Basekelwa UMngane Wabo Omkhulu Kunabo Bonke
KUNOBUNGANE obubodwa obusekela oFakazi BakaJehova ngokukhethekile. Ubuhlobo babo obuyigugu noMngane wabo omkhulu kunabo bonke, uJehova uNkulunkulu. (Qhathanisa noJakobe 2:23.) Ubasekela phakathi nokuvivinywa kokholo okukhulu.
Umlando woFakazi wokuba qotho ngaphansi kwemibuso yobushiqela uye wabatshazwa izingqapheli eziningi. Enye yazo uJiří Krupička, udokotela wefilosofi nesayensi yezinto zemvelo owafuduka eCzechoslovakia ngo-1968 ngemva kokuchitha iminyaka eminingi emakamu okuhlushwa amaKhomanisi. Encwadini yakhe ethi Renesance rozumu (Ukuvuselelwa Kwamandla Engqondo), ukhuluma ngokuhlupheka nokuqina koFakazi ababeboshelwe ukungathathi-hlangothi kwabo.
Ngaphansi kukahulumeni wobuKhomanisi, oFakazi abaningi bagwetshwa ejele ngenxa yokholo lwabo. Nakuba beboshiwe, benqaba ukumba i-uranium ezimayini eyayisetshenziswa empini. (Isaya 2:4) UKrupička uchaza lokho akubona kwenye yalezi zimayini ngo-1952. Wabona abantu ababili bemi njengezithombe ezimbozwe iqhwa emakhazeni asebusika ashubis’ umnkantsha. Emakhanda nasemahlombe babembozwe ngemigqomo yensimbi.
UKrupička uyabhala: “Babemi lapho begqoke amagxaba asejele kusukela ekuseni ngovivi. Babengakwazi kanjani ukuma isikhathi eside kangako ngemilenze eyase yomiswe amakhaza? Ngamandla okholo. Lemigqomo yayisimidala futhi isigqwalile. Ngonya, othile wayigxisha emakhanda nasemahlombe abo ngamandla kangangokuthi umlomo odlavazekile womgqomo wadabula ijakhethi yenye yalamadoda futhi wangena enyameni, kwase kuconsa igazi emkhonweni wayo.
“Unogada wamisa iqembu lethu phambi kwabo, futhi umlawuli wabeka amazwi ambalwa. Ukunqaba ukusebenza, esho, kuwukuvukela futhi kunesijeziso esifanele. Akukho mizwa eyimbudane ngokuphathelene nempi nokubulala ezosiza laba abenqabayo, lezi zitha zesimiso sokusebenzela uhulumeni.”
Umlawuli wacosha umshiza wensimbi futhi washaya omunye walemigqomo. Umuntu owayephakathi wawa nomgqomo usesekhanda. Okwenzeka ngemva kwalokho akazange akukhohlwe uKrupička.
Uthi: “Kwezwakala ukuhlabelela kuvela ngaphakathi kulemigqomo. Amazwi aphansi, umthandazo ohlebezwayo oya kuNkulunkulu, okwazi ukuzwa noma yini noma kuphi—ngisho nomzamo wokuhlabelela emigqonyeni emidala, negqwalile ye-uranium. Ukuzwa ngokucacile kunengoma ehlatshelelwa esontweni elikhulu.”
Ngo-September 1, 1993, umsebenzi woFakazi BakaJehova eCzech Republic wathola ukuqashelwa okungokomthetho kukahulumeni. Manje oFakazi baseCzech bayajabula ngokuqhubeka ngenkululeko nomsebenzi wabo wobuKristu wokufundisa. Yebo, bayajabula ngokutshela abanye ngoJehova, uMngane wabo omkhulu kunabo bonke.
[Isithombe ekhasini 7]
Abezé emhlanganweni eCzech Republic