingcweliswe igama lakho. Umbuso wakho mawufike. Siphe namuhla isinkwa sethu semihla ngemihla. Futhi usithethelele izono zethu, ngoba nathi siyabathethelela bonke abantu abanecala kithi. Futhi ungasiholeli ekulingweni.” (I-Douay Version yamaKatolika) Ngokuvamile lona waziwa ngokuthi uMthandazo WeNkosi. Unengcebo yolwazi.
Zibekwa nje, igama lokuqala ngqá lisitshela ukuthi kufanele siyibhekise kubani imithandazo yethu—kuBaba wethu. Phawula ukuthi uJesu akazange akuvumele nakancane ukuthandaza komunye umuntu, isithombe, noma “usanta,” noma ngisho nakuye. Kakade uNkulunkulu wayethe: “Ngeke nginikeze omunye inkazimulo yami, nodumo lwami izinto ezibaziwe.” (Isaya 42:8, Dy) Ngakho-ke imithandazo eqondiswe kunoma yini noma kunoma ubani ngaphandle kukaBaba wethu wasezulwini uNkulunkulu, akayizwa, kungakhathaliseki ukuthi lowo mkhulekeli uqotho kangakanani. EBhayibhelini, uJehova uNkulunkulu kuphela obizwa ngokuthi ‘umuzwi wemikhuleko.’—IHubo 65:2, NW.
Abanye bangase bathi “osanta” bamane nje bangabanxuseli kuNkulunkulu. Kodwa uJesu ngokwakhe wayala: “Mina ngiyindlela neqiniso nokuphila. Akekho oza kuBaba ngaphandle kokuba eze ngami. Futhi, noma yini eniyicelayo egameni lami, ngiyoyenza leyonto, ukuze uBaba akhazinyuliswe mayelana neNdodana.” (Johane 14:6, 13) Ngaleyo ndlela uJesu wawuchitha umqondo wokuthi kunothile obizwa ngokuthi usanta ongafeza indima yokuba umnxuseli. Phawula nalokho umphostoli uPawulu akusho ngokuqondene noKristu: “Akasifelanga nje kuphela—wavuka kwabafileyo, futhi umi laphaya ngakwesokunene sikaNkulunkulu esincengela.” “Uphila phakade ukuze anxusele bonke abeza kuNkulunkulu ngaye.”—Roma 8:34; Heberu 7:25, i-Jerusalem Bible yamaKatolika.
Igama Okumelwe Lingcweliswe
Amazwi alandelayo omthandazo kaJesu athi: “Malingcweliswe igama lakho.” Umuntu angalingcwelisa, noma alihlukanise, kanjani igama likaNkulunkulu uma engalazi futhi engalisebenzisi? ‘ETestamenteni Elidala’ uNkulunkulu ubizwa ngegama lakhe elithi Jehova izikhathi ezingaphezu kuka-6 000.
Umbhalo waphansi ka-Eksodusi 6:3 kuyi-Douay Version yamaKatolika uthi ngokuqondene negama likaNkulunkulu: “Abanye abantu bosuku lwanamuhla baye baklama igama elithi Jehova . . . , ngoba indlela yangempela yokubiza igama [likaNkulunkulu], elisembhalweni wesiHeberu, seyilahleke ngokuphelele ngenxa yokungasetshenziswa isikhathi eside.” Ngakho i-New Jerusalem Bible yamaKatolika isebenzisa igama elithi Yahweh. Nakuba izazi ezithile zikhetha leyo ndlela yokulibiza, elithi “Jehovah” liyindlela esemthethweni nekade yaba khona yokubiza igama laphezulu ngesiNgisi. Ezinye izilimi zinezazo izindlela zokubiza igama laphezulu. Into esemqoka iwukuba sisebenzise leli gama ukuze silingcwelise. Ingabe isonto lakho liye lakufundisa ukuba usebenzise igama elithi Jehova lapho uthandaza?
Izinto Okufanele Ukuzithandazela
Ngokulandelayo uJesu wafundisa abafundi ukuba bathandaze bathi: “Umbuso wakho mawufike.” IVangeli likaMathewu linezela amazwi athi: “Intando yakho mayenziwe emhlabeni njengoba kunjalo ezulwini.” (Mathewu 6:10, Dy) UMbuso kaNkulunkulu uwuhulumeni ophathiswe uJesu Kristu. (Isaya 9:6, 7) Ngokwesiprofetho seBhayibheli, maduze nje uzosusa bonke ohulumeni babantu bese ungenisa inkathi yokuthula kwembulunga yonke. (IHubo 72:1-7; Daniyeli 2:44; IsAmbulo 21:3-5) Ngakho-ke emithandazweni yawo amaKristu eqiniso akuthinta njalo ukuza koMbuso. Ingabe isonto lakho liye lakufundisa ukuba wenze kanjalo?
Ngokuthakazelisayo, uJesu wabonisa nokuthi imithandazo yethu ingase ihlanganise nezindaba zomuntu siqu ezisikhathazayo. Wathi: “Siphe namuhla isinkwa sethu semihla ngemihla. Futhi usithethelele izono zethu, ngoba nathi siyabathethelela bonke abantu abanecala kithi. Futhi ungasiholeli ekulingweni.” (Luka 11:3, 4, Dy) Amazwi kaJesu asikisela ukuthi singase sifune intando kaNkulunkulu ezindabeni zansuku zonke, ukuthi singasondela kuJehova nganoma yini engase isikhathaze noma iphazamise ukuthula kwengqondo yethu. Ukumnxusa njalo uNkulunkulu ngalendlela kusisiza ukuba siqaphele ukuncika kwethu kuye. Ngakho siliqaphela kakhudlwana ithonya lakhe ekuphileni kwethu. Ngokufanayo ukucela uNkulunkulu zonke izinsuku ukuba asithethelele izono zethu kunenzuzo. Ngokwenza kanjalo sibuqaphela ngokwengeziwe ubuthakathaka bethu—futhi sikubekezelele ngokwengeziwe ukushiyeka kwabanye. Isikhuthazo sikaJesu sokuba sithandazele ukukhululwa ekulingweni naso siyafaneleka, ikakhulukazi ngenxa yezindinganiso zokuziphatha eziwohlokayo zalelizwe. Ngokuvumelana nalowo mthandazo, siyaqikelela ukuba sigweme izimo ezingase zisiholele ekwenzeni okubi.
Khona-ke, akungabazeki ukuthi uMthandazo WeNkosi usitshela okuningi ngokwenza imithandazo ejabulisa uNkulunkulu. Kodwa ingabe uJesu wayehlose ukuba sithathe lomthandazo bese simane siwuphindaphinda njalo?
Izeluleko Ezengeziwe Ngomthandazo
UJesu wanikeza iziyalezo ezengeziwe ngomthandazo. KuMathewu 6:5, 6, siyafunda: “Uma nithandaza, akumelwe nibe njengabazenzisi; ngoba bathanda ukuthandaza bemi emasinagogeni nasemakhoneni ezindlela ezibanzi ukuze babonakale kubantu. . . . Nokho, wena, lapho uthandaza, ngena ekamelweni lakho, futhi ngemva kokuvala umnyango wakho, uthandaze kuYihlo osekusithekeni; khona-ke uYihlo obukele esekusithekeni uyokukhokhela.” Lamazwi asifundisa ukuthi umthandazo akufanele wenziwe ngendlela yokubukisa neyokuthenga amehlo ukuze abathile bahlabeke umxhwele. Ingabe uthulula inhliziyo yakho kuJehova ngasese, njengoba iBhayibheli linxusa?—IHubo 62:8.
UJesu wanikeza lesi sixwayiso: “Emithandazweni yenu ningathemelezi njengoba kwenza amaqaba, ngoba acabanga ukuthi ngokusebenzisa amazwi amaningi ayozenza ezwiwe.” (Mathewu 6:7, JB) Ngokucacile, uJesu wayengakwamukeli ukubamba imithandazo ngekhanda—ngokufanayo nokuyifunda encwadini ethile. Futhi amazwi akhe ayakulahla ukusebenzisa irosari.
Incwadi yeMisa yamaKatolika iyavuma: “Umthandazo wethu ongcono kakhulu kungase kube imicabango yethu siqu ezifikelayo lapho siphendukela kuye sibonga noma siswele, ngezikhathi zosizi, noma ngokumdumisa kwethu kwansuku zonke okuvamile.” Imithandazo kaJesu uqobo yayizifikela, yayingabanjiwe ngekhanda. Ngokwesibonelo, funda umthandazo kaJesu olotshwe kuJohane isahluko 17. Unamathela emthandazweni oyisibonelo, ugcizelela isifiso sikaJesu sokubona igama likaJehova lingcweliswa. Lomthandazo kaJesu wawuzifikela futhi usuka ekujuleni kwenhliziyo.
Imithandazo UNkulunkulu Ayizwayo
Uma uye wafundiswa ukwenza imithandazo ebanjwe ngekhanda, ukuthandaza ‘kosanta’ noma ezithombeni, noma ukusebenzisa izinto ezingokwenkolo ezinjengerosari, umqondo wokuthandaza ngendlela uJesu ayibonisa ungase ubonakale uthusa ekuqaleni. Nokho, isihluthulelo siwukwazi uNkulunkulu—igama lakhe, injongo yakhe, nobuntu bakhe. Lokhu ungakwenza ngokutadishisisa iBhayibheli. (Johane 17:3) OFakazi BakaJehova bakulungele futhi bazimisele ukukusiza kulokhu. Phela, baye basiza izigidi emhlabeni wonke ukuba ‘zizwe futhi zibone ukuthi uJehova muhle’! (IHubo 34:8) Lapho uya umazi kangcono uNkulunkulu, uyoshukumiseleka kakhudlwana ukuba umdumise ngomthandazo. Futhi lapho usondela kakhudlwana kuJehova ngomthandazo onenhlonipho, ubuhlobo bakho naye buyoba seduze kakhudlwana.
Ngakho, bonke abakhulekeli bakaNkulunkulu beqiniso banxuswa ukuba ‘bathandaze ngokungaphezi.’ (1 Thesalonika 5:17) Qiniseka ukuthi imithandazo yakho ivumelana ngempela neBhayibheli, kuhlanganise neziyalezo zikaJesu Kristu. Ngalendlela ungaqiniseka ukuthi uNkulunkulu uyoyamukela imithandazo yakho.
[Isithombe ekhasini 7]
Lapho sifunda ngokwengeziwe ngoJehova, sishukunyiselwa kakhudlwana ukuba sithandaze kuye ngokusuka enhliziyweni